2 Jix jin yujtetoj xol kꞌejkꞌinal bꞌey kꞌej jolinaj yili. Jix jin yakꞌ bꞌeytoj yul-laj bꞌe yin tol cꞌam jin tzejtebꞌal.

3 Masanil cꞌal cꞌu, chin smakꞌon yetoj sjowal scꞌul.

4 Jix yakꞌ ichambꞌoj jin mimanil, kocꞌ xacꞌal jix yute cantoj jin bꞌajil.

5 Jix jin yakꞌ michꞌcha yetoj syaꞌilal cꞌal yetoj cuscꞌulal.

6 Jix jin eyecꞌ xol kꞌejkꞌinal, jaxca xacꞌal yeoc ebꞌ camnajxa yet tax peyxa.

7 Jix jin smajche yul jun colal cꞌamxa chi skeꞌ jin colon jin bꞌa; jix jin skꞌalon ey yetoj chꞌen mimej cadena.

8 Caxcꞌal chi el waw yin jin kꞌanon scolwal, cꞌamxa chi ẍaꞌ yabꞌ tzet chi walaꞌ.

9 Jix smajche el jin bꞌe yetoj chꞌen chꞌen, yuxan txꞌojxa bꞌeal bꞌey jix jin too canoj.

10 Laan jix yute sbꞌa Jehová ey jin, jaxca junoj noꞌ oso chi yewbꞌa el sbꞌa, jaxca wal junoj noꞌ bꞌalam tol tꞌinan cꞌal stit jucna win.

11 Jix jin jutxle bꞌey yul-laj bꞌe, kocꞌ xacꞌal jix jin yute cantoj, jix jin bꞌejlecan yu.

12 Jix swaꞌne oc sjulbꞌal win, jix jin yaon oc sattaj sjulbꞌal tuꞌ.

13 Jaꞌ sjulbꞌal Naj Kaawil jix sjultoj win, caw jix kꞌaxbꞌo ecꞌtoj yul jin cꞌul.

14 Masanil xacꞌal ebꞌ wet animail chi bꞌuchwa ebꞌ win; asanxane jin chin yakꞌ bꞌina ebꞌ xol skꞌane.

15 Jix jin eecꞌ yin syaꞌtajilal yu; caw kꞌaꞌ tzet jix yakꞌ wuqꞌue.

16 Jix poꞌotoj wee yet jix jin eyqꞌuey sat txꞌotxꞌ yu; tuxa cꞌal jix jin cancan telan xol pojoj yu.

17 Caw cꞌamxa cꞌal watxꞌcꞌulal eyecꞌ wetoj, manxa naꞌanoj tzalacꞌulal wu.

18 Chi waloni, tol jix pax wip; jaꞌ tinaniꞌ cꞌamxa Jehová eyoc yipoj jin cꞌul.

19 Jaꞌ yet chin naꞌontej jin cuscꞌulal cꞌal yet jix jin cancan jin txꞌojli, caw jix wetne jin cꞌul yu wabꞌen syaꞌil.

20 Jaꞌ yet chin naꞌontej wan tuꞌ, manxa animaoj jin chi wabꞌe.

21 Jaꞌ tinaniꞌ, ey jun tzetyetal chi woche, tol ey cꞌaltaꞌ ecꞌ yin jin naꞌbꞌal, jaꞌton jun tuꞌ chi woche chi waoc yipoj jin cꞌul.

22 Asanne ton yu scamcꞌulal Jehová, yuxan cꞌam chi cu lawi eyoj, yutol cꞌam chi lawi a scamcꞌulal Naj.

23 Caw miman yeoc scamcꞌulal, jaxca tol acꞌ yili cꞌal junjun skꞌinibꞌalil.

24 Yuxan chi wal jaxca tiꞌ: Ey cꞌal ecꞌ Jehová wetoj, yuxan asanne Naj chi waoc yipoj jin cꞌul.

25 Caw watxꞌ Jehová tet ebꞌ chi yaoc yipoj scꞌul, jaꞌton ebꞌ tol chi sbꞌejoc sbꞌa yul skꞌabꞌ.

26 Yel xacꞌal watxꞌ tol numomi jon yet chi kechbꞌanen scolwal Dios, masantaꞌcꞌal chi colwa Naj ketoj.

27 Yel xacꞌal watxꞌ tol chi kaoc cu bꞌa yul skꞌabꞌ Jehová, yet tax cꞌal cu yaliẍal.

28 Yel xacꞌal watxꞌ tol chi cu can cu txꞌojli yin numomial, yajbꞌan chi yaoc syaꞌilal Jehová kibꞌan.

29 Sowalil tol chi cu oc yin eyilal tet, chi cu ey noan sat txꞌotxꞌ sattaj Naj, tala chi okꞌ scꞌul Jehová kin.

30 Caxcꞌal chi makꞌletoj jun pacꞌoj cu sat, ma chi cu bꞌuchlei, bꞌejan ojabꞌ cu cꞌul cu chaꞌoni.

31 Yutol cꞌam bꞌey chi cu bꞌejlecan yu Jehová yin junelne.

32 Caxcꞌal mi chi yaoc syaꞌilal kibꞌan, caw chi cus pax scꞌul Naj kin, yutol jaꞌ scamcꞌulal caw miman yeocoj.

33 Cꞌam chi ẍaꞌ scꞌul Jehová tol chi yaoc cu cuscꞌulal cꞌal syaꞌilal chi jul kibꞌan.

34 Jaꞌ Jehová cꞌam chi ẍaꞌ scꞌul tol chi etex ebꞌ ánima yu cuscꞌulal yul preso bꞌey junjun conobꞌ,

35 yutol cꞌam chi yoche tol chi iꞌle ecꞌ tzetyetal tol akꞌbꞌil tet ebꞌ yu Jehová, jaꞌton Naj ey yet masanil.

36 Man watxꞌoj yul sat Jehová, ta tol man watxꞌoj chi yun snaꞌle oc yin ebꞌ ánima yin sjichanil.

37 ¿Tumi taꞌ ey junoj mactxequel chi skeꞌ yalon junoj kꞌane, ta manaj Jehová chi aloni? catuꞌ chi yunen junoj tzetyetal.

38 Ta chi jul swatxꞌilal ma syaꞌilal kibꞌan, jaꞌ Jehová chi el yin scꞌul yunen jaxca tuꞌ.

39 ¿Tzet yu, yuxan oj tit cu jowal yin Dios, ta tol yu cu penail yuxan chi jul junoj syaꞌilal kibꞌan?

40 Cu naꞌwej sicꞌlebꞌil tzet utbꞌil yili cu naꞌbꞌal, catuꞌ chi kaon oc cu bꞌa yul skꞌabꞌ Jehová.

41 Kawejtoj cu naꞌbꞌal yet chi cu txali tet Dios ey bꞌey satcan, catuꞌ chi kalon tet jaxca tiꞌ:

42 Jix oc cu penail cꞌal cu pitalil ey jaach, ma ja wakꞌ tan cu penail tuꞌ kibꞌan jon.

43 Jix tit sjowal ja cꞌul kin, jix jon ja wujteni, jix jon ja qꞌueyon el yin tol cꞌamxa cꞌal ja mimancꞌulal.

44 Jix ja cꞌubꞌa el ja bꞌa xol jun asun, yet watxꞌ cꞌamxa cha wabꞌ cu txa chi kaltoj ey jaach.

45 Jaxca xacꞌal kꞌalem jix jon ja wute sattaj masanil ebꞌ ánima.

46 Masanil xacꞌal ebꞌ chi jowi oc kin, caw jix bꞌuchwa ebꞌ kin jon.

47 Jaꞌ xiwcꞌulal, cꞌal tzet ey smey, syaꞌilal cꞌal uchlebꞌail jix jul kibꞌan jon.

48 Caw chi el jiioj yal jin sat yu cuscꞌulal, yutol lalan slawi ey ebꞌ wet conobꞌ.

49 Cꞌam chin bꞌej wokꞌi, yutol lalan cꞌal wabꞌen syaꞌil,

50 masantaꞌcꞌal oj kechbꞌane scolwal Jehová bꞌey satcan.

51 Caw yaꞌ xacꞌal jin sat chi wabꞌe yetoj jin pixan, yu tzet chi ecꞌtoj yibꞌan ebꞌ ix ix bꞌey yul jin conobꞌ.

52 Jaꞌ ebꞌ chi jowi oc win, jix jin yujte ecꞌ ebꞌ jaxca noꞌ tzꞌiquin, yin cꞌam cꞌal tzet chi wute ebꞌ.

53 Jix jin skꞌojeytoj ebꞌ yin wiquisal bꞌey yul jun jolan, catuꞌ jix smajchen can jun jolan tuꞌ ebꞌ yetoj chꞌen chꞌen, cꞌamxa bꞌey chi skeꞌ jin colon jin bꞌa.

54 Jix jin eycantoj laan xol jaꞌ, jix jin naꞌ tol oj jin qꞌuey xacꞌal cantoj xol jaꞌ tuꞌ.

55 Jaach Jehová jin Diosal, jix jin awi ey jaach, bꞌey snaatil yich jun jolan tuꞌ.

56 Caw jix wal jin bꞌa ey jaach, yet chin ja colon eloj; jix ja wabꞌ tzet jix jin kꞌanaꞌ.

57 Jix jaach jul jin cꞌatan yet jix jaach wawteni, catuꞌ jix ja walon ey jin: Cꞌam ojabꞌ chach xiwi, ja chi.

58 Jaach jin Diosal, jaach jix jin ja colcan el yul skꞌabꞌ camich.

59 Jaach Jehová jin Diosal, ilaꞌ bꞌey chin etnelei. Asanne jaach chach colwa wetoj, waꞌne jin oc yin sjichanil.

60 Ilaꞌ yili tzet chi yoche ebꞌ chi jowi oc win, cꞌal snaꞌon ebꞌ tzet oj jin yute.

61 Jaach jin Diosal, ja wotaj jantaj tzet chi yal ebꞌ, cꞌal masanil jantaj tzet chi snaꞌ ebꞌ win.

62 Junjun cꞌal cꞌu chin yaloꞌtane ebꞌ, chi snaꞌon ebꞌ tzet oj jin yute ebꞌ.

63 Ilaꞌ tol masanil cꞌal cꞌu cꞌal akꞌbꞌalil chi bꞌuchwa ebꞌ win.

64 Jaach jin Diosal, pajtze tet ebꞌ jaxca smooal ẍaꞌon yu tzet chin yute ebꞌ.

65 Akꞌ pitbꞌoj el snaꞌbꞌal ebꞌ, catuꞌ cha waon cantoj syaꞌtajilal yibꞌan ebꞌ.

66 Jaach jin Diosal, ujte ebꞌ yetoj sjowal ja cꞌul. Quey ojabꞌ a ebꞌ ja wu bꞌey yul yibꞌankꞌinal tiꞌ.