2 Cꞌamxa junoj conobꞌ bꞌey caan ebꞌ yicꞌaal Jacob, jix cancan yu Jehová. Jaꞌ yu sjowal scꞌul, yuxan yin jun txolan jix akꞌle lawoj ey scuartel ebꞌ soldado yet Judá. Tuxa jix eyqꞌuey jun nación tiꞌ sat txꞌotxꞌ yu, yetoj cꞌal masanil ebꞌ yaaw yeoc bꞌey.

3 Pilan jix akꞌle lawoj masanil ebꞌ soldado Israel yu sjowal scꞌul Jehová, ma xa colwa yetoj yet jix jul wan scajat ebꞌ yin. Jix yaoc sjowal scꞌul yibꞌan ebꞌ yicꞌaal Jacob, laan sjowal scꞌul jaxca junoj miman kꞌakꞌ chi akꞌon lawoj masanil tzetyetal.

4 Jaꞌ Jehová, laan jix yute sbꞌa jaxca junoj chi uchon lawoj ey junoj tzetyetal, jix yatoj sjulbꞌal yetcꞌulal conobꞌ. Jaxca junoj makꞌon cam ánima, queytuꞌ jix yun smakꞌon cam ebꞌ camcꞌulnebꞌil yu. Jaxca wal junoj kꞌakꞌ, queywal tuꞌ yeoc sjowal scꞌul yibꞌan scalubꞌal ebꞌ a Sión.

5 Jaꞌ Jehová, laan jix yute sbꞌa jaxca junoj chi uchon lawoj junoj tzetyetal. Jix yakꞌ lawoj ey Israel yin junelne. Jix yuch lawoj masanil scuartel ebꞌ soldado cꞌal sdespacho ebꞌ yaaw bꞌey conobꞌ Judá; junjun cꞌal cꞌu eyoc syaꞌilal yibꞌan ebꞌ.

6 Jaxca xacꞌal chi yun yetneletoj junoj awo, queytuꞌ jix yun yetnentoj stemplo Jehová bꞌey chi oc yambꞌabꞌail. Jaꞌ jix akꞌon too qꞌueycꞌulal wan kꞌin cꞌal scꞌual xewilal yu conobꞌ Sión. Jaꞌ yu sjowal scꞌul Jehová, yuxan jix yintajne can el ebꞌ rey cꞌal ebꞌ yakꞌomal xaambꞌal.

7 Jix yintajne can el Jehová jun yet xaambꞌal, catuꞌ cꞌamxa yopiso stemplo yu. Tuxa jix yaoc yul skꞌabꞌ ebꞌ chi uchon ey snail scalubꞌal. Manxa jantajoj aw chi oc bꞌey stemplo Jehová, jaxca xacꞌal tol scꞌual kꞌin.

8 Jaꞌ Jehová jix snaꞌbꞌalne el yuchon ey smuroal conobꞌ Sión. Jix cam snaꞌon tzet oj yun yuchon lawoj, cꞌam cꞌal chi xew niꞌoj, masantaꞌcꞌal jix yiꞌ sbꞌa tzet naꞌbꞌil yu. Junne xacꞌal jix yun yeyqꞌuey bꞌulna storreal cꞌal smuroal.

9 Tuxa cꞌal jix ey can wejan spuertail jun conobꞌ tuꞌ sat txꞌotxꞌ, jix kꞌatoj yul eyocoj. Jaꞌ sreyal, cꞌal ebꞌ eyoc yin yaawil, jaꞌ xol ebꞌ txꞌoj conobꞌal jix toocan ebꞌ; cꞌamxa sley Dios tituꞌ. Jaꞌ ebꞌ ẍejabꞌ Jehová, cꞌamxa tzet chi akꞌle yil ebꞌ yin weyicheal.

10 Jaꞌ ebꞌ icham winaj yul conobꞌ Sión, tzꞌin xacꞌal ẍi ebꞌ, chotan ey ebꞌ bꞌey sat txꞌotxꞌ. Chi yaatoj pojoj ebꞌ yin sjolom, chi yaon oc eel pichile ebꞌ. Jaꞌ ebꞌ ix kꞌopo ix bꞌey Jerusalén, chi ey noan ebꞌ sat txꞌotxꞌ.

11 Caw chi etex el jin sat yu okꞌil, caw chi nicꞌcha xaam jin cꞌul chi wabꞌe; cꞌamxa wip chi wabꞌe, yet chi wilon slawi ey ebꞌ wet conobꞌ, jaꞌ ebꞌ unin lalanto xutxwi, chi cam ebꞌ yu wail bꞌey yul-laj scalleal conobꞌ.

12 Chi yalon ebꞌ unin tet xutx jaxca tiꞌ: Akꞌ cu loꞌbꞌe, akꞌ tzet chi kucꞌ jon, ẍi ebꞌ. Jaxca tol yasil chi iꞌon ebꞌ, chi telcꞌotoj ebꞌ yul-laj scalleal conobꞌ, chi sbꞌejon ey sbꞌa ebꞌ yul skꞌabꞌ xutx, catuꞌ chi cam ebꞌ.

13 ¿Jex a Jerusalén, mac yetoj oj skeꞌ jex jin laanbꞌaneni? Jex a conobꞌ Sión, ¿tzet junoj txꞌoxbꞌanile chin txꞌox ey jex, yet chex jin mimancꞌulneni? Caw miman jix yun je lawi eyoj, ¿Macto wal oj jex akꞌon waꞌxoj a junelxa?

14 Jaꞌ tzet jix yal ebꞌ ẍejabꞌ Dios ey jex, man jichanoj jix yun yalon el ebꞌ ey jex. Ma txꞌoxle el je penail yu ebꞌ, yuxan ma qꞌuexcha je naꞌbꞌal. Lekꞌtiꞌal kꞌane jix al-le ey jex, jix je yaon oc yipoj je cꞌul.

15 Jaꞌ yet chi il-le Jerusalén yu ebꞌ chi ecꞌ yul-laj bꞌe, tuxa cꞌal chi smakꞌ skꞌabꞌ ebꞌ, yin sbꞌuchwai. Chi xubꞌli ebꞌ, caw chi yakꞌ bꞌilwoj sjolom ebꞌ yin sbꞌuchwai, catuꞌ chi yalon ebꞌ jaxca tiꞌ: ¿Jaꞌ mi jun conobꞌ tiꞌ chi bꞌina bꞌey sat txꞌotxꞌ tiꞌ tol txꞌojxa swatxꞌil yili? ẍi ebꞌ, yet chi yalon ebꞌ.

16 Masanil ebꞌ chi jowi oc yin jun conobꞌ tuꞌ, chi yal pena kꞌane ebꞌ yin. Tol chi xubꞌli ebꞌ, chi a txꞌumna ebꞌ, chi yalon ebꞌ jaxca tiꞌ: Tuxa jix kakꞌ lawoj ey yin junelne. Jaꞌton wal jun cꞌual tiꞌ echbꞌanebꞌil ku, yuxan lalan wal kilon tinaniꞌ, ẍi ebꞌ.

17 Tuxa jix yun tzetyetal tol naꞌbꞌilxa yu Jehová, tuxa jix yun skꞌane albꞌilcan yu yet tax peyxa. Jix cu yakꞌ lawoj, ma cꞌal yakꞌ mimancꞌulal kin. Jix el yin scꞌul tol jix cu tzeele yu ebꞌ chi jowi oc kin, jix yiꞌon yip ebꞌ yet jix cu yakꞌon eyqꞌuey ebꞌ.

18 Jex a Sión, kꞌanwej scolwal Jehová je yetoj. El ojabꞌ yal je sat yet cꞌualil cꞌal yet akꞌbꞌalil. Cꞌam ojabꞌ che bꞌej je yokꞌi, cꞌam ojabꞌ chex oc tucan je txali.

19 Kocꞌtaj cꞌal chex a waan, catuꞌ chi a je yaw je txali yet akꞌbꞌalil, yin je kꞌanon scolwal Jehová. Yin ojabꞌ masanil je cꞌul chex jul sattaj Jehová. Iꞌwej a je kꞌabꞌ yet chex txali tet Naj, kꞌanwej scolwal yibꞌan ebꞌ je yuninal, yutol ey bꞌey lalan scam ebꞌ xiquinlaj scalleal conobꞌ yu wail.

20 Jaach Jehová jin Diosal, naꞌtej, cꞌamto bꞌey queytuꞌ cha wute ebꞌ ánima jaxca chon ja wute tiꞌ. ¿Tumi smoo ey ebꞌ ix txutxe chi ẍiꞌeytoj yuneꞌ tol lalanto xutxwi? ¿Tumi smoo chi makꞌle cam ebꞌ yakꞌomal xaambꞌal, cꞌal ebꞌ ja chejabꞌ bꞌey yul ja templo?

21 Ebꞌ achꞌe cꞌal ebꞌ icham winaj, tuxa cꞌal jix ey latzꞌan ebꞌ scam bꞌey yul-laj calle; ebꞌ achꞌe cꞌal ebꞌ kꞌopo ix, jix cam ebꞌ yu chꞌen espada. Yet jix tit sjowal ja cꞌul, jix ja makꞌon cam ebꞌ, ma xacꞌal ja wakꞌ mimancꞌulal yin ebꞌ.

22 Jaach Jehová jin Diosal, jaꞌ yet jix stit sjowal ja cꞌul kin, caw jix lawi jul masanil ebꞌ cu cajat kinlaj jon jaxca wal yet chi syambꞌan sbꞌa ebꞌ ánima yin junoj kꞌin, cꞌamxa junoj mactxequel jix colcha eloj. Jaꞌ ebꞌ kuninal jix kil chꞌibꞌ jon, jix cu cuy ebꞌ, pilan jix makꞌle cam ebꞌ yu ebꞌ cu cajat jon.