4 Jix yalon Jehová ey jin jaxca tiꞌ: Alel jin kꞌane tet wan bꞌaj tuꞌ, catuꞌ cha walon jaxca tiꞌ: Jex tajin bꞌaj, abꞌwej yalon skꞌane Jehová. 5 Jaꞌ Jehová Naj Yaaw chi aloni: Oj wakꞌ je yiꞌ je kaꞌeꞌ junelxa, catuꞌ oj jex iquisbꞌoj pax aoj. 6 Oj je nubꞌle ey je bꞌa, catuꞌ oj jex wakꞌon no yu je chiꞌbꞌeal junelxa, oj oc je tzꞌuumal je yin catuꞌ oj wakꞌ je yiꞌon je kaꞌeꞌ, jaxa je yiquisbꞌi a junelxa tuꞌ. Jaxca wal tuꞌ oj yun je yotajnen eloj tol jain ton Jehová jin, ẍi Dios. 7 Jix wal wan kꞌane tiꞌ jaxca jix yun yalon Naj ey jin. Yajbꞌan lalan jin kꞌanabꞌi, jix wabꞌen sbꞌilwi jun tzetyetal, jix ecꞌ jun quixcabꞌ, queytuꞌ jix yun scꞌoli sjunbꞌanen oc sbꞌa wan bꞌaj tuꞌ. 8 Catuꞌ jix wilon an, tol jix sjunbꞌane oc sbꞌa wan bꞌaj tuꞌ, eyxa oc txꞌanil, yetoj ẍiꞌbꞌeal, cꞌal stzꞌuumal yin. Asan xin, cꞌamto chi yiꞌ skaꞌeꞌ ebꞌ.

9 Jix lawi tuꞌ, jix yalon pax Jehová ey jin jaxca tiꞌ: Jaach tiꞌ, al jin kꞌane tet kaꞌeꞌ, cha walon tet jaxca tiꞌ: Jaꞌ Jehová Naj Yaaw chi alon jaxca tiꞌ: Jaach kaꞌeꞌ, titan bꞌey masanil yul yibꞌankꞌinal, catuꞌ chach oc can yin wan mimanile camnajxa tiꞌ, yet chi skeꞌ yiquisbꞌi a ebꞌ junelxa, ẍi Jehová, ey jin. 10 Jaꞌ yet jix walon jaxca jix yun yalon Dios tuꞌ ey jin, jix oc skaꞌeꞌ wan mimanile tuꞌ, catuꞌ jix a waan ebꞌ. Caw ecꞌal ebꞌ, jaxca xa yilitoj junoj miman bꞌulan ebꞌ soldado.

11 Catuꞌ jix yalon Jehová ey jin: Jaach ánima, jaꞌ wan tajin bꞌaj tiꞌ chi yaltej yin ebꞌ conobꞌ Israel, yutol chi yal ebꞌ jaxca tiꞌ: Jaon tiꞌ jaxca tol tajin xa cu bꞌajil, cꞌamxa tzet eyoc yipoj cu cꞌul, tuxa jix cu qꞌueyle eloj, je chi. 12 Yu jun tuꞌ xin, alel jin kꞌane tiꞌ tet ebꞌ ja wet conobꞌ jaxca tiꞌ: Jaꞌ Jehová chi alon jaxca tiꞌ: Jex jin conobꞌ, jaxca tol oj jex jin jajatej bꞌey mujan jex eytoj; oj jex wiꞌeltej tituꞌ, catuꞌ oj jex wakꞌon meltzo bꞌey je conobꞌ junelxa. 13 Jaꞌ yet oj jin jajon je mujbꞌanil tuꞌ, oj jex wiꞌon eltej bꞌey ey jex ecꞌ tuꞌ, oj je yotajne eloj jaex jin conobꞌ jex tiꞌ, tol jain ton Jehová jin. 14 Jain chi walaꞌ tol oj waoc Wespíritu je yin, jaxca tol oj jex pitzcꞌu aoj; catuꞌ oj jex wakꞌon caey ecꞌ junelxa bꞌey je txꞌotxꞌ tuꞌ. Queytuꞌ oj yun je yotajne eloj tol jain ton Jehová jin. Jaꞌ tzet lalan walon tiꞌ, sowalil oj wakꞌ elocoj, ẍi Jehová ey jin.

15 Jix yalon pax Jehová ey jin, jix yalon jaxca tiꞌ: 16 Jaach ánima, sey caabꞌoj teꞌ teꞌ, catuꞌ cha tzꞌibꞌen oc yin junoj teꞌ bꞌabꞌel jaxca tiꞌ: Jaꞌton teꞌ txꞌoxbꞌanil yeoc yin ebꞌ yicꞌaal Judá, cꞌal ebꞌ yet Israelal jaꞌjun yetoj. Chi lawi tuꞌ, cha tzꞌibꞌen pax oc yin junxa teꞌ jaxca tiꞌ: Jaꞌton teꞌ txꞌoxbꞌanil yeoc yin ebꞌ yicꞌaal Efraín, naj yuninal José, yetoj cꞌal masanil ebꞌ yet Israelal jaꞌjun yetoj ebꞌ. 17 Chi lawi tuꞌ, catuꞌ cha wakꞌon ẍaꞌlen sbꞌa xaam teꞌ yul ja kꞌabꞌ, junxane chi yun ja mitxꞌon a teꞌ. 18 Jaꞌ yet oj skꞌanlen ebꞌ ja wet conobꞌ ey jaach jaxca tiꞌ: Al ey jon tzet chi yal yeloc apnoj jun tiꞌ, ta ẍi ebꞌ, 19 cha walon tet ebꞌ jaxca tiꞌ: Jaꞌ Jehová Naj Yaaw chi aloni: Oj wiꞌa teꞌ teꞌ yet José, teꞌ eyoc yul skꞌabꞌ Efraín, cꞌal wanxa yicꞌaal Israel eyoc yetoj, catuꞌ oj jin junbꞌane ey yetoj teꞌ yet Judá, junxane oj wute ey teꞌ scaabꞌil yul jin kꞌabꞌ, ja chi tet ebꞌ. 20 Sattaj wal ebꞌ, catuꞌ cha wiꞌon a teꞌ teꞌ tuꞌ scaabꞌil, jaꞌton teꞌ bꞌey jix jaach tzꞌibꞌli oc tuꞌ. 21 Chi lawi tuꞌ, cha walon jaxca tiꞌ: Jaꞌ Jehová Naj Kaawil chi alon jaxca tiꞌ: Jex conobꞌ Israel, jain oj jex wiꞌeltej bꞌey xol-laj wan conobꞌlaj bꞌey jix jex apni ocoj. Yal cꞌal bꞌeytuꞌ ey jex ecꞌoj, oj jex jin yambꞌa ocoj, catuꞌ oj jex wakꞌon meltzo bꞌey sat je txꞌotxꞌ junelxa. 22 Junxane conobꞌal oj jex wute can bꞌey txꞌotxꞌ tzalquiltaj txꞌotxꞌ yul yet Israel, catuꞌ junxane je reyal oj waocoj. Cꞌamxa bꞌakꞌin oj jex poꞌochatoj. Manxa caabꞌoj conobꞌal oj je yunne. 23 Manxa oj je yetnetoj je bꞌa yu je yoc eyilal tet wan comon dios tol yaabꞌetaj, yetoj cꞌal wan spenail jix je yun yet yalantoj. Yutol oj wiꞌel jun pit naꞌbꞌale eyoc je yin, oj jex jin sajbꞌane el yin je penail. Jin conobꞌ oj je yun can ocoj, jain xa je Diosal jin. 24 Jaꞌton jin chejabꞌ David oj oc je reyaloj cꞌal je yilomaloj je masanil, oj je jijen jin chejbꞌanil cꞌal jin ley tuꞌ. 25 Catuꞌ oj jex caey ecꞌ bꞌey jun nación jix wakꞌ tet jin chejabꞌ Jacob, jaꞌton bꞌey jix caey ecꞌ ebꞌ je yichmam. Jaꞌ tituꞌ oj caey ecꞌ ebꞌ je yuninal, cꞌal masanil je yicꞌaal; jaꞌ naj jin chejabꞌ David oj yakꞌ yaawil je xol. 26 Oj wakꞌ jin wa kꞌane je yetoj, yet watxꞌ oj jex caey ecꞌ yin tzalacꞌulal. Yin junelne oj jin waꞌne can jun jin wa kꞌane je yetoj. Oj wakꞌon chꞌibꞌ je bꞌisil, catuꞌ oj eecꞌal ecꞌ jin templo je xol. 27 Oj jin caey ecꞌ snan je xol, yutol je Diosal jin, jin conobꞌ oj je yun can ocoj. 28 Oj eecꞌal ecꞌ jin templo je xol yin junelne, masanil wanxa nacionlaj, oj naꞌcha el yu, tol sicꞌbꞌil jex el wu yet chex oc can wetoj, ẍi Jehová.