Albꞌil El Kꞌane Yin Ebꞌ Yilomal Conobꞌ Israel
34
Jix kꞌanabꞌ pax Jehová ey jin, jix yalon jaxca tiꞌ: 2 Jaach ánima, al jin kꞌane yin ebꞌ yilomal conobꞌ Israel tiꞌ, cha walon jaxca tiꞌ: Jaꞌ Jehová Naj Yaaw chi alon jaxca tiꞌ: Caw okꞌbꞌal cꞌul ebꞌ yilomal conobꞌ Israel tiꞌ, yutol asanne ebꞌ chi steyne sbꞌa xꞌojli, manaj ebꞌ conobꞌ chi steyne ebꞌ jaxca taꞌ smooalil. 3 Jaex tiꞌ, laan jex jaxca junoj ilom meꞌ, tol asan cꞌal yuqꞌuen slecheal noꞌ, cꞌal swaꞌnen spichil ebꞌ yetoj xil noꞌ, cꞌal smakꞌon cam noꞌ caw bꞌakꞌech yin ẍiꞌoni, man pax yotaj oj chi steyne low smeꞌ. 4 Cꞌam chi syaꞌilne noꞌ meꞌ tol tzꞌontaj, tam wal chi yante noꞌ yaꞌey, cꞌal noꞌ kꞌail yajan. Cꞌam chi syambꞌa oc noꞌ chi sajlemtoj, tam wal chi seyecꞌ noꞌ chi qꞌuey cantoj. Asan cꞌal yetneni cꞌal smakꞌle noꞌ yu. 5 Jaꞌ ebꞌ jin conobꞌ tuꞌ, laan ebꞌ jaxca noꞌ meꞌ cꞌam yilomal eyocoj, tuxa cꞌal chi sajlem cantoj ebꞌ, jaꞌ noꞌ chiꞌwawom xol-laj teꞌal noꞌ chi chiꞌontoj noꞌ. 6 Catuꞌ chi qꞌuey cantoj noꞌ bꞌey sjolomlaj wonan, cꞌal bꞌey txꞌotxꞌ tzalquiltaj, yal cꞌal bꞌey chi sajlem cantoj noꞌ. Cꞌamxa mactxequel chi oc il yu stoo seyon ecꞌ noꞌ.7 Yu jun tuꞌ xin, jex yilomal jin conobꞌ, chi cam wal je yabꞌen tzet chi walaꞌ. 8 Jain Jehová Yaaw jin chi walaꞌ: Jaꞌ ebꞌ jin conobꞌ tuꞌ, laan yeoc ebꞌ jaxca noꞌ meꞌ cꞌam yilomal. Chi sajlemtoj, catuꞌ chi chiꞌle eytoj yu noꞌ xol-laj teꞌal noꞌ, jal jex che tzꞌaj je yalaꞌ tol jaex che yil ebꞌ jin conobꞌ tiꞌ, cꞌam che teyne ebꞌ, asanne jex che teyne je bꞌa je txꞌojli. 9 Yu jun tuꞌ, jex yilomal jin conobꞌ, abꞌwej tzet chi walaꞌ. 10 Jain Jehová Yaaw jin chi wal jaxca tiꞌ: Tol caw chi tit jin jowal je yin, yuxan oj wakꞌ sowalil jin conobꞌ tiꞌ ey jex. Oj jex wiꞌel yin je yopiso yin je teynen ebꞌ jin conobꞌ tiꞌ, yet watxꞌ che bꞌej je teynen je bꞌa jaex tiꞌ. Oj wiꞌecꞌ ebꞌ yul je kꞌabꞌ, yet watxꞌ cꞌamxa chex lowoc yin ebꞌ.
Jun Watxꞌ Ilom Meꞌ
11 Jain Jehová Yaaw jin chi walaꞌ, tol jain caw oj jin yambꞌa oc ebꞌ jin conobꞌ tiꞌ, cꞌal jin teynen ebꞌ. 12 Jaxca junoj ilom meꞌ tol chi oc il yu smeꞌ yet chi sajlemtoj noꞌ, jaxca tuꞌ oj yun woc il yu ebꞌ jin conobꞌ tiꞌ. Oj jin yambꞌa oc ebꞌ jix sajlemtoj bꞌey xol kꞌej jolinaj, cꞌal bꞌey ey smey. 13 Jain oj wiꞌeltej ebꞌ xol wanxa txꞌoj nacionlaj. Oj jin yambꞌa oc ebꞌ, catuꞌ oj wiꞌontoj ebꞌ bꞌey xꞌotxꞌal bꞌey titnaj. Oj apnoj oc caan ebꞌ bꞌey txꞌotxꞌ txꞌotxꞌ yaax sat yul yet Israel, cꞌal bꞌey ey jaꞌ snukꞌjaꞌlaj, cꞌal xol-laj ebꞌ caan cꞌaltaꞌ tituꞌ. 14 Jaxca chi yun yiꞌontoj low smeꞌ junoj ilom meꞌ bꞌey sjolomlaj wonan bꞌey ey an yaax cꞌultaj, queytuꞌ oj wute ebꞌ jin conobꞌ tiꞌ. Jaꞌ tituꞌ chi xew noꞌ, cꞌal slow noꞌ bꞌey ey an yaax cꞌultaj. 15 Jain Jehová jin chi walaꞌ tol oj jin teyne ebꞌ jin conobꞌ tuꞌ, catuꞌ oj wiꞌontoj ebꞌ xewoj.
16 Oj jin seyecꞌ ebꞌ qꞌueynajtoj, oj jin yambꞌa oc ebꞌ sajleminaj ye cantoj, oj wante ebꞌ yasinajtoj, oj wakꞌon yip ebꞌ tzꞌontaj, catuꞌ oj jin teyne ebꞌ bꞌakꞌech, cꞌal ebꞌ ey yip. Queyton tuꞌ oj yun jin teyne ebꞌ jin conobꞌ jaxca wal smooalil.
17 Jain Jehová Yaaw jin chi walaꞌ: Jain oj jin naꞌon je yin junjun jex, jex tol laan jex jaxca meꞌ, cꞌal jex tol laan jex jaxca chiw. 18 Ey jex jaex tiꞌ tol laan jex jaxca noꞌ meꞌ tol asan an yaax chꞌim chi sloꞌ, tuxa cꞌal chi stecꞌtoj wanxa an. Chi yucꞌ cꞌal pax jaꞌ saj jaꞌ noꞌ, jal niꞌojxa jaꞌ xin, tuxa cꞌal chi stecꞌcantoj. 19 ¿Tumi watxꞌ ta tol jaꞌ wanxa noꞌ meꞌ oj loꞌon an cꞌultaj tol tecꞌbꞌilxatoj, cꞌal yuqꞌuen jaꞌ jaꞌ tol tatxa yili tuꞌ? 20 Yu jun tuꞌ, yuxan jain Jehová Yaaw jin chi wal ey jex, tol jain caw oj jin colwa yetoj ebꞌ yeynajil, catuꞌ oj waon oc syaꞌilal yibꞌan ebꞌ mimej yeloc apnoj yin yopiso. 21 Jaex tol mimej je yeloc apnoj yin je yopiso tiꞌ, tol tax che yujte ecꞌ ebꞌ yeynajil, jaxca chi yun junoj ilom meꞌ tol caw ey yip chi yujten ecꞌ noꞌ cꞌam yip. 22 Yu jun tuꞌ, yuxan jain oj jin col ebꞌ yeynajil yeoc xol jin conobꞌ, yet watxꞌ cꞌamxa chi etex ebꞌ yu ebꞌ ey yopiso. 23 Jain oj waoc junoj je teynemal jaex tiꞌ, jaꞌton jin chejabꞌ David. Jaꞌ oj jex teynen jaxca junoj ilom meꞌ tol watxꞌ chi yute steynen smeꞌ. 24 Jain caw Jehová jin chi walaꞌ, tol je Diosal jin, yuxan jaꞌ jin chejabꞌ David oj waoc je yaawiloj. 25 Oj wakꞌ jin wa kꞌane je yetoj, yet watxꞌ tzalacꞌulal oj yun je caey ecꞌoj. Oj wiꞌon el masanil tzetyetal tol ey smey yul jin nación tiꞌ, yet watxꞌ cꞌamxa tzet oj je naꞌ, tol tzalacꞌulal xacꞌal oj yun je weyi caxcꞌal xol-laj teꞌ chex caey ecꞌoj.
26 Oj wakꞌ yaxilal je yibꞌan, catuꞌ oj wakꞌon jin watxꞌcꞌulal bꞌey txꞌotxꞌ tzalquiltaj bꞌey chi oc eyilal ey jin, catuꞌ oj wakꞌon cꞌal pax eyqꞌuey nabꞌ yin stiempoal, yet che chaꞌon syaaxilal oj wakꞌ ey jex. 27 Oj yakꞌ sat teꞌ awbꞌeal teꞌ, catuꞌ oj yakꞌon yawoal sat txꞌotxꞌ txꞌotxꞌ tiꞌ, catuꞌ yin xacꞌal tzalacꞌulal oj jex caey ecꞌ bꞌey sat je txꞌotxꞌ. Jain oj jex jin colel yul skꞌabꞌ ebꞌ bꞌey ey jex oc yakꞌomaloj servilal tinaniꞌ. Queyton tuꞌ oj yun snaꞌcha el je yu, tol jain ton Jehová jin. 28 Jaꞌ wanxa nación, manxa oj yelkꞌane ecꞌ je tzettaj yetal ebꞌ, manxa pax oj jex chiꞌletoj yu noꞌ chiꞌwawom noꞌ, watxꞌ xacꞌal oj yun je caey ecꞌoj. Cꞌamxa mactxequel oj jex xibꞌtenoj. 29 Jain oj wakꞌ yaaxbꞌoj sat je txꞌotxꞌ, miman sat je yawo oj yakꞌa, yet watxꞌ manxa oj je yetne je cꞌul yu wail, manxa oj jex bꞌuchle pax yu wanojxa nacionlaj. 30 Oj je yotajne eloj tol jain ton Jehová je Diosal jin. Jain Jehová Yaaw jin chi walaꞌ, tol ey jin cꞌal ecꞌ je yetoj jaex conobꞌ Israel jex tiꞌ, yutol jin conobꞌ je yeocoj. 31 Jain caw chi walaꞌ, tol jaex jin conobꞌ jex tiꞌ, teynebꞌil jex wu jaxca noꞌ meꞌ tol teynebꞌil, yutol je Diosal jin. Jain Jehová jin chi walaꞌ, ẍi Dios.