2 Jaꞌ bꞌey txꞌotxꞌ tzalquiltaj yul yet Israel tuꞌ, bꞌey naat eyaoj, jaꞌ tituꞌ jix jin iꞌle atoj yu Jehová jix wilaꞌ. Jaꞌ tituꞌ jix wiltoj bꞌey yetcꞌulal sur, ey jun bꞌulan na laan xacꞌal yili jaxca junoj miman conobꞌ. 3 Jix jin yiꞌontoj Jehová bꞌey jun conobꞌ tuꞌ. Jaꞌ tituꞌ jix wil jun winaj tol laan yili jaxca chꞌen bronce. Jaꞌ tituꞌ linan oc bꞌey stiꞌ jun puerta, iꞌbꞌil oc jun txꞌan yu, lino cꞌal eloj, yetoj jun teꞌ aa yet chi yakꞌbꞌalne yin yechbꞌaloj. 4 Jix yalon jun winaj tuꞌ ey jin jaxca tiꞌ: Chi cam ja wabꞌeni cꞌal ja wilon tzetyetal oj jin txꞌox ey jaach, yutol jaꞌ Dios jix jaach iꞌontej titiꞌ, yet watxꞌ cha wotajnen eloj. Oj lawoj tuꞌ, oj ja walon masanil tzetyetal cha wil tet ebꞌ ja wet conobꞌ Israel, ẍi ey jin.

5 Jix wiloni, tol ey jun muro joyan oc yinlaj templo tuꞌ. Jaꞌ jun teꞌ aa iꞌbꞌil oc yu jun winaj tuꞌ, ey oxebꞌ metro steel. Jix yechen jun muro tuꞌ. Jaꞌ jun tuꞌ ey oxebꞌ metro spimal, oxebꞌ cꞌal pax metro yea steel. 6 Jix lawi tuꞌ, jix too bꞌey jun puerta yetcꞌulal bꞌey chi aol cꞌu, jix atoj bꞌey jun kꞌooch yeocoj, catuꞌ jix yechen sjolomtaj jun puerta tuꞌ. Jaꞌ jun puerta tuꞌ, ey oxebꞌ metro yeocoj. 7 Jaꞌ bꞌey yul octoj stiꞌ jun smajil na tuꞌ, ey jun scalleal chi octoj. Jaꞌ tituꞌ txolan oc wan niẍtej cuartolaj stiꞌlaj bꞌey juntaj pacꞌ, ey oxox cuartolaj yet ebꞌ chi teyneni. Jaꞌ junjun cuarto tuꞌ, ey oxebꞌ metro sat, oxebꞌ metro cꞌal pax spacꞌul. Jaꞌ spimal ey can xol wan cuartolaj tuꞌ, nan yox metro spimal. Jaꞌ bꞌey sattaj octoj wan cuarto tuꞌ, ey junxa jajan, ey oxebꞌ metro spacꞌul, chi apni oc bꞌey jun yamakꞌil jacantoj bꞌey stemplo Dios. 8-9 Jix yechen jun yamakꞌil bꞌey chi cu octoj yul stemplo Dios, ey canebꞌ metro sat. Ey caabꞌ mimej pilaliẍ, ey jun metro spimal. 10 Jaꞌ bꞌey junjun pacꞌ bꞌey chi cu octoj yetcꞌulal bꞌey chi aol cꞌu, ey oxebꞌ cuarto laan cꞌal yul junjun, laan cꞌal spimal yili wan eyoc snan xol junjun.

11 Jix lawi tuꞌ, jix echele jun puerta tuꞌ yu jun winaj tuꞌ, ey joebꞌ metro sat, jal bꞌey chi cu octoj tuꞌ xin, ey wajebꞌ metro yetoj nanxa. 12 Jaꞌ bꞌey stiꞌ junjun cuartolaj tuꞌ, ey junjun yaliẍ muro eyocoj, ey nan metro sat, nan metro yea steel. Junjun cꞌal wan cuarto tuꞌ, ey oxebꞌ metro sat cꞌal oxebꞌ metro spacꞌul. 13 Jix lawi tuꞌ, jix yechen masanil sat bꞌey chi cu octoj, chi tit tacꞌal yechen bꞌey yul jun cuarto masantaꞌcꞌal bꞌey yul junxa cuarto spacꞌul sbꞌa yetoj, ey 12 metro yetoj nanxa yin masanil. 14 Jix lawi tuꞌ, jix yechen cꞌal pax jun yamakꞌil jacantoj bꞌey stemplo Dios, ey laonebꞌ metro spacꞌul. 15 Jaꞌ spacꞌul yin masanil, chi tit tacꞌal bꞌey yich masantaꞌcꞌal bꞌey stiꞌ spuertail, ey 25 metro yin masanil. 16 Jaꞌ wan cuarto tuꞌ, eyoc swentanail junjun wan cuarto jacantoj bꞌey jun yamakꞌil tuꞌ. Ey cꞌal pax swentanail snanlaj xol wan cuarto tuꞌ, txolan pax smajil snanlaj wan cuarto tuꞌ. Jal bꞌey yinlaj spacꞌul jun yamakꞌil tuꞌ, eyoc yechel teꞌ palma yinlaj.

17 Jix lawi tuꞌ, jix jin yiꞌon octoj jun winaj tuꞌ, yet chi wilon jun bꞌabꞌel yamakꞌil bꞌey yul tuꞌ. Jaꞌ jun yamakꞌil tuꞌ, latzꞌbꞌil oc chꞌen chꞌen yinlaj, joyan oc 30 wan cuarto yinlaj. 18 Jaꞌ chꞌen chꞌen latzꞌbꞌil ey tuꞌ, chi apni tacꞌal oc chꞌen bꞌey yichlaj wan cuarto bꞌey junjun puertalaj, ey cꞌal yamakꞌil yinlaj masanil. Jaꞌ jun bꞌabꞌel amakꞌ tuꞌ, jatuꞌ ey yintaj junxa yet scaabꞌ sattaj eltoj stiꞌ na tuꞌ. 19 Jaꞌ jun winaj tuꞌ, jix yeche snan xol sattaj spuertail bꞌey yalan, masantaꞌcꞌal bꞌey yin junxa puerta bꞌey yul octoj tuꞌ. Jaꞌ yin masanil jun tuꞌ ey 50 metro, jacꞌalaꞌ cꞌal pax bꞌey yetcꞌulal norte, cꞌal yetcꞌulal bꞌey chi aol cu.

20 Ey cꞌal pax jun puerta bꞌey bꞌabꞌel sattaj stiꞌ na tuꞌ bꞌey yetcꞌulal norte. Jaꞌ jun winaj tuꞌ jix yeche jantaj jun spacꞌul, cꞌal jantaj jun sat. 21 Ey oxebꞌ cuarto bꞌey junjun spacꞌul scalleal jun puerta tuꞌ. Poꞌobꞌil ey snan scaabꞌil, cꞌal yamakꞌil; laan cꞌal yechel yetoj smajil eyoc yetcꞌulal bꞌey chi too cꞌu, chi yal yeloc apnoj tol ey 25 metro skꞌatil, jal sat ey 12 metro yetoj nanxa. 22 Jaꞌ jun yul stiꞌ na tuꞌ yetoj cꞌal swentanail, yetoj bꞌey eyoc yechel teꞌ palma, laan cꞌal yetoj wan ey yetcꞌulal bꞌey chi aol cꞌu. Ey jujebꞌ bꞌelan yeoc sat skꞌoochal chi atoj bꞌey spuertail tuꞌ, jaꞌ scalleal chi cancan bꞌey yul. 23 Jaꞌ bꞌey yetcꞌulal sattaj jun smajil na tuꞌ, jatuꞌ ey pax spuertail yet scaabꞌ yamakꞌil na tuꞌ, laan cꞌal jaxca jun ey yetcꞌulal bꞌey chi aol cu. Jaꞌ jun winaj tuꞌ, jix yeche bꞌey snan xol caabꞌ puerta tuꞌ, ey 50 metro snan xol.

24 Jix lawi tuꞌ, jix jin yiꞌontoj jun winaj tuꞌ bꞌey yetcꞌulal sur, ey cꞌal pax jun puerta tituꞌ. Jix yechen wan cuartolaj, yetoj cꞌal yul stiꞌ na, laan cꞌal yechel yetoj wanxa. 25 Jaꞌ jun miman na tuꞌ, ey cꞌal swentanail yetoj cꞌal scuartoal, laan jaxca cꞌal wanxa tuꞌ. Jaꞌ yechel masanil, ey 25 metro skꞌatil, catuꞌ 12 metro yetoj nanxa yeoc sat. 26 Jujebꞌ bꞌelan yeoc sat jun skꞌoochal chi aapnoj bꞌey jun puerta tuꞌ, ey cꞌal pax scuartoal bꞌey yul-laj junjun. Ey cꞌal pax oc yechel teꞌ palma yinlaj spacꞌul spilaliẍal. 27 Jaꞌ jun yet scaabꞌ yamakꞌil tuꞌ, ey jun smajil eyoc bꞌey yetcꞌulal sur. Jix yechen jun winaj tuꞌ, jaꞌ xol caabꞌ puerta bꞌey yetcꞌulal sur, ey 50 metro xol.

28 Jix lawi tuꞌ, jix jin yiꞌontoj bꞌey spuertail yet scaabꞌ amakꞌ bꞌey yetcꞌulal sur. Jix yechen jun puerta tuꞌ, laan cꞌal yechel yetoj wanxa puerta. 29-30 Jaꞌ scuartoal, yetoj yamakꞌil tuꞌ, cꞌal yul spilaliẍal, laan cꞌal yechel yetoj wanxa. Jaꞌ jun na tuꞌ, cꞌal scuartoal, ey cꞌal swentanail bꞌey yinlaj. Ey 25 metro skꞌatil yin masanil, yetoj 12 metro yetoj nanxa yeoc sat. 31 Jaꞌ yul spilaliẍal tuꞌ, jaccombꞌa yeoc yetoj jun bꞌabꞌel yamakꞌil tuꞌ, ey cꞌal pax oc yechel teꞌ palma yinlaj spilaliẍal. Jaꞌ bꞌey jun puerta tuꞌ, ey waxajebꞌ bꞌelan sat skꞌoochal chi atoj.

32 Jix lawi tuꞌ, jix jin yiꞌon octoj bꞌey jun yet scaabꞌ yamakꞌil yul stiꞌ na tuꞌ, bꞌey jun smajil yetcꞌulal bꞌey chi aol cꞌu, jix yechen puerta tuꞌ, laan cꞌal yechel jaxca wanxa. 33 Ey cꞌal spuertail, cꞌal spilaliẍal, swentanail bꞌey yinlaj tuꞌ. Ey 25 metro yeoc skꞌatil yetoj 12 metro yetoj nanxa yeoc sat. 34 Jaꞌ yul spilaliẍal bꞌey jun bꞌabꞌel yamakꞌil tuꞌ, eyoc yechel teꞌ palma yinlaj spacꞌul spilaliẍal. Jaꞌ bꞌey jun puerta tuꞌ ey waxajebꞌ bꞌelan sat skꞌoochal chi atoj.

35 Jix lawi tuꞌ, jix jin yiꞌontoj jun winaj tuꞌ bꞌey puerta bꞌey yetcꞌulal norte; jix yechen jun smajil na tuꞌ, jaꞌ jun tuꞌ laan cꞌal yetoj wanxa, 36 ey cꞌal spuertail, cꞌal spilaliẍal, swentanail bꞌey yinlaj tuꞌ. Ey 25 metro yeoc skꞌatil yetoj 12 metro yetoj nanxa yeoc sat. 37 Jaꞌ jun spilaliẍal bꞌey bꞌabꞌel jun amakꞌ tuꞌ, eyoc yechel teꞌ palma yin yoyal bꞌey junjun spacꞌul. Jaꞌ bꞌey jun puerta tuꞌ ey waxajebꞌ sat skꞌoochal chi atoj.

38 Jaꞌ bꞌey yul octoj stiꞌ junjun smajil jun na tuꞌ, jaꞌ tituꞌ ey junjun cuarto junne cꞌal yeoc yul spilaliẍal junjun puerta. Jaꞌ tituꞌ chi txꞌale noꞌ noꞌ chi oc yin xaambꞌal. 39 Jaꞌ bꞌey yul octoj smajil na tuꞌ, jaꞌ tituꞌ ey canebꞌ meẍa chꞌen latzꞌbꞌil aoj, caabꞌ bꞌey junjun pacꞌ. Jaꞌ yibꞌan wan meẍa tuꞌ, jaꞌ tituꞌ chi makꞌle cam noꞌ noꞌ chi tzꞌaꞌ yin xaambꞌal, yetoj cꞌal noꞌ chi cam yu yakꞌle tan spenail ma yu stooloj spenail. 40 Jaꞌ bꞌey yul stiꞌ spuertail bꞌey yetcꞌulal norte, eey caabꞌ chꞌen meẍa bꞌey junjun pacꞌ, 41 chi yal yeloc apnoj ey canebꞌ wan chꞌen meẍa tuꞌ bꞌey yul, cꞌal canebꞌ bꞌey stiꞌeltoj jun na tuꞌ. Ey waxajebꞌ meẍa tuꞌ yin masanil, jaꞌton yibꞌan wan meẍa tuꞌ chi makꞌle cam noꞌ noꞌ chi akꞌle yin xaambꞌal. 42 Jaꞌ canebꞌ meẍa bꞌey chi makꞌle cam noꞌ noꞌ chi akꞌle tzꞌaꞌ yin xaambꞌal tuꞌ, josbꞌil chꞌen eyoc yin. Ey 75 centímetro skꞌatil junjun, ey cꞌal pax 75 centímetro sat, 50 centímetro yea steel. Jaꞌ yibꞌan wan tuꞌ, jaꞌ tituꞌ chi ale atoj chꞌen mitxꞌkꞌabꞌe chi kꞌanle yet chi makꞌle cam noꞌ xaambꞌal tuꞌ. 43 Jaꞌ yul junjun cuarto tuꞌ, jaꞌ tituꞌ txolan octoj wan chꞌen slocxomal noꞌ chiꞌbꞌe tuꞌ, 25 centímetro steel junjun chꞌen. Jaꞌ yibꞌan wan meẍa tuꞌ, jatuꞌ chi ey bꞌatxan noꞌ chiꞌbꞌe cꞌal ixim jarina chi akꞌle yin xaambꞌalil tuꞌ.

44 Jix lawi tuꞌ, jix jin yiꞌon octoj bꞌey jun yet scaabꞌ yamakꞌil octoj stiꞌ jun miman na tuꞌ. Jaꞌ tituꞌ, ey caabꞌ cuarto, jacantoj bꞌey yetcꞌulal wanxa tuꞌ. Ey jun ey bꞌey scawilal puerta bꞌey yetcꞌulal norte; jacantoj bꞌey yetcꞌulal sur. Jal pax junxa xin, jatuꞌ ey bꞌey scawilal puerta bꞌey yetcꞌulal sur, jatuꞌ jacantoj bꞌey yetcꞌulal norte.

45 Jix yalon jun winaj tuꞌ ey jin jaxca tiꞌ: Jaꞌ jun cuarto jacantoj bꞌey yetcꞌulal sur, yet ebꞌ yakꞌomal xaambꞌal chi akꞌwi servil bꞌey stemplo Dios. 46 Jal pax wan cuarto jacantoj bꞌey yetcꞌulal norte, yet ebꞌ yakꞌomal xaambꞌal chi akꞌwi servil bꞌey jun yet xaambꞌal. Masanil ebꞌ yakꞌomal xaambꞌal tuꞌ, yicꞌaal Sadoc ebꞌ, asanne ebꞌ xol ebꞌ yicꞌaal Levita chi skeꞌ yoc sattaj Jehová yin yakꞌwi servil, ẍi jun winaj tuꞌ ey jin.

47 Jix lawi tuꞌ, jix echele jun yet scaabꞌ yamakꞌil stemplo Dios yu jun winaj tuꞌ. Laan cꞌal yechel scanpaqꞌuil, 50 metro yeocoj. Jaꞌ jun yet xaambꞌal tuꞌ, jatuꞌ eyecꞌ bꞌey sattaj stemplo Dios. 48 Jaꞌ jun winaj tuꞌ, jix jin yiꞌoctoj bꞌey yul octoj stiꞌ templo tuꞌ, catuꞌ jix yechen yinlaj cꞌal spilaliẍal; ey nan yox metro spimal. Jal junxa smajil xin, ey jujebꞌ metro sat. Jaꞌ sattaj eltej bꞌey stiꞌ puerta tuꞌ, nan scaabꞌ metro yeeltej junjun spacꞌul. 49 Jaꞌ jun yul stiꞌ puerta tuꞌ, ey 10 metro sat, yetoj wajebꞌ metro yul. Ey skꞌoochal chi atoj. Ey caabꞌ mimej chꞌen oy bꞌey stiꞌ spuertail, junjun cꞌal bꞌey junjun spacꞌul.