8 Jaꞌ bꞌey spacꞌul txꞌotxꞌ yet Judá, jaꞌ tituꞌ ey jun txꞌotxꞌ sicꞌbꞌil eloj: Ey nan yoxlajonebꞌ kilómetro sat. Jal steel, laan yetoj yet junjun icꞌaaleal, chi tit tacꞌal yetcꞌulal bꞌey chi aol cꞌu, catuꞌ chi apni yetcꞌulal bꞌey chi too cꞌu. Jaꞌ bꞌey snan xol txꞌotxꞌ tuꞌ, jatuꞌ ey templo.

9 Jaꞌ jun tujan txꞌotxꞌ txꞌotxꞌ wet yeoc tuꞌ, ey nan yoxlajonebꞌ kilómetro steel, yetoj laonebꞌ kilómetro sat. 10 Jaꞌ bꞌey jun tujan txꞌotxꞌ tuꞌ, ey junoj tujan txꞌotxꞌ tol yet ebꞌ yakꞌomal xaambꞌal yeocoj. Nan yoxlajonebꞌ kilómetro steel, jal sat, ey joebꞌ kilómetro. Jaꞌ bꞌey snan yul tuꞌ, jatuꞌ ey jin templo. 11 Jaꞌ jun txꞌotxꞌ tuꞌ, yet ebꞌ yakꞌomal xaambꞌal eyoc yin jin yakꞌon servil, jaꞌton ebꞌ yicꞌaal Sadoc, jaꞌton ebꞌ ma toj tzajan yintaj ebꞌ yet Israelal, yet jix yiꞌon el sbꞌa ebꞌ wintaj, jaxca jix yute sbꞌa ebꞌ yet Levitail ebꞌ. 12 Yu jun tuꞌ, yuxan jaꞌ bꞌey jun tujan txꞌotxꞌ tol wet yeoc tuꞌ, txꞌotxꞌ junne ey yetoj yet ebꞌ Levita, jaꞌ tituꞌ ey jun tujan txꞌotxꞌ tol asan ebꞌ yakꞌomal xaambꞌal ey yet. 13 Jaꞌ bꞌey stiꞌel txꞌotxꞌ yet ebꞌ yakꞌomal xaambꞌal, jatuꞌ ey cꞌal pax txꞌotxꞌ yet ebꞌ Levita. Jaꞌton txꞌotxꞌ tuꞌ ey nan yoxlajonebꞌ kilómetro steel yetoj joebꞌ kilómetro sat. Jal pax txꞌotxꞌ wet yeoc xin, ey nan yoxlajonebꞌ kilómetro steel yetoj laonebꞌ kilómetro sat. 14 Jaꞌton wal jun tujan txꞌotxꞌ tuꞌ yel xacꞌal watxꞌ sat bꞌey yul nación tuꞌ. Cꞌam junoj tujan txꞌotxꞌ tuꞌ chi skeꞌ txonle eloj. Cꞌam cꞌal pax chi skeꞌ qꞌuexle txꞌotxꞌ, tam wal chi skeꞌ yakꞌle tet junojxa mactxequel, yutol junelne wet yeocoj.

15 Jal niꞌojxa txꞌotxꞌ xin, ey nan yoxlajonebꞌ kilómetro steel yetoj nan yox kilómetro sat, manxa wet oj yeocoj. Jaꞌ bꞌey snan sat txꞌotxꞌ tuꞌ, jatuꞌ ey jun miman conobꞌ. Jal jantaj to txꞌotxꞌ colan yin xin, chi skeꞌ scaey ebꞌ ánima cꞌal yoc slowbꞌaloj noꞌ jobꞌbꞌeal noꞌ. 16 Jaꞌ jun conobꞌ tuꞌ ey 2,250 metro junjun spacꞌul. 17 Jaꞌ bꞌey yinlaj conobꞌ tuꞌ, jatuꞌ ey slowbꞌal noꞌ jobꞌbꞌeal noꞌ. Jaꞌ jun tujan txꞌotxꞌ tuꞌ ey 125 metro sat bꞌey scanpaqꞌuil conobꞌ tuꞌ. 18 Jaꞌ bꞌey spacꞌul jun conobꞌ tuꞌ, junne ey yetoj txꞌotxꞌ wet yeocoj. Ey jun tujan txꞌotxꞌ tuꞌ, ey joebꞌ kilómetro steel yetcꞌulal bꞌey chi aol cꞌu bꞌey conobꞌ tuꞌ, jacꞌalaꞌ joebꞌ kilómetro steel yetcꞌulal bꞌey chi too cꞌu. Jaꞌ jun txꞌotxꞌ tuꞌ chi oc mulnail yibꞌan, jaꞌ sat awo chi yambꞌale a xin, jaꞌ chi sloꞌ ebꞌ ánima chi mulna bꞌey yul conobꞌ tuꞌ. 19 Jaꞌ ebꞌ ánima chi mulna bꞌey yul conobꞌ tuꞌ, yal cꞌal tzet icꞌaaleal yeoc xol ebꞌ yet Israelal, chi skeꞌ smulna bꞌey jun tujan txꞌotxꞌ tuꞌ. 20 Masanil txꞌotxꞌ txꞌotxꞌ sicꞌbꞌil can eloj, jaꞌton txꞌotxꞌ wet yeocoj, yetoj cꞌal txꞌotxꞌ yet ebꞌ conobꞌ ye can ocoj. Jaꞌ masanil wan tuꞌ ey nan yoxlajonebꞌ kilómetro junjun pacꞌ.

21-22 Jaꞌ mac eyoc yin yaawil, jaꞌ chi iꞌon oc txꞌotxꞌ ey can snan xol txꞌotxꞌ yet Judá, yetoj txꞌotxꞌ yet Benjamín; chi yal yeloc apnoj, jaꞌton txꞌotxꞌ spacꞌul txꞌotxꞌ wet yeocoj, cꞌal spacꞌul txꞌotxꞌ yet conobꞌal yeocoj. Jaꞌ txꞌotxꞌ tuꞌ, ey nan yoxlajonebꞌ kilómetro sat, catuꞌ chi bꞌey cꞌaltoj yetcꞌulal bꞌey chi aol cꞌu, masantaꞌcꞌal chi apni oc bꞌey smoonal nación Israel tuꞌ. Jal pax yetcꞌulal bꞌey chi too cꞌu xin, masantaꞌcꞌal bꞌey jaꞌ Mar Mediterráneo chi apni ocoj. Jal bꞌey snan yul tuꞌ, jatuꞌ chi cancan txꞌotxꞌ wet yeoc bꞌey ey jin templo. Jaꞌ tituꞌ ey cꞌal pax txꞌotxꞌ yet ebꞌ yakꞌomal xaambꞌal, cꞌal yet ebꞌ Levita, cꞌal txꞌotxꞌ bꞌey eey miman conobꞌ.

23-27 Jaꞌ txꞌotxꞌ yet wanxa ebꞌ yicꞌaal Israel, chi too bꞌey yetcꞌulal sur. Junjun cꞌal icꞌaaleal, chi ẍaꞌ junjun tujan xꞌotxꞌ chi too tacꞌal bꞌey yul moon, yetcꞌulal bꞌey chi too cꞌu, masantaꞌcꞌal chi apni oc bꞌey moon yetcꞌulal bꞌey chi aol cꞌu. Queytuꞌ yeoc yin xolilal jaxca tiꞌ:

28 Jaꞌ bꞌey yetcꞌulal sur, jatuꞌ ey txꞌotxꞌ yet Gad, jaꞌ smoonal, chi too tacꞌal bꞌey Tamar, chi ecꞌtoj bꞌey snukꞌjaꞌlaj yet Meribá-cadés, cꞌal bꞌey jaꞌ yet txꞌotxꞌ Egipto, masantaꞌcꞌal chi apni oc bꞌey jaꞌ Mar Mediterráneo.

29 Jaꞌton jun txꞌotxꞌ tuꞌ oj ẍaꞌ ebꞌ yicꞌaal Israel. Queytuꞌ oj yun je poꞌon ecꞌ txꞌotxꞌ, ẍi Jehová Naj Yaaw.

30-34 Jaꞌ jun conobꞌ ey snan sat txꞌotxꞌ tuꞌ, eyoc smuroal yinlaj, ey 2,250 metro yeoc junjun spacꞌul, catuꞌ laan cꞌal yeoc scanpaqꞌuil. Jaꞌ bꞌey junjun spacꞌul ey oxebꞌ spuertail. Jaꞌ yin junjun puerta chi bꞌina sbꞌi junjun icꞌaale yin, jaxca tiꞌ yeoc xolilal. Jaꞌ wan spuertail bꞌey yetcꞌulal norte chi yij: Rubén, Judá cꞌal Leví; jal yetcꞌulal bꞌey chi aol cꞌu chi yij: José, Benjamín cꞌal Dan; jal pax bꞌey sur chi yij: Simeón, Isacar cꞌal Zabulón; jal yetcꞌulal bꞌey chi too cꞌu chi yij: Gad, Aser cꞌal Neftalí. 35 Jaꞌ jun smuroal tuꞌ ey bꞌalonebꞌ kilómetro yeoc yinlaj miman conobꞌ tuꞌ, jaꞌ sbꞌi jun conobꞌ tuꞌ yet oj bꞌey cꞌaltoj: Scalubꞌal Jehová, oj yij sbꞌi, ẍi Dios, ẍi naj Ezequiel.