Jaꞌ Tzet Chi Yun Jun Yaaw Yet Ey Kꞌin
46
Jain jaꞌcaw Jehová Yaaw jin chi walaꞌ: Jaꞌ jun spuertail yet scaabꞌ yamakꞌil yetcꞌulal bꞌey chi aol cꞌu, majan ojabꞌ cꞌal yet eyoc mulnail yin wajebꞌ cꞌual, asan yet scꞌual xewilal chi jajlei, yetoj yet scꞌual yet chi ali xꞌaaw. 2 Jaꞌ yet chi yakꞌon xaambꞌal junoj yaaw yeocoj, jatuꞌ chi octoj bꞌey sbꞌabꞌel yamakꞌil templo, catuꞌ chi oc apnoj bꞌey yul spilaliẍal yetcꞌulal bꞌey chi aol cꞌu. Jaꞌ tituꞌ chi oc linan bꞌey smarcoal puerta, yajbꞌan lalan yakꞌon tzꞌaꞌ noꞌ xaambꞌal tuꞌ, yetoj cꞌal noꞌ xaambꞌal yet watxꞌcꞌulal chi yakꞌ jun yaaw tuꞌ. Catuꞌ chi ey noan ebꞌ sat txꞌotxꞌ yet chi oc ebꞌ yin eyilal ey jin bꞌey yajantaj puerta tuꞌ. Chi lawi tuꞌ, chi el bꞌey eyecꞌ tuꞌ, cꞌamxa chi maji jun puerta tuꞌ masantaꞌcꞌal yet yeycꞌualil. 3 Jaꞌ yet scꞌual xewilal, yetoj cꞌal yet chi ali xꞌaaw, sowalil chi oc ebꞌ conobꞌ yin eyilal ey jin, jaꞌton sattaj jun puerta tuꞌ. 4 Jaꞌ noꞌ noꞌ sowalil chi yakꞌ jun yaaw yeoc tuꞌ yet scꞌual xewilal, yet chi akꞌle tzꞌaꞌ noꞌ yin xaambꞌal ey jin, wajcꞌon noꞌ achꞌe meꞌ, yetoj jun noꞌ icham meꞌ tol watxꞌ ojabꞌ cꞌal smimanil noꞌ sjujcꞌonal. 5 Sowalil chi yakꞌ 20 kilo ixim jarina yetoj noꞌ icham meꞌ tuꞌ. Jal yetoj noꞌ achꞌe meꞌ tuꞌ xin, jatacꞌalaꞌ jantaj chi el yin scꞌul yakꞌoni. Jaꞌ yin jun 20 kilo ixim jarina tuꞌ, chi akꞌle cꞌal pax nan scan litro aceite. 6 Jaꞌ yet scꞌual yet chi ali xꞌaaw xin, sowalil chi akꞌle junoj noꞌ achꞌe wacax, yetoj wajcꞌon noꞌ achꞌe meꞌ, yetoj jun noꞌ icham meꞌ. Jaꞌ masanil noꞌ tuꞌ, cꞌam cꞌal bꞌey man tzꞌajanoj smimanil noꞌ. 7 Jaꞌ yetoj jun noꞌ achꞌe wacax tuꞌ, chi akꞌle 20 kilo ixim jarina. Quey pax tuꞌ chi yun yakꞌle yetoj junjun noꞌ icham meꞌ. Jal pax yetoj noꞌ achꞌe meꞌ tuꞌ xin, yal cꞌal jantaj chi el yin scꞌul yakꞌoni. Jaꞌ yetoj junjun 20 kilo ixim jarina tuꞌ, chi akꞌle nan scan litro aceite olivo.8 Jaꞌ yet oj octej jun yaaw yeoc tuꞌ, jatuꞌ oj octej bꞌey yul spilaliẍal templo, jacꞌalaꞌ jaꞌ tituꞌ oj el cꞌal pax toj. 9 Jaꞌ yet chi octej ebꞌ conobꞌ yin eyilal ey jin yet scꞌual kꞌin, sowalil chi yun ebꞌ jaxca tiꞌ: Jaꞌ mactxequel chi octej bꞌey smajil bꞌey yetcꞌulal norte, jaxa bꞌey puerta bꞌey yetcꞌulal sur chi ecꞌ eltoj. Jal mactxequel jaꞌ bꞌey puerta bꞌey sur chi octoj, jaxa bꞌey puerta bꞌey yetcꞌulal norte chi ecꞌ eltoj. Cꞌam junoj chi meltzo ecꞌ el junelxa bꞌey puerta bꞌey jix octoj, tol jaxa bꞌey puerta bꞌey sattaj chi eltoj. 10 Jaꞌ jun yaaw yeoc tuꞌ, sowalil chi octej yetoj ebꞌ conobꞌ, catuꞌ chi el pax toj yetoj ebꞌ. 11 Jaꞌ yin mimej kꞌin, cꞌal scꞌual yambꞌabꞌail, chi akꞌle 20 kilo ixim jarina yin junjun noꞌ wacax. Quey pax tuꞌ chi yun yakꞌle yin junjun noꞌ icham meꞌ. Jal pax yin junjun noꞌ achꞌe meꞌ xin, yal cꞌal jantaj chi el yin scꞌul ebꞌ yakꞌoni. Jaꞌ yetoj junjun 20 kilo ixim jarina tuꞌ, chi akꞌle cꞌal pax nan scan litro aceite.
12 Jaꞌ yet chi el yin scꞌul jun eyoc yin yaawilal tuꞌ yakꞌon junoj xaambꞌal ey jin, jaxca noꞌ noꞌ chi akꞌle tzꞌaꞌoj ma junoj noꞌ chi akꞌle yin yet watxꞌcꞌulal, sowalil chi jajle puerta bꞌey yetcꞌulal bꞌey chi aol cꞌu, catuꞌ chi yakꞌon xaambꞌal, jaxca chi yun yakꞌon yet scꞌual xewilal. Jaꞌ yet tuxa chi eltoj, catuꞌ chi majchele can jun puerta tuꞌ.
Ofrenda Chi Akꞌle Yet Junjun Cꞌu
13 Junjun cꞌal cꞌu yet skꞌinibꞌalil, sowalil chi akꞌle junoj noꞌ meꞌ jun abꞌil skꞌinal, tol cꞌam niꞌoj man tzꞌajanoj smimanil, yet chi akꞌle tzꞌaꞌ noꞌ yin xaambꞌal ey jin. 14 Junjun skꞌinibꞌalil chi akꞌle junoj ofrenda ey jin. Jujebꞌ kilo ixim jarina, yetoj jun litro aceite chi secle ey bꞌey yibꞌan ixim jarina. Jaꞌ jun tiꞌ, sowalil chi jijele. 15 Jaꞌ junoj achꞌe meꞌ yetoj cꞌal ofrenda yin ixim jarina, cꞌal aceite, sowalil chi akꞌle tzꞌaꞌ yet junjun skꞌinibꞌalil.
Jaꞌ Tzet Sowalil Chi Yun Jun Yaaw Yetoj Xꞌotxꞌ
16 Jain Jehová Yaaw jin chi walaꞌ: Ta jaꞌ junoj eyoc yin yaawil tuꞌ chi saꞌ txꞌotxꞌ tet yuninal, jaꞌton smajul txꞌotxꞌ ebꞌ tol yet, jaꞌ jun tuꞌ chi oc can yin smajuloj pax tet yicꞌaal ebꞌ. 17 Ta jaꞌ junoj yaaw tuꞌ chi saꞌ txꞌotxꞌ tet junoj yakꞌomal servil xin, asanne cꞌal jayebꞌ abꞌil yet eyoc yin yakꞌon servilal tuꞌ ey yalon yet yin txꞌotxꞌ, masantaꞌcꞌal yet chi jul scꞌual chi jajcha eloj. Jaꞌ yet tuꞌ, chi oc can jun txꞌotxꞌ tuꞌ yetoj jun yaaw tuꞌ junelxa, yet cꞌal pax ebꞌ yuninal jun txꞌotxꞌ tuꞌ. 18 Jaꞌ jun yaaw tuꞌ, cꞌam yalon yet stokꞌon ecꞌ smajul txꞌotxꞌ junojxa mactxequel. Jaꞌ tzetyetal ey tet, jaꞌ chi yakꞌ smajuloj yuninal. Jaxca tuꞌ xin, cꞌam mactxequel xol jin conobꞌ chi cancan yin tol cꞌam smajul txꞌotxꞌ, ẍi Dios.
Jaꞌ Wan Cucina Bꞌey Templo
19 Jix lawi tuꞌ xin, jix jin yiꞌontoj jun winaj tuꞌ bꞌey chi cu octoj bꞌey yin scꞌul jun miman puerta, bꞌey wan cuarto yet ebꞌ yakꞌomal xaambꞌal chi can bꞌey yetcꞌulal norte. Catuꞌ jix xꞌoxon ey jin yetcꞌulal bꞌey chi too cꞌu. 20 Jix yalon ey jin jaxca tiꞌ: Jaꞌton titiꞌ sowalil oj txicle noꞌ xaambꞌal yu ebꞌ yakꞌomal xaambꞌal yu yakꞌle tan spenail, ma yu stoolanele spenail. Jaꞌ titiꞌ oj waꞌnele cꞌal pax ixim jarina oj akꞌle yin ofrendail. Yet watxꞌ, cꞌam chi iꞌle eltoj wan tzetyetal tuꞌ bꞌey bꞌabꞌel yamakꞌil templo, yet watxꞌ cꞌam chi oc can stzejejial wan tzetyetal tol yet Dios yeoc yin ebꞌ ánima, ẍi jun winaj tuꞌ. 21 Jix lawi tuꞌ jix wiloni, tol jix jin yiꞌtoj jun winaj tuꞌ bꞌey jun bꞌabꞌel yamakꞌil templo, jix jin yiꞌon cꞌal ecꞌ yul-laj scanebꞌal xiquin. 22 Jix wilon cꞌal bꞌey junjun xiquinlaj tuꞌ, ey junjunxa yul pilaliẍ ey canoj. Laan cꞌal yechel masanil. Ey 20 metro steel yetoj 15 metro sat. 23 Jaꞌ yinlaj yamakꞌil tuꞌ, eya jun muro chꞌen cꞌal eloj, jaꞌ bꞌey yichlaj jun muro tuꞌ, jatuꞌ eya bꞌey chi oc kꞌakꞌ. 24 Jix lawi tuꞌ xin, jix yalon ey jin jaxca tiꞌ: Jaꞌton bꞌey wan cucina tiꞌ oj akꞌle ta noꞌ xaambꞌal yu ebꞌ chi mulna bꞌey templo yu ebꞌ conobꞌ, ẍi jun winaj tuꞌ ey jin.