5 Jaꞌ junoj mactxequel tol jichan snaꞌbꞌal, watxꞌ cꞌal tzet chi el yuneni. 6 Man comonoj chi scaltoj sbꞌa xol ebꞌ chi aon oc junoj kꞌin bꞌey sjolomlaj wonan yet chi oc ebꞌ eyilal tet echele. Cꞌam ojabꞌ chi yaoc lekꞌtiꞌ sdiosal ebꞌ je yet Israelal yipoj scꞌul. Cꞌam ojabꞌ chi yiꞌecꞌ yistil junojxa yet winajil, cꞌam chi sjunbꞌane sbꞌa yetoj yistil yet eyoc ix yin yilon sbꞌisbꞌal xꞌaaw. 7 Cꞌam chi yetne junoj yet animail. Jaꞌ tiꞌ yet tol chi yakꞌ meltzo tzettaj yetal chi yakꞌ can junoj chi oc maan tumin tet. Cꞌam chi yelkꞌane stzettaj yetal junoj mactxequel. Chi yakꞌ sloꞌbꞌe ebꞌ cꞌam sloꞌbꞌe, catuꞌ chi yakꞌon spichil mac cꞌam spichil. 8 Cꞌam chi yakꞌ chꞌen tumin yin maanil yin skꞌanon el yucꞌaꞌ chꞌen maan tumin. Cꞌam chi yetne junoj je yet animail. Caw watxꞌ chi yun swaꞌnen yeoc junoj kꞌane yibꞌan cawanoj ey jowal xol. 9 Chi yakꞌ yip sjijen jaxca yalon jin ley, cꞌal jin chejbꞌanil. Jaꞌ junoj mactxequel jaxca tuꞌ sbꞌeybꞌal, caw jichan ton yeoc yin sbꞌeybꞌal, jain Jehová jin chi walaꞌ tol oj naatbꞌoj skꞌinal.

10 Kꞌinaloj ta ey junoj scꞌaal jun winaj, caw elkꞌom ma tol caw makꞌom cam ánima chi elocoj. 11 Caxcꞌal mi man jaxca oj tuꞌ sbꞌeybꞌal naj mame tuꞌ, jal pax jun uninale tuꞌ xin, chi cꞌal comon to low yetoj ebꞌ ánima sjolomlaj wonan, cꞌal yoc eyilal tet echele, cꞌal yunen mul yetoj yistil yet winajil. 12 Chi yetnen ebꞌ mebꞌa, cꞌal ebꞌ okꞌbꞌal cꞌul yeoc yu scawxinajil. Chi oc elkꞌan tet ebꞌ ánima, cꞌam chi yakꞌ meltzo junoj tzetyetal chi yakꞌ can junoj mactxequel yin maan tumin tet ebꞌ chi oc maan bꞌey. Asanxane yin wan comon lekꞌtiꞌ dios tuꞌ chi yaoc yipoj scꞌul, catuꞌ chi yunen cꞌal tzetyetal tol yaabꞌetaj jin sattaj. 13 Chi skꞌanon mimej yucꞌaꞌ tumin chi yakꞌ yin maanil tet junojxa mactxequel. Jaꞌ jun ánima jaxca tuꞌ, man mimanoj tiempo oj skeꞌ yiquisbꞌoj ecꞌoj. Yutol caw yaabꞌetaj tzet chi el yuneni, jaꞌ junoj mactxequel jaxca tuꞌ sbꞌeybꞌal, jacꞌal oc chi yiꞌtej scamichal yibꞌan.

14 Tala cꞌuxan ey junoj scꞌaal jun pena sbꞌeybꞌal tuꞌ, jix ilon yunen masanil wan tzetyetal jix yun smam tuꞌ, ta cꞌam chi oc tzajan yintaj sbꞌeybꞌal smam tuꞌ. 15 Ta cꞌam chi yaoc kꞌin bꞌey sjolomlaj wonan yet chi oc eyilal tet comon dios, tam wal chi yaoc snaꞌbꞌal yin lekꞌtiꞌ sdiosal ebꞌ yet Israelal. Cꞌam chi mulwi yetoj yistil yet winajil. 16 Cꞌam cꞌal junoj mac chi yetne. Cꞌam junoj tzetyetal chi skꞌan can ecꞌ tet ebꞌ chi oc maan tumin tet. Cꞌam chi elkꞌanwi. Jaꞌ tzet chi yunne, tol chi yakꞌ sloꞌbꞌe ebꞌ cꞌam sloꞌbꞌe, catuꞌ chi yakꞌon spichil ebꞌ cꞌam spichil. 17 Cꞌam junoj mactxequel chi yetne; cꞌam chi skꞌanel miman yucꞌaꞌ tumin chi yatoj yin maanil, tol chi sjije jin ley, catuꞌ chi sbꞌeybꞌalne jaxca yalon jin chejbꞌanil. Jaꞌ jun ánima jaxca tuꞌ sbꞌeybꞌal, man oj cam yu spenail smam; jaꞌ tzet oj chaꞌlo yu jun mactxequel tuꞌ, tol oj naatbꞌoj skꞌinal. 18 Jal smam tuꞌ xin, oj cam yu spenail chi el yunen tuꞌ, yutol etnem ánima, elkꞌom, caw pena tzet jix yun yul sconobꞌal.

19 Jaex tiꞌ, oj je kꞌanle jaxca tiꞌ: ¿Tzet yu, yuxan cꞌam chi stoolane el ebꞌ cꞌaale smul smam? je chi. Ta jaꞌ scꞌaal tuꞌ asan tzetyetal watxꞌ, cꞌal sjichanil jix yunne, catuꞌ chi sjijeni, cꞌal sbꞌeybꞌalnen jin ley, yu jun tuꞌ, yuxan oj iquisbꞌoj cꞌal ecꞌoj. 20 Jaꞌ mac chi yaoc spenail, jaꞌ smoo chi cami. Cꞌam chi skeꞌ stoolane el smul smam ebꞌ uninale, tam wal ebꞌ mame chi stoolane el smul yuninal. Jaꞌ mac jichan sbꞌeybꞌal, oj ẍaꞌ spajtzebꞌal sjichanil; jal pax mac penawom xin, oj ẍaꞌ spajtzebꞌal spena sbꞌeybꞌal tuꞌ.

21 Ta jaꞌ jun penawom chi spoꞌoel sbꞌa yin masanil spenail chi yunne, catuꞌ chi sjijen masanil jin ley, cꞌal sbꞌeybꞌalne sjichanil, caw yel, jaꞌ jun tuꞌ, man oj camoj. 22 Jain Jehová jin tiꞌ, manxa oj jin naꞌtej masanil spenail jix yun jun mactxequel tuꞌ, jaꞌ tiꞌ yet, tol oj naatbꞌoj skꞌinal yutol jaꞌ sjichanil chi yunne. 23 Jain wal caw Jehová jin chi walaꞌ, tol cꞌam chi woche tol chi cam ebꞌ penawom, yutol chi woche tol chi sqꞌuex sbꞌeybꞌal ebꞌ, yet watxꞌ chi iquisbꞌi cꞌal ecꞌ ebꞌ.

24 Ta tol jaꞌ junoj jichan sbꞌeybꞌal, catuꞌ chi sbꞌejoncan yunen sjichanil tuꞌ, catuꞌ chi yunen masanil tzetyetal tol yaabꞌetaj chi yun ebꞌ penawom, ¿oj mi iquisbꞌoj cꞌal ecꞌ jun tuꞌ che naꞌ? Cꞌamaj. Manxa oj jin naꞌtej tzetyetal watxꞌ jix el yunen tuꞌ. Asan tol sowalil chi cam yu spenail chi el yunen tuꞌ. 25 Tejan ey jex che yal jaxca tiꞌ: Jaꞌ Dios man jichanoj tzet chi yunne, je chi, che yaloni. Jex Israel, chi cam je yabꞌen tzet chi walaꞌ, jain tiꞌ, jichan cꞌal tzet chi el wuneni, jal jex jaex tiꞌ, man jichanoj je bꞌeybꞌal. 26 Jaꞌ mactxequel watxꞌ snaꞌbꞌal, catuꞌ chi sbꞌejoncan pax yunen swatxꞌ bꞌeybꞌal, jaꞌ jun tuꞌ, oj yiꞌtej scamichal yibꞌan yu spenail chi yunne. 27 Taꞌ jaꞌ junoj penawom chi spoꞌoel sbꞌa xol spenail, catuꞌ chi yunen swatxꞌilal cꞌal sjichanil, oj colcha can eloj, man oj camoj. 28 Yutol chi spoꞌoel sbꞌa xol spenail, jaꞌ jun tuꞌ, caw yel man oj cam yu spenail tuꞌ.

29 Jaex conobꞌ Israel jex tiꞌ, ey jex che yal jaxca tiꞌ: Jaꞌ Dios man jichanoj tzet chi yunne, je chi, che yaloni. Yuxan chi cam je yabꞌen tzet chi walaꞌ, jain tiꞌ, jichan cꞌal tzet chi el wuneni, jal jex jaex tiꞌ man jichanoj je bꞌeybꞌal. 30 Jain wal caw Jehová Yaaw jin chi walaꞌ, tol oj jin naꞌoc je yin junjun jex, jatacꞌalaꞌ tzet chi el je yuneni. Yuxan bꞌejwej can je pena bꞌeybꞌal yin junelne, naꞌwej je bꞌa. Ta cꞌamaj, jaꞌ je pena bꞌeybꞌal tuꞌ oj jex akꞌon qꞌueyel yin junelne. 31 Yuxan poꞌowej el je bꞌa yin masanil spenail che yun jin sattaj an. Jaꞌ ojabꞌxa junoj acꞌ naꞌbꞌale cꞌal acꞌ bꞌeybꞌale che bꞌeybꞌalne. Jex conobꞌ Israel, ¿tzet yu, yuxan oj jex camoj? 32 Jain Jehová jin chi walaꞌ, tol cꞌam chi woche tol ey jex comon cꞌal chex cami. Yuxan poꞌowej el je bꞌa yin spenail xin, yet watxꞌ ey je kꞌinal, ẍi Dios.