Jaꞌ Tzet Albꞌilcan Yibꞌan Naj Gog Yu Dios
38
Jix kꞌanabꞌ Jehová ey jin, jix yalon jaxca tiꞌ: 2 Jaach ánima, jaꞌ tinaniꞌ meltzaantoj jacan yetcꞌulal conobꞌ Magog. Alel jin kꞌane yin naj Gog, naj sat yaaw yeoc bꞌey Mésec cꞌal bꞌey Tubal. 3 Jaꞌ Jehová Naj Yaaw chi alon jaxca tiꞌ: Jaach Gog yaaw ja weoc bꞌey Mésec, cꞌal bꞌey Tubal, jain chi walaꞌ, tol caw chi tit jin jowal ja win. 4 Oj jaach wakꞌ meltzotoj, oj waoc junoj chꞌen locan ye xaam yin ja tiꞌ. Oj jaach wiꞌel titiꞌ yetoj masanil noꞌ ja che, yetoj masanil ebꞌ eyoc yibꞌan che tol iꞌbꞌil oc smitxꞌkꞌabꞌ yet jowal, yetoj jun miman bꞌulan soldado iꞌbꞌil oc yespada, cꞌal chꞌen majbꞌal sat julbꞌal iꞌbꞌil oc yu ebꞌ. 5 Jaꞌ xol ebꞌ tuꞌ eyoc ebꞌ soldado yet Persia, ebꞌ yet Etiopía cꞌal yet Libia. Masanil ebꞌ tuꞌ iꞌbꞌil oc smajbꞌal sat julbꞌal ebꞌ cꞌal chꞌen chꞌen kꞌoxkꞌome yu ebꞌ. 6 Yetoj cꞌal pax masanil ebꞌ soldado a Gómer, cꞌal ebꞌ a Bet-togarmá, chi tit tacꞌal ebꞌ bꞌey norte, yetoj cꞌal ebꞌ jix tit bꞌey wanxa conobꞌlaj, cꞌamxa chi bꞌischa jantaj ebꞌ eyoc ja wetoj. 7 Waꞌne ja bꞌa, iꞌa ja mitxꞌkꞌabꞌ yet jowal; iꞌtoj masanil ebꞌ soldado eyoc yalan ja chejbꞌanil. 8 Jaꞌ yet oj ecꞌ el jayebꞌoj abꞌil, oj ja naꞌon ja wakꞌon jowal yin conobꞌ Israel, jaꞌton jun conobꞌ tol naatil cannaj can tzꞌinan yu jowal. Jaꞌ yet jun tiempoal tol jix sajlemtoj ebꞌ xol wanxa conobꞌ, jal pax tinaniꞌ xin, tuxa jix meltzo ebꞌ junelxa bꞌey txꞌotxꞌ tzalquiltaj yul yet Israel, jaꞌ tituꞌ oj caey cꞌal ecꞌ yin tzalacꞌulal. 9 Jaxca wal junoj miman asun oj yun ja wapni oc bꞌey jun conobꞌ tuꞌ yetoj wanxa nación eyoc ja wetoj, oj jaach oc joyan yin jaxca junoj miman yaax nabꞌ yetoj masanil ebꞌ ja soldado tol cꞌamxa chi bꞌischa jantaj sbꞌisil.10 Jaꞌcaw Jehová jin chi walaꞌ: Jaꞌ yet jun cꞌual tuꞌ, asan xacꞌal pena naꞌbꞌale oj ja waoc yin xolilal. 11 Oj ja walon jaxca tiꞌ: Oj wakꞌ jowal yetoj wan ánima tol cꞌam smuroal sconobꞌ eyocoj, cꞌam spuertail tam wal yul smajil eyocoj, jaꞌton ebꞌ ánima tol yin cꞌal tzalacꞌulal eecꞌ yaloni. 12 Oj welkꞌane stzettaj yetal ebꞌ, oj jin oc yin wan conobꞌ tol to jix caꞌ waꞌnele aoj, jaꞌton wan conobꞌ tol tocꞌal jix yambꞌaletej xol-laj nación bꞌey caw ey sjobꞌbꞌeal noꞌ ebꞌ, cꞌal wanxa tzetyetal ey tet ebꞌ. Jaꞌ tituꞌ caan ebꞌ bꞌey snan yul yibꞌankꞌinal tiꞌ, ja chi, oj waloni. 13 Jaꞌ ebꞌ ánima caan bꞌey Sabá, bꞌey Dedán, yetoj cꞌal ebꞌ txonwom chi tit bꞌey Tarsis, yetoj cꞌal bꞌey wanxa conobꞌlaj, oj skꞌanle ebꞌ ey jaach jaxca tiꞌ: ¿Yin mi elkꞌan chach juli, tuxa cꞌal mi jix ja yambꞌatej masanil ebꞌ ja soldado yet chi jul je yuchontoj cꞌal je yiꞌontoj chꞌen plata cꞌal chꞌen oro, yetoj noꞌ jobꞌbꞌeal noꞌ, yetoj cꞌal jantaj bꞌeomal chi jul ja wiꞌtoj? ẍi mi ebꞌ, ẍi Jehová.
14 Yu jun tuꞌ, jaach ánima, alel jin kꞌane tet naj Gog, catuꞌ cha walon jaxca tiꞌ: Jaꞌ Jehová Naj Yaaw chi alon jaxca tiꞌ: Jaꞌ yet caw watxꞌ xacꞌal yeoc jin conobꞌ Israel, catuꞌ cha waon xacꞌal oc ja sat yin. 15 Oj jaach tit taꞌcꞌal bꞌey ja conobꞌ caw naat, bꞌey norte yetoj wanxa nación yetoj ebꞌ soldado caw jelan yakꞌon jowal, cꞌamxa chi bꞌischa jantaj ebꞌ eyoc yibꞌan che, cꞌal ebꞌ ánima jaꞌjun ja wetoj. 16 Oj ja wakꞌ jowal yetoj ebꞌ jin conobꞌ, oj jaach oc joyan yin jaxca chi yun yoc joyan asun yinlaj txꞌotxꞌ wonan, queytuꞌ oj yun ja woc yin akꞌo jowal yin jin conobꞌ Israel. Jaach Gog, caw oj majcha el sat txꞌotxꞌ txꞌotxꞌ tiꞌ ja wu jaxca asun. Jaꞌ yet slawubꞌ cꞌual tuꞌ, oj jaach watoj yin jun jin txꞌotxꞌ tiꞌ. Ja wu jaach tiꞌ, yuxan oj jin yotajne el wanxa nación, yet oj jin txꞌoxon jin mimanbꞌilal sattaj ebꞌ.
17 Jain Jehová Yaaw jin chi walaꞌ: Jaach tiꞌ, jix jaach wakꞌ bꞌina yet tax cꞌal peyxa, yet jix jin chejon kꞌanabꞌ el ebꞌ jin chejabꞌ xol conobꞌ Israel. Jix al-le el yet tax jun tiempoal tuꞌ, tol jaach oj jaach wiꞌtej yin akꞌo jowal yin ebꞌ jin conobꞌ, ẍi Jehová.
Syaꞌilal Yibꞌan Naj Gog
18 Jain Jehová Yaaw jin chi walaꞌ: Jaꞌ yet oj yakꞌon jowal naj Gog yin Israel, jaꞌ yet tuꞌ cꞌamxa chi alcha jantaj sjowal jin cꞌul oj tit yin. 19 Yetoj wal sjowal jin cꞌul chi waloni, tol jaꞌ yet jun cꞌual tuꞌ, oj ecꞌ jun miman quixcabꞌ caw jow bꞌey Israel. 20 Jaꞌ noꞌ pescado ey bꞌey yul-laj jaꞌ mar, cꞌal noꞌ tzꞌiquin chi ecꞌ jenenoj, yetoj noꞌ chiꞌwawom noꞌ, cꞌal yetoj noꞌ chi sjutx sbꞌa sat txꞌotxꞌ, caw oj bꞌilwoj a masanil noꞌ yu xiwcꞌulal jin sattaj. Yetoj cꞌal pax masanil ebꞌ ánima bꞌey yul yibꞌankꞌinal tiꞌ. Oj el jootxꞌ yinlaj wonan, oj el wejlabꞌoj chꞌen mimej chꞌen, cꞌal spoꞌoey wejlabꞌoj smuroal conobꞌ. 21 Jain Jehová Yaaw jin chi wal jaxca tiꞌ: Jaꞌ bꞌey txꞌotxꞌ tzalquiltaj txꞌotxꞌ ey bꞌey yul jin conobꞌ tiꞌ, oj waoc camich yin ebꞌ soldado naj Gog. Junjun cꞌal oj meltzo oc yin yet soldadoal yetoj yespada. 22 Oj waoc syaꞌilal yibꞌan Gog, yetoj yaꞌbꞌil cꞌal camich, catuꞌ oj waon cꞌal pax ey mimej yaax nabꞌ yetoj sajbꞌat, cꞌal azufre tol oj chaw skꞌakꞌal yibꞌan yetoj cꞌal ebꞌ soldado, cꞌal yetoj masanil wan conobꞌ jaꞌjun yetoj. 23 Queytuꞌ oj yun jin txꞌoxon jin mimanbꞌilal sattaj conobꞌlaj, tol asanne jin miman weloc apnoj. Queytuꞌ oj yun wakꞌon jin bꞌa yotajne el ecꞌaloj conobꞌlaj, yuxan oj yotajne el ebꞌ tol jain ton Jehová jin.