3 Caxcꞌal mi tol watxꞌ xacꞌal chi yute sbꞌa, ma tol cꞌamxa cꞌal niꞌoj spenail. ¿Tzet wal yetal oj yiꞌ Dios, Naj jun chi skeꞌ yu masanil?

4 Man yu oj ja jijemal, ma yu ja watxꞌil yuxan chach yakꞌ cuenta Dios yetoj ja yaꞌilal tiꞌ.

5 Jaꞌton yu caw miman ja penail tuꞌ yul sat, catuꞌ cꞌamxa chi bꞌischa jantaj ja penail tuꞌ.

6 Jix ja kꞌan can ecꞌ spichil ebꞌ mebꞌa ánima yin sqꞌuexeloj junoj tzetyetal jix smaane ey jaach, caxcꞌal mi jix elcan tꞌiran ebꞌ.

7 Jaꞌ mactxequel ey stajin tiꞌal tumi jix ja wakꞌ jaꞌ yucꞌ ebꞌ; jaꞌ mac ey swail tumi jix ja wakꞌ sloꞌbꞌe.

8 Naꞌbꞌa xacꞌal caw ey smey ja bꞌinalei, ey ja weloc apnoj yul sat ebꞌ ánima, jix ja naꞌ tol ja wet masanil txꞌotxꞌ txꞌotxꞌ tiꞌ.

9 Jix ja chejon pax ebꞌ ix tol camnajxa yichamil yin tol cꞌam tzet jix ja wakꞌ tet ebꞌ; catuꞌ jix ja wiꞌon can ecꞌ tzetyetal ey yul skꞌabꞌ ebꞌ tol camnajxa smam xutx.

10 Jaꞌton yu jun tuꞌ, yuxan chi oc joyan xiwcꞌulal ja win tinaniꞌ, catuꞌ chi somcha a ja cꞌul yu tzetyetal ey smey.

11 Yu jun tuꞌ, jaxca tol kꞌejkꞌinal xacꞌal bꞌey ey jaach ecꞌoj, cꞌamxa chi skeꞌ ja wilon niꞌoj; jaxca wal junoj jaꞌ elom jaꞌ chach ijon bꞌeyoj.

12 Jaꞌ Dios ey bꞌey satcan, naat eyatoj yibꞌan weycan, chi yil eytej masanil sat txꞌotxꞌ tiꞌ.

13 ¿Tzet yuxan cha walaꞌ tol man yotaj oj Dios cu bꞌeybꞌal? ¿Tumi man oj yil eytej xol kꞌejin asun jantaj tzet chi kunne?

14 ¿Chim ja naꞌ tol cꞌam chi yil eytej Dios xol kꞌejin asun tuꞌ? Tejan tol lalan sbꞌeyecꞌ Dios yibꞌan satcan tuꞌ, ja chi?

15 ¿Tumi chi yoche ja cꞌul chach oc tzajan yintaj sbꞌeybꞌal ebꞌ penawom cꞌam yeloc apnoj Dios yul sat?

16 Jaꞌ ebꞌ tuꞌ yin jun txolan jix yun scam ebꞌ, jaxca chi yun yiꞌletoj junoj mactxequel yu junoj elom jaꞌ.

17 Jix yalon ebꞌ tet Dios jaxca tiꞌ: Manche jon ja tzee. ¿Tzet wal oj kiꞌ yin Naj chi skeꞌ yu masanil? ẍi ebꞌ.

18 (Caxcꞌal mi jaxca tuꞌ yalon ebꞌ, jaꞌ Naj jix akꞌon noel sna ebꞌ yu masanil tzettaj yetal. ¡Cꞌam ojabꞌ chin naꞌ jaxca chi yun snaꞌon ebꞌ pena snaꞌbꞌal tuꞌ!)

19 Jaꞌ yet oj yilon oc ebꞌ watxꞌ snaꞌbꞌal yet chi eyqꞌuey ebꞌ penawom tuꞌ, oj tzala a ebꞌ, caw oj tzeewoj a ebꞌ,

20 jaꞌ yet oj yilon ebꞌ tol jaꞌ sbꞌeomal ebꞌ penawom, oj lawoj can ey stzꞌaꞌtoj.

21 Jaach Job, aoc ja bꞌa yul skꞌabꞌ Dios, ocan yin watxꞌcꞌulal yetoj, ta jaxca tuꞌ, watxꞌ oj jaach elocoj.

22 Ẍaꞌ ojabꞌ ja cꞌul tol jaꞌ Dios chach cuyoni; can ojabꞌ wal skꞌane Naj yin ja naꞌbꞌal.

23 Ta tol cha wiꞌey ja bꞌa, catuꞌ cha waon oc ja bꞌa yul skꞌabꞌ Dios, Naj chi skeꞌ yu masanil, oj jaach iꞌle a can yu. Ta naat cha wiꞌ can el spenail bꞌey ja na.

24 Cꞌam ojabꞌxa yeloc apnoj chꞌen oro yul ja sat, jaxca ojabꞌ xacꞌal pojoj ma jaxca chꞌen comon chꞌen ey bꞌey yul-laj jaꞌ cha wute.

25 Jaꞌ Naj Miman yeoc Yipalil, jaꞌ Naj oj oc cꞌal ja wetoj, catuꞌ oj mimanbꞌoj tzet ey, ey jaach junelxa.

26 Oj jaach tzala yetoj Dios, catuꞌ oj ja waon pax oc yipoj ja cꞌul.

27 Ta tol ey tzet oj ja kꞌan tet, oj yabꞌ tzet oj ja walaꞌ, asantane tol oj ja jije ja wunen bꞌey jix ja wakꞌcan ja tiꞌ tet.

28 Caw watxꞌ cꞌal oj jaach eloc yin masanil tzetyetal oj ja wunne; oj yakꞌon sajkꞌinal ja wibꞌan bꞌey chach eqꞌui.

29 Yutol jaꞌ Dios chi iꞌon ey ebꞌ chi smimanbꞌane sbꞌa, catuꞌ chi col-le ebꞌ yeynajil yu.

30 Jaꞌ Naj chi colon mac cꞌam spenail, yuxan oj jaach colchaoj ta tol cꞌam ja penail, ẍi naj Elifaz.