Jun Skꞌabꞌ Uva Yetoj Jun Noꞌ Chii
17
Jix kꞌanabꞌ Jehová ey jin, jix yalon jaxca tiꞌ: 2 Jaach ánima, al junoj skꞌaneal tet conobꞌ Israel yin txꞌoxbꞌanileal. 3 Al tet ebꞌ jaxca tiꞌ:Tol jain Jehová jin chi wal jaxca tiꞌ: Ey wal jun noꞌ chii jix apni oc bꞌey Líbano; caw miman xicꞌ, naat tacꞌal jix apni oc jenenoj, tzꞌibꞌintaj xacꞌal yili xiil. Jaꞌ tituꞌ jix apni oc noꞌ bꞌey jun teꞌ kꞌuteꞌ.
4 Jix skꞌutzꞌon el ẍumuc jun teꞌ teꞌ tuꞌ noꞌ, catuꞌ jix toi. Jaꞌ bꞌey jun sconobꞌal ebꞌ txonwom, jaꞌ tituꞌ jix yaw jun teꞌ noꞌ chii tuꞌ.
5 Jix lawi tuꞌ, jix yiꞌon a jun swol uva noꞌ, jaꞌ bꞌey jun txꞌotxꞌ jix bꞌet yawey noꞌ, bꞌey chi oc mulnail bꞌey stiꞌlaj jaꞌ, jaxca chi yun yawle teꞌ bꞌajmam.
6 Jaꞌ yet jix woli teꞌ xin, caw miman jix yunne, tol caw yaax xaj, caxcꞌal txenne wal steel teꞌ. Jix tocꞌal bꞌakꞌakꞌoj skꞌabꞌlaj teꞌ bꞌey eyecꞌ noꞌ chii tuꞌ, jix bꞌey cꞌaltoj xeꞌ teꞌ yul txꞌotxꞌ. Caw ecꞌal swol cꞌal skꞌabꞌlaj teꞌ jix chꞌibꞌaoj.
7 Ey pax junxa noꞌ chii caw wal miman, caw miman xicꞌ, caw pim xiil. Jix tocꞌal xeꞌ jun teꞌ teꞌ tuꞌ yetcꞌulal noꞌ chii tuꞌ, jaꞌ teꞌ teꞌ bꞌey awbꞌil eyoj jatuꞌ jix bꞌey cꞌaltoj xeꞌ, cꞌal skꞌabꞌlaj bꞌey yetcꞌulal junxa noꞌ chii tuꞌ, yet watxꞌ miman jaꞌ chi yakꞌ noꞌ tet jun teꞌ tuꞌ.
8 Queytuꞌ jix yute sbꞌa, caw watxꞌ sat txꞌotxꞌ txꞌotxꞌ bꞌey awbꞌil eyoj. Ey jaꞌ miman jaꞌ tituꞌ, yuxan chi skeꞌ sbꞌey cꞌaltoj skꞌabꞌlaj, cꞌal yakꞌon sat yin stiempoal, manxa jantajoj swatxꞌil yili, ẍi Dios, ja chi.
9 Alel jin kꞌane tiꞌ tet ebꞌ ja wet conobꞌ: Jaꞌ Jehová chi alon jaxca tiꞌ: Jaꞌ jun xutx uva tiꞌ, man oj chꞌibꞌoj. Jaꞌ noꞌ bꞌabꞌel chii tuꞌ, jaꞌ noꞌ oj tokꞌon atej xeꞌ. Queytuꞌ oj yun yey bꞌulna sat spujeloj. Oj tajtoj wan swol lalanto yeloloj. Man sowaliloj tol ey ecꞌaloj ánima oj tokꞌon atej xeꞌ.
10 Caxcꞌal txꞌojxa bꞌey chi awlei, man xacꞌaltaꞌ oj elol swol. Jaꞌ yet oj low kaꞌeꞌ yin chi tit bꞌey chi aol cꞌu, oj tajeloj. Oj tajel bꞌey oj elol swol, ja chi tet ebꞌ, ẍi Jehová ey jin.
11 Jix yalon pax Jehová ey jin jaxca tiꞌ: 12 Kꞌanle ja wabꞌ tet jun conobꞌ caw wal pit chi yute sbꞌa tiꞌ, ta tol yotaj tzet chi yal yeloc apnoj jun skꞌaneal tiꞌ. Al tet ebꞌ jaxca tiꞌ: Jaꞌ naj sreyal Babilonia jix apni oc bꞌey Jerusalén, jix jul yiꞌontoj sreyal Judá yin presowomal bꞌey Babilonia, yetoj cꞌal ebꞌ eyoc yin yaawil yetoj. 13 Jix lawi tuꞌ, jix yaon oc yin yaawilal jun yicꞌaal chi oc can yin reyal. Jix swaꞌne jun swa kꞌane yetoj. Jix yakꞌon pural yakꞌon stiꞌ yin tol jijem oj yute sbꞌa tet. Jix iꞌletoj ebꞌ miman yeloc apnoj bꞌey jun conobꞌ tuꞌ yin presowomal, 14 yet watxꞌ, chi elcan yip yopiso, chi cancan yin tol cꞌamxa yip, tol cꞌamxa chi skeꞌ yiꞌon a caan sbꞌa, yet chi eloc jun wa kꞌane tuꞌ. 15 Jaꞌ jun yaaw tuꞌ, caw pit jix yute sbꞌa tet sreyal Babilonia. Tol jix yatoj ẍejabꞌ bꞌey Egipto, yet chi skꞌanontej ecꞌaloj noꞌ che yet jowal, cꞌal ecꞌaloj soldado. ¿Chim je naꞌ tol oj skeꞌ scolon el sbꞌa jaxca tuꞌ? ¿Tumi oj skeꞌ scolon el sbꞌa junoj mactxequel tol cꞌam chi sjije junoj swa kꞌane bꞌey chi yakꞌ can stiꞌ? 16 Jain Jehová jin chi wakꞌ jin tiꞌ: Jaꞌ bꞌey Babilonia oj cam mactxequel tol cꞌam chi yakꞌ eloc apnoj bꞌey jix yakꞌ can stiꞌ, catuꞌ ma sjije bꞌey jun swa kꞌane jix swaꞌne yetoj jun rey jix akꞌon yopiso tuꞌ. 17 Jaꞌ sreyal Egipto tuꞌ, caxcꞌal caw ey mimanoj sbꞌisil soldado jelan yakꞌon jowal, man oj skeꞌ scolwa yin jowal yet oj swaꞌnen a swalubꞌ ebꞌ Babilonia bꞌey yinlaj smuroal conobꞌ Jerusalén, yet chi smakꞌon cam ecꞌaloj ánima. 18 Jix yintajne el bꞌey jix yakꞌ can stiꞌ, ma yun bꞌey tzet chi yal jun swa kꞌane jix swaꞌne tuꞌ, caxcꞌal jix yakꞌ stiꞌ tol jijem oj yute sbꞌa, yu cꞌal tol jix yun wan tuꞌ, yuxan ma xa skeꞌ colon sbꞌa.
19 Jain Jehová chi wakꞌcan jin tiꞌ: Tol ma sjije yunen bꞌey jix yakꞌ can stiꞌ jin sattaj, jaꞌton yin jun wa kꞌane jix yakꞌa, bꞌey jix jin yakꞌ bꞌinaoj, yu jun tuꞌ, yuxan oj waoc syaꞌilal yibꞌan. 20 Oj watoj junoj jin txim yaal yibꞌan. Queytuꞌ oj yun scancan yul jun yaal tuꞌ, oj wiꞌtej bꞌey Babilonia. Jaꞌ tituꞌ oj jin naꞌoc yin, yutol pit jix yute sbꞌa ey jin. 21 Jaꞌ ebꞌ soldado caw ey yip, oj cam ebꞌ yin jowal, jal ebꞌ oj colcha can el xin, oj sajlem cantoj ebꞌ bꞌey masanil yul yibꞌankꞌinal tiꞌ. Queytuꞌ oj yun snaꞌcha el je yu, tol jain ton Jehová jin jix wal jun tiꞌ.
22 Jain Jehová jin chi walaꞌ: Jain caw oj wiꞌel ẍumuc teꞌ kꞌuteꞌ tol naat eyaoj. Jaꞌ junoj yuninal ẍumuc teꞌ oj wiꞌeloj, jain caw oj waw teꞌ bꞌey sjolom junoj wonan tol naat eyaoj, 23 jaꞌton bꞌey jun wonan yel xacꞌal naat eya bꞌey Israel. Jaxca tuꞌ oj yun ẍꞌibꞌa skꞌabꞌlaj teꞌ miman kꞌuteꞌ tuꞌ, catuꞌ yel xacꞌal watxꞌ yili. Jaꞌ bꞌey yich teꞌ tuꞌ, oj caey masanil tujan noꞌ noꞌ, jaꞌ bꞌey skꞌabꞌlaj teꞌ, jatuꞌ oj swaꞌne oc sweyubꞌ masanil junjun tujan noꞌ tzꞌiquin. 24 Jaxca tuꞌ oj yun yotajne el masanil teꞌ teꞌ,a tol jain ton Jehová jin chi skeꞌ chin kꞌajtoj teꞌ miman teꞌ caw chi meyeyi steel, catuꞌ chi skeꞌ wakꞌon chꞌibꞌa teꞌ txenne steel. Jain chi wakꞌ tajtoj teꞌ teꞌ caw yaax xaj, catuꞌ chi wakꞌon yaaxbꞌoj a teꞌ tajin. Jain Jehová jin chi walaꞌ, yet chi yunen junoj tzetyetal chi walaꞌ, ẍi Jehová.