5 Queyton tuꞌ oj yun wakꞌon meltzo snaꞌbꞌal ebꞌ Israel win, jaꞌton ebꞌ jix yiꞌel snaꞌbꞌal win, jaxa tet comon dios jix oc ebꞌ yin eyilal. 6 Yu jun tuꞌ, yuxan al tet ebꞌ Israel jaxca tiꞌ: Tol jaꞌ Jehová chi alon jaxca tiꞌ: Meltzaanwejtej ey jin, bꞌejwej can wan comon dios cꞌal wan je bꞌeybꞌal tol yaabꞌetaj che yun tuꞌ, ja chi tet ebꞌ. 7 Ta ey junoj Israel, ma junoj txꞌoj conobꞌal, caan ecꞌ xol ebꞌ tuꞌ, ta chin yintajne can eloj, catuꞌ chi yaon oc snaꞌbꞌal yin comon dios, catuꞌ chi yaontoj sbꞌa yul skꞌabꞌ spenail, chi lawi tuꞌ, catuꞌ chi jul ebꞌ bꞌey junoj ebꞌ jin chejabꞌ yin skꞌanlen ey jin yu ebꞌ, jain caw oj wakꞌ spajtzebꞌal tet. 8 Jain oj wakꞌle jowal yetoj jun ánima tuꞌ, oj jin qꞌueyel xol jin conobꞌ yet chi oc yin txꞌoxbꞌanileal, yet chi bꞌinale yu ebꞌ ánima. Queyton tuꞌ oj yun snaꞌcha el je yu, tol jain ton Jehová jin tiꞌ.

9 Ta tol ey junoj ebꞌ chi yaloc sbꞌa jin chejabꞌoj tuꞌ, chi iꞌle eytej sat, catuꞌ chi yakꞌon spajtzebꞌal yul yet, jain Jehová jin tiꞌ jix wakꞌ iꞌle eytej sat jun tuꞌ. Oj waoc sjowal jin cꞌul yin jun tuꞌ, oj wakꞌon qꞌueyel xol jin conobꞌ Israel. 10 Sowalil chi jul syaꞌilal yibꞌan jun winaj chi skꞌanle yabꞌ snaꞌbꞌal tuꞌ, yetoj cꞌal yibꞌan jun chi yaloc sbꞌa jin chejabꞌoj chi akꞌon spajtzebꞌal yul yet tuꞌ. 11 Yu jun tuꞌ, yuxan jaꞌ jin conobꞌ Israel man xacꞌal oj spoꞌocan el sbꞌa wintaj an, tam wal stoo yin spenail. Jain Jehová jin chi walaꞌ, tol jin conobꞌ yeoc ebꞌ, jain xa sDiosal jin ebꞌ, ẍi Jehová.

12 Jix yalon pax Jehová ey jin jaxca tiꞌ: 13 Jaach ánima, ta ey junoj conobꞌal chi ecꞌ yibꞌan yin yaon oc spenail ey jin, oj waoc syaꞌilal yibꞌan, oj wiꞌecꞌ sloꞌbꞌe, yuxan oj cam ebꞌ ánima cꞌal noꞌ noꞌ yu wail. 14 Kꞌinaloj ta jaꞌ xol ebꞌ tuꞌ, jatuꞌ caan Noé, Daniel cꞌal Job, jain Jehová jin chi walaꞌ tol asan mi ebꞌ oxwan tuꞌ chi colcha eloj, yutol watxꞌ snaꞌbꞌal ebꞌ, cꞌam mi junojxa mac chi colcha eloj.

15 Ta oj watoj noꞌ chiꞌwawom noꞌ bꞌey jun conobꞌ tuꞌ, yet oj makꞌle cam masanil ebꞌ yu noꞌ noꞌ tuꞌ, tzꞌinini xacꞌal oj yun canoj. Cꞌamxa mactxequel oj ecꞌ tituꞌ yu xiwcꞌulalil tet noꞌ. 16 Kꞌinaloj ta caan ebꞌ oxwan tuꞌ bꞌey jun conobꞌ tuꞌ, asan mi ebꞌ chi colcha eloj. Jal pax yuninal ebꞌ xin, cꞌamxa mi chi colcha can el ebꞌ. Jain caw Jehová jin chi walaꞌ, tol cusiltaj txꞌotxꞌ xacꞌal oj yun can jun conobꞌ tuꞌ.

17 Ta chi wakꞌ jul jowal yibꞌan jun conobꞌ tuꞌ, yet chi cam ebꞌ ánima, cꞌal noꞌ noꞌ, 18 kꞌinaloj ta jatuꞌ caan ebꞌ oxwan winaj tuꞌ xol ebꞌ tuꞌ, asan mi ebꞌ chi colcha can eloj. Jain Jehová Yaaw jin chi walaꞌ, tol cꞌamxa mi chi skeꞌ scolcha el yuninal ebꞌ yu.

19 Ta chi watoj yaꞌbꞌil yibꞌan jun conobꞌ tuꞌ, yetoj sjowal jin cꞌul catuꞌ chi waontoj camich yibꞌan ebꞌ ánima, cꞌal yibꞌan noꞌ noꞌ. 20 Kꞌinaloj ta jaꞌ tituꞌ caan naj Noé, Daniel cꞌal Job, asanne mi ebꞌ chi skeꞌ scolcha can eloj yutol watxꞌ snaꞌbꞌal ebꞌ. Jain Jehová jin chi walaꞌ, tol cꞌamxa chi skeꞌ scolcha can el yuninal ebꞌ tuꞌ.

21 Jain Jehová Yaaw jin chi walaꞌ: Yel xacꞌal ey smey tzetyetal oj juloj, yet oj waontoj canebꞌ tujan syaꞌilal yibꞌan Jerusalén: Jaꞌton jowal, wail, noꞌ chiꞌwawom noꞌ, cꞌal yaꞌbꞌil, tol tꞌinan cꞌal scam ebꞌ ánima, cꞌal noꞌ noꞌ yu wan yaꞌbꞌil tuꞌ. 22 Jaywanne ebꞌ oj colcha can eloj, jaꞌton ebꞌ oj skeꞌ yel tituꞌ yetoj yuninal. Jaꞌ yet oj jul ebꞌ ey jaach tiꞌ, oj ja wil sbꞌeybꞌal ebꞌ, cꞌal jantaj spenail chi yun ebꞌ. Queyton tuꞌ oj yun yoc tucan ja naꞌon yin syaꞌilal oj wakꞌ jul yin Jerusalén. 23 Jain caw Jehová Yaaw jin chi walaꞌ, tol queyton tuꞌ oj yun snaꞌcha el ja wu, tol cꞌam tzetyetal tol man smoo oj jix wun bꞌey Jerusalén, ẍi Jehová.