Jun Jaꞌ Jaꞌ Jix Aol Bꞌey Yul Templo
47
Jix lawi tuꞌ, jix jin yiꞌontoj jun winaj tuꞌ bꞌey stiꞌ spuertail templo. Jix wiloni tol jaꞌ bꞌey yalan stiꞌ puerta tuꞌ, jatuꞌ chi aol jun jaꞌ. Jaꞌ tituꞌ chi too can jun jaꞌ tuꞌ yetcꞌulal bꞌey chi aol cꞌu, bꞌey yin scꞌul templo. Jaꞌ jun jaꞌ tuꞌ, jatuꞌ chi too can bꞌey yetcꞌulal cu watxꞌ kꞌabꞌ, jaꞌton bꞌey yetcꞌulal sur bꞌey jun yet xaambꞌal. 2 Jix lawi tuꞌ, jix jin yiꞌon el jun winaj tuꞌ bꞌey templo, bꞌey puerta yetcꞌulal norte. Jix bꞌet jin joy jin bꞌa yu bꞌey stiꞌ na, masantaꞌcꞌal bꞌey puerta yetcꞌulal bꞌey chi aol cꞌu. Ey jun yaliẍ jaꞌ chi aol bꞌey yetcꞌulal sur bꞌey jun puerta tuꞌ. 3 Jaꞌ jun winaj tuꞌ, jix eltoj yetcꞌulal bꞌey chi aol cꞌu, jix yeche yetoj jun txꞌan iꞌbꞌil oc yu. Jix yeche 500 metro, jix jin yiꞌon ecꞌtoj bꞌey yul jaꞌ jaꞌ tuꞌ. Jix aol jaꞌ jaꞌ tuꞌ bꞌey snukꞌ wajan. 4 Jix lawi tuꞌ, jix yechen pax junxa 500 metro catuꞌ jix jin yiꞌon pax ecꞌtoj bꞌey yul jaꞌ jaꞌ; jaꞌ yet tuꞌ jix aapnoj jaꞌ bꞌey sjolom jin penec. Jix yechen pax junxa 500 metro, catuꞌ jix jin yiꞌon pax ecꞌtoj bꞌey yul jaꞌ jaꞌ. Jaꞌ yet tuꞌ, jix aapnoj jaꞌ jaꞌ tuꞌ bꞌey jin nan. 5 Jix yechen junxa 500 metro. Jaꞌ yet tuꞌ caw mimanxa jaꞌ, ma xa skeꞌ jin kꞌaxbꞌo ecꞌ yul jaꞌ. Caw mimanxa yich jaꞌ, cꞌam chi skeꞌ wecꞌtoj, asan ta chi skeꞌ cu makꞌon jaꞌ xin, chi skeꞌ cu kꞌaxbꞌonen jaꞌ. 6 Catuꞌ jix yalon ey jin jaxca tiꞌ: Jaach ánima, chi cam ja naꞌon yin tzetyetal jix ja wilaꞌ, ẍi ey jin.Jix lawi tuꞌ, jix jin yiꞌontoj bꞌey stiꞌlaj jaꞌ jaꞌ tuꞌ. 7 Jix wiloni, tol jaꞌ bꞌey scaabꞌ paqꞌuil stiꞌlaj jaꞌ jaꞌ tuꞌ, caw ey teꞌ teꞌ eya tituꞌ. 8 Jix lawi tuꞌ, jix yalon ey jin: Jaꞌ jun jaꞌ tiꞌ, chi bꞌey cꞌaltoj yetcꞌulal bꞌey chi aol cꞌu. Chi too can jaꞌ bꞌey spananil stiꞌ jaꞌ Jordán, catuꞌ chi too can jaꞌ bꞌey xol jaꞌ Camnaj Mar. Jaꞌ yet oj apnoj oc jaꞌ xol jaꞌ tuꞌ, oj chiꞌbꞌoj jaꞌ mar tuꞌ yu jaꞌ. 9 Yal cꞌal bꞌey oj apnoj oc jun jaꞌ tiꞌ, watxꞌ xacꞌal oj yun scaey ecꞌ masanil tujan noꞌ noꞌ bꞌey yul jaꞌ tuꞌ, oj chꞌibꞌ sbꞌisil noꞌ pescado yul jaꞌ. Yutol jaꞌ jun jaꞌ tiꞌ, oj chiꞌbꞌoj el jaꞌ kꞌachiꞌ jaꞌ yu, catuꞌ ecꞌal oj yun sbꞌisil masanil tzetyetal tol ey yiquisal bꞌey yul jaꞌ. 10 Jaꞌ bꞌey stiꞌlaj jaꞌ mar chi too tacꞌal bꞌey En-gadi masantaꞌcꞌal bꞌey En-eglaim. Jaꞌ tituꞌ caw ey ebꞌ mitxꞌom pescado oj yakꞌ taj xim ebꞌ. Jaꞌ tituꞌ oj chꞌibꞌ masanil tujan noꞌ pescado, jaxca wal noꞌ pescado ey yul jaꞌ Mar Mediterráneo. 11 Jal pax bꞌey txꞌotxꞌ yaax txꞌotxꞌlaj xin, man oj chꞌibꞌ jaꞌ jaꞌ tituꞌ. Jaꞌ tituꞌ ey jaꞌ kꞌachiꞌ, jaꞌ bꞌey jaꞌ tuꞌ oj iꞌle atej atzꞌam. 12 Jaꞌ bꞌey stiꞌlaj jaꞌ jaꞌ tuꞌ, oj chꞌibꞌa masanil tujan teꞌ teꞌ chi cu loꞌ sat. Jaꞌ teꞌ teꞌ tuꞌ, cꞌam bꞌakꞌin chi pujel xaj. Man oj sbꞌej yakꞌon sat. Junjun cꞌal xꞌaaw ey acꞌ sat teꞌ, yutol jaꞌ jaꞌ oj eltej bꞌey templo eyoc yaaloj teꞌ. Jaꞌ sat teꞌ tuꞌ, oj loꞌleoj, jal xaj teꞌ xin, oj oc ambꞌalil, ẍi jun winaj tuꞌ.
Smoonal Jun Nación Tuꞌ
13 Jix yalon Jehová ey jin jaxca tiꞌ: Jain Jehová Yaaw jin chi walaꞌ: Jaꞌton wal smoonal jun txꞌotxꞌ oj ẍaꞌ ebꞌ lacawebꞌ tujan yicꞌaal Israel smajuloj. (Jaꞌ ebꞌ yicꞌaal José caabꞌ tujan smajul ebꞌ oj yiꞌ. 14 Jain jix wakꞌ jin tiꞌ wakꞌon jun txꞌotxꞌ tiꞌ tet ebꞌ je yichmam. Laan cꞌal chi yun je poꞌon ecꞌ je lacawebꞌ tujan icꞌaaleal. Jaꞌton jun txꞌotxꞌ tiꞌ oj oc je majuloj wu.)
15 Jaꞌ smoonal bꞌey norte, chi too tacꞌal bꞌey jaꞌ Mar Mediterráneo, catuꞌ oj ecꞌtoj bꞌey conobꞌ Hetlón, cꞌal bꞌey conobꞌlaj yet Sedad, 16 Hamat, Berotá, cꞌal Sibraim, (jaꞌ jun tuꞌ, jatuꞌ ey bꞌey smoonal snan xol Damasco yetoj Hamat,) masantaꞌcꞌal bꞌey Hazar-haticón, (jaꞌton smoon sbꞌa yetoj Haurán). 17 Yu jun tuꞌ xin, jaꞌ smoonal chi too tacꞌal bꞌey jaꞌ Mediterráneo, masantaꞌcꞌal chi apni oc bꞌey Hasar-enán. Jaꞌ bꞌey norte chi cancan txꞌotxꞌ txꞌotxꞌ yet Damasco, cꞌal txꞌotxꞌ yet Hamat.
18 Jal pax smoonal yetcꞌulal bꞌey chi aol cꞌu, chi ecꞌtoj bꞌey stiꞌlaj yet Haurán, cꞌal yet Damasco. Chi bꞌey cꞌaltoj bꞌey stiꞌlaj jaꞌ Jordán, jaꞌton jaꞌ tuꞌ moon yeoc snan xol Galaad cꞌal Israel, masantaꞌcꞌal chi apni oc bꞌey conobꞌ Tamar, bꞌey yetcꞌulal sur yet jaꞌ Camnaj Mar.
19 Jal pax smoonal bꞌey sur chi too tacꞌal bꞌey Tamar, chi ecꞌtoj bꞌey jaꞌ snukꞌjaꞌlaj bꞌey Meribá-cadés, cꞌal bꞌey jaꞌ elom jaꞌ yet Egipto, masantaꞌcꞌal chi apni oc bꞌey jaꞌ mar Mediterráneo.
20 Jal pax smoonal yetcꞌulal bꞌey chi too cꞌu, jaꞌton jaꞌ Mar Mediterráneo eyoc yin smoonal, chi too tacꞌal bꞌey smoonal yet Egipto, masantaꞌcꞌal chi apni oc bꞌey stiꞌ jaꞌ bꞌey sattaj, bꞌey chi cu octoj bꞌey Hamat.
21 Jaꞌton jun txꞌotxꞌ tiꞌ sowalil chi poꞌole ecꞌ je xol jaex yicꞌaal jex Israel tiꞌ. 22 Jaꞌton jun txꞌotxꞌ tuꞌ oj je yiꞌ jaex tiꞌ, yetoj cꞌal ebꞌ txꞌoj conobꞌal eyecꞌ je xol, jaꞌton ebꞌ eyxa yuninal. Jaꞌ yet oj je poꞌon ecꞌ txꞌotxꞌ txꞌotxꞌ je xol, laan oj je yute yet ebꞌ txꞌoj conobꞌal tuꞌ je yetoj. 23 Jain Jehová Yaaw jin chi walaꞌ, tol jaꞌ ebꞌ txꞌoj conobꞌal tuꞌ, oj ẍaꞌ smajul txꞌotxꞌ ebꞌ yin junjun icꞌaaleal bꞌey eyecꞌ ebꞌ tuꞌ.