2 Jaꞌ tituꞌ jix yal Jehová ey jin: Jaꞌ jun puerta tiꞌ, oj can cꞌal majan jaxca tuꞌ; cꞌam bꞌakꞌin oj jajleoj. Cꞌam mactxequel oj skeꞌ yoctoj yul, yutol jaꞌ bꞌey jun tuꞌ jix jin octoj jain sDiosal Israel jin tiꞌ. 3 Asan naj syaawil conobꞌ chi skeꞌ yapni oc low tituꞌ yet chi ẍiꞌon noꞌ xaambꞌal jin sattaj. Jaꞌ tituꞌ chi ecꞌ octoj bꞌey yul spilaliẍal bꞌey sattaj tuꞌ, jacꞌalaꞌ jaꞌ tituꞌ, chi ecꞌ el pax toj junelxa, ẍi Dios.

4 Jix lawi tuꞌ, jix jin yiꞌontoj jun winaj tuꞌ bꞌey jun puerta ey bꞌey yetcꞌulal norte, bꞌey sattaj templo. Jix wiloni tol jix noel yul templo yu stzejejial Jehová. Queytuꞌ jix yun wey noan bꞌey sat txꞌotxꞌ. 5 Catuꞌ jix yalon Jehová ey jin: Jaach ánima, chi cam wal ja wiloni, cꞌal ja wabꞌen sleyalil yeoc jin templo tiꞌ. Oj cam wal ja wiloni, mactxequel oj skeꞌ yoctoj cꞌal yeltoj yul jin templo tiꞌ.

6 Al tet ebꞌ ja wet conobꞌ Israel, ebꞌ pit chi yute sbꞌa tuꞌ: Jain Jehová jin chi walaꞌ: Bꞌejwej can bꞌeybꞌale tol yaabꞌetaj yili chi wilaꞌ. 7 Jaex tiꞌ, jix je yetne el jin templo. Comon xacꞌal jix je chaꞌ octoj ebꞌ txꞌoj conobꞌal yul, jaꞌton wan ánima tol cꞌam yechel jin wa kꞌane eyoc yin snaꞌbꞌal cꞌal yin smimanil. Jix je yetnetoj yin je yakꞌon ixim tiriw, cꞌal ẍepuꞌal noꞌ noꞌ yin xaambꞌal, cꞌal ẍiqꞌuil noꞌ xaambꞌal tuꞌ, caw cꞌamxa yeloc apnoj jin wa kꞌane yul je sat. 8 Ma je jije jin chejbꞌanil yin je yakꞌon xaambꞌal, tol jix je ya can oc je yopiso tuꞌ yul skꞌabꞌ ebꞌ txꞌoj conobꞌal, ja chi.

9 Jaꞌ yu jun tuꞌ, yuxan jain Jehová jin chi walaꞌ: Jaꞌ bꞌey jin templo, cꞌamxa bꞌakꞌin oj octoj junoj txꞌoj conobꞌal tol cꞌam yechel jin wa kꞌane eyoc yin snaꞌbꞌal, cꞌal yin smimanil, tam wal ebꞌ txꞌoj conobꞌal caan ecꞌ je xol.

10 Jaꞌ ebꞌ Levita tol jix el jin cꞌatan, yet jix jin sbꞌejoncan masanil ebꞌ Israelal, jaꞌton yet jix too ebꞌ yin eyilal tet tzet chi al-le oc diosal, oj waoc syaꞌilal yibꞌan ebꞌ yu spenail tuꞌ. 11 Oj skeꞌ yoc ebꞌ yin yakꞌon servil cꞌal steynen spuertail jin templo, cꞌal yin junojxa akꞌo servilal bꞌey templo tuꞌ. Chi skeꞌ smakꞌon cam noꞌ xaambꞌal ebꞌ bꞌey jin templo, jaꞌton noꞌ chi yakꞌ ebꞌ conobꞌ yin ofrendail. Sowalil bꞌejan ojabꞌ scꞌul ebꞌ yin yakꞌon servil yet conobꞌ. 12 Jaꞌ yet yalantoj, jix yakꞌ servil yet conobꞌ ebꞌ yin yiꞌon ey sbꞌa tet wan chi al-le oc diosal. Queytuꞌ jix yun yijbꞌaletoj ebꞌ yet Israelal yin spenail yu ebꞌ. Yu jun tuꞌ, yuxan jain Jehová jin chi wakꞌcan jin tiꞌ, tol oj waoc syaꞌilal yibꞌan ebꞌ yu spenail tuꞌ. 13 Cꞌam chi skeꞌ yoc ebꞌ yin yakꞌon servil jin sattaj yin yakꞌomaloj xaambꞌal, tam wal chi skeꞌ smitxꞌon tzetyetal ebꞌ tol miman yeloc apnoj, tam wal tzetyetal tol wet yeocoj. Sowalil oj jul yibꞌan ebꞌ yu yel sqꞌuixwil ebꞌ yu spenail jix el yunen ebꞌ. 14 Yu jun tuꞌ, jaꞌ yin comon mulnail oj waoc ebꞌ yin yakꞌon servil ebꞌ bꞌey jin templo, yet watxꞌ oj yiltoj masanil mulnail ebꞌ tituꞌ.

15 Jal pax ebꞌ yakꞌomal xaambꞌal yeoc xol ebꞌ Levita, yicꞌaal Sadoc, jaꞌ ebꞌ tuꞌ jix jin yakꞌ cꞌal servil ebꞌ, caxcꞌal mi jix spoꞌoel sbꞌa ebꞌ yet Israelal yin sjijen jin chejbꞌanil, yuxan jain Jehová jin chi walaꞌ, tol asanne ebꞌ tuꞌ chi skeꞌ sjul jin sattaj yin jin yakꞌon servil. Chi skeꞌ yoc ebꞌ jin sattaj yin yakꞌon ẍepuꞌal noꞌ noꞌ, cꞌal yakꞌon ẍiqꞌuil noꞌ xaambꞌal ebꞌ ey jin an. 16 Chi skeꞌ cꞌal pax yoctoj ebꞌ yul jin templo, yet chi octoj ebꞌ bꞌey jun yet xaambꞌal yin jin yakꞌon servil ebꞌ. Asan ebꞌ chi skeꞌ yilon jin mulnail tituꞌ. 17 Jaꞌ yet chi octoj ebꞌ bꞌey spuertail jun yet scaabꞌ yamakꞌil tuꞌ, sowalil chi yaoc spichil ebꞌ tol lino cꞌal eloj. Jaꞌ yet eyoc ebꞌ yin yopiso tuꞌ, ma bꞌey templo cꞌam chi yaoc spichil ebꞌ tol lana eyoc yin. 18 Sowalil eyoc an lino skꞌoxiloj sjolom ebꞌ. Sowalil lino cꞌal pax yet yul swex ebꞌ eyocoj. Cꞌam ojabꞌ chi skꞌal snan ebꞌ, yet watxꞌ cꞌam chi el jaꞌ yin ebꞌ. 19 Jaꞌ yet cꞌamto chi eltej ebꞌ bꞌey bꞌabꞌel yamakꞌil tuꞌ, bꞌey eyecꞌ wan yet conobꞌ ebꞌ tuꞌ, sowalil chi yiꞌcan el spichil ebꞌ chi skꞌan yin yopiso bꞌey yul templo, catuꞌ chi cancan bꞌey yul wan cuarto tuꞌ. Jaꞌ junojxa spichil ebꞌ chi yaocoj, yet watxꞌ cꞌam chi oc can stzejejial Dios tol eyoc yin jun pichile tuꞌ yin ebꞌ eyecꞌ tituꞌ.

20 Cꞌam chi yakꞌ tzujom el tꞌiran sjolom ebꞌ, tam wal chi ẍaꞌ xacꞌal pax chꞌibꞌtoj xil sjolom ebꞌ, txenne cꞌal chi yun stzujle el xil sjolom ebꞌ. 21 Cꞌam junoj yakꞌomal xaambꞌal chi yucꞌ vino yet chi octoj bꞌey jun yet scaabꞌ yamakꞌil na tuꞌ. 22 Cꞌam chi skeꞌ snupi ebꞌ yetoj ebꞌ ix ix tol camnajxa yichamil, ma tol spoꞌolenaj sbꞌa yetoj yichamil; tol asanne ojabꞌ junoj ix kꞌopo Israel, ma yistil junoj ebꞌ yakꞌomal xaambꞌal camnajxa, chi skeꞌ yoc yistiloj ebꞌ.

23 Jaꞌ ebꞌ yakꞌomal xaambꞌal tuꞌ, sowalil chi cuywa ebꞌ tet jin conobꞌ yet chi yotajne el ebꞌ tzetyetal sicꞌbꞌil el wu, cꞌal tzetyetal man sicꞌbꞌiloj el wu, yin tzetyetal saj, cꞌal tzetyetal man sajoj, jatacꞌalaꞌ yalon ley. 24 Jacꞌalaꞌ ta ey bꞌey chi oc jowal, jaꞌ ebꞌ chi waꞌnen yeoc jun jowal tuꞌ, jatacꞌalaꞌ yalon jin ley. Chi sjije sleyalil wan jin kꞌin ebꞌ, catuꞌ chi sjijen scꞌual xewilal ebꞌ tol wet yeocoj.

25 Cꞌam bꞌakꞌin chi smitxꞌ junoj mimanile tol camnajxa, yet watxꞌ cꞌam chi yetnetoj sbꞌa ebꞌ sattaj ley. Asanne ta jaꞌ smam, ma txutx ebꞌ, ma jaꞌ junoj scꞌaal, ma scutzꞌin, ma junoj yuẍtaj, ma junoj yanabꞌ ebꞌ tol cꞌamto yichamil yet chi cami, chi skeꞌ smitxꞌon ebꞌ. 26 Chi lawi tuꞌ, sowalil chi sajbꞌane sbꞌa ebꞌ, jatacꞌalaꞌ ley, catuꞌ cꞌam chi oc ebꞌ mulna yul templo yin jujebꞌ cꞌual. 27 Jaꞌ yet chi oc pax toj ebꞌ bꞌey yul templo tuꞌ, yet chi mulna ebꞌ yin yopiso junelxa, jain Jehová jin chi walaꞌ, tol sowalil chi yakꞌ junoj xaambꞌal ebꞌ yu stancan el spenail ebꞌ yibꞌan.

28 Cꞌam cꞌal junoj ebꞌ yakꞌomal xaambꞌal tuꞌ chi yiꞌ smajul txꞌotxꞌ bꞌey je conobꞌ tuꞌ, jaxca tol jain, ey jin oc smajuloj ebꞌ. 29 Jaꞌ sloꞌbꞌe ebꞌ yakꞌomal xaambꞌal jaꞌton tzetyetal chi akꞌle ey jin yu yet conobꞌ ebꞌ, yetoj cꞌal noꞌ xaambꞌal chi akꞌle ey jin yu yakꞌle tan spenail, cꞌal yu stoolanele el spenail, yetoj cꞌal masanil tzetyetal chi yakꞌ ebꞌ yet Israelal ebꞌ ey jin. Jaꞌ wan tuꞌ, yet cꞌal ebꞌ yeocoj. 30 Yetoj pax oj, jaꞌ ebꞌ yakꞌomal xaambꞌal tuꞌ, jaꞌ bꞌabꞌel sat awo caw watxꞌ, sowalil chi ẍaꞌ ebꞌ, yetoj cꞌal masanil ofrenda. Jaꞌ yet oj je waꞌnen ixim pan, ixim caw watxꞌ, jaꞌ oj je yakꞌ tet ebꞌ, yet watxꞌ chi wakꞌ jin watxꞌcꞌulal je yibꞌan. 31 Jaꞌ ebꞌ yakꞌomal xaambꞌal tuꞌ, cꞌam chi skeꞌ ẍiꞌon junoj noꞌ tzꞌiquin ebꞌ, ma junojxa noꞌ noꞌ tol tucꞌal chi cameloj, ma tucꞌal makꞌbꞌil cam yu noꞌ chiꞌwawom noꞌ.