5 Jix lawi tuꞌ, jix yechen pax spimal smuroal stemplo Dios, ey oxebꞌ metro spimal. Jaꞌ bꞌey yinlaj templo tol junne yeoc yetoj, ey wan cuartolaj caabꞌ metro yeoc yich junjun. 6 Jaꞌ wan cuarto tuꞌ, eyoc jun yibꞌan junxa, oxebꞌ piso yeocoj, jaꞌ yin junjun piso, ey 30 cuarto. Jaꞌ sattaj stemplo Dios tuꞌ, jaꞌ tituꞌ lakꞌan oc junjun piso. Jaꞌ yibꞌan wan tuꞌ, jaꞌ tituꞌ eyoctoj spatzabꞌil junjun cuarto; yu jun tuꞌ, yuxan cꞌam chi octoj yul-laj yich stemplo Dios. 7 Jaꞌ wan cuarto ey bꞌey yet scaabꞌ piso, miman yul yintaj wan ey bꞌey yet bꞌabꞌel piso. Jal wan bꞌey yox piso xin, miman yul ebꞌ yintaj wan bꞌey scaabꞌ piso tuꞌ. Ey jun kꞌooch bꞌe chi too bꞌey bꞌabꞌel piso, chi ecꞌ atoj bꞌey scaabꞌ piso, masantaꞌcꞌal chi apni bꞌey yet yox piso. 8-11 Jix wilon masanil yich xeꞌ bꞌey bꞌatxan ey smuroal stemplo Dios, ey oxebꞌ metro yea steel; jacꞌal oc jun tuꞌ eyoc yichoj wan cuarto eya bꞌey yinlaj templo tuꞌ. Jaꞌ yichlaj wan cuarto tuꞌ, ey nan yox metro spimal, nan yox metro etxan can eltoj jun yich tuꞌ yinlaj xeꞌ templo tuꞌ. Ey jun yamakꞌil bꞌey yinlaj stemplo Dios, ey 10 metro sat snan xol templo yetoj wan scuarto ebꞌ yakꞌomal xaambꞌal. Ey puerta yet wan cuarto bꞌey yinlaj templo chi elol bꞌey yamakꞌil bꞌey yinlaj tuꞌ. Ey jun puerta bꞌey yetcꞌulal norte, ey cꞌal pax junxa bꞌey yetcꞌulal sur.

12 Jaꞌ sattaj yamakꞌil stemplo Dios, yetcꞌulal bꞌey chi too cꞌu, ey jun miman na eya tituꞌ, ey 35 metro yeoc sat, 45 metro yeoc spacꞌul. Jaꞌ smuroal, ey nan yox metro spimal.

13 Jix echele spacꞌul stemplo Dios yu jun winaj tuꞌ. Chi too tacꞌal bꞌey yintaj templo. Masanil sattaj yamakꞌil tuꞌ, yetoj jun na ey yetcꞌulal bꞌey chi too cꞌu, ey 50 metro yin masanil. 14 Jaꞌ sattaj jun templo tuꞌ, chi cancan yetcꞌulal bꞌey chi aol cꞌu, yetoj jun yamakꞌil eltoj tuꞌ, ey 50 metro. 15 Jix lawi tuꞌ, jix yechen spacꞌul jun na ey bꞌey yintaj templo tuꞌ, jacan octej bꞌey sattaj eltoj tuꞌ, yetoj spimal smuroal, ey cꞌal pax 50 metro.

Jaꞌ caabꞌ cuarto bꞌey yul templo tuꞌ, yetoj cꞌal yul spilaliẍal jacantoj yin yamakꞌil tuꞌ, 16 eyoc teꞌ chemteꞌ yinlaj. Ey cꞌal oc swentanail yoxebꞌal, txenne cꞌal sat swentanail. Chi too tacꞌal chemteꞌ bꞌey stiꞌ spuertail, masantaꞌcꞌal bꞌey yul, ey cꞌal oc chemteꞌ yichlaj sat masanil. Chi too tacꞌal bꞌey sat spisoal, masantaꞌcꞌal chi aapnoj bꞌey swentanail. Jaꞌ wan wentana tuꞌ ey smajbꞌanil sat eyocoj. 17 Ey cꞌal pax oc teꞌ chemteꞌ satlaj yich yul bꞌabꞌel cuarto bꞌey chi cu octoj bꞌey yul caabꞌ cuarto tuꞌ. 18 Nonaj xacꞌal el yin sat masanil teꞌ chemteꞌ tuꞌ yu yechel querubín cꞌal yetoj yechel teꞌ palma. Eyoc jun yechel teꞌ palma, cꞌal jun yechel querubín yinlaj, jaxca cꞌal tuꞌ yeoc masanil. Caabꞌcaabꞌ cꞌal sat junjun wan querubín tuꞌ. 19 Ey jun sat, laan yili jaxca sat ánima, tꞌanan oc yin yechel teꞌ palma tuꞌ. Jal junxa xin, laan yili jaxca sat noꞌ bꞌalam, tꞌanan cꞌal pax oc yin junxa yechel teꞌ palma. Quey cꞌal tuꞌ yili yul templo tuꞌ masanil. 20 Chi too tacꞌal bꞌey sat spisoal masantaꞌcꞌal bꞌey sjolomtaj smajil na tuꞌ. 21 Jaꞌ smarcoal yul stiꞌ smajil stemplo Dios tuꞌ, laan cꞌal yeoc scaabꞌil.

Jaꞌ bꞌey sattaj jun cuarto tol Asan Jehová Ey Yet Xꞌojli, ey jun tzetyetal laan yili 22 jaxca junoj teꞌ yet xaambꞌal, jun metro yeocoj, nan scaabꞌ metro yea steel. Ey xiquinlaj, ey cꞌal pax oc sbꞌatxlubꞌal yalan. Jal yinlaj xin, teꞌ cꞌal eloj. Jix yalon jun winaj tuꞌ ey jin: Jaꞌton jun meẍa tiꞌ eyoc sattaj Jehová, ẍi ey jin.

23 Jaꞌ smajil wan bꞌabꞌel cuarto, yetoj cꞌal smajil jun Cuarto Asan Dios Ey Yet Xꞌojli, caabꞌcaabꞌ jenan yeoc wan puerta tuꞌ. 24 Jal wanojxa xin, caabꞌ tujan yeocoj, eyoc svisagrail snanlaj. 25 Jaꞌ yin satlaj spuertail jun bꞌabꞌel cuarto tuꞌ, ey cꞌal oc yechel querubín yin, yetoj cꞌal yechel teꞌ palma. Laan yili yetoj wan eyoc bꞌey satlaj yich. Jaꞌ yibꞌan spuertail bꞌey yul spilaliẍal tuꞌ, eyoc spatil yibꞌan tol teꞌ cꞌal eloj. 26 Jaꞌ bꞌey junjun pacꞌ yul spilaliẍal tuꞌ, ey swentanail tol txenne sat. Ey cꞌal pax oc yechel teꞌ palma yin satlaj yich.