Jaꞌ Txꞌotxꞌ Txꞌotxꞌ Tol Yet Jehová Yeocoj
45
Jaꞌ yet chi poꞌole ecꞌ txꞌotxꞌ txꞌotxꞌ yin junjun icꞌaaleal, sowalil chi poꞌole can el niꞌoj txꞌotxꞌ tol wet chi yun can oc jain Jehová jin tiꞌ, nan yoxlajonebꞌ kilómetro chi yun can steel, yetoj laonebꞌ kilómetro sat. Masanil jun tujan txꞌotxꞌ tuꞌ, wet chi yun can ocoj. 2 Jaꞌ bꞌey snan yul jun txꞌotxꞌ tuꞌ, jaꞌ tituꞌ chi poꞌole can el jun tujan yet templo, 250 metro chi yun canoj. Laan cꞌal chi yun yechel junjun pacꞌ. Jaꞌ bꞌey yinlaj tuꞌ chi can cꞌal pax junxa 25 metro, tol colan chi yun canoj. 3 Jaꞌ junoj tujan txꞌotxꞌ txꞌotxꞌ tol wet chi yun can oc tuꞌ, ey jun tujan, nan yoxlajonebꞌ kilómetro steel, joebꞌ kilómetro sat. Jaꞌ snan yul jun tujan tuꞌ, sowalil jaꞌ tituꞌ chi can templo tol wet yeocoj. 4 Jaꞌ jun tujan txꞌotxꞌ tuꞌ yet ebꞌ yakꞌomal xaambꞌal chi mulna bꞌey templo chi yun can ocoj, jaꞌton ebꞌ chi oc jin sattaj yin jin yakꞌon servil. Jaꞌ tituꞌ chi skeꞌ swaꞌnen a sna ebꞌ, cꞌal swaꞌxi a jin templo sat. 5 Jacꞌalaꞌ, ey cꞌal pax junxa tujan txꞌotxꞌ nan yoxlajonebꞌ kilómetro steel, yetoj joebꞌ kilómetro sat. Jaꞌ jun tuꞌ, yet ebꞌ Levita chi yun canoj, jaꞌton ebꞌ chi mulna bꞌey jin templo, yet watxꞌ ey bꞌey chi swaꞌne a sconobꞌal ebꞌ bꞌey chi caey ecꞌ ebꞌ. 6 Jal yin slawubꞌal xin, sowalil chi can junxa tujan txꞌotxꞌ txꞌotxꞌ bꞌey scꞌatan txꞌotxꞌ wet yeocoj. Jaꞌ jun tujan tuꞌ yet masanil ebꞌ conobꞌ Israel chi yun canoj. Nan yoxlajonebꞌ kilómetro chi yun skꞌatil yetoj nan yox kilómetro chi yun sat.Jaꞌ Txꞌotxꞌ Yet Naj Yaaw
7 Yetoj cꞌal pax oj, ey caabꞌ tujan txꞌotxꞌ yet ebꞌ yaaw chi yun canoj. Ey jun tujan txꞌotxꞌ ey yetcꞌulal bꞌey chi aol cꞌu, jal junxa tujan txꞌotxꞌ xin, jatuꞌ chi can yetcꞌulal bꞌey chi too cꞌu, chi yal yeloc apnoj jaꞌton bꞌey jun spacꞌul txꞌotxꞌ wet yeocoj, cꞌal bꞌey spacꞌul txꞌotxꞌ yet ebꞌ conobꞌ yeocoj. Laan cꞌal steel yetoj junoj tujan txꞌotxꞌ yet junoj icꞌaaleal. 8 Jaꞌ jun tujan txꞌotxꞌ tuꞌ, yet ebꞌ yaaw yeoc bꞌey Israel chi yun can ocoj. Yuxan manxa oj iꞌle ecꞌ xꞌotxꞌ ebꞌ jin conobꞌ yu ebꞌ, jaꞌ xꞌotxꞌ ebꞌ tuꞌ chi cancan tet yicꞌaal ebꞌ yet bꞌakꞌin.
Ley Yin Ebꞌ Naj Yaaw
9 Jain Jehová jin chi walaꞌ: Jex yaaw je yeoc bꞌey Israel. Kꞌojbꞌilxa je yetnen ebꞌ ánima; watxꞌ ojabꞌ cꞌal che yute je bꞌa, jichan ojabꞌ cꞌal che yute je waꞌnen yeoc junoj jowal ey snan xol ebꞌ. Bꞌejwej je tokꞌon ecꞌ xꞌotxꞌ ebꞌ jin conobꞌ. Jain Jehová jin chi walaꞌ:
10 Tzꞌajan ojabꞌ je yechbꞌal che kꞌanaꞌ. 11 Jaꞌ je yechbꞌal che kꞌan yin tzetyetal yin sat awoal, jaꞌ che yakꞌbꞌalne cꞌal pax yin jaꞌ jaꞌ chi yun yechelei. Jaꞌ jun echbꞌal chi yij homer, ey 220 litro chi ey yul. Jaꞌ chi akꞌon yechel masanil echbꞌal. Jaꞌ junoj homer, chi yiꞌ laonebꞌ bato jaxca wan tzetyetal yin jaꞌ chi yun yechelei, ma laonebꞌ efa tzetyetal yin sat awoal.
12 Jacꞌalaꞌ cꞌal pax tzetyetal tol chi echele yalil junoj tzetyetal: Jaꞌ junoj 20 gera, laan jaxca jun siclo;a jal pax junoj 60 siclo laan yalil jaxca jun chi yij mina.
13 Jaꞌton wan ofrenda tiꞌ sowalil che yakꞌa: Jaꞌ yin ixim tiriw, cꞌal yin ixim cebada, 60 tujan che yute. Jaꞌ junoj tujan tuꞌ che yakꞌ yin ofrendail. 14 Jacꞌalaꞌ laan cꞌal pax che yute je poꞌon el je yaceite, 100 tujan che yute eloj; jun tujan che yakꞌ cꞌal pax yin ofrendail. 15 Jal pax yin noꞌ je meꞌ xin, jaꞌ xol junoj 200 noꞌ, che yiꞌel junoj noꞌ caw bꞌakꞌech. Jain Jehová jin chi walaꞌ, tol jaꞌ masanil wan tiꞌ oj kꞌanle yin ofrendail yin ixim tiriw, cꞌal yin xaambꞌal chi akꞌle tzꞌaꞌoj, cꞌal yin xaambꞌal yet watxꞌcꞌulal, yu yakꞌle tan spenail jin conobꞌ Israel.
16 Sowalil chi yakꞌ masanil ebꞌ conobꞌ Israel wan ofrenda tuꞌ tet ebꞌ yaaw yeoc xol ebꞌ. 17 Jaꞌ ebꞌ yaaw tuꞌ chi akꞌon tzꞌaꞌ noꞌ noꞌ tuꞌ yin xaambꞌal, yetoj cꞌal ofrenda yin ixim tiriw, cꞌal yin vino chi akꞌle yet chi ali xꞌaaw, yetoj yet scꞌual xewilal, cꞌal yet wan kꞌin miman yeloc apnoj. Sowalil chi yakꞌ cꞌal pax xaambꞌal yu yakꞌle tan spenail, cꞌal ofrenda yin ixim tiriw, yetoj xaambꞌal chi tzꞌaꞌi, cꞌal xaambꞌal yet watxꞌcꞌulal, yet watxꞌ chi akꞌle tan spenail ebꞌ yicꞌaal Israel.
Kꞌin Pascua
18 Jain Jehová Yaaw jin chi walaꞌ: Jaꞌ yet bꞌabꞌel cꞌu yet bꞌabꞌel xꞌaaw, sowalil che yakꞌ junoj noꞌ achꞌe wacax yin xaambꞌal yet chi akꞌle tan spenail bꞌey jin templo. 19 Jaꞌ naj sat yakꞌomal xaambꞌal oj yiꞌa niꞌoj ẍiqꞌuil noꞌ noꞌ tuꞌ, jaꞌton noꞌ chi akꞌle yin xaambꞌal yu yakꞌle tan spenail. Chi sbꞌonon oc yin smarcoal spuertail templo, yetoj cꞌal yinlaj scanebꞌal xiquin jun yet xaambꞌal tuꞌ, yetoj cꞌal yin smarcoal spuertail yet scaabꞌ yamakꞌil tuꞌ. 20 Jacꞌalaꞌ queytuꞌ chi yun cꞌal pax yet sjuj cꞌual, yal cꞌal mactxequel chi oc spenail yin tol man yin oj scꞌul chi tita, ma yin tol man yotaj oj, ta lalan yoc spenail. Queytuꞌ chi yun sajbꞌican el jin templo. 21 Jaꞌ yet 14 yoc bꞌabꞌel xꞌaaw, catuꞌ che chaꞌon el yich je chaꞌon kꞌin Pascua. Jujebꞌ cꞌu che loꞌ ixim pan tol cꞌam yich eeyoj. 22 Jaꞌ yet jun cꞌual tuꞌ, jaꞌ jun eyoc yin yaawilal, sowalil chi yakꞌ junoj noꞌ icham wacax yin xaambꞌal yu spenail, yu cꞌal pax yet masanil conobꞌ. 23 Jaꞌ yet junjun cꞌu yin jujebꞌ cꞌual kꞌin tuꞌ, sowalil chi akꞌle jujcꞌon noꞌ achꞌe wacax, jujcꞌon pax noꞌ icham meꞌ, noꞌ man tzꞌontaj oj. Chi akꞌle tzꞌaꞌ noꞌ yin xaambꞌal ey jin. Yetoj cꞌal pax oj, chi akꞌle junoj noꞌ icham chiw yin xaambꞌal yu yakꞌle tan spenail. 24 Jaꞌ yetoj junjun noꞌ achꞌe wacax tuꞌ, yetoj cꞌal junjun noꞌ meꞌ, sowalil chi akꞌle pax junoj 20 kilo ixim tiriw, yetoj nan scan litro aceite.
Kꞌin Yet Wan Pat Waꞌnebꞌil A Yetoj Skꞌabꞌ Teꞌ Cꞌal Xaj Teꞌ
25 Jacꞌalaꞌ pax yet jujebꞌ cꞌual kꞌin yet wan pat skꞌabꞌ teꞌ, jaꞌton jun tuꞌ chi chaꞌle yet 15 yoc yet sjuj xꞌaaw. Jaꞌ jun yaaw tuꞌ, sowalil chi yakꞌ cꞌal xaambꞌal. Laan cꞌal sbꞌisil noꞌ xaambꞌal chi yakꞌa, jaꞌton noꞌ chi akꞌle yin xaambꞌal yu spenail, cꞌal noꞌ chi akꞌle tzꞌaꞌ yin xaambꞌal yet watxꞌcꞌulal, yetoj ixim tiriw cꞌal aceite chi akꞌlei. Laan cꞌal sbꞌisil jaxca yet chi cu naꞌontej yet jix cu jajcha eltej bꞌey txꞌotxꞌ Egipto.