2 Masanil jantaj tzet ey, ey jon, jix oc can yul skꞌabꞌ ebꞌ txꞌoj conobꞌal; jaꞌ cu na jon, yet xa ebꞌ txꞌoj conobꞌal yeocoj.

3 Mebꞌa unin xacꞌal jix kun can jon, cꞌamxa cu mam jon, jaꞌ ebꞌ ix cu txutx jon, jix can ebꞌ ix xꞌojli, cꞌamxa yichamil ebꞌ ix.

4 Jaꞌ teꞌ cu siꞌ, cꞌal jaꞌ jaꞌ chi kucꞌ jon, tol chi cu man masanil jon.

5 Ujtebꞌil jon cꞌal oc yu ebꞌ chi jowi oc kin jon; caw chi cu cꞌuumbꞌi, cꞌamxa cꞌal bꞌey chi cu xew niꞌoj jon.

6 Jix too bꞌatxan cu kꞌabꞌ tet ebꞌ a Egipto cꞌal tet ebꞌ Asiria, yu cu chaꞌon niꞌoj cu loꞌbꞌe tet ebꞌ jon.

7 Jaꞌ ebꞌ cu mam icham jon jix oc spenail ebꞌ ey jaach, tuxa jix camtoj ebꞌ. Jaꞌ tinaniꞌ, jaꞌ kibꞌan chi tit can syaꞌilal yu spenail ebꞌ tuꞌ.

8 Jaꞌ tinaniꞌ ey jon oc yul skꞌabꞌ ebꞌ yakꞌomal servil yeocoj, cꞌamxa mactxequel chi cu colon el yul skꞌabꞌ ebꞌ jon.

9 Xol xacꞌal xiwcꞌulal chi bꞌet cu sey niꞌoj cu loꞌbꞌe jon, yutol ey smey yu ebꞌ akꞌom jowal bꞌey txꞌotxꞌ cusiltaj txꞌotxꞌ.

10 Caw chi tzꞌaꞌtoj cu tzꞌuumal yu yajan cꞌu, caw chi tit kꞌakꞌ kin yu wail jon.

11 Jaꞌ bꞌey Sión, cꞌal bꞌey yul-laj conobꞌlaj yul yet Judá, caw chi etnele ebꞌ ix ix yetoj ebꞌ ix kꞌopo ix.

12 Jix locbꞌale a ebꞌ cu yaawil yu ebꞌ cu cajat jon, cꞌamxa xacꞌal niꞌoj yeloc apnoj ebꞌ naj icham winaj yul sat ebꞌ.

13 Jaꞌ ebꞌ winaj tol ey yip, jix ale oc ebꞌ yin jutxꞌu jarina; jal ebꞌ achꞌe unin, jix telcꞌotoj ebꞌ naj yalan teꞌ siꞌ.

14 Cꞌamxa ebꞌ icham winaj chi ey wojan stiꞌ spuertail conobꞌ yet chi swaꞌnen yeoc junoj kꞌane ebꞌ. Cꞌamxa ebꞌ achꞌe chi abꞌle yoc yul snukꞌ sbꞌitni.

15 Cꞌamxa cu tzalacꞌulal jon. Jaꞌ canal yet tzalacꞌulal, cuscꞌulalxa jix yute cantoj sbꞌa.

16 Cꞌamxa cu corona eyoc yin cu jolom; caw okꞌbꞌalcꞌule kili jon, yu jix kaoc cu penail ey jaach.

17 Yu jun tuꞌ, yuxan caw yaꞌ jon ey tinaniꞌ jon, lalan xacꞌal skꞌejtanel chi kil jon.

18 Jaꞌ conobꞌ Sión, tuxa jix uchcha ey masanil; jaxa cꞌal noꞌ waax eyecꞌoj.

19 Jal jaach pax jaach tiꞌ, jaach Jehová jin Diosal, yaaw jaach cꞌal yin masanil tiempo; ey cꞌal ja wopiso.

20 ¿Tzet yu, yuxan chi cu toocan qꞌueycꞌulal ja wu yin junelne? ¿Tzet yu, yuxan caw naatil xacꞌal jix jon ja bꞌejcanoj?

21 Jaach Jehová jin Diosal, iꞌon meltzo ja cꞌatan junelxa, yet watxꞌ chi cu meltzo oc yul ja kꞌabꞌ. Toloj wal watxꞌ chi yun yecꞌ ku junelxa jon, jaxca keoc yet yalantoj.

22 Yutol jaꞌ tinaniꞌ, jix jon ja wintajne can el yin junelne. Yel xacꞌal jix tit sjowal ja cꞌul kibꞌan jon.