Jaꞌ Skꞌane Dios Jix Stzꞌibꞌe
EZEQUIEL
Jix Yil Stzejejial Dios Naj Ezequiel
1
1-3 Jain Ezequiel jin tiꞌ, scꞌaal jin naj Buzi, jain jix jin tzꞌibꞌe jun libro tiꞌ. Yakꞌomal xaambꞌal weocoj. Jatuꞌ ey jin ecꞌ bꞌey stiꞌ jun jaꞌ jaꞌ chi yij Quebar, bꞌey Babilonia; ey jin oc xol ebꞌ a Judea jix iꞌletej bꞌey eyoc ebꞌ presowomal. Jaꞌ yet joebꞌxa cꞌu yoc yet scan xꞌaaw yet abꞌil 30, yet tuxa jix ecꞌtoj joebꞌ abꞌil yet tax cꞌal jix iꞌletoj naj rey Joaquín yin presowomal, jaꞌ yet tuꞌ jix jajcha satcan jix wilaꞌ, jix xꞌoxon sbꞌa Dios ey jin; jix yaoc skꞌabꞌ Jehová wibꞌan yetoj yipalil. 4 Jix wilon an, tol jaꞌ bꞌey yetcꞌulal norte jix tit jun miman jow kaꞌeꞌ, yetoj jun miman kꞌej asun. Jaꞌ tituꞌ jix eltej kaꞌeꞌ cꞌal raya, tuxa cꞌal chi kopopi yili bꞌey yinlaj. Jaꞌ snan xol jun kꞌakꞌ tuꞌ, ey jun tzetyetal tuxa cꞌal chi kopopi yili, jaxca skopopial chꞌen bronce. 5 Jaꞌ bꞌey snan yul, ey canwan tzetyetal iquis laan yili jaxca ánima. 6 Junjun cꞌal ebꞌ ey canebꞌ sat cꞌal canebꞌ xicꞌ. 7 Jichan cꞌal yeoc xubꞌ ebꞌ, jaꞌ yajan ebꞌ, laan jaxca yiskꞌaj noꞌ wacax, caw chi kopopi yili jaxca chꞌen bronce tol caw watxꞌ snijle el stzꞌilal. 8 Jaꞌ ebꞌ tuꞌ, ey canebꞌ sat cꞌal canebꞌ xicꞌ, ey cꞌal pax canebꞌ skꞌabꞌ jaxca yet ánima yin scanpaqꞌuil spacꞌul bꞌey yalan xicꞌ. 9 Chi ẍaꞌle sbꞌa xicꞌ ebꞌ yet chi bꞌeytoj ebꞌ, jichan cꞌal stoo ebꞌ bꞌey tꞌanantoj, cꞌam cꞌal chi ecꞌ joyoyoj ebꞌ yet chi bꞌeytoj ebꞌ. 10 Jaꞌ sat junjun ebꞌ: Laan yili jaxca sat ánima; jaꞌ yetcꞌulal swatxꞌ kꞌabꞌ ebꞌ, laan yili jaxca sat noꞌ bꞌalam, jaꞌ bꞌey sqꞌuexan ebꞌ, laan yili jaxca sat wacax; jal pax bꞌey jun pacꞌxa xin, laan yili jaxca sat noꞌ chii. 11 Jaꞌ yet chi yiꞌon a xicꞌ ebꞌ, caabꞌ chi ẍaꞌle sbꞌa yetoj yet ebꞌ bꞌey junjun pacꞌ, jal caabꞌxa xin, jaꞌ chi majchen ey smimanil ebꞌ. 12 Jun laan cꞌal chi yun sbꞌeytoj ebꞌ sattaj, cꞌam cꞌal chi ecꞌ joyoyoj ebꞌ yet chi bꞌey stoo ebꞌ, jatacꞌalaꞌ bꞌey chi ijbꞌaletoj ebꞌ yu yipalil Dios. 13 Laan yili ebꞌ jaxca stzakꞌakꞌ cajxeinaj oc skꞌakꞌal; laan yili jaxca junoj tzejtebꞌal chi ecꞌabꞌtoj snan xol ebꞌ; tuxa cꞌal chi kopopi yili, catuꞌ chi eltej kopna raya xol. 14 Jaꞌ ebꞌ querubín tuꞌ, chi too ebꞌ, catuꞌ chi meltzo pax tej ebꞌ yin eymanil, jaxca chi yun yecꞌ koplabꞌoj raya.15 Jaꞌ yet jix wilon wan tuꞌ, catuꞌ jix wilon pax bꞌey sat txꞌotxꞌ tiꞌ, tol jaꞌ bꞌey yin spacꞌul junjun ebꞌ, ey jun xoyan oc yin junjun jaxca yili junoj rueda. 16 Jaꞌ canebꞌ xoyan oc yin ebꞌ tuꞌ, laan cꞌal yili scanebꞌal, caw chi kopopi yili jaxca chꞌen chi yij topacio, jaxca tol ey junjunojxa chi kꞌaxbꞌo ecꞌtoj snan junjun ebꞌ. 17 Chi cꞌal skeꞌ stoo bꞌey scanpaqꞌuil yin tol cꞌam chi ecꞌ joyoyoj. 18 Catuꞌ jix wiloni, tol jaꞌ junjun wan xoyan ye tuꞌ, tol ey junxa miman chꞌen xoyan oc yinlaj, caw qꞌueyubꞌtaj yili. Jaꞌ masanil yinlaj tuꞌ, nonaj xacꞌal el yu jaxca sbꞌakꞌ sat. 19 Jaꞌ yet chi bꞌeytoj ebꞌ querubín tuꞌ, chi bꞌey cꞌal pax stoo wan xoyan ye tuꞌ. Ta chi a waan ebꞌ bꞌey sat txꞌotxꞌ, catuꞌ chi a cꞌal pax waan wan xoyan ye tuꞌ yetoj ebꞌ. 20 Jaꞌ ebꞌ tuꞌ, chi bꞌey stoo ebꞌ bꞌey chi iꞌletoj ebꞌ yu yipalil Dios, catuꞌ chi tocꞌal wan xoyan ye tuꞌ yetoj ebꞌ, yutol jaꞌ yin wan tuꞌ, eyoc spixan wan tzetyetal iquis tuꞌ. 21 Jaꞌ yet chi bꞌey wan tzetyetal iquis tuꞌ, chi bꞌey cꞌal pax wan rueda tuꞌ. Ta chi oc tucan ebꞌ, chi oc cꞌal pax tucan wan xoyan ye tuꞌ. Ta chi a waan ebꞌ bꞌey sat txꞌotxꞌ tiꞌ, chi a cꞌal pax waan wanxa tuꞌ yetoj, yutol jaꞌ yin wan tuꞌ eyoc spixan ebꞌ querubín tuꞌ.
22 Jaꞌ yibꞌan sjolom ebꞌ, ey junoj tzetyetal jenan ocoj, tuxa cꞌal chi kopopi yili jaxca chꞌen cheew, caw qꞌueyubꞌtaj xacꞌal yili. 23 Jaꞌ yalan jun pacꞌ jenan oc yin sjolom ebꞌ tuꞌ, jatuꞌ jichan chi yun yiꞌon a xicꞌ ebꞌ, catuꞌ chi ẍaꞌlen sbꞌa junjun xicꞌ ebꞌ tuꞌ. Jal caabꞌxa xin, jaꞌ chi majchen el smimanil ebꞌ. 24 Catuꞌ jix wabꞌen cꞌal pax sbꞌilwi xicꞌ ebꞌ yet chi too jenenoj ebꞌ: Laan sbꞌilwi jaxca sbꞌilwi jaꞌ mimej jaꞌ yet chi chꞌibꞌ jaꞌ, jaxca yoc yul snukꞌ Dios, Naj chi skeꞌ yu masanil jaxca yet chi kabꞌen sbꞌilwi cꞌu, ma jaxca sbꞌilwi yecꞌ junoj miman bꞌulan soldado. Jaꞌ yet chi oc tucan ebꞌ, catuꞌ chi yiꞌon ey xicꞌ ebꞌ tuꞌ. 25 Jix wabꞌen yoc jun nukꞌe bꞌey yibꞌan jun jenan oc yibꞌan ebꞌ tuꞌ. 26 Jaꞌ yibꞌan jun tuꞌ jix wil jun trono laan yili jaxca chꞌen zafiro. Jaꞌ yul jun trono tuꞌ, jatuꞌ chotan atoj jun jaxca yili ánima. 27 Catuꞌ jix wilon cꞌal pax oj tol jaꞌ bꞌey yibꞌan atoj snan, laan yili yetoj chꞌen bronce tol chi kopopi, caw chi chaw skꞌakꞌal. Jix wilon cꞌal pax oj tol jaꞌ bꞌey yalan, laan yili jaxca xaj kꞌakꞌ, tuxa cꞌal chi kopopi bꞌey yinlaj. 28 Jaxca wal yili junoj kꞌukꞌulcan chi aol snan xol asun yet chi yakꞌon nabꞌ, jaxca tuꞌ yili skopopial eyoc yinlaj. Queytuꞌ yili yipalil Jehová jix wilaꞌ. Jaꞌ yet jix wiloni, jix jin ey pajna sat txꞌotxꞌ.