Jaꞌ Conobꞌ Jerusalén Laan Yetoj An Xutxal Uva Cꞌam Yopiso
15
Jix yalon pax Jehová ey jin jaxca tiꞌ:2 Jaach ánima, ¿tzet wal yopiso junoj xutxal yakꞌil an uva yintaj pax skꞌabꞌlaj junoj teꞌ teꞌ?
3 Yutol jaꞌ junoj xutxal tuꞌ cꞌam yopiso, tam wal chi skeꞌ yoc yich na yet chi oc locan tzetyetal yin.
4 Ta chi oc yin siꞌal, catuꞌ chi tzꞌaꞌtoj, jaꞌ stzakꞌakꞌil tuꞌ, cꞌam cꞌaltaꞌ yopiso.
5 Jaꞌ yet cꞌamto chi tzꞌaꞌi, cꞌam cꞌaltaꞌ tzet chi oqui, ¿tumi jato wal yet tuxa jix tzꞌaꞌtoj, catuꞌ oj oc yopiso?
6 Yu jun tuꞌ, yuxan jain Jehová jin chi walaꞌ: Jaxca chi yun stzꞌaꞌtoj junoj xutxal yakꞌil an uva tuꞌ, yetoj cꞌal wanxa teꞌ teꞌ, queyton tuꞌ oj yun wakꞌon qꞌueyle el ebꞌ caan bꞌey Jerusalén.
7 Jain wal caw oj waoc syaꞌilal yibꞌan ebꞌ. Caxcꞌal jix ela ebꞌ tet jun kꞌakꞌ tuꞌ; jaxa junxa kꞌakꞌ kꞌakꞌ oj akꞌon lawoj ey ebꞌ. Jaꞌ yet oj waon oc sjowal jin cꞌul yin ebꞌ tuꞌ, queyton tuꞌ oj yun snaꞌcha el je yu, tol jain ton Jehová jin.
8 Jain caw Jehová Yaaw jin chi walaꞌ, tol cusiltaj xacꞌal oj wute cantoj jun conobꞌ tuꞌ, yutol jix ecꞌ ebꞌ yibꞌan, ẍi Dios.