Jix Eyqꞌuey Naj Gog
39
Jaach ánima, alel jin kꞌane yin naj Gog, cha walon jaxca tiꞌ: Jaꞌ Jehová Naj Yaaw chi alon jaxca tiꞌ: Jaach Gog, yaaw ja weoc yin conobꞌ Mésec, cꞌal yin Tubal; caw eyoc sjowal jin cꞌul ja win. 2 Oj jaach wiꞌtej bꞌey yetcꞌulal norte, niẍtejal oj yun ja jul bꞌey txꞌotxꞌ tzalquiltaj txꞌotxꞌ yul yet Israel. 3 Yin eymanil oj jin makꞌey wan julbꞌal eyoc yul ja qꞌuexan kꞌabꞌ, cꞌal wan flecha eyoc yul ja watxꞌ kꞌabꞌ. 4 Jal jaach tiꞌ, yetoj ebꞌ ja soldado, cꞌal wan nacionlaj jaꞌjun ja wetoj, oj jex cam bꞌey sjolomlaj txꞌotxꞌ tzalquiltaj yul yet Israel. Jaꞌ tituꞌ oj wakꞌ je mimanil tet noꞌ miij, cꞌal tet masanil noꞌ chiꞌwawom noꞌ. Jaꞌ noꞌ tuꞌ oj jex chiꞌontoj. 5 Tuxa cꞌal oj jex can bꞌulan bꞌey txꞌotxꞌ mulnabꞌal txꞌotxꞌ. Jain Jehová jin chi wakꞌ jin tiꞌ yin jun tiꞌ. 6 Oj watoj kꞌakꞌ bꞌey yibꞌan Magog, yetoj cꞌal yibꞌan masanil ebꞌ ánima caan yin tzalacꞌulal bꞌey stiꞌlaj jaꞌ mar. Queytuꞌ oj yun yotajnen el ebꞌ tol jain ton Jehová jin. 7 Queytuꞌ oj yun jin txꞌoxon el wipalil tet conobꞌ Israel, yet watxꞌ, cꞌamxa bꞌakꞌin oj bꞌuchwa ebꞌ win, manxa oj yal jin cꞌul tol oj jin intajnele el yu ebꞌ. Queytuꞌ oj yun yotajnen el wanojxa conobꞌlaj tol jain ton Jehová jin, sDiosal jin Israel, cꞌam junojxa laan wetoj. 8 Jaꞌ jun cꞌual chi wal tiꞌ, lalanxa sjuli, jain Jehová jin chi walaꞌ, tol sowalil oj yunne, ẍi Jehová, ja chi.9 Jaꞌ masanil ánima caan bꞌey junjun conobꞌlaj yul yet Israel, oj eltej ebꞌ syambꞌa a masanil mitxꞌkꞌabꞌe yet jowal, yu skꞌanon ebꞌ yin siꞌal, jaꞌton masanil tujan majbꞌal sat julbꞌal, yetoj niẍtej julbꞌal cꞌal mimej lanza, jaꞌton wan tuꞌ oj skꞌanbꞌalne ebꞌ yin siꞌal yin jujebꞌ abꞌil. 10 Manxa sowaliloj tol naat oj eltoj ebꞌ Israel yambꞌa siꞌ, tam wal stoo ebꞌ tzokꞌo siꞌ bꞌey xol-laj teꞌ, yutol jaꞌ masanil wan mitxꞌkꞌabꞌe yet jowal tuꞌ, jaꞌ oj oc siꞌoj ebꞌ. Jain Jehová jin chi walaꞌ, tol queytuꞌ oj yun yiꞌon ecꞌ stzettaj yetal ebꞌ tet ebꞌ jix iꞌon ecꞌ stzettaj yetal ebꞌ yet yalantoj.
Jaꞌ Tzet Oj Yun Smujle Naj Gog
11 Jaꞌ yet jun cꞌual tuꞌ, jain oj wakꞌ bꞌey oj mujle Gog yetoj ebꞌ soldado yul yet Israel, jaꞌton jun panan bꞌey chi ecꞌ ebꞌ bꞌelwom ánima, bꞌey sattaj ecꞌtej jaꞌ Camnaj Mar. Jaꞌ tituꞌ, cꞌamxa mac oj ecꞌoj, yutol jaꞌ bꞌey oj mujle naj Gog yetoj masanil soldado; oj yij can sbꞌi, jaꞌ jun spananil yet ebꞌ akꞌom jowal yet naj Gog. 12 Jujebꞌ xꞌaaw oj yakꞌ ebꞌ Israel yin smujon ebꞌ camom tuꞌ, catuꞌ oj qꞌuischa aoj cꞌal swaꞌxi a sat txꞌotxꞌ tuꞌ. 13 Masanil ánima oj colwa yin smujon ebꞌ ánima oj cam tuꞌ. Jain Jehová Yaaw jin chi walaꞌ, tol caw bꞌinabꞌil oj yun can xol conobꞌ Israel jun cꞌual yet oj jin txꞌoxon el wipalil tuꞌ. 14 Jaꞌ yet oj lawoj ecꞌ jujebꞌ xꞌaaw tuꞌ, ey junxa bꞌulan ebꞌ ánima oj toolanele yu yecꞌ ebꞌ seyon yilaꞌ yet chi mujle masanil mimanile tol cꞌamto chi mujlei. Queyton tuꞌ oj yun sqꞌuischa a yul sconobꞌ ebꞌ tuꞌ. 15 Jaꞌ yet oj ilcha sbꞌajil camnaj yu ebꞌ chi ecꞌ seyon tuꞌ, oj ya can a junoj yechel ebꞌ, jaxa yet chi jul ebꞌ chi mujon camom tuꞌ xin, jaꞌ ebꞌ oj iꞌontoj yet chi smujon ebꞌ bꞌey chi yij sbꞌi, jaꞌ jun spananil yet ebꞌ akꞌom jowal yet naj Gog. 16 Queyton tuꞌ oj yun swaꞌxi el xꞌotxꞌ ebꞌ tuꞌ yul jin sat, ẍi Jehová ey jin. (Jacꞌalaꞌ pax scawilal tuꞌ, ey pax jun conobꞌ oj yij sbꞌi, txꞌotxꞌ bꞌey jix mujle ebꞌ akꞌom jowal, ẍi Jehová.)
17 Jix yalon Jehová ey jin jaxca tiꞌ: Jaach ánima, al tet masanil noꞌ miij, cꞌal tet masanil noꞌ chiꞌwawom noꞌ: Tit ojabꞌ noꞌ bꞌey wanxa nacionlaj, yet chi syambꞌan oc sbꞌa noꞌ bꞌey txꞌotxꞌ tzalquiltaj yul yet Israel, tol oj wakꞌ wan xaambꞌal yet chi low noꞌ. Oj skeꞌ ẍiꞌon chiꞌbꞌe noꞌ, cꞌal yuqꞌuen chicꞌ noꞌ. 18 Jaꞌ ẍiꞌbꞌeal ebꞌ soldado oj ẍiꞌ noꞌ, cꞌal ẍiqꞌuil ebꞌ yaaw yeoc bꞌey yul junjun conobꞌ bꞌey sat txꞌotxꞌ txꞌotxꞌ tiꞌ. Oj chiꞌle ebꞌ jaxca chi yun cu chiꞌon noꞌ icham meꞌ, cꞌal noꞌ yuneꞌ meꞌ, noꞌ chiw cꞌal noꞌ wacax caw bꞌakꞌech, chi tit bꞌey Basán. 19 Jaꞌ wan xaambꞌal oj jin waꞌne tuꞌ, jaꞌ oj ẍiꞌ noꞌ, yetoj cꞌal ẍepuꞌal noꞌ. Caw oj noel scꞌul noꞌ sicꞌlebꞌil, oj wakꞌ chicꞌ yucꞌ noꞌ, masantaꞌcꞌal oj joybꞌoj sat noꞌ jaxca ebꞌ uqꞌuem an. 20 Jain Jehová jin chi walaꞌ, tol jaꞌ jun miman loꞌo oj jin waꞌne tuꞌ, jaꞌton ẍiꞌbꞌeal noꞌ che, cꞌal yetoj smimanil ebꞌ soldado eyoc yibꞌan che, masantaꞌcꞌal oj no scꞌul noꞌ sicꞌlebꞌil.
Oj Syambꞌa Oc Sbꞌa Ebꞌ Israel
21 Queyton tuꞌ oj yun jin txꞌoxon el wipalil sattaj wan txꞌoj conobꞌal. Masanil nacionlaj oj otajne eloj, cꞌal yilon ocoj, tzet utbꞌil chi yun jin naꞌon oc yin ebꞌ ánima cꞌal waon oc syaꞌilal yibꞌan ebꞌ. 22 Jatax cꞌal yet jun cꞌual tuꞌ, cꞌal yet chi bꞌey cꞌaltoj, oj jin yotajne el ebꞌ Israel, tol jain ton Jehová sDiosal jin ebꞌ. 23 Masanil wanxa conobꞌ oj yotajne eloj tol jaꞌ ebꞌ Israel jix iꞌletoj yin presowomal yu cꞌal spenail ebꞌ, yutol caw pit jix yute sbꞌa ebꞌ ey jin, yuxan jix jin el txꞌuman tet ebꞌ, jix jin bꞌejon can oc ebꞌ yul skꞌabꞌ scajat, jaxca tuꞌ jix yun yeyqꞌuey ebꞌ, cꞌal smakꞌle cam ebꞌ bꞌey xol jowal. 24 Queytuꞌ jix wute ebꞌ jaxca smooalil, yu cꞌal spenail ebꞌ, cꞌal spitalil ebꞌ, yuxan jix jin el txꞌuman tet ebꞌ.
25 Jal pax tinaniꞌ, jain Jehová Yaaw jin chi wal jaxca tiꞌ: Caw chi okꞌ jin cꞌul yin ebꞌ conobꞌ Israel tiꞌ, jaꞌton ebꞌ yicꞌaal Jacob. Oj wakꞌ jin watxꞌcꞌulal tet ebꞌ yin junelne, yet chi iꞌle a can jin bꞌi yu ebꞌ. 26 Jaꞌ yet oj caey ebꞌ junelxa bꞌey sconobꞌ tuꞌ, cꞌamxa tzet oj snaꞌ ebꞌ, tam wal eyto mac oj xibꞌten ebꞌ. Queyton tuꞌ oj yun sqꞌuixwoj a ebꞌ yu spitalil, cꞌal yu spenail jix yun ebꞌ jin sattaj. 27 Jaꞌ yet oj wiꞌon eltej ebꞌ bꞌey yul-laj sconobꞌ ebꞌ scajat ebꞌ tuꞌ, cꞌal jin yambꞌan oc ebꞌ junelxa. Queyton tuꞌ oj yun xeclo eloj, tol miman weloc apnoj sattaj masanil conobꞌ. 28 Jain jix wakꞌ iꞌletoj ebꞌ yin presowomal bꞌey wan txꞌoj conobꞌal, jacꞌalaꞌ jain pax oj jin yambꞌatej ebꞌ junelxa bꞌey sconobꞌal. Cꞌamxa junoj ebꞌ oj cancan tituꞌ. Queytuꞌ oj yun yotajnen el ebꞌ, tol jain ton Jehová sDiosal jin ebꞌ. 29 Jain chi walaꞌ, tol manxa cꞌal oj jin el txꞌuman tet ebꞌ junelxa, yutol oj waoc Wespíritu yin conobꞌ Israel tiꞌ, ẍi Dios.