Jix wabꞌen yoc jun aw, jix yalon ey jin jaxca tiꞌ: Jaach ánima,^a aan waanoj, tol ey tzet oj wal ey jaach, ẍi ey jin. 2 Jaꞌ yet lalan yalon wan tuꞌ ey jin, jix wabꞌen yoc Yespíritu Dios win, jix oc wip, catuꞌ jix jin a linanoj. 3 Jix yalon ey jin jaxca tiꞌ: Jaach ánima, oj jaach jin chejtoj xol ebꞌ ja wet Israelal. Yutol jaꞌ jun conobꞌ tuꞌ caw man jijemoj ebꞌ, caw pena chi yute snaꞌbꞌal ebꞌ win. Jaxca yutenaj sbꞌa smam icham ebꞌ yet peyxa, queytuꞌ chi yute sbꞌa ebꞌ win tinaniꞌ. 4 Jain chach jin chejtoj xol ebꞌ ánima tol pena snaꞌbꞌal ebꞌ, catuꞌ caw pit chi yute snaꞌbꞌal ebꞌ, cha walon tet ebꞌ jaxca tiꞌ: Jaꞌ Jehová Naj Kaawil, jaꞌ chi alon ey jex. 5 Caxcꞌal mi oj ẍaꞌ yabꞌ ebꞌ, ma cꞌamaj, yutol caw pena chi yute snaꞌbꞌal ebꞌ, queytuꞌ oj yun snaꞌcha el yu ebꞌ tol ey jun jin chejabꞌ eyecꞌ snan xol ebꞌ. 6 Jaach ánima, cꞌam ojabꞌ chach xiw tet ebꞌ, cꞌal yu tzet oj yal ebꞌ ey jaach. Caxcꞌal mi oj oc joyan ebꞌ ja win, jaxca xacꞌal tol ey jaach toj xol qꞌuix, ma jaxca xacꞌal tol ey jaach ecꞌ xol noꞌ sinam, cꞌam cꞌal chach xiw tet ebꞌ, tam wal yu tzet oj yal ebꞌ ey jaach, yutol caw pit chi yute sbꞌa ebꞌ. 7 Jaach oj ja walel jin kꞌane tet ebꞌ, caxcꞌal oj ẍaꞌ yabꞌ ebꞌ ma cꞌamaj, yutol pit yeoc snaꞌbꞌal ebꞌ. 8 Chi cam ja wabꞌen tzet chi walaꞌ, man ojabꞌ pena oj cha wute ja bꞌa jaxca ebꞌ tuꞌ. Jaj ja tiꞌ, catuꞌ oj ja loꞌon eytoj tzetyetal oj wakꞌ ey jaach, ẍi Dios ey jin.