8 Ma cꞌal sjije ebꞌ tzet jix walaꞌ, caw pit cꞌal jix yute sbꞌa ebꞌ ey jin. Ma yal scꞌul ebꞌ jix ẍaꞌ yabꞌ tzet jix walaꞌ. Ma cꞌal yakꞌ lawoj wan comon sdiosal ebꞌ tol yaabꞌetaj tuꞌ, tam wal jix sbꞌejcan wan sdiosal ebꞌ a Egipto. Yu jun tuꞌ, yuxan jix jin naꞌ tol sowalil oj wiꞌel sjowal jin cꞌul yetoj syaꞌilal chi waoc yin ebꞌ bꞌey Egipto tuꞌ. 9 Queytuꞌ jix wute jin naꞌon wan tuꞌ, man pax jaxca oj tuꞌ jix wute, yet watxꞌ cꞌam chi al-le pena kꞌane win yu wanxa conobꞌ, yutol tꞌanan oc ebꞌ win yet jix wiꞌon eltej ebꞌ bꞌey txꞌotxꞌ Egipto. 10 Jain jix wiꞌeltej ebꞌ bꞌey Egipto tuꞌ, jix wiꞌon cantoj ebꞌ bꞌey txꞌotxꞌ cusiltaj txꞌotxꞌ. 11 Jaꞌ tituꞌ jix wakꞌ yotajne el jin ley cꞌal jin chejbꞌanil tet ebꞌ, tol jaꞌ yu chi sbꞌeybꞌalne jin ley ebꞌ, yuxan chi yiꞌcan skꞌinal ebꞌ. 12 Jix wakꞌon sbꞌeybꞌalne ebꞌ jun scꞌual xewilal tol wet yeocoj, yu yoc can yecheloj jin wa kꞌane jix wakꞌ yetoj ebꞌ, cꞌal yu snaꞌontej ebꞌ tol jain Jehová jin tiꞌ, jain jix jin sicꞌ can el ebꞌ jin conobꞌoj. 13 Caw pit cꞌal jix yute sbꞌa ebꞌ jin sattaj bꞌey txꞌotxꞌ cusiltaj txꞌotxꞌ tuꞌ, ma sjije jin ley ebꞌ, jix yintajne el jin chejbꞌanil jix wakꞌcan tet ebꞌ, ta jix sjije ebꞌ, ey mi cꞌal skꞌinal ebꞌ. Jacꞌalaꞌ jun scꞌual xewilal tol wet yeocoj, junelne ma sjije ebꞌ. Yu jun tuꞌ, yuxan jix jin naꞌ waon oc sjowal jin cꞌul yin ebꞌ bꞌey txꞌotxꞌ cusiltaj txꞌotxꞌ tuꞌ. Jaꞌ tituꞌ oj wakꞌ xacꞌal lawoj ey ebꞌ yin junelne waloni. 14 Man jaxca oj tuꞌ jix wute pax oj yet watxꞌ, man penaoj chin kan yul sat wanojxa conobꞌ, yutol tꞌanan oc ebꞌ yet jix wiꞌon eltej ebꞌ bꞌey txꞌotxꞌ Egipto.

15 Yetoj cꞌal pax oj jaꞌ bꞌey txꞌotxꞌ cusiltaj txꞌotxꞌ jix wakꞌcan jin tiꞌ tol man oj octoj ebꞌ bꞌey jun txꞌotxꞌ tol tꞌinan wakꞌon tet ebꞌ tuꞌ, jaꞌton jun txꞌotxꞌ manxa jantajoj swatxꞌil yintaj masanil txꞌotxꞌ, jun txꞌotxꞌ caw yaax sat, 16 yutol jix yintajne el jin chejbꞌanil ebꞌ cꞌal jin ley, ma pax sjije ebꞌ jun scꞌual xewilal tol wet yeocoj, yutol asan yin wan comon dios eyoc snaꞌbꞌal ebꞌ. 17 Jix wakꞌ mimancꞌulal yin ebꞌ yu wan tuꞌ, ma jin qꞌueyel bꞌey txꞌotxꞌ cusiltaj txꞌotxꞌ tuꞌ. 18 Yu jun tuꞌ, yuxan jix wal tet yuninal ebꞌ tuꞌ, tol cꞌam ojabꞌ che bꞌeybꞌalne jaxca sbꞌeybꞌal ebꞌ je mam icham, cꞌam ojabꞌ che jije tzet chi yal ebꞌ ey jex, cꞌam ojabꞌ chex oc tzajan yintaj wan comon dios. 19 Jain Jehová je Diosal jin, jain chi wal ey jex jaxca tiꞌ: Jijem ojabꞌ che yute je bꞌa tet jin chejbꞌanil cꞌal jin ley. 20 Miman ojabꞌ yeloc apnoj jun scꞌual xewilal yul je sat, yutol wet yeocoj. Jaꞌton jun tuꞌ txꞌoxbꞌanil jin wa kꞌane jix jin waꞌne je yetoj. Queytuꞌ oj yun je yotajnen eloj tol jain ton Jehová je Diosal jin, jin chi tet ebꞌ.

21 Jacꞌalaꞌ pit jix yute sbꞌa yuninal ebꞌ tuꞌ ey jin. Ma sjije jin ley ebꞌ, tam wal jix sbꞌeybꞌalne jin chejbꞌanil ebꞌ, tol jaꞌton wan tuꞌ chi akꞌon skꞌinal ebꞌ chi bꞌeybꞌalneni. Jacꞌalaꞌ jix yetne el jun scꞌual xewilal ebꞌ tol wet yeocoj. Yu jun tuꞌ, yuxan jix jin naꞌ tol chi wiꞌel sjowal jin cꞌul yin ebꞌ, catuꞌ chi wakꞌon lawoj el ebꞌ bꞌey txꞌotxꞌ cusiltaj txꞌotxꞌ tuꞌ, waloni. 22 Asan xin, yutol caw miman yeloc apnoj jin bꞌi, yuxan jix jin mitxꞌoc tucan jun syaꞌilal tuꞌ yibꞌan ebꞌ, yet watxꞌ man pena oj chin can sattaj wan nacionlaj jix ilon wiꞌon eltej ebꞌ bꞌey txꞌotxꞌ Egipto. 23 Jaꞌ yet eyecꞌ ebꞌ bꞌey txꞌotxꞌ cusiltaj txꞌotxꞌ tuꞌ, jix wakꞌon can jin tiꞌ tol oj jin sajlemne cantoj ebꞌ bꞌey masanil yul yibꞌankꞌinal, 24 yutol ma sjije jin chejbꞌanil ebꞌ. Jix yintajne el jin ley ebꞌ, ma sjije ebꞌ jun scꞌual xewilal tol wet yeocoj, asan cꞌal yin wan diosal yichmam ebꞌ bꞌey eyoc snaꞌbꞌal. 25 Ma cꞌaltaꞌ sbꞌejcan ebꞌ yunen wan bꞌeybꞌale man watxꞌoj, tol cꞌam chi yakꞌ kꞌinale. 26 Jix yetnentoj sbꞌa ebꞌ yu yakꞌon xaambꞌal tet comon dios, jix yakꞌon tzꞌaꞌ sbꞌabꞌel yuninal ebꞌ yin xaambꞌalil. Queytuꞌ jix wakꞌ yun ebꞌ, yet watxꞌ chi jul xiwcꞌulal yin ebꞌ, yet chi yotajne el ebꞌ tol jain ton Jehová jin, ẍi Dios.

27 Jaach ánima, al tet ebꞌ ja wet Israelal tol jain Jehová Yaaw jin chi wal jaxca tiꞌ: Jaꞌ ebꞌ je mam icham jix xꞌemtej sjowal jin cꞌul ebꞌ, caw pit jix yute sbꞌa ebꞌ ey jin. 28 Jaꞌ yet jix wiꞌoctoj ebꞌ bꞌey sat txꞌotxꞌ txꞌotxꞌ jix wakꞌ jin tiꞌ wakꞌon tet ebꞌ, jix yilon oc ebꞌ wan tzalquiltaj, cꞌal wan teꞌ teꞌ tol yaax xaj. Jaꞌ tituꞌ jix xꞌemtej sjowal jin cꞌul ebꞌ yu yakꞌon xaambꞌal, cꞌal ofrenda, cꞌal yakꞌon tzꞌaꞌ incienso tol sukꞌukꞌi yoc sabꞌ, cꞌal secon ey vino ebꞌ yin ofrendail tet wan comon dios. 29 Jix jin kꞌanlen tet ebꞌ jaxca tiꞌ: ¿Tzet yeloc apnoj wan lugar tol naat eya bꞌey chi bꞌet je yakꞌ je xaambꞌal tuꞌ? jin chi tet ebꞌ. Jatax yet tuꞌ, jix yij can sbꞌi jun lugar tuꞌ, Jun Lugar Naat Eyaoj, jaꞌton jun bꞌey chi yakꞌ xaambꞌal ebꞌ Israel.

30 Al tet ebꞌ ja wet Israelal tol jain Jehová Yaaw jin chi wal jaxca tiꞌ: ¿Tzet yu, yuxan tol che yoche che yetnetoj je bꞌa jaxca jix yun yetnentoj sbꞌa ebꞌ je mam icham? ¿Tzet yu, yuxan pit che yute je bꞌa catuꞌ chex oc yin eyilal tet wan comon dios tol yaabꞌetaj tuꞌ? 31 Jaꞌ yet che yakꞌon tzꞌaꞌ je yofrenda cꞌal je yuninal yin xaambꞌalil, lalan cꞌal je yetnen el je bꞌa yetoj wan comon dios tuꞌ, catuꞌ chi to wal je yoche chi jul je kꞌanle tzet chi yoche je cꞌul ey jin. Jain Jehová Yaaw jin chi wakꞌ jin tiꞌ je yin, tol man oj jin takꞌwoj ey jex. 32 Yutol jix je yaoc yin je naꞌbꞌal tol che bꞌeybꞌalne jaxca tzet chi sbꞌeybꞌalne wanxa nacionlaj, tol chi oc ebꞌ yin eyilal tet teꞌ teꞌ, cꞌal yin chꞌen chꞌen. Cꞌam bꞌakꞌin oj jin chaꞌ je yun jaxca tuꞌ. 33 Jain Jehová Yaaw jin chi wakꞌ jin tiꞌ, tol jaꞌ yetoj sjowal jin cꞌul, cꞌal yetoj wipalil tol miman yeocoj, oj wakꞌ yaawil je yibꞌan. 34 Oj jin txꞌox wipalil, cꞌal sjowal jin cꞌul yet oj jex jin yambꞌantej bꞌey wanxa nacionlaj, jaꞌton bꞌey sajleminaj je ye cantoj wu. 35-36 Oj jex wiꞌeltej bꞌey wan conobꞌlaj tuꞌ. Jain Jehová jin chi walaꞌ, tol oj jex jul jacan jin sattaj, catuꞌ oj jin naꞌon oc je yin, yu waon oc syaꞌilal je yibꞌan, jaxca jix yun waon oc syaꞌilal yibꞌan ebꞌ je mam icham bꞌey txꞌotxꞌ cusiltaj txꞌotxꞌ yul yet Egipto. 37 Jain oj jin naꞌoc je yin junjun jex, catuꞌ oj wakꞌon eloc jin wa kꞌane. 38 Oj wiꞌeltej ebꞌ pena snaꞌbꞌal je xol, jaxca tol jin cajat jin bꞌa yetoj ebꞌ, oj wiꞌeltej ebꞌ txꞌoj conobꞌal tol sajleminaj ye cantoj je xol, man cꞌaltaꞌ oj octoj ebꞌ bꞌey sat xꞌotxꞌ ebꞌ je yet Israelal. Queytuꞌ oj yun je yotajne eloj tol jain ton Jehová jin.

39 Jex conobꞌ Israel, jain Jehová Yaaw jin chi wal jaxca tiꞌ: Asiꞌwej, ocanwej yin eyilal tet je comon dios tuꞌ. Jaxa yet bꞌakꞌin, oj jex oc yin jijemal ey jin. Manxa oj je yetne el jin mimanbꞌilal yin je yakꞌon tzꞌaꞌ je yofrenda ey jin, cꞌal yin je yoc yin eyilal tet wan comon dios tuꞌ. 40 Jaꞌ bꞌey jun tzalan tol wet yeocoj, jatuꞌ oj jex oc je masanil yin eyilal ey jin, bꞌey jun wonan tol yel xacꞌal naat eya yul jin conobꞌ Israel. Jain Jehová jin chi walaꞌ, tol jaꞌ tituꞌ oj jex jin chaꞌ yetoj masanil jin cꞌul. Jaꞌ tituꞌ oj jin kꞌan ey jex, tol oj je yakꞌ je yofrenda ey jin, tol oj je yiꞌtej je bꞌabꞌel sat awo, cꞌal masanil tzetyetal tol wet yeocoj. 41 Jaꞌ yet oj jex jin yambꞌan eltej bꞌey xol-laj wan nación bꞌey sajleminaj je ye cantoj tinaniꞌ, yin tzalacꞌulal oj yun jex jin chaꞌon jaxca junoj ofrenda tol ochebꞌil wu. Oj jin txꞌox jin mimanbꞌilal je xol sattaj masanil conobꞌ.

42 Jaꞌ yet oj jex wiꞌon octoj bꞌey jun txꞌotxꞌ tol jix wakꞌ jin tiꞌ wakꞌon can tet ebꞌ je mam icham, queytuꞌ oj yun snaꞌcha el je yu, tol jain ton Jehová jin. 43 Jaꞌ yet tuꞌ oj je naꞌtej jantaj pena bꞌeybꞌale jix el je yuneni. Caw pena xacꞌal oj je yabꞌ yu wan tzetyetal jix el je yunen tuꞌ. 44 Jaex Israel jex tiꞌ, jaꞌ yet tuꞌ, oj je yotajnen eloj tol jain ton Jehová jin, watxꞌ oj wute jin naꞌbꞌal je yin yu wiꞌon a can jin mimanbꞌilal. Jain ton caw Jehová jin chi walaꞌ, tol man jaxca oj jix je yute je bꞌa tuꞌ, man jaxca oj tuꞌ oj wute jin naꞌbꞌal je yin, ẍi Jehová, ja chi, ẍi Dios.

45 Jix kꞌanabꞌ Jehová ey jin, jix yalon jaxca tiꞌ:

46 Jaach ánima, meltzaantoj tꞌanan bꞌey yetcꞌulal sur, catuꞌ chach kꞌanabꞌtoj; jaꞌ jin kꞌane oj wal yin txꞌotxꞌ mimej eltzabꞌ bꞌey yul yet sur, 47 catuꞌ cha walon jaxca tiꞌ: Jaꞌ Jehová Naj Yaaw chi alon jaxca tiꞌ: Jain oj waoc jun kꞌakꞌ yet oj tzꞌaꞌtoj masanil teꞌ mimej teꞌ ey bꞌey xol-laj mimej eltzabꞌ, teꞌ yaax cꞌal teꞌ tajin; tol oj chaw xaj jun miman kꞌakꞌ tuꞌ, cꞌam mactxequel oj skeꞌ sbꞌuton tanoj. Jaꞌ ebꞌ ánima ey tituꞌ, oj tzꞌaꞌtoj sat ebꞌ yu bꞌey sur yetoj cꞌal bꞌey norte. 48 Masanil yul yibꞌankꞌinal oj otajnen eloj, tol jain jix waoc jun kꞌakꞌ tuꞌ. Yutol jaꞌ jun kꞌakꞌ tuꞌ, man cꞌal oj tanoj, ẍi Jehová.

49 Jix lawi tuꞌ, jix jin takꞌwi tet Naj: ¡Ay jaach Jehová jin Diosal, jaꞌ ebꞌ ánima tiꞌ, chi yal ebꞌ tol cꞌam chi naꞌcha el yu ebꞌ tzet lalan walon tet ebꞌ!