8 Jix jin ecꞌ pax junelxa bꞌey scawilal tuꞌ, jix wiloni tol smoo xa chi nupi. Yuxan jix watoj jun kꞌap yibꞌan. Queyton tuꞌ jix yun jin pichoni, yutol tꞌiran eloj. Jain Jehová jin chi walaꞌ tol jix wakꞌ jin wa kꞌane yetoj, yet chi oc can yul jin kꞌabꞌ.

9 Jix wakꞌ aẍnoj, jix jin sajbꞌane el smimanil, jix waon oc perfume yin. 10 Jix waoc an pichile tol elawtaj yili stzꞌibꞌil. Jix waon oc xanabꞌ tol tzꞌuum caw wal watxꞌ; yetoj cꞌal pax jun scꞌalil tol lino cꞌal eloj, yetoj cꞌal pax jun spichil tol caw watxꞌ ye ẍemlei. 11 Caw watxꞌ xacꞌal jix yun waon oc yelawiloj yin. Jix waoc jun chꞌen brazalete yin skꞌabꞌ, yetoj cꞌal pax jun chꞌen ue yin snukꞌ. 12 Jix waon cꞌal pax oc jun chꞌen ue yin xaam, yetoj chꞌen ome yin xiquin, cꞌal yetoj jun corona yin sjolom manxa jantajoj swatxꞌil yili. 13 Pichichi xacꞌal jix yun can eyoj, jix oc oro cꞌal yetoj chꞌen plata yin. Jaꞌ spichil tuꞌ, jaꞌton an lino caw wal watxꞌ yili, jaꞌton an kꞌap tol caw watxꞌ ye ẍemlei, catuꞌ manxa jantajoj swatxꞌil yili yelawil stzꞌibꞌil. Jix wakꞌon pan manxa jantajoj swatxꞌil yili tet yet chi sloꞌoni, yetoj noꞌ yal awcabꞌ cꞌal yetoj aceite olivo. Caw watxꞌ xacꞌal jix yun yili, jix oc wal yin reinail. 14 Caw bꞌinabꞌil jix yun xol-laj nación yu swatxꞌilal yili. Jain wal caw Jehová jin chi walaꞌ tol tzꞌajaji xacꞌal jix yun jin waꞌnen el yetoj spichil tol caw elawtaj yili.

15 Jaxa wal jix yun xin, jix yaon oc snaꞌbꞌal yin swatxꞌilal yili tuꞌ, cꞌal yu sbꞌinale yu tzet chi yunne, jaꞌ yin amulal jix toocanoj, jix yakꞌon sbꞌa tet yal cꞌal mactxequel chi ecꞌ tituꞌ. 16 Jaꞌ yetoj spichil jix swaꞌne a skꞌap na bꞌey chi oc yin eyilal tet comon dios bꞌey txꞌotxꞌ tzalquiltaj. Jaꞌ tituꞌ jix oc yin amulal. Jaꞌ wan tzet jix yun tuꞌ, man smoo tol jaxca tuꞌ jix yunne. 17 Jix yiꞌon el masanil chꞌen chꞌen caw watxꞌ yili, chꞌen oro, cꞌal yetoj chꞌen plata akꞌbꞌil tet wu. Jaꞌ yetoj chꞌen jix swaꞌnen a yechel winaj yet chi oc yunen amulal yetoj. 18 Jix yaoc spichil manxa jantajoj swatxꞌil yili stzꞌibꞌil tuꞌ yin. Jix lawi tuꞌ, jaxa yakꞌon aceite cꞌal incienso tol wet yeocoj, jaꞌ jix yakꞌ tet sdiosal tuꞌ. 19 Jaꞌ ixim pan waꞌnebꞌil yetoj ixim jarina caw wal watxꞌ, yetoj aceite olivo, cꞌal yetoj noꞌ yal awcabꞌ jix wakꞌ sloꞌbꞌeoj, jaꞌ jix yakꞌ yin xaambꞌalil tol ochbꞌetaj xacꞌal yili tet wan echele tuꞌ. Jain Jehová jin chi walaꞌ, tol queytuꞌ jix yute sbꞌa.

20 Jaꞌ ebꞌ wuninal jix ali, wet yeocoj, jix yakꞌ tzꞌaꞌ yin xaambꞌal tet wan echele tuꞌ, jaxca xacꞌal tol loꞌbꞌe jix yun yakꞌle ebꞌ unin tuꞌ tet wan echele tuꞌ. Man asanne cꞌal amulal jix yunne, 21 tol jix makꞌle cam ebꞌ wuninal tuꞌ yu, catuꞌ jix iꞌletoj ebꞌ yin xaambꞌal yet chi akꞌle tzꞌaꞌ tet wan comon dios tuꞌ. 22 Yu wan spenail caw yaabꞌetaj chi yun tuꞌ, yuxan ma xa snaꞌtej tzet utbꞌil jix yun stitoc yin syaliẍal, tol tꞌiran eloj, tuxa cꞌal chi tecꞌle ecꞌ xol stzꞌilal.

23 Jain Jehová Yaaw jin chi walaꞌ: Caw okꞌbꞌal cꞌul yu jantaj spenail jix el yunen tuꞌ. 24 Jaꞌ bꞌey chi meyeyi xacꞌal yili, jatuꞌ jix swaꞌne a bꞌey chi oc yin eyilal tet wan comon dios. 25 Jaꞌ bꞌey chi apni oc junjun scalleal conobꞌ jix swaꞌne a wan yet xaambꞌal bꞌey chi oc eyilal tet comon dios. Jaꞌ swatxꞌilal yili, caw yaabꞌetaj jix yute cantoj. Jix yakꞌon sbꞌa yin amulal tet yal cꞌal mactxequel chi apni oc scꞌatan. 26 Jix oc yin amulal yetoj mactxequel caan scawilal, jaxca ebꞌ a Egipto tol caw pekꞌ ebꞌ yin amulal. Yu jun tuꞌ, yuxan caw jix xꞌemtej sjowal jin cꞌul yu amulal chi yunne.

27 Yu jun tuꞌ, yuxan caw jix tit sjowal jin cꞌul yin, jix waon oc syaꞌilal yibꞌan. Jix waon cꞌal pax oc yul skꞌabꞌ ebꞌ scajat, jaꞌton ebꞌ Filisteo. Jaꞌ ebꞌ tuꞌ jix qꞌueya scꞌul ebꞌ yiloni yu sbꞌeybꞌal tol qꞌuixwiltaj yoqui. 28 Man asanne oj cꞌal jaxca tuꞌ, yutol caw jix yaoc sbꞌa yin amulal yetoj ebꞌ Asiria. Tam wal yu jaxca tuꞌ, catuꞌ jix can yin tzalacꞌulal. 29 Jix oc cꞌal ian yakꞌon sbꞌa yin amulal bꞌey Babilonia, jaꞌton bꞌey sconobꞌ ebꞌ txonwom; tam wal yu jaxca tuꞌ, catuꞌ jix can ix yin tzalacꞌulal. 30 Jain wal caw Jehová jin chi walaꞌ: Caw wal pekꞌ ix yin amulal, yuxan jaxca wal junoj ix amul ix tol cꞌam chi qꞌuixwi niꞌoj, queytuꞌ jix yute sbꞌa. 31 Jix swaꞌne a wan yet xaambꞌal bꞌey chi oc eyilal tet comon dios bꞌey junjun scalleal conobꞌ, jaꞌton bꞌey chi meyeyi xacꞌal yili, jix yunen amulal. Asan xin, man laan oj jix yute sbꞌa jaxca wanojxa ebꞌ ix amul ix, yutol ma skꞌan stool ix.

32 Jaxca wanojxa ix caw wal pena chi yute sbꞌa scꞌatan yichamil tol chi ẍaꞌoc junoj txꞌoj winajil yin, queytuꞌ jix yute sbꞌa Jerusalén. 33 Jaꞌ masanil ebꞌ ix amul ix, chi akꞌle stool ebꞌ ix; jal pax ix tiꞌ xin, jix yakꞌ saꞌbꞌeal tet ebꞌ ey scamcꞌulal yin. Jaꞌ jix toolanen ebꞌ yal cꞌal bꞌey jix tit ebꞌ jix oc yin amulal yetoj. 34 Yu jun tuꞌ, yuxan txꞌoj yel ix yintaj wanxa ebꞌ ix amul ix. Cꞌam mac chi seyon ecꞌoj yet chi yun mul yetoj, tam wal chi stoolane ebꞌ, tol jaꞌcaw ix chi toolane mac chi oc yin amulal yetoj, yu jun tuꞌ, yuxan txꞌoj yel yintaj wanxa ebꞌ ix amul ix.

35 Yu jun tuꞌ, abꞌwej tzet chi wal yin ix amul ix tiꞌ: 36 Jain Jehová Yaaw jin chi walaꞌ: Caw cꞌam chi qꞌuixwi niꞌoj ix stꞌirbꞌan el sbꞌa yin yaon oc sbꞌa yin amulal yetoj ebꞌ chi camcꞌulneni, jix ey kaan tet wan comon dios tol yaabꞌetaj. Jix yakꞌon maltoj ẍiqꞌuil ebꞌ yuneꞌ yin yakꞌon yin xaambꞌalil. 37 Yu jun tuꞌ, yuxan oj jin yambꞌa oc masanil ebꞌ camcꞌulnebꞌil yu, cꞌal ebꞌ jix yakꞌ tzalabꞌoj scꞌul yetoj, cꞌal ebꞌ cꞌam chi yoche. Oj jin yambꞌa oc joyan ebꞌ yin; sattaj wal ebꞌ oj jin tꞌirbꞌan eloj, yet watxꞌ oj yil ebꞌ yel tꞌiranoj. 38 Oj jin naꞌoc yin ix, jaxca chi yun snaꞌle oc yin junoj ix ix ey yichamil chi yatoj sbꞌa yin amulal, ma junoj ix makꞌom cam ánima. Yetoj wal sjowal jin cꞌul, cꞌal yetoj jin chichoncꞌulal oj waon oc yul skꞌabꞌ camich. 39 Oj waoc ix yul skꞌabꞌ wan winaj tuꞌ, yet oj yakꞌon lawoj ebꞌ wan yet xaambꞌal, cꞌal bꞌey jix oc yin eyilal tet wan comon dios tuꞌ. Oj iꞌle el spichil yetoj cꞌal wan eyoc yelawiloj yin, tuxa cꞌal oj elcan tꞌiranoj. 40 Oj a waan ebꞌ conobꞌ yin, catuꞌ oj kꞌojchꞌennele cam yu ebꞌ, catuꞌ oj makꞌle cam ebꞌ ix yetoj espada yu ebꞌ. 41 Oj nusle tzꞌaꞌ sna yu ebꞌ; sattaj wanxa ebꞌ ix ix, oj ale oc syaꞌilal yibꞌan. Queytuꞌ oj yun wakꞌon lawoj ey yamulal tuꞌ, catuꞌ oj sbꞌejon stoolane tet ebꞌ chi yun amulal yetoj. 42 Queytuꞌ oj yun yel sjowal jin cꞌul yin, cꞌal yel jin chichoncꞌulal. Oj jin can xacꞌal yin tzalacꞌulal, yin tol cꞌamxa sjowal jin cꞌul yin. 43 Yutol jix too qꞌueycꞌulal yu, tzet utbꞌil yeoc yet jix titoc yin yachꞌeal, yuxan jix xꞌemtej sjowal jin cꞌul yu sbꞌeybꞌal tol yaabꞌetaj yili ocoj. Yu jun tuꞌ, yuxan jain caw Jehová jin chi walaꞌ tol oj waoc syaꞌilal yibꞌan yu spena bꞌeybꞌal tuꞌ.

44 Masanil xacꞌal ebꞌ ánima oj alon jun kꞌane tiꞌ yin Jerusalén. Oj yalon ebꞌ: Jaxca wal tiꞌ yeoc ix txutxe, queytuꞌ ye cꞌal pax oc ix uneꞌe, ẍi ebꞌ oj yalon ebꞌ. 45 Jaꞌ Jerusalén tiꞌ, jaxca tol yuneꞌ junoj txutxe tol chi chichon oc scꞌul yin yichamil, cꞌal yin yuneꞌ. Quey cꞌal pax tuꞌ ebꞌ sno ix, chi chichon scꞌul ebꞌ ix yin yichamil, cꞌal yin yuneꞌ, yutol jaꞌ xutx masanil ebꞌ, a Hitita ton ix, jal smam ebꞌ xin, Amorreo. 46 Jaꞌ yetcꞌulal norte, jatuꞌ ey jun sno ix tol bꞌabꞌel ix, jaꞌton Samaria yetoj cꞌal yaldealaj. Jal bꞌey sur, jatuꞌ ey jun sno ix tol tzunan ix xa, jaꞌton Sodoma yetoj cꞌal yaldealaj. 47 Jaꞌ yintaj sbꞌeybꞌal ebꞌ tuꞌ, jix oc tzajan Jerusalén, jix yaoc spenail tol yaabꞌetaj. Man asanne oj wan tuꞌ jix yunne, yel xacꞌal ecꞌbꞌan jix yun yoc yin amulal yintaj ebꞌ tuꞌ. 48 Jain Jehová Yaaw jin chi walaꞌ: Tol jaꞌ Sodoma, yetoj cꞌal yaldealaj, ma yun jaxca tzet jix yun Jerusalén yetoj cꞌal yaldealaj. 49 Jaꞌton wal spenail jix yun Sodoma tiꞌ, yetoj masanil yaldeail: Caw wal jix smeyne sbꞌa ebꞌ, yutol caw ey sloꞌbꞌe ebꞌ, chi yakꞌon tzalabꞌoj scꞌul ebꞌ, yutol watxꞌ xacꞌal yeoc ebꞌ; ma colwa yin ebꞌ mebꞌa, tam wal tet ebꞌ eyoc xol cawxinajil. 50 Jix oc ebꞌ yin meynebꞌail, jix oc cꞌal pax ian ebꞌ sbꞌeybꞌalnen wan tzetyetal tol caw yaabꞌetaj; yu jun tuꞌ, yuxan jix wakꞌ lawoj ey ebꞌ, jaxca chi yun je yilon oc tinaniꞌ. 51 Ilaꞌ cꞌal pax Samaria, ma nanbꞌoj yaon oc spenail jaxca wal spenail Jerusalén jix yaocoj. Caw miman tzetyetal yel xacꞌal yaabꞌetaj jix yun Jerusalén tuꞌ. Jaꞌ wanxa conobꞌ eyoc scawilal, jaꞌ ebꞌ tuꞌ watxꞌ to wal niꞌojxa ebꞌ. 52 Jaꞌ tinaniꞌ, jaꞌ Jerusalén tuꞌ sowalil oj yakꞌ techa qꞌuixwilal, yutol yel xacꞌal miman yeoc spenail yintaj yet Sodoma, cꞌal yintaj yet Samaria. Jaꞌ wan tuꞌ, jaꞌ yet chi cu laanbꞌane yetoj yet Jerusalén, watxꞌ to wal niꞌojxa ebꞌ.

53 Yuxan oj wiꞌa can Sodoma, cꞌal Samaria yetoj yaldeail; yetoj cꞌal pax Jerusalén. 54 Asan xin, sowalil tol oj yakꞌ techa yeynajil yu Jerusalén, cꞌal qꞌuixwilal, yu tzetyetal jix el yuneni, yutol watxꞌtaj wal niꞌojxa wanxa tuꞌ yintaj. 55 Jaꞌ yet chi meltzo Sodoma, cꞌal Samaria yetoj cꞌal yaldeail jaxca yeoc yet yalantoj, quey cꞌal pax tuꞌ oj yun Jerusalén yetoj cꞌal yaldeail. 56 Jaꞌ Jerusalén jix bꞌuchwa yin Sodoma, yet eyoc yin meynebꞌail, 57 jaꞌton yet cꞌamto chi ilcha eltej spenail chi yunne. Jal pax tinaniꞌ xin, jaꞌ ebꞌ a Edom, yetoj cꞌal ebꞌ Filisteo yetoj cꞌal masanil ebꞌ caan scawilal, caw chi bꞌuchle Jerusalén yu ebꞌ. Masanil xacꞌal ánima bꞌey yul yibꞌankꞌinal tiꞌ chi yintajnen eloj. 58 Jaꞌ tinaniꞌ xin, jain Jehová jin chi walaꞌ, tol sowalil oj yabꞌ syaꞌil Jerusalén yu sbꞌeybꞌal tol yaabꞌetaj xacꞌal yili.

59 Jain Jehová Yaaw jin chi walaꞌ: Tol oj jin pajtze tet Jerusalén, jaxca wal smooalil, yutol jix yakꞌ can stiꞌ, jal pax tinaniꞌ xin, ma sjije yunen jaxca jix yun yakꞌon can swa kꞌane wetoj. 60 Yuxan jain tiꞌ, oj jin naꞌtej jin wa kꞌane jix wal can yetoj yet achꞌeto, catuꞌ oj jin waꞌne junojxa tol ey cꞌal ecꞌoj. 61 Oj lawoj tuꞌ, jaꞌ Jerusalén, oj snaꞌtej spena bꞌeybꞌal, cꞌal sqꞌuixwi a yet oj wakꞌon pax meltzo caabꞌ conobꞌ yul skꞌabꞌ; jaꞌton Samaria cꞌal Sodoma. Jaxca tuꞌ oj wute, caxcꞌal cꞌam yalon yet ebꞌ yin jin wa kꞌane yetoj Jerusalén. 62 Oj jin waꞌne jin wa kꞌane yetoj junelxa. Queytuꞌ oj yun snaꞌcha el yu, tol jain ton Jehová jin. 63 Oj wakꞌ tan el masanil tzettaj jix el yuneni; jal Jerusalén tuꞌ xin, man oj toj qꞌueycꞌulal yu. Jain Jehová jin chi walaꞌ, tol oj yabꞌ wal yoc pitzꞌan qꞌuixwilal yin, yuxan cꞌamxa cꞌal bꞌakꞌin oj smeyne sbꞌa, ẍi Jehová, ja chi yibꞌan Jerusalén, ẍi Dios ey jin.