5 Jix lawi tuꞌ xin, jix wabꞌeni tol jaꞌ Yespíritu Dios jix jin iꞌon a waanoj, jix jin yiꞌontoj bꞌey yet scaabꞌ yamakꞌil templo. Jix wiloni tol caw nonaj el yul templo yu stzejejial Jehová. 6 Jix wilon pax oj, ey jun winaj linan oc jin cꞌatan. Jix wabꞌeni, tol jata cꞌal bꞌey yul templo tuꞌ jix kꞌanabꞌ eltej Jehová ey jin. 7 Jix yalon jaxca tiꞌ: Jaach ánima, jaꞌton titiꞌ bꞌey ey jin trono tiꞌ; jaꞌ titiꞌ caan jin ecꞌ yin junelne snan xol ebꞌ ja wet Israelal. Jaꞌ ebꞌ tiꞌ, yetoj cꞌal ebꞌ sreyal ebꞌ, manxa oj jin yintajne el ebꞌ, manxa oj oc ebꞌ yin eyilal tet comon dios, cꞌal smujon sreyal ebꞌ scawilal jin templo tiꞌ, jaxca jix yun ebꞌ yet yalantoj. 8 Jaꞌ yet tuꞌ jix swaꞌne a spalacio ebꞌ yin scꞌul jin templo. Junxane smuroal ey snan xol spuertail jin templo yetoj puertail sdespacho ebꞌ tuꞌ. Caw pena chi yun jin bꞌina yu ebꞌ, yutol caw pena sbꞌeybꞌal ebꞌ, caw yaabꞌetaj yul jin sat. Yu jun tuꞌ, yuxan jix tit jin jowal yin ebꞌ, catuꞌ jix wakꞌon cam ebꞌ. 9 Yu jun tuꞌ, cꞌam ojabꞌxa chi oc ebꞌ yin eyilal tet comon dios, cꞌam ojabꞌxa chi smuj sreyal ebꞌ scꞌatan jin templo, queyton tuꞌ oj yun weecꞌ snan xol ebꞌ. 10 Jaꞌ tinaniꞌ xin, jaach ánima, al tet ebꞌ ja wet Israelal tzet utbꞌil yeoc jin templo jix ja wilaꞌ, yet watxꞌ chi cam yilon ebꞌ cꞌal qꞌuixwi a ebꞌ yu spenail chi yunne. 11 Ta tol oj qꞌuixwoj a ebꞌ yu tzet jix el yunen ebꞌ, catuꞌ oj ja kocꞌ alne el tet ebꞌ tzet utbꞌil yeoc jin templo, yetoj cꞌal tzettaj yetal ey yul, yetoj cꞌal tzet utbꞌil yeoc spuertail, chi yal yeloc apnoj masanil tzet utbꞌil yeocoj, yetoj cꞌal pax wan sleyalil tol sowalil chi jijelei. Tzꞌibꞌe yechel masanil wan tuꞌ, yet watxꞌ oj naꞌcha el yu ebꞌ sicꞌlebꞌil yet oj yuneni. Catuꞌ cha tzꞌibꞌen cꞌal pax masanil wan ley, yet watxꞌ chi sjije ebꞌ yuneni. 12 Jaꞌton jun tuꞌ xolilal tzet yeoc bꞌey jin templo: Masanil txꞌotxꞌ tzalquiltaj yinlaj templo, junelne tol wet yeocoj, ẍi Jehová.

13 Jaꞌ jun yechel jun yet xaambꞌal bꞌey yul stemplo Dios tuꞌ, jacꞌalaꞌ jun echbꞌal tuꞌ jix kꞌanle yin templo. Jaꞌ cimientoal yich jun yet xaambꞌal, ey nan metro eeytoj yul txꞌotxꞌ, nan cꞌal pax metro ey can el yinlaj. Ey cꞌal pax niꞌanxa tzalan a bꞌey stiꞌlaj tuꞌ, 25 centímetro eyaoj. 14 Chi tit tacꞌal bꞌey yibꞌan cimientoal yich masantaꞌcꞌal bꞌey chi aapnoj yet scaabꞌ tujan yich, jun metro eya steel; nan metro etxan can el yinlaj. Jal pax jun yet yox tujan xin, caabꞌ metro eya steel, etxan can el nan metro yinlaj yich jun yet xaambꞌal tuꞌ. 15 Jaꞌ bꞌey jun yet xaambꞌal tuꞌ chi akꞌle tzꞌaꞌ xaambꞌal. Jaꞌ jun tuꞌ, caabꞌ metro eya steel; jaꞌ scanebꞌal xiquin naat eya yibꞌan bꞌey chi akꞌle tzꞌaꞌ noꞌ xaambꞌal. 16 Jaꞌ jun tuꞌ, ey wajebꞌ metro cꞌal yeoc junjun spacꞌul. 17 Jacꞌalaꞌ jun yet yox yich, ey jujebꞌ metro yeoc junjun spacꞌul. Jaꞌ yin stiꞌlaj, ey niꞌanxa tzalan aoj, 25 centímetro eyaoj, nan metro etxan can el yinlaj yich jun yet xaambꞌal tuꞌ. Jaꞌ jun kꞌooch chi atoj bꞌey jun yet xaambꞌal tuꞌ, chi can yetcꞌulal bꞌey chi aol cꞌu.

18 Jix lawi tuꞌ, jix yalon Jehová ey jin: Jaach ánima, ja yet oj apnoj oc stiempoal swaꞌxi jun yet xaambꞌal tuꞌ, sowalil chi jijele wan sleyalil tiꞌ: Sowalil oj akꞌle tzꞌaꞌ junoj noꞌ noꞌ yin xaambꞌal yibꞌan, catuꞌ oj txile oc ẍiqꞌuil noꞌ yibꞌan. 19 Jain Jehová jin chi walaꞌ, tol jaꞌ tet ebꞌ Levita yicꞌaal Sadoc, jaꞌton ebꞌ yakꞌomal xaambꞌal, jaꞌ ebꞌ chi skeꞌ sjul jin cꞌatan yin jin yakꞌon servil ebꞌ, chi yakꞌ tzꞌaꞌ junoj noꞌ achꞌe wacax ebꞌ yin xaambꞌal, yu yakꞌle lawoj spenail ebꞌ. 20 Chi lawi tuꞌ, oj yiꞌontej niꞌoj ẍiqꞌuil noꞌ ebꞌ, catuꞌ chi xion oc ebꞌ yin scanebꞌal xiquin jun yet xaambꞌal, cꞌal yin xiquinlaj yet yox tujan yich tol naat eyaoj, cꞌal yinlaj yich masanil jun yet xaambꞌal tuꞌ. Queytuꞌ oj yun swaꞌxi can el jun yet xaambꞌal cꞌal yoc can yin yopiso. 21 Chi lawi tuꞌ, catuꞌ chi yiꞌon a noꞌ wacax ebꞌ jix akꞌle yin xaambꞌal tuꞌ, catuꞌ oj yakꞌon tzꞌaꞌ ebꞌ bꞌey yinlaj templo bꞌey jun lugar tol txequel yeocoj. 22 Jaꞌ yet junxa cꞌual, oj yakꞌon tzꞌaꞌ junoj noꞌ chiw ebꞌ, yu yakꞌle tan spenail ebꞌ, jaꞌton junoj noꞌ cꞌam niꞌoj tacnajil. Queytuꞌ oj yun sajbꞌanen el ebꞌ yakꞌomal xaambꞌal jun yet xaambꞌal tuꞌ yetoj noꞌ chiw, jaxca cꞌal jix yun ebꞌ yetoj noꞌ wacax. 23 Jaꞌ yet oj lawoj wan tuꞌ, oj yiꞌontej junoj noꞌ achꞌe wacax ebꞌ, cꞌal junoj noꞌ icham meꞌ, tol watxꞌ cꞌal smimanil noꞌ scacꞌonal. 24 Queyton tuꞌ oj yun yiꞌontej ebꞌ ey jin. Oj yaoc yatzꞌamil ebꞌ, catuꞌ oj yakꞌon tzꞌaꞌ ebꞌ yu wiꞌle a can yu ebꞌ. 25 Yin junjun cꞌu, yin jujebꞌ cꞌual, sowalil oj yakꞌ cꞌal pax junoj noꞌ chiw ebꞌ yin xaambꞌal, yu yakꞌle tan spenail, yetoj cꞌal junoj noꞌ achꞌe wacax, cꞌal yetoj junoj noꞌ icham meꞌ. Tol watxꞌ cꞌal smimanil noꞌ scacꞌonal. 26 Queytuꞌ oj yun ebꞌ junjun cꞌu, yet chi sajbꞌanen ebꞌ yakꞌomal xaambꞌal jun yet xaambꞌal tuꞌ, yet watxꞌ chi oc cꞌal yopiso. 27 Jujebꞌ cꞌual oj yun ebꞌ jaxca tuꞌ, jal yet swaxajebꞌ cꞌual xin, cꞌal yet oj bꞌey cꞌaltoj, oj yakꞌ cꞌal xaambꞌal ebꞌ chi tzꞌaꞌi, cꞌal xaambꞌal yet watxꞌcꞌulal. Yutol jain Jehová jin chi walaꞌ; tol oj jex jin chaꞌ yin tzalacꞌulal, ẍi Dios.