2 Jaꞌ ebꞌ penawom chi sqꞌuexecꞌ smoonal txꞌotxꞌ ebꞌ, chi yelkꞌanetoj noꞌ meꞌ ebꞌ, yet watxꞌ chi chꞌibꞌ sbꞌisil smeꞌ ebꞌ.

3 Chi tokꞌle ecꞌ noꞌ sbꞌuru ebꞌ camnajxa smam xutx yu ebꞌ, catuꞌ chi iꞌle can ecꞌ noꞌ swacax ebꞌ ix camnajxa yichamil yu ebꞌ, yu sqꞌuexeloj chꞌen smaan tumin ebꞌ.

4 Chi elkꞌanele ecꞌ stzetyetal ebꞌ mebꞌa yul-laj bꞌe yu ebꞌ, catuꞌ chi yewbꞌa el sbꞌa ebꞌ yeynajil ánima tet ebꞌ.

5 Jaꞌ ebꞌ mebꞌa laan xacꞌal chi yun can ebꞌ jaxca noꞌ xol-laj teꞌal bꞌuru bꞌey txꞌotxꞌ cusiltaj txꞌotxꞌ, ian xacꞌal cꞌam chi ilcha sloꞌbꞌe ebꞌ. Jaꞌ bꞌey txꞌotxꞌ cusiltaj txꞌotxꞌ tuꞌ chi sey sloꞌbꞌe ebꞌ chi sloꞌ yetoj yuninal.

6 Jaꞌ xol smulnail ebꞌ txꞌoj conobꞌal, jaꞌ tituꞌ chi too sicꞌa ixim sjolom tiriw ebꞌ, yetoj cꞌal pax bꞌey awbꞌil ey yuva ebꞌ penawom.

7 Jaꞌ ebꞌ mebꞌa tuꞌ, cꞌam spichil ebꞌ eyoc yet chi ecꞌ akꞌbꞌal. Cꞌam niꞌoj tzetyetal chi colon ebꞌ tet siic.

8 Jaꞌ yet chi yakꞌon nabꞌ, caw chi ey yal ebꞌ bꞌey xol-laj teꞌ, catuꞌ chi oc cantoj noan ebꞌ yewbꞌa el sbꞌa bꞌey yul-laj chꞌen nachꞌen.

9 Chi tokꞌle ecꞌ yuneꞌ ebꞌ ix ix camnajxa yichamil yu ebꞌ penawom tuꞌ, yu sqꞌuexeloj junoj tzetyetal maanebꞌil yu ebꞌ.

10 Jaꞌ ebꞌ mebꞌa unin tuꞌ, ian xacꞌal cꞌam spichil ebꞌ eyocoj. Chi ecꞌ syambꞌa a ixim tiriw ebꞌ, yu wanojxa ánima, yajbꞌan chi cam ebꞌ yu wail.

11 Chi xꞌumon ecꞌ chꞌen chꞌen yet molino ebꞌ, yet chi yiꞌon eltej yaceite olivo ebꞌ. Chi tecꞌwi el yal uva ebꞌ, lalan scam pax ebꞌ yu tajin tiꞌal.

12 Jaꞌ ebꞌ chi yasitoj, chi el yaw ebꞌ, lalanxa scam ebꞌ bꞌey xol conobꞌ. Cꞌam cꞌal chi abꞌle xa ebꞌ yu Dios.

13 Ey mactxequel cꞌam chi yoche jun bꞌe yet sajkꞌinal, junelne cꞌam chi sbꞌeybꞌalne watxꞌ bꞌeybꞌale ebꞌ.

14 Jaꞌ junoj makꞌom cam ánima caw sebꞌ chi a waanoj, chi too smakꞌon cam junoj mebꞌa ánima, jaxa yet chi kꞌejbꞌi eyoj, elkꞌanxa chi yunne.

15 Jaꞌ ebꞌ chi yun mul yul skꞌabꞌ yistil, asan tol chi yechbꞌane skꞌejbꞌi ey ebꞌ, chi smajchen el sat ebꞌ. Chi snaꞌon ebꞌ jaxca tiꞌ: Cꞌam mactxequel chi cu iloni, ẍi ebꞌ.

16 Jaꞌ ebꞌ elkꞌom tuꞌ, jaꞌ yet akꞌbꞌalil chi too ebꞌ elkꞌan xol-laj na. Jaxa yet cꞌualil chi smajche oc sbꞌa ebꞌ; cꞌam chi ẍaꞌ scꞌul ebꞌ chi yil sajkꞌinal.

17 Caw chi xiw ebꞌ tet sajkꞌinal yet cꞌualil, jaꞌ xol kꞌejkꞌinal yet akꞌbꞌalil caw chi tzala ebꞌ, yutol jaꞌ yet tuꞌ chi xiw ebꞌ ánima swatxꞌ naꞌbꞌal.

18 Jaꞌ ebꞌ penawom tuꞌ, tucꞌal oj ecꞌabꞌtoj ebꞌ jaxca jaꞌ elom jaꞌ, chi tit can syaꞌtajilal yibꞌan xꞌotxꞌ ebꞌ, cꞌamxa mactxequel oj mulna bꞌey chi yaw uva ebꞌ.

19 Jaxca chi yun sqꞌueya chꞌen sajbꞌacom yu skꞌaxanil yajan cꞌu, queytuꞌ oj yun sqꞌueya ebꞌ penawom bꞌey oj mujle eytoj ebꞌ.

20 Chi too can qꞌueycꞌulal ebꞌ yu xutx; jaxa noꞌ yaax jaꞌ oj chiꞌon cantoj ebꞌ bꞌey mujan. Tumi eyto junojxa mactxequel oj naꞌontej ebꞌ. Jaꞌ ebꞌ penawom tuꞌ, oj qꞌueyle el ebꞌ jaxca chi yun skꞌajle ey junoj teꞌ teꞌ.

21 Jaꞌ ebꞌ ix ix cꞌam yuneꞌ, cꞌal ebꞌ ix camnajxa yichamil, caw chi etex ebꞌ ix yu ebꞌ, cꞌam bꞌey chi colwa niꞌoj ebꞌ yin ebꞌ ix.

22 Jaꞌ yetoj yipalil Dios chi akꞌon lawoj el ebꞌ penawom tuꞌ. Jaꞌ yet chi xꞌoxon yipalil tuꞌ, tumi eyto mac cꞌam chi xiw tet camich.

23 Ta chi el yin scꞌul Dios tol chi eecꞌ cꞌal ebꞌ penawom yin tzalacꞌulalil, asan xin, ey cꞌal oc sat Naj yin ebꞌ tzet chi el sbꞌeybꞌalnen ebꞌ.

24 Yin jun txolan chi skeꞌ ya waan ebꞌ penawom tuꞌ; jacꞌalaꞌ yin jun txolan chi skeꞌ pax sqꞌueyle el ebꞌ. Chi il-le el ebꞌ, chi too can ebꞌ bꞌey camich, jaxca cꞌal chi yun wanxa ebꞌ ánima. Chi kꞌuple el ebꞌ jaxca chi yun stokꞌle atej xeꞌ junoj teꞌ qꞌuix, ma jaxca chi yun skꞌuple a ixim tiriw yin stopanil.

25 Ta tol man quey oj tuꞌ yoqui, ¿mac junoj chi skeꞌ yaloni tol lekꞌtiꞌal kꞌane chi walaꞌ? ¿ma tol cꞌam yeloc apnoj jin kꞌane tiꞌ? ẍi naj Job.