2 Jaꞌ ebꞌ ánima caan bꞌey conobꞌ Sión, yel xacꞌal ochebꞌil ebꞌ yintaj chꞌen oro caw watxꞌ yili; jal tinaniꞌ xin, laan xacꞌal chi utele ebꞌ jaxca junoj txꞌotxꞌ xi waꞌnebꞌil yu junoj comon tzꞌajlom.

3 Ilaꞌ tax noꞌ xutx ooj chi yakꞌ txutxwoj yuneꞌ noꞌ, jal pax ebꞌ ix ix ey yul jin conobꞌ tiꞌ, junelne cꞌam chi okꞌ scꞌul ebꞌ ix yin yuneꞌ, laan chi yute sbꞌa ebꞌ jaxca noꞌ avestruz chi yakꞌ can sjos noꞌ bꞌey txꞌotxꞌ cusiltaj txꞌotxꞌ.

4 Jaꞌ ebꞌ unin lalanto xutxwi, caw chi cam ebꞌ yu tajin tiꞌal, tuxa cꞌal chi oc can lakꞌan yakꞌ ebꞌ yul spikꞌom. Caxcꞌal mi chi skꞌan sloꞌbꞌe ebꞌ, cꞌam mac chi akꞌon tet ebꞌ.

5 Ey ebꞌ ánima caw ey sloꞌbꞌe yet peyxa, jal pax tinaniꞌ, lalan scam ebꞌ yu wail bꞌey yul-laj calle. Jaꞌ mactxequel jix chꞌibꞌ yul-laj na caw watxꞌ yili, jal tinaniꞌ jatuꞌ chi caey ecꞌ ebꞌ bꞌey xol-laj kꞌalem.

6 Jaꞌ wan syaꞌilal jix jul yibꞌan jin conobꞌ yu spenailal, yel xacꞌal ecꞌbꞌan yintaj yet ebꞌ a conobꞌ Sodoma. Jaꞌ jun conobꞌ tuꞌ, yin junne txolan jix yun slawi eyoj, caxcꞌal mi cꞌam mactxequel jix oc joyan yakꞌon jowal yin.

7 Jaꞌ ebꞌ eyoc yin yaawil yul jin conobꞌ tiꞌ, kopopi xacꞌal yili ebꞌ yintaj chꞌen sajbꞌacom, yel xacꞌal sajin yili ebꞌ yintaj noꞌ lech; yel xacꞌal cajin yili smimanil ebꞌ yintaj chꞌen coral; yel xacꞌal watxꞌ yili ebꞌ yintaj chꞌen zafiro.

8 Jal tinaniꞌ, yel xacꞌal kꞌej yili ebꞌ yintaj akꞌbꞌalil. Jaꞌ mac chi ilon yin ebꞌ yul-laj calle, cꞌamxa chi naꞌcha mactxequel ebꞌ. Jix tajoc stzꞌuumal ebꞌ yin sbꞌajil, tajin xacꞌal ebꞌ jaxca teꞌ siꞌ.

9 Yel xacꞌal watxꞌ yet mactxequel jix cam yu jowal yintaj mactxequel tol chi cam yu wail, yutol cꞌuancꞌulal xacꞌal chi yun scam ebꞌ, yutol cꞌamxa sloꞌbꞌe ebꞌ.

10 Jaꞌ ebꞌ ix ix watxꞌ snaꞌbꞌal, chi smakꞌ cam yuneꞌ ebꞌ ix, catuꞌ chi yakꞌon ta ebꞌ, chi ẍiꞌon eytoj yuneꞌ ebꞌ, yu cꞌal jun syaꞌilal jix jul yibꞌan ebꞌ jin conobꞌ.

11 Jix eloc jantaj sjowal scꞌul Jehová jix yatej; jix yaon oc skꞌakꞌal conobꞌ Sión, masantaꞌcꞌal jix yakꞌ lawoj ey cimientoal yichlaj.

12 Jaꞌ ebꞌ rey bꞌey yul yibꞌankꞌinal, cꞌal ebꞌ conobꞌ, ma snaꞌ ebꞌ ta tol ey wanoj scajat ebꞌ oj skeꞌ yoctoj yul conobꞌ Jerusalén.

13 Jaxca tuꞌ jix yun yoc spenail ebꞌ ẍejabꞌ Dios, cꞌal yu smul ebꞌ yakꞌomal xaambꞌal, tol jix maltoj ẍiqꞌuil ebꞌ ánima cꞌam spenail yu ebꞌ.

14 Jal tinaniꞌ xin, laan xacꞌal yecꞌabꞌ ebꞌ bꞌey yul-laj scalleal conobꞌ, jaxca yecꞌabꞌ ebꞌ tol cꞌam cꞌaltaꞌ chi skeꞌ yilwani; caw tzꞌiltaj xacꞌal spichil ebꞌ yu chicꞌ, cꞌamxa mactxequel chi ẍaꞌ scꞌul yoc mitxꞌan yin spichil ebꞌ.

15 Chi yalon ebꞌ ánima tet ebꞌ jaxca tiꞌ: Cꞌam ojabꞌ chex jul cu cꞌatan, cꞌam ojabꞌ chex oc mitxꞌan kin, yutol caw tzꞌiltaj jex. Yu jun tuꞌ, jix elcantoj ebꞌ yul sconobꞌ, chi ecꞌabꞌtoj ebꞌ yul junjun conobꞌ, cꞌamxa mac chi chaꞌon ebꞌ.

16 Yetoj sjowal scꞌul Jehová jix yuchon sajlemtoj ebꞌ, ma xacꞌal teynele ebꞌ yu. Cꞌamxa cꞌal yeloc apnoj ebꞌ yakꞌomal xaambꞌal yul sat Jehová, ma xacꞌal okꞌ scꞌul Naj yin ebꞌ icham winaj.

17 Caw jix cu cꞌuumbꞌi a cu majon sjul jun mac chi cu coloni, cꞌam pax mac jix jul colwa kin. Ey taꞌle jun nación eyoc yipoj cu cꞌul, ma pax skeꞌ yu cu scolon eloj.

18 Caw tꞌanan xacꞌal oc ebꞌ cu cajat kin, yin tzet chi yun cu bꞌey cꞌaltoj. Cꞌamxa chi skeꞌ keltoj yul-laj calle yu ebꞌ; jaꞌ tinaniꞌ, tuxa jix jul scꞌual cu lawi eyoj, tuxa jix jul scꞌual yoc camich kibꞌan.

19 Jaꞌ mactxequel chi cu ujteni, yel xacꞌal jelan sbꞌey ebꞌ yintaj noꞌ chii, chi ecꞌ jenenoj bꞌey satcan. Tzajan cꞌal ebꞌ kintaj bꞌey sjolomlaj wonan; chi yaey yaal ebꞌ cu sattaj yet chi cu smajon ebꞌ bꞌey txꞌotxꞌ cusiltaj txꞌotxꞌ.

20 Jaꞌ cu reyal eyoc yipoj cu cꞌul, naj sicꞌbꞌil el yu Jehová, tuxa jix michꞌcha yu ebꞌ. Jaon tiꞌ, jix cu naꞌ tol jaꞌ oj cu colon tet wanxa nación.

21 Jex a Edom, jex che yakꞌ yaawil bꞌey masanil yul conobꞌ Us, tzeeanwej, tzalaanwej, yajbꞌan chi to skeꞌ. Yutol oj apnoj oc syaꞌilal je yibꞌan; jaxca xacꞌal uqꞌuem an oj je yunne, qꞌuixwiltaj xacꞌal oj je yute je bꞌa.

22 Jex a Sión, tuxa jix eloc masanil jantaj syaꞌilal jix ale oc je yibꞌan. Man oj jex ale cantoj yin presowomal yu Jehová yin junelne. Jal jex a Edom jex tiꞌ, yu je penail yuxan oj ale cꞌal pax oc syaꞌilal je yibꞌan yu Jehová, queytuꞌ oj yun xeclo eloj, jantaj yeoc je penail je yibꞌan.