3 Akꞌwej mimancꞌulal, yajbꞌan chin kꞌanabꞌi; chi lawi tuꞌ xin, chi skeꞌ jin je bꞌuchoni, cꞌal jin je tzeeni.

4 Jain tiꞌ, ¿manaj yetoj junoj comon ánima chi wakꞌ jowal? Yu jun tuꞌ, ¿tumi man smoo oj scus jin cꞌul che naꞌ?

5 Ta oj je yabꞌ tzet oj walaꞌ, qꞌuey ojabꞌ a je cꞌul, tzꞌin cꞌal je chi.

6 Jaꞌ yet chin naꞌon yin wan tiꞌ, chin xiw cꞌal pax aoj, jaꞌ jun jin mimanil tiꞌ, caw chi bꞌilwi aoj.

7 ¿Tzet yuxan tol iquis cꞌal ecꞌ ebꞌ penawom tuꞌ? Chi oc ebꞌ yin icham animail, caw ey cꞌal tzetyetal ey tet ebꞌ.

8 Chi yil ẍꞌibꞌa yuninal cꞌal yitxiquin ebꞌ, caw tzalacꞌulal cꞌal yeoc ebꞌ bꞌey sna.

9 Cꞌam tzet chi snaꞌ ebꞌ, caw tzalacꞌulal cꞌal ey ebꞌ. Tumi ey syaꞌilal chi ale oc yibꞌan ebꞌ yu Dios.

10 Caw watxꞌ cꞌal ẍꞌibꞌ noꞌ swacax ebꞌ, tumi ey junoj yuneꞌ swacax ebꞌ chi cami.

11 Caw chi a tꞌujna yuninal ebꞌ sjajchi jaxca noꞌ yuneꞌ meꞌ.

12 Jaꞌ yet chi yabꞌen stenle teꞌ arpa ebꞌ cꞌal teꞌ waabꞌ cꞌal yet chi xuꞌle junojxa mitxꞌkꞌabꞌe yet bꞌit, caw chi a tꞌujlabꞌoj ebꞌ scanalwi.

13 Caw miman tzetyetal ey tet ebꞌ yet chi camtoj ebꞌ; yin wal tzalacꞌulal chi yun stoo can ebꞌ bꞌey chi mujlei.

14 Chi yal ebꞌ tet Dios jaxca tiꞌ: Manche jon ja tzee, cꞌam chi koche chi cu bꞌeybꞌalne ja chejbꞌanil.

15 ¿Tzet yuxan oj cu oc yin eyilal tet Naj chi skeꞌ yu masanil tzetyetal tuꞌ? ¿Tzet wal chi kiꞌ yin, yuxan tol oj cu txaloj cꞌal tet Naj? ẍi ebꞌ.

16 Jaꞌ snaꞌon ebꞌ penawom tuꞌ, tol yul cꞌal yet ebꞌ yuxan ey sbꞌeomal ebꞌ snaꞌoni. Jain tiꞌ cꞌam chin chaꞌ wabꞌ tzet chi yal ebꞌ.

17 ¿Tumi comon xacꞌal chi lawi skꞌinal ebꞌ penawom jaxca chi yun stan junoj tzejtebꞌal? Man comonoj xacꞌal chi jul syaꞌilal yibꞌan ebꞌ. Man comonoj xacꞌal chi tit sjowal scꞌul Dios yin ebꞌ, catuꞌ chi yabꞌen syaꞌil ebꞌ.

18 Tumi comon xacꞌal chi sajlem cantoj ebꞌ jaxca an chꞌim, chi xuꞌletoj yu cajxuchum kaꞌeꞌ.

19 Chim la je naꞌ tol jaꞌ yuninal ebꞌ oj toolanen spenail jix el yunen ebꞌ mame tuꞌ. Yuxan chi wal jain tiꞌ: Jaꞌ ojabꞌ Dios chi aon oc syaꞌilal yibꞌan ebꞌ penawom tuꞌ, yet watxꞌ oj naꞌcha el yu ebꞌ tol jaꞌ yu spenail ebꞌ yuxan queytuꞌ chi yun ebꞌ.

20 Jaꞌ ebꞌ penawom tuꞌ, smoo ton wal yabꞌen syaꞌil ebꞌ. Tit ojabꞌ sjowal scꞌul Dios yibꞌan ebꞌ, Naj tol chi skeꞌ yu masanil.

21 Yutol oj cam ebꞌ yin junelne, tumi yotaj to ebꞌ ta ey tzet chi jul yibꞌan yuninal ebꞌ.

22 Yu jun tuꞌ xin, ¿mactxequel chi skeꞌ yakꞌon junoj naꞌbꞌale tet Dios, Naj tol chi naꞌon oc yin ebꞌ mimej yopiso cꞌal ebꞌ ey bꞌey satcan?

23 Ey ebꞌ watxꞌ chi yun yecꞌ tiempo yu, caw achꞌe ánima tocꞌal pax ebꞌ yet chi camtoj ebꞌ,

24 caw watxꞌ slow ebꞌ, cam tzet chi snaꞌ ebꞌ yu skꞌinal.

25 Ey pax wanxa ebꞌ xin, yin xacꞌal okꞌbꞌalcꞌule chi yun yecꞌ yu ebꞌ catuꞌ chi camtoj ebꞌ, caw cꞌam niꞌoj tzet watxꞌ jix sloꞌ ebꞌ.

26 Jal pax bꞌey mujan ebꞌ camom tuꞌ laan cꞌal eloj; cꞌam junoj tol man oj chiꞌle yu noꞌ yaax jaꞌ.

27 Wotaj tzetyetal che naꞌ jaex tiꞌ win, che yoche che naꞌ je yunen junoj spenail win.

28 Che kꞌanle ey jex junjun jex: ¿Bꞌeytuꞌ jix cancan sna jun penawom tol yaaw xacꞌal jix yute sbꞌa tuꞌ? je chi.

29 ¿Tumi cꞌam bꞌey chex kꞌanabꞌ yetoj ebꞌ ánima chi ecꞌabꞌi? ¿Tumi ma je yabꞌ tzetyetal chi yal ebꞌ?

30 Jaꞌ yet chi tit sjowal scꞌul Dios eyman chi yatej junoj syaꞌilal, jal ebꞌ penawom xin, tumi ey tzet chi iꞌon ebꞌ.

31 Tumi ey mac chi alon oc sbꞌeybꞌal ebꞌ tuꞌ yin sat; cꞌam mactxequel chi pajtzen tet ebꞌ, yutol caw smoo ton ẍaꞌon spaj ebꞌ.

32 Jaꞌ yet chi too mujle can ebꞌ, catuꞌ chi ale oc steynemal bꞌey chi mujle ebꞌ tuꞌ.

33 Caw siclabꞌinaj xacꞌal chi yabꞌ txꞌotxꞌ txꞌotxꞌ tuꞌ. Jaꞌ yintaj ebꞌ tuꞌ oj toj mujle masanil ánima; ey cꞌal pax mactxequel xax bꞌabꞌitoj mujle sattaj ebꞌ.

34 ¿Tzet oj yun je yakꞌon smimanil jin cꞌul yetoj wan je kꞌane cꞌam yeloc apnoj tuꞌ? Lekꞌtiꞌal kꞌane cꞌal che yal ey jin, ẍi naj Job tet ebꞌ.