3 Jix jon ja bꞌuch yetoj wan ja pena kꞌane jix ja walaꞌ, yuxan jix jin naꞌ tzet oj yun jin pajtzen ey jaach.

4 Jaach tiꞌ, ja wotajxa tol yet tax cꞌal jix cꞌoli stitoc ebꞌ ánima bꞌey yul yibꞌankꞌinal tiꞌ,

5 jaꞌ ebꞌ penawom, txenne tiempo jix yakꞌ tzalabꞌoj scꞌul ebꞌ, junne txolan jix lawi eyoj.

6 Caxcꞌal yel xacꞌal caw naat eya ebꞌ chi yabꞌ jaxca weycan ey bꞌey satcan, jaꞌ sjolom ebꞌ chi a tacꞌal apnoj bꞌey chi ecꞌ asun,

7 oj lawoj ey ebꞌ jaxca stzaꞌ noꞌ noꞌ, manxa yotaj oj ebꞌ swatxꞌil ánima bꞌey oj apnoj can oc ebꞌ.

8 Tucꞌal oj qꞌueya ebꞌ jaxca junoj weyiche. Cꞌamxa mactxequel oj ilon yecꞌ ebꞌ.

9 Jaꞌ ebꞌ jix ilon yecꞌ ebꞌ, cꞌal ebꞌ jix ecꞌ yetoj ebꞌ, cꞌamxa bꞌey oj yil-le oc sbꞌa ebꞌ junelxa.

10 Jaꞌ yuninal ebꞌ oj akꞌon meltzo masanil tet ebꞌ mebꞌa jantaj tzetyetal jix yelkꞌane ebꞌ.

11 Jaꞌ yet caw eyto yip ebꞌ yin yachꞌeal, oj eycantoj ebꞌ bꞌey smujbꞌanil ebꞌ camom.

12 Yutol caw jix ẍaꞌ scꞌul ebꞌ yunen spenail jaxca junoj tzetyetal chiꞌ sloꞌi, caw jix yakꞌ tzalabꞌoj scꞌul ebꞌ yetoj,

13 caxcꞌal caw chiꞌ jix yabꞌ ebꞌ.

14 Jal pax yul scꞌul ebꞌ xin, venenoxa oj yute cantoj sbꞌa, ecꞌbꞌan yintaj sjowal stiꞌ noꞌ labꞌa.

15 Oj xae atej masanil sbꞌeomal ebꞌ jix sloꞌeytoj, yutol jaꞌ Dios oj iꞌon atej yul scꞌul ebꞌ.

16 Jaxca tol jix stzꞌubꞌ eytoj svenenoal stiꞌ noꞌ labꞌa ebꞌ, jaꞌ jun veneno tuꞌ oj akꞌon cam ebꞌ.

17 Yu jun tuꞌ, yuxan man oj skeꞌ yakꞌon tzalabꞌoj scꞌul ebꞌ yetoj tzetyetal ey tet, jaxca noꞌ lech, cꞌal noꞌ yal awcabꞌ chi bꞌey jaxca jaꞌ jaꞌ.

18 Jaꞌ masanil tzetyetal jix yiꞌcan ecꞌ ebꞌ, sowalil oj yakꞌ meltzo ebꞌ; man xacꞌal oj skeꞌ yakꞌon tzalabꞌoj scꞌul ebꞌ yetoj sbꞌeomal.

19 Caw jix etnele ebꞌ mebꞌa yu ebꞌ, cꞌamxa niꞌoj tzet jix yakꞌ can ebꞌ tet ebꞌ. Jaꞌ ebꞌ etnem ánima tuꞌ jix majon can oc wan na tol manaj ebꞌ jix waꞌnen aoj.

20-21 Cꞌamxa niꞌoj jix yakꞌ can ebꞌ, yuxan man naatiloj jix yakꞌ tzalabꞌoj scꞌul ebꞌ yetoj.

22 Yajbꞌan caw miman tzetyetal ey tet ebꞌ, jaꞌ yet tuꞌ oj jul bꞌiscꞌulal yibꞌan ebꞌ. Oj eyqꞌuey ebꞌ yul skꞌabꞌ ebꞌ pena snaꞌbꞌal.

23 Jaꞌ yet chi yakꞌon no scꞌul ebꞌ, jaꞌ yet tuꞌ oj secon eytej sjowal scꞌul Dios yibꞌan ebꞌ. Oj jul yibꞌan ebꞌ, yajbꞌan lalan slow ebꞌ.

24 Ta tol chi ela ebꞌ tet junoj chꞌen espada tol hierro; jaꞌ chꞌen julbꞌal tol bronce cꞌal eloj jaꞌ oj low yin ebꞌ.

25 Palan cꞌal yecꞌ el yul smimanil ebꞌ, catuꞌ chi stokꞌon eltoj ebꞌ bꞌey jun pacꞌxa, oj eltej yul scꞌul ebꞌ yu, yuxan caw oj jul mimej xiwcꞌulal xol ebꞌ ánima tuꞌ.

26 Jaꞌ kꞌejkꞌinal oj majchen el tzetyetal ewan cꞌuan ye yu ebꞌ. Jaꞌ jun kꞌakꞌ tol cꞌam stanbꞌal, jaꞌ jun tuꞌ oj akꞌon tzꞌaꞌtoj masanil tzetyetal ey tet ebꞌ.

27 Jaꞌ Dios oj txꞌoxon el masanil spenail ebꞌ. Catuꞌ oj yalon ebꞌ ánima tol ey spenail ebꞌ.

28 Jaꞌ yet oj jul sjowal scꞌul Dios yibꞌan ebꞌ, masanil sbꞌeomal ebꞌ oj lawoj can eyoj.

29 Queywal tuꞌ tzet naꞌbꞌil yu Dios yibꞌan ebꞌ penawom, jaꞌton tzet watxꞌ xa yeoc yibꞌan ebꞌ tuꞌ yu Naj tinaniꞌ, ẍi naj Zofar.