2 Jaꞌ yet junel, ey jun noꞌ xutx bꞌalam, jix ale octoj xol noꞌ icham bꞌalam; jix swaꞌne sweyubꞌ noꞌ. Jaꞌ tituꞌ jix chꞌibꞌ cꞌal pax a noꞌ yuneꞌ.

3 Jix chꞌibꞌ jun noꞌ yuneꞌ tuꞌ, caw jelan jix eloc noꞌ. Jix scuy sbꞌa noꞌ seyon ẍiꞌbꞌe, jaꞌ ebꞌ ánima chi smitxꞌeyoj, catuꞌ chi ẍiꞌon noꞌ.

4 Jix abꞌle skꞌumal noꞌ yu wanxa nacionlaj, yuxan jix mitxꞌle ey noꞌ yu ebꞌ yul jun txꞌan yaal, jix yaon oc jun chꞌen gancho ebꞌ yin noꞌ, catuꞌ jix sjutxtoj ebꞌ, masantaꞌcꞌal jix apni oc bꞌey Egipto.

5 Jaꞌ yet jix yilon oc noꞌ txutxe tuꞌ tol ma eloc jaxca chi yoche scꞌul, jix yiꞌontoj junxa yuneꞌ noꞌ, catuꞌ jix yilon chꞌibꞌoj, caw jelan jix eloc junxa noꞌ tuꞌ.

6 Jaꞌ yet jix oc noꞌ achꞌeal xin, chi xa bꞌetecꞌ noꞌ xol-laj noꞌ icham bꞌalam tuꞌ. Queytuꞌ jix yun scuyon sbꞌa noꞌ smitxꞌon ẍiꞌbꞌe; jaxa jix yun xin, tol chi chiꞌle eytoj ebꞌ ánima yu noꞌ.

7 Manxa jantajoj ebꞌ ánima jix makꞌle cam yu noꞌ bꞌey yul-laj spalacio ebꞌ rey. Caw ecꞌal mimej conobꞌ jix yetnetoj noꞌ; caw chi bꞌilwi jun yul yibꞌankꞌinal tiꞌ yu yel yaw noꞌ.

8 Jix lawi tuꞌ xin, jix oc ebꞌ conobꞌlaj caan scawilal tuꞌ scajatoj noꞌ; jix swaꞌnen ey jun txim yaal ebꞌ. Queytuꞌ jix yun yeyqꞌuey yu ebꞌ.

9 Jix yaoc jun chꞌen gancho ebꞌ yin noꞌ, catuꞌ jix smajchen octoj ebꞌ yul jun caanteꞌ jaxca bꞌey chi majchele octoj junoj noꞌ, queytuꞌ jix yun yiꞌletoj tet naj sreyal Babilonia. Jix ale octoj noꞌ yul preso tituꞌ, yet watxꞌ cꞌamxa mactxequel oj abꞌen yel yaw bꞌey sjolomlaj wonan yul yet Israel.

10 Yuxan jaex Israel jex tiꞌ, laan jex jaxca junoj yakꞌil uva awbꞌil ey bꞌey stiꞌlaj junoj jaꞌ jaꞌ. Caw miman chi yunne, catuꞌ chi yakꞌon sat, manxa jantajoj swol chi aoloj, yutol ey cꞌal oc yal.

11 Caw chꞌen chꞌen teꞌ jix yun skꞌabꞌlaj. Jaꞌ skꞌabꞌlaj tuꞌ jix oc skꞌojochoj ebꞌ rey. Yel xacꞌal miman jix yun ẍꞌibꞌa steel, masantaꞌcꞌal jix aapnoj xol-laj asun. Eyxa smey jix yun yili, yu miman steel cꞌal yu ecꞌal skꞌabꞌlaj.

12 Jaxa jix yunne, jix tokꞌle atej an uva tuꞌ yetoj sjowal scꞌul Dios, jix kꞌojle ey an sat txꞌotxꞌ. Jix tajtoj an yetoj sat yu jun kaꞌeꞌ jix tit yetcꞌulal bꞌey chi aol cꞌu. Jix jechle el skꞌabꞌlaj tol chꞌen chꞌen teꞌ yili tuꞌ, catuꞌ jix akꞌle tzꞌaꞌ masanil.

13 Jaꞌ bꞌey txꞌotxꞌ cusiltaj txꞌotxꞌ, jaxa tituꞌ jix awle eyoj, bꞌey caw sat txꞌotxꞌ.

14 Pilan jix tzꞌaꞌtoj wan skꞌabꞌ tol chꞌen chꞌen yili yu kꞌakꞌ tuꞌ, jix tzꞌaꞌ cꞌal pax toj an sat yetoj. Cꞌamxa skꞌabꞌlaj tol chꞌen chꞌenal teꞌ tol chi skeꞌ yoc skꞌojochoj ebꞌ rey, ẍi jun bꞌit, ẍi Jehová. (Jaꞌton jun bꞌit tiꞌ, bꞌit yet cuscꞌulal yu camich, jaꞌ jun tuꞌ oj bꞌitnele oj.)