6 Jix yalon pax Jehová ey jin jaxca tiꞌ: Jain Jehová chi wal jin kꞌane tiꞌ tet ebꞌ Israel: Jain Jehová Yaaw jin tiꞌ, yetoj sjowal jin cꞌul chi walon jaxca tiꞌ. Jaꞌ wan nación tuꞌ, caw jix bꞌuchwa ebꞌ yin txꞌotxꞌ mimej wonanlaj, txꞌotxꞌ tzalquiltaj, yin jobꞌelaj cꞌal yin txꞌotxꞌ pananlaj. 7 Yu jun tuꞌ, jain Jehová Yaaw jin tiꞌ chi wakꞌ jin tiꞌ, tol jaꞌ wan conobꞌlaj tuꞌ, jain oj wiꞌel sqꞌuixwil ebꞌ. 8 Jal pax bꞌey wan conobꞌlaj ey bꞌey sjolomlaj wonan xin, caw ey teꞌ mimej awbꞌeal teꞌ oj chꞌibꞌaoj, oj je loꞌon sat teꞌ, yutol tuxa oj jex meltzotoj. 9 Ey jin cꞌal ecꞌ je yetoj, yet oj jex wiꞌon meltzotej, oj jex jin teyne cꞌal yet oj je yawon je yawo sat je txꞌotxꞌ tuꞌ. 10 Caw yin eymanil oj yun wakꞌon chꞌibꞌ je bꞌisil. Oj noel je conobꞌ tuꞌ je yu, jaꞌ bꞌey jix uchchatoj conobꞌ tuꞌ, oj caꞌ waꞌnele a junelxa. 11 Jain oj wiꞌa can sbꞌisil je jobꞌbꞌeal noꞌ, yel xacꞌal oj chꞌibꞌ je bꞌisil. Caw ecꞌal jex oj jex caey ecꞌ tituꞌ, jaxca taꞌ je yeoc yet yalantoj, yel xacꞌal watxꞌ oj yun je caey ecꞌoj yintaj yet yalantoj. Queyton tuꞌ oj yun je yotajnen eloj, tol jain ton Jehová jin. 12 Tol oj jex ecꞌabꞌ bꞌey sjolomlaj wonan, catuꞌ oj je yiꞌon pax oc je txꞌotxꞌ junelxa tituꞌ, cꞌamxa bꞌakꞌin oj qꞌueyle el ebꞌ je yuninal sat je txꞌotxꞌ tuꞌ.

13 Jain Jehová Yaaw jin chi walaꞌ: Jaꞌ ebꞌ ánima bꞌey wanxa conobꞌ, chi yal ebꞌ tol chi qꞌueya ebꞌ ánima, cꞌal yuninal bꞌey txꞌotxꞌ wonan yul yet Israel. 14 Yu jun tuꞌ, yuxan jain chi walaꞌ, tol manxa oj yun jaxca tuꞌ. 15 Jain caw chi walaꞌ, tol manxa oj bꞌuchwa wan nación yin txꞌotxꞌ Israel, manxa oj yal pena kꞌane ebꞌ yin, yutol manxa oj qꞌueyel ánima tituꞌ, ẍi Jehová.

16 Jix kꞌanabꞌ Jehová ey jin, jix yaloni: 17 Jaach ánima, jaꞌ yet caan ebꞌ ja wet Israelal bꞌey xꞌotxꞌal yet yalantoj, jix yetnetoj xꞌotxꞌal ebꞌ yu spena bꞌeybꞌal ebꞌ tuꞌ. Yutol jaꞌ sbꞌeybꞌal ebꞌ, caw yaabꞌetaj yul jin sat. 18 Yu jun tuꞌ, yuxan jix watoj sjowal jin cꞌul yibꞌan ebꞌ, yutol makꞌom cam ánima ebꞌ yul sconobꞌ tuꞌ, cꞌal yu jantaj spenail jix el yunen ebꞌ tol jix oc ebꞌ yin eyilal tet comon dios. 19 Yu spena bꞌeybꞌal ebꞌ tuꞌ, yuxan jix waoc syaꞌilal yibꞌan ebꞌ, queytuꞌ jix yun sajlemtoj ebꞌ bꞌey xol-laj nación. 20 Jaꞌ bꞌey yul-laj wan conobꞌ bꞌey jix apni oc ebꞌ tuꞌ, pena cꞌal jix yun sbꞌinale jin bꞌi yu ebꞌ, yutol jix yal ebꞌ ánima jaxca tiꞌ: Jaꞌ ebꞌ tiꞌ, sconobꞌ Jehová ebꞌ, ilaꞌ pax tol jix iꞌle el ebꞌ bꞌey sconobꞌal, ẍi ebꞌ. 21 Yu jun tuꞌ, yuxan caw pena jix wabꞌe, yutol yu wal ebꞌ jin conobꞌ tiꞌ, yuxan caw pena xacꞌal chi yun jin bꞌina bꞌey xol-laj conobꞌlaj bꞌey jix jex apni cꞌal ocoj.

22 Yu jun tuꞌ xin, al tet ebꞌ ja wet conobꞌ Israel jaxca tiꞌ: Tol jain Jehová Yaaw jin chi walaꞌ: Jaꞌ tzet oj wunne, man je yu oj jaex Israel jex tiꞌ yuxan oj wunne, wu jain tiꞌ, yutol je yu, yuxan pena jix yun jin bꞌina ecꞌ xol-laj wan nacionlaj bꞌey jix jex apni oc tuꞌ. 23 Oj jin txꞌox wal jin mimanbꞌilal sattaj wan nación jix alon pena kꞌane win je yu jaex tiꞌ. Jain caw chi walaꞌ, tol jaꞌ je yin jaex tiꞌ oj jin txꞌoxel jin mimanbꞌilal sattaj ebꞌ. Queytuꞌ oj yun snaꞌcha el yu ebꞌ tol jain ton Jehová jin. 24 Jain oj jex wiꞌeltej bꞌey xol-laj wanxa txꞌoj conobꞌal tuꞌ; catuꞌ oj jex jin yambꞌan ocoj, oj jex wiꞌontoj bꞌey je txꞌotxꞌal tuꞌ junelxa. 25 Oj jex jin sajbꞌane el yetoj caw saj jaꞌ, catuꞌ oj jin txꞌaon el je penail, queyton tuꞌ oj yun je sajbꞌican eloj, yutol jix jex oc yin eyilal tet wan comon dios. 26 Oj waoc jun acꞌ naꞌbꞌale je yin, oj jin qꞌuexon je naꞌbꞌal. Oj wiꞌel jun caw naꞌbꞌale eyoc je yin jaxca chꞌen chꞌen, catuꞌ oj waon oc naꞌbꞌale tol jijem je yin. 27 Jaxa waon oc Wespíritu je yin tuꞌ, yu je jijen jin chejbꞌanil, cꞌal jin ley. 28 Oj jex eyecꞌ bꞌey jun nación jix wakꞌ tet ebꞌ je yichmam, yutol jin conobꞌ jex jaex tiꞌ, jain xa je Diosal jin. 29 Jain oj jex jin teyne, yet watxꞌ manxa oj je yetnetoj je bꞌa bꞌey wan tzetyetal chex etnentoj tuꞌ, catuꞌ oj wiꞌon a can je yawo tiriw, cꞌamxa bꞌakꞌin oj waoc wail je yibꞌan. 30 Masanil teꞌ awbꞌeal teꞌ oj yakꞌ sat teꞌ wu, yet watxꞌ cꞌamxa cꞌal qꞌuixwanil oj jul je yibꞌan sattaj wanojxa nacionlaj yu wail. 31 Jaꞌ yet oj je naꞌontej je pena bꞌeybꞌal ma je penail, jaex cꞌal ocoj oj jex qꞌuixwoj a yu. 32 Jain caw Jehová Yaaw jin chi walaꞌ. Jex Israel, otajnewej eloj, man yu oj tol watxꞌ jex yuxan chi wun jun tiꞌ je yin; smoo cꞌaltaꞌ je qꞌuixwi a yu je pena bꞌeybꞌal tuꞌ.

33 Jain Jehová Yaaw jin chi wal jaxca tiꞌ: Jaꞌ yet oj wiꞌon el je penail, oj jex wakꞌon caey ecꞌ bꞌey je conobꞌal tuꞌ, catuꞌ oj je caꞌ waꞌnen a junelxa. 34 Jaꞌ txꞌotxꞌ jix cancan yin cusiltaj txꞌotxꞌ tuꞌ, oj awle awo sat txꞌotxꞌ junelxa, catuꞌ oj yilon ebꞌ ánima oj ecꞌ tituꞌ, tol eyxa oc yawoal txꞌotxꞌ. 35 Catuꞌ oj yalon ebꞌ jaxca tiꞌ: Jaꞌ jun txꞌotxꞌ tiꞌ, jix can yin cusiltaj txꞌotxꞌ, jal pax tinaniꞌ eyxa yawo chi kilaꞌ, jaxca xacꞌal yili Edén; jaꞌ wan conobꞌlaj lawinaj eyoj, tuxa cꞌal uchquiltaj jix yun cantoj; jal pax tinaniꞌ, caw watxꞌ xa yeocoj, eyxa ebꞌ ánima caan xa bꞌey, ẍi ebꞌ, oj yalon ebꞌ. 36 Queyton tuꞌ xin, jaꞌ wanxa ebꞌ nacionlaj oj to cancan bꞌey scawilal tuꞌ, oj yotajne el ebꞌ tol jain caw Jehová jin chin caꞌ waꞌne wan tzet uchchanajtoj, cꞌal wawon junelxa tzetyetal tol jokꞌbꞌil aoj. Jain caw Jehová jin chi walaꞌ, catuꞌ oj yunen wan tzet chi wal tiꞌ.

37 Jain wal caw Jehová, yaaw jin chi walaꞌ: Jaꞌ tzetyetal oj je kꞌan ey jin, oj wakꞌ ey jex. Oj wakꞌ chꞌibꞌ je bꞌisil jaxca chi yun ẍꞌibꞌ sbꞌisil noꞌ meꞌ. 38 Jaꞌ wan conobꞌlaj lawinaj eyoj, oj noel yu ánima junelxa, laan xacꞌal yili yecꞌ ebꞌ ánima jaxca chi yun yecꞌ nililoj noꞌ meꞌ chi iꞌletej yin xaambꞌal bꞌey Jerusalén yet kꞌin. Jaxca tuꞌ oj yun je yotajnen eloj tol jaꞌcaw Jehová jin, ẍi Dios.