Jaꞌ jun libro tiꞌ jix tzꞌibꞌelecan yet abꞌil 590-570 a.C.

Jaꞌ bꞌey conobꞌ Babilonia jix tzꞌibꞌelecan yu naj Ezequiel. Ezequiel sbꞌi jun libro tiꞌ, yutol jaꞌ skꞌane Dios yalnaj can tet naj Ezequiel, jaꞌton tzꞌibꞌebꞌilcan ey yul an. Jaꞌ yet abꞌil 586 a.C. jix apni ebꞌ soldado a Babilonia yakꞌ jowal yin conobꞌ Jerusalén. Jaꞌ naj Ezequiel tiꞌ, ẍejabꞌ Dios naj, jix iꞌletoj naj jaxca presowomal bꞌey Babilonia yetoj wanxa ebꞌ a Judá, yet cꞌamto chi akꞌle eyqꞌuey conobꞌ Jerusalén tuꞌ. Eyxa ecꞌ naj Ezequiel bꞌey Babilonia tuꞌ yet jix makꞌle ey wejlabꞌoj conobꞌ Jerusalén yu ebꞌ scajat jun conobꞌ tuꞌ. Yu jun tuꞌ, yuxan jix yalel skꞌane Dios naj Ezequiel tet ebꞌ eyecꞌ yetoj bꞌey Babilonia, yetoj cꞌal pax tet ebꞌ a Jerusalén.

Jaꞌ jun libro tiꞌ ey canebꞌ tujan yeocoj: Jaꞌ jun bꞌabꞌel tujan, chi el yich bꞌey capítulo 1 chi apni oc bꞌey capítulo 24. Jaꞌ titiꞌ chi yaltej tol chi awtele naj ẍejabꞌ Dios tiꞌ yet chi yalon naj tet ebꞌ ánima tol oj jul sjowal scꞌul Dios yibꞌan ebꞌ, oj eyqꞌuey conobꞌ Jerusalén.

Jaꞌ yet scaabꞌ tujan, chi el yich bꞌey capítulo 25 chi apni oc bꞌey capítulo 32. Jaꞌ titiꞌ chi yaltej tol jaꞌ sjowal scꞌul Dios oj jul pax yibꞌan wanxa conobꞌ, jaꞌton wan chi etnen conobꞌ Jerusalén. Ey cꞌal pax kꞌane jix al-le eloj yet xax eyqꞌuey conobꞌ Jerusalén tuꞌ.

Jaꞌ yet yox tujan, chi yal bꞌey capítulo 33 chi apni bꞌey capítulo 39. Jaꞌ titiꞌ chi yal yu skꞌane Dios albꞌiltoj tet ebꞌ ánima eycantoj bꞌey Babilonia yin presowomal. Albꞌil cꞌal pax toj tol oj waꞌnele a conobꞌ Jerusalén junelxa, yetoj cꞌal wan kꞌane jix al-le can el yibꞌan Gog.

Jaꞌ yet scan tujan, chi el yich bꞌey capítulo 40 chi apni oc bꞌey capítulo 48. Chi yaltej tol ey tzet jix txꞌoxle yil naj Ezequiel jaxca weyiche, yu tzet oj yun swaꞌxi conobꞌ Israel cꞌal stemplo Dios yet bꞌakꞌin.

Jaꞌ naj Ezequiel tiꞌ, jix yaoc Dios naj yipoj scꞌul sicꞌlebꞌil, caw jelan, jix scꞌubꞌa jantaj tzetyetal jix yil naj yin snaꞌbꞌal. Jaꞌ tzetyetal jix akꞌle yil tuꞌ, caw jix yaoc yin scꞌul, yuxan caw jix yakꞌ yip yet jix yalon el skꞌane Dios jix yil yin txꞌoxbꞌanileal. Jix yakꞌ yip yalon el skꞌane Dios tet ebꞌ yet conobꞌ, yet watxꞌ chi qꞌuexcha snaꞌbꞌal ebꞌ. Jix yalon cꞌal pax oj tol oj caꞌ waꞌnele a jun nación tuꞌ junelxa. Jaꞌ yul jun libro tiꞌ, chi yaltej jun skꞌaneal caw otajbꞌil, jaꞌton bꞌey chi bꞌinale wan tajin bꞌaj. Jaꞌ wan tajin bꞌaj tuꞌ, jix oc pax yiquisal ebꞌ junelxa, jaꞌton chi yal bꞌey capítulo 37:1-14. Jaꞌ naj ẍejabꞌ Dios tiꞌ, yakꞌomal pax xaambꞌal yeoc naj, jix yal naj tol sowalil watxꞌ chi kute cu bꞌa sattaj Dios.