2 Jaꞌ yet peyxa, jaxca tol yaaw yeoc xol wanxa mimej conobꞌlaj, jal pax tinaniꞌ xin, tol chi akꞌle pural yoc yin mulnail. Tuxa cꞌal chi siꞌson scꞌul yokꞌ yet akꞌbꞌalil; tuxa cꞌal chi eytej jiioj yal sat yin spacꞌul sat. Jaꞌ xol masanil ebꞌ swatxꞌil ánima bꞌey yul-laj wan conobꞌ tuꞌ, cꞌamxa junoj mac chi mimancꞌulneni. Masanil xacꞌal ebꞌ chi jowi oc yin.

3 Caw yaꞌtaj yeoc ebꞌ a Judá, yutol eyoc ebꞌ yin mulnail caw yaꞌtaj; ilaꞌ tol jix iꞌletoj ebꞌ yin presowomal. Jaꞌ tinaniꞌ, eyxa ecꞌ ebꞌ xol wanxa nación, tol cꞌam chi xew niꞌoj ebꞌ yin smulnail. Eyxa ecꞌ ebꞌ xol syaꞌtajilal; jix michꞌcha ebꞌ yu ebꞌ chi ujten ecꞌoj.

4 Cusiltaj xacꞌal yili sbꞌeal Sión tinaniꞌ, cꞌamxa junoj mactxequel chi jul ilo kꞌin. Tzꞌinini xacꞌal ye can spuertail sconobꞌ. Asanxane okꞌil chi yun ebꞌ yakꞌomal xaambꞌal. Jaꞌ ebꞌ kꞌopo ix, caw chi tac scꞌul ebꞌ. Yutol jaꞌ conobꞌ Jerusalén caw chi yabꞌ syaꞌil sicꞌlebꞌil.

5 Tuxa jix eyqꞌuey ebꞌ yu wan chi jowi oc yin ebꞌ; yutol lalan cꞌal ya can wan scajat ebꞌ tuꞌ. Jaꞌ Jehová jix aon oc syaꞌilal yibꞌan ebꞌ, yutol yel xacꞌal miman spenail ebꞌ jix yaocoj. Tuxa jix iꞌletoj masanil ebꞌ caan tituꞌ yin presowomal yu wan scajat ebꞌ tuꞌ.

6 Tuxa jix qꞌueya swatxꞌilal yili conobꞌ Sión. Jaꞌ ebꞌ yaaw yeoc xol ebꞌ, laan xacꞌal ebꞌ jaxca noꞌ scꞌultajil che tol cꞌamxa chi ilcha sloꞌbꞌe, yuxan lalan spax yip ebꞌ. Tuxa cꞌal jutxbꞌil oc yajan ebꞌ sattaj ebꞌ chi ujteni.

7 Jaꞌ yet lalan yabꞌen syaꞌil ebꞌ a Jerusalén yin etnecꞌulal, chi snaꞌontej masanil sbꞌeomal ebꞌ yet yalantoj. Jaꞌ yet jix eyqꞌuey ebꞌ yul skꞌabꞌ wan scajat ebꞌ tuꞌ, cꞌamxa mactxequel jix colon el ebꞌ. Jaꞌ yet chi il-le oc yin ebꞌ yu wan scajat ebꞌ tuꞌ, chi bꞌuchwa oc ebꞌ yin ebꞌ, yutol jix eyqꞌuey ebꞌ.

8 Jaꞌ ebꞌ ánima bꞌey conobꞌ Jerusalén, yel xacꞌal miman spenail ebꞌ jix yaocoj, yuxan smoo ton wal yal-le yin ebꞌ. Jaꞌ ebꞌ tol miman yeloc apnoj jun conobꞌ tuꞌ yul sat yet peyxa, cꞌamxa chi ochele ebꞌ tinaniꞌ, yutol jix iꞌle el sqꞌuixwil ebꞌ. Yuxan jaꞌ ebꞌ a Jerusalén, caw chi okꞌ ebꞌ, tuxa cꞌal chi smajche el sat ebꞌ yu qꞌuixwilal.

9 Caw miman txequel yeoc spenail ebꞌ caan bꞌey Jerusalén tuꞌ, caw cꞌam chi snaꞌ niꞌoj ebꞌ tzet oj jul yibꞌan. Caw qꞌueyubꞌtaj xacꞌal jix yun yeyqꞌuey sconobꞌ ebꞌ, cꞌamxa junoj mactxequel chi akꞌon smimanil scꞌul ebꞌ. Yu jun tuꞌ, chi yalon ebꞌ jaxca tiꞌ: Jaach Jehová cu Diosal, ilon wal oc xol syaꞌilal eyoc kibꞌan tiꞌ jon, yutol jix uchle lawoj ey cu conobꞌ yu ebꞌ cu cajat jon, ẍi ebꞌ.

10 Pilan jix yelkꞌanetoj masanil sbꞌeomal Jerusalén ebꞌ. Tꞌanan wal oc ebꞌ ánima, catuꞌ jix octoj lemna ebꞌ txꞌoj conobꞌal bꞌey yul stemplo Dios, jaꞌton wan ánima tol jix yal Jehová, tol cꞌam chi skeꞌ yoctoj.

11 Masanil ebꞌ ánima caan yul jun conobꞌ tuꞌ, caw chi okꞌ ebꞌ yet chi ecꞌ seyon sloꞌbꞌe ebꞌ. Jaꞌ sbꞌeomal ebꞌ jix yatoj sqꞌuexeloj sloꞌbꞌe, yet watxꞌ, cꞌam chi cam ebꞌ yu wail. Jix walon jaxca tiꞌ: ¡Jaach jin Diosal, ocan wal tꞌanan kin jon, ilaꞌ wal chi yun cu lawi ey jon! ¡Jaach jin Diosal, il wal oc ja cꞌul kin yu syaꞌilal eyoc kibꞌan tiꞌ jon!

12 Jaex lalan je too yul-laj bꞌe tiꞌ, ocanwej tucanoj, catuꞌ che naꞌoni, ¿ey mi wal syaꞌilal tuxa jix ecꞌ el jaxca chi cu utele tiꞌ? Yel xacꞌal chi ecꞌ yibꞌan kabꞌen syaꞌil. Jaꞌ Jehová jix aontej jun syaꞌilal tiꞌ kibꞌan yu sjowal scꞌul.

13 Jaꞌ Jehová jix aontej jun kꞌakꞌ bꞌey satcan, yet chi yakꞌ lawoj ey cu bꞌajil. Jix swaꞌne ey jun yaal cu sattaj, queytuꞌ jix yun cu meltzotoj kintaj. Jix cu bꞌejlecan yu, junjun xacꞌal txolan chi yaoc syaꞌilal kibꞌan.

14 Tuxa jix yil Jehová cu penail, jacꞌal oc cu penail tuꞌ jix cu kꞌalon eyoj, jaxca wal junoj ijatz caw al yeoc kibꞌan, caw chi pax kip yu. Jaꞌ Jehová jix cu aon oc yul skꞌabꞌ ebꞌ cu cajat; cꞌamxa chi skeꞌ cu tecꞌbꞌan cu bꞌa tet ebꞌ.

15 Caw naat jix bꞌejlecan ebꞌ soldado chi cu colon el xol jowal yu Jehová. Jix yaontej jun miman bꞌulan soldado yin yakꞌon jowal kin, yet chi lawi ey masanil ebꞌ achꞌe cu xol. Tuxa jix cu tecꞌle ey jaon a Judá jon tiꞌ yu Jehová, jaxca wal chi yun stecꞌle el yal an uva.

16 Yu jun tuꞌ, yuxan chi cu okꞌi; caw chi el yal cu sat. Cꞌamxa junoj mactxequel chi akꞌon smimanil cu cꞌul; cꞌamxa junoj mac chi skeꞌ yakꞌon cu tecꞌanil. Jix cancan ebꞌ kuninal xol syaꞌilal, yutol jaꞌ ebꞌ cu cajat yel xacꞌal jelan yakꞌon jowal ebꞌ ey jon.

17 Jaꞌ Sión tiꞌ, chi yiꞌa skꞌabꞌ yet chi txali, cꞌamxa mactxequel chi mimancꞌulneni. Yutol jaꞌ Jehová jix yambꞌantej ebꞌ caan cu cawilal yet chi yakꞌon jowal ebꞌ kin. Jaꞌ Jerusalén tiꞌ, intajnebꞌilxa el yu ebꞌ ánima.

18 Jix yun Jehová jaxca wal smooalil, yutol caw pit jix kute cu bꞌa bꞌey ẍejbꞌanil. Je masanil jex conobꞌ, abꞌwej wal tzet oj kal ey jex; ilwej ton abꞌ wan syaꞌilal eyoc kibꞌan tiꞌ jon. Jaꞌ ebꞌ kuninal jon, jix iꞌletoj ebꞌ yin yakꞌomaloj servilal.

19 Jix cu kꞌan scolwal wan nacionlaj eyoc ketoj yaloni, tucꞌal chi cu yetne ebꞌ. Jaꞌ ebꞌ naj yakꞌomal xaambꞌal, cꞌal ebꞌ icham winaj, lalan yecꞌ seyon sloꞌbꞌe ebꞌ yul-laj scalleal conobꞌ, catuꞌ jix cam ebꞌ.

20 Jaach Jehová cu Diosal, ilaꞌ wal wan syaꞌilal eyoc kibꞌan tiꞌ jon, caw chi nicꞌcha xaam cu cꞌul chi kabꞌ jon. Caw chi oc pitzꞌitzꞌoj syaꞌilal tuꞌ yin cu cꞌul jon, yet chi cu naꞌontej cu pitalil jix el kunen ja sattaj. Jaꞌ bꞌey yinlaj conobꞌ tiꞌ, chi cam ebꞌ ánima yu jowal, quey pax tuꞌ yul conobꞌ tiꞌ, ey cꞌal pax camich chi oqui.

21 Jaꞌ ebꞌ ánima, chi yabꞌ ebꞌ yel kaw yu cu cuscꞌulal jon, cꞌamxa junoj mactxequel chi akꞌon smimanil cu cꞌul jon. Masanil ebꞌ chi jowi oc kin jon, yotaj ebꞌ tol eyoc syaꞌilal kibꞌan jon, caw chi tzala ebꞌ yu wan syaꞌilal jix ja waoc kibꞌan tiꞌ jon. Jul ojabꞌ scꞌual tol albꞌilcan ja wu yet peyxa, yet watxꞌ laan oj yun ebꞌ jaxca chi kun tiꞌ jon.

22 Naꞌtej jantaj spenail ebꞌ jix yaoc ja sattaj; jaxca ojabꞌ chon ja wute tiꞌ, quey ojabꞌ tuꞌ, cha wute pax ebꞌ. Jaon tiꞌ jon, caw chi cu okꞌ sicꞌlebꞌil jon, chi pax yip cu pixan jon, ẍi ebꞌ a Jerusalén tet Jehová.