Jaꞌ Wan Na Eyoc Yinlaj Stemplo Dios
42
Jix lawi tuꞌ, jix wilon an tol jix jin yiꞌeltej jun winaj tuꞌ bꞌey sattaj eltej bꞌey yetcꞌulal norte. Jix jin yiꞌon octoj yul wan cuarto snan xol jun yamakꞌil yinlaj stemplo Dios, yetoj junxa na bꞌey yetcꞌulaltoj norte. 2 Jaꞌ wan cuarto tuꞌ, ey 50 metro yeoc spacꞌul bꞌey yetcꞌulal norte, yetoj 25 metro yeoc sat. 3 Jal jun pacꞌ chi cancan bꞌey stiꞌ yamakꞌil yinlaj templo tuꞌ, ey 10 metro sat. Jal junxa pat yetcꞌulal bꞌey latzꞌbꞌil oc chꞌen chꞌen bꞌey jun bꞌabꞌel yamakꞌil templo tuꞌ, ey oxebꞌ piso yeoc junjun. Junjun piso yaliẍne yul yintaj wan yet bꞌabꞌel. 4 Jaꞌ bꞌey sattaj wan cuarto tuꞌ, ey jun yul pilaliẍ ey can snan, joebꞌ metro sat yetoj 50 metro skꞌatil, chi apni oc bꞌey yul octoj. Jaꞌ spuertail wan cuarto tuꞌ, jatuꞌ eyoc bꞌey yetcꞌulal norte. 5 Jaꞌ wan cuarto bꞌey yet yox piso tuꞌ, yaliẍne ebꞌ yintaj wan yet scaabꞌ piso ey bꞌey yalan, yutol ey wan yul pilaliẍ ey can snanlaj, yuxan yaliẍ xa yul wan tuꞌ. 6 Oxebꞌ piso yeoc wan cuarto tuꞌ, asan xin, cꞌam spilaliẍal jaxca yet wan cuarto ey yinlaj jun bꞌabꞌel yamakꞌil tuꞌ, yuxan jaꞌ jun piso bꞌey yibꞌan tuꞌ, yaliẍ yul yintaj jun eyoc snan, jal jun snan tuꞌ xin, yaliẍ yintaj jun ey yalan.7 Ey jun muro yin 25 metro yeoc skꞌatil chi ecꞌtoj bꞌey sattaj wan cuarto tuꞌ, junne chi ecꞌtoj yetoj smuroal jun bꞌabꞌel yamakꞌil eltoj tuꞌ. 8 Yutol jaꞌ wan cuarto ey bꞌey spacꞌul jun bꞌabꞌel tuꞌ, asanne 25 metro yeoc skꞌatil, jal pax wan cuarto ey bꞌey yinlaj templo xin, ey 50 metro yeoc spacꞌul. 9 Jaꞌ wan cuarto bꞌey bꞌabꞌel piso, bꞌey spuertail yet chi cu octoj bꞌey bꞌabꞌel yul stiꞌ na tuꞌ, bꞌey jun pacꞌ ey yetcꞌulal bꞌey chi aol cꞌu, 10 bꞌey chi elol smuroal jun na tuꞌ.
Jaꞌ bꞌey yetcꞌulal sur, bꞌey snan xol jun yamakꞌil yinlaj stemplo Dios yetoj junxa na tuꞌ, jaꞌ tituꞌ ey cꞌal pax wanxa cuarto eyaoj. 11 Laan cꞌal scawxi, laan cꞌal yeoc jaxca wan cuartolaj bꞌey yetcꞌulal norte. Laan cꞌal yeoc bꞌey chi cu octoj cꞌal bꞌey chi cu eltej, yetoj cꞌal jun yul pilaliẍ ey can snan yul. 12 Jaꞌ yet chi cu octoj bꞌey wan cuartolaj bꞌey yetcꞌulal sur, ey jun puerta bꞌey chi ẍaꞌel yich bꞌey yul pilaliẍ tuꞌ, bꞌey chi ecꞌ eltoj smuroal tuꞌ, jaꞌton jun muro tuꞌ enele yeoc yetcꞌulal bꞌey chi aol cꞌu.
13 Jix yalon jun winaj tuꞌ ey jin jaxca tiꞌ: Jaꞌ wan cuarto bꞌey yetcꞌulal norte, cꞌal bꞌey sur, jaꞌton wan ey stiꞌeltoj sattaj templo tuꞌ, asanne ebꞌ yakꞌomal xaambꞌal ey yet. Jaꞌ tituꞌ chi ẍiꞌ noꞌ xaambꞌal ebꞌ yakꞌomal xaambꞌal tol asan Jehová ey yet, yutol jaꞌ ebꞌ chi akꞌwi servil bꞌey Jehová. Jaꞌ tituꞌ chi yaoctoj wan tzetyetal ebꞌ tol asan Dios ey yet, jaꞌton ixim tiriw chi akꞌle yin ofrendail, cꞌal ixim chi akꞌle yetoj noꞌ xaambꞌal yu yakꞌle tan spenail, cꞌal yetoj noꞌ xaambꞌal, yu stooloj spenail, yutol jaꞌ wan ofrenda tuꞌ, yet Jehová yeocoj. 14 Jaꞌ yet chi octoj ebꞌ yakꞌomal servil tuꞌ yul templo, cꞌam chi skeꞌ comon cꞌal chi eltoj ebꞌ bꞌey sattaj cꞌal bꞌey yamakꞌil templo yet cꞌamto chi sqꞌuexcan el spichil ebꞌ chi yaoc yin yopiso yul templo tuꞌ. Yutol jaꞌ jun spichil ebꞌ tuꞌ, miman yeloc apnoj, yuxan cꞌam chi skeꞌ yeltoj ebꞌ xol conobꞌ yetoj; sowalil txꞌojxa spichil ebꞌ chi yaocoj, ẍi jun winaj tuꞌ ey jin.
Jix Echele Yinlaj Templo
15 Jaꞌ yet jix lawi yechen yul templo jun winaj tuꞌ, jix jin yiꞌon eltoj bꞌey jun puerta ey yetcꞌulal bꞌey chi aol cꞌu. Jix lawi tuꞌ, jix oc ian yechen txꞌotxꞌ yinlaj templo tuꞌ. 16 Jix skꞌanbꞌalne jun teꞌ aa iꞌbꞌil oc yu, jix yechen bꞌey jun pacꞌ yetcꞌulal bꞌey chi aol cꞌu; ey 250 metro. 17 Jix lawi tuꞌ, jix yechen cꞌal pax jun pacꞌ yetcꞌulal norte, jaꞌ jun tuꞌ ey cꞌal pax 250 metro. 18 Jal jun pacꞌxa yetcꞌulal sur, ey 250 metro. 19 Jaꞌ yin slawubꞌal xin, jaꞌ yetcꞌulal bꞌey chi too cꞌu, jacꞌalaꞌ 250 metro cꞌal pax oj. 20 Jix yeche cꞌal scanpaqꞌuil. Jaꞌ yin masanil xꞌotxꞌal templo tuꞌ, ey jun muro, 250 metro yeoc junjun pacꞌ. Jaꞌ jun tuꞌ eyoc snan xol tzetyetal tol yet Dios yeocoj, cꞌal wanxa txꞌoj yeocoj.