3 Toloj wal chi skeꞌ wotajne eloj, bꞌeytuꞌ chi ilcha oc Dios wu, tzet wal chi yun wapni oc bꞌey spalacio tuꞌ.

4 Ta tol chi ilcha oc wu, watxꞌ chi wal jin yaꞌilal tiꞌ sattaj Naj, yutol ecꞌal tzetyetal chi yoche jin cꞌul chi wal tet.

5 Ta tol ey tzet oj yal ey jin, wotajxa tzet oj yun jin takꞌwi tet Naj.

6 ¿Tumi taꞌ oj jin stenchane yet oj jin yakꞌon tzꞌini eyoj? tucꞌaltaꞌ oj yabꞌ tzetyetal oj walaꞌ,

7 oj naꞌcha el yu tzet chi walaꞌ, catuꞌ oj mi yaloni tol cꞌam jin penail; quey mi tuꞌ oj yun jin jajcha can el yu yin junelne.

8 ¿Kꞌinaloj ta chi too jin seyecꞌ Dios bꞌey chi aol cꞌu ma cꞌaltaꞌ ilcha oc wu? ¿ta chi too jin seyecꞌ bꞌey chi too cꞌu ma cꞌaltaꞌ ilcha pax oc wu tituꞌ?

9 ¿Kꞌinaloj ta chi too jin seyecꞌ Dios yetcꞌulal norte ma cꞌaltaꞌ ilcha oc wu? kꞌinaloj ta chi too jin seyecꞌ yetcꞌulal sur ma cꞌaltaꞌ xꞌox sbꞌa Naj ey jin?

10 Ta chi ilcha oc Naj wu, yotaj Naj jin bꞌeybꞌal; jaxam jin yakꞌon porobꞌal tuꞌ, watxꞌ xacꞌal mi oj yun weloc jaxca chꞌen oro chi akꞌle tzꞌaꞌ xol kꞌakꞌ.

11 Jain tiꞌ, jaꞌ jun bꞌeybꞌale jix xꞌox can ey jin, cꞌam bꞌakꞌin chin bꞌejcan jin bꞌeybꞌalneni.

12 Jix jin jije cꞌal ẍejbꞌanil cꞌal scuybꞌanil. Ecꞌbꞌanxa yeloc apnoj ẍejbꞌanil yul jin sat yintaj jin loꞌbꞌe.

13 Asanne Dios, cꞌam junojxa chi skeꞌ stenon oc tucan junoj tzetyetal chi snaꞌ. Jaꞌ yet chi snaꞌon yunen junoj tzetyetal, chi cꞌal yunne.

14 Jaꞌ tzetyetal jix snaꞌ yunen win an, jix cꞌal yunne, eyto cꞌal wanxa tzetyetal tol lalan snaꞌon oc win.

15 Yu jun tuꞌ, yuxan caw chin xiw tet, jaꞌ yet chin naꞌontej Dios, caw chin bꞌilwi a yu xiwcꞌulal.

16 Jaꞌ Dios Naj Chi Skeꞌ Yu Masanil, jaꞌ chi akꞌon wip yet ey jin xiwcꞌulal.

17 Caxcꞌal cꞌam chi skeꞌ wilon yu kꞌejkꞌinal joyan oc winlaj, cꞌam cꞌaltaꞌ chin bꞌej yel waw tet Naj.