Kꞌane Albꞌilcan El Yibꞌan Txꞌotxꞌ Seír
35
Jix kꞌanabꞌ Jehová ey jin, jix yalon jaxca tiꞌ: 2 Jaach ánima, meltzaantoj tꞌanan bꞌey yetcꞌulal txꞌotxꞌ tzalquiltaj yul yet Seír, catuꞌ cha walon el jin kꞌane yibꞌan txꞌotxꞌ. 3 Cha walon jaxca tiꞌ:Jaꞌ Jehová Naj Yaaw chi alon jaxca tiꞌ: Jex ánima caan jex bꞌey txꞌotxꞌ tzalquiltaj yul yet Seír, jain chi walaꞌ tol caw chi tit jin jowal je yin, yuxan oj waoc syaꞌilal je yibꞌan, cusiltaj txꞌotxꞌ xacꞌal oj wute can je conobꞌ, yutol oj uchcha can ey je conobꞌ tuꞌ.
4 Oj lawoj ey je conobꞌal tuꞌ yin junelne. Cusiltaj txꞌotxꞌ xacꞌal oj wute cantoj. Queytuꞌ oj yun snaꞌcha el je yu, tol jain ton Jehová jin.
5 Yutol chex jowi cꞌaltaꞌ oc yin conobꞌ Israel tuꞌ yet peyxa, je yanaj oc camich yibꞌan ebꞌ yet eyoc syaꞌil yibꞌan ebꞌ yu spenail. 6 Yu jun tuꞌ, jain Jehová Yaaw jin chi wakꞌcan jin tiꞌ, tol oj jex waoc yul skꞌabꞌ camich, jaꞌ camich tuꞌ oj jex ujten ecꞌoj, yutol eyxa oc camich je yibꞌan. 7 Cusiltaj txꞌotxꞌ xacꞌal oj wute cantoj txꞌotxꞌ Seír, cꞌamxa junoj mactxequel oj skeꞌ yecꞌabꞌ tituꞌ. 8 Oj wakꞌ noel bꞌey txꞌotxꞌ tzalquiltaj, bꞌey jobꞌelaj, cꞌal bꞌey yul-laj jaꞌ, pilan oj noel yu smimanil camnaj, jaꞌton ebꞌ oj cam xol jowal. 9 Junelne oj wakꞌcan je txꞌotxꞌal yin cusiltajil, cꞌamxa mac oj caey ecꞌ bꞌey yul-laj je conobꞌ tuꞌ. Queyton tuꞌ oj yun je yotajnen eloj tol jain ton Jehová jin.
10 Jaex tiꞌ, je yotaj tol jain Jehová jin tiꞌ ey jin ecꞌ tituꞌ, jaex tiꞌ che yal jaxca tiꞌ: Jaꞌ conobꞌ Israel, yetoj conobꞌ Judá yetoj cꞌal bꞌey chi apni oc smoonal, ket oj yun can ocoj, je chi, che yaloni. 11 Yuxan jain wal caw Jehová Yaaw jin chi wakꞌcan jin tiꞌ, tol jaxca wal sjowal je cꞌul, cꞌal je chichoncꞌulal yin conobꞌ Israel, queytuꞌ oj jex wute cꞌal pax jaex tiꞌ. Yet watxꞌ oj naꞌcha el je yu, tol jain ton Jehová jin. 12 Queytuꞌ oj yun je yotajnen el jaex tiꞌ, tol jain Jehová jin tiꞌ, jix wabꞌ je bꞌuchwal kꞌane yet jix je yalon jaxca tiꞌ: Jaꞌ txꞌotxꞌ tzalquiltaj bꞌey yul yet Israel, cusiltaj txꞌotxꞌ xacꞌal jix yun canoj. Tuxa jix cani, yet watxꞌ jaon xa chi cu majcan ocoj, je chi. 13 Caw mimejtaj xacꞌal jix je yute je bꞌa jin sattaj, jix je yalon pena kꞌane win, jix wabꞌ tzet jix je yalaꞌ.
14 Jain Jehová Yaaw jin chi wal wan tiꞌ: Masanil xacꞌal yul yibꞌankꞌinal tiꞌ oj tzala aoj, yet oj jex wakꞌon lawoj eyoj. 15 Yutol jaex tiꞌ, yel xacꞌal jix jex tzalabꞌi yet jix lawi ey conobꞌ Israel; yu jun tuꞌ, yuxan oj jin spajtze ey jex jaxca jix je yute je bꞌa. Cusiltaj txꞌotxꞌ xacꞌal oj yun cantoj txꞌotxꞌ tzalquiltaj yul yet Seír, jaꞌton smajul txꞌotxꞌ ebꞌ Edom. Queyton tuꞌ oj yun yotajnen el ebꞌ tol jain ton Jehová jin, ẍi Dios.