3 Ey jex cꞌal oc je yalon pena kꞌane win. ¿Tumi cꞌam chex qꞌuixwi je yalon ey jin jaxca tuꞌ?

4 Caxcꞌal mi ey jin penail, ¿tumi jaex jun che yabꞌ syaꞌil wetoj?

5 Jacꞌalaꞌ je meynen cꞌal je bꞌa jin sattaj, catuꞌ yu jin yaꞌilal tiꞌ che yalon oc yin jin sat tol penawom jin.

6 Toloj wal chi naꞌcha el je yu, tol jaꞌ Dios chin uten jaxca tiꞌ, jaꞌ Naj jix jin akꞌon eyqꞌuey yul jun yaal tiꞌ.

7 Comon xacꞌal chi el waw, chi walon jaxca tiꞌ: Chin etexi, jin chi, cꞌamxa mac chi takꞌwi ey jin, chi wal jin bꞌa cꞌamxa mac chin abꞌeni.

8 Jaꞌ Dios jix majchen el jin bꞌe, cꞌamxa chi skeꞌ wecꞌtoj. Jaxca xacꞌal tol xol kꞌejkꞌinal chin bꞌeyi.

9 Jix yiꞌecꞌ jin bꞌeomal masanil; cꞌamxa bꞌey chin bꞌinale ecꞌoj.

10 Jix jin yakꞌ lawoj el yin junelne. Jaꞌ tzet eyoc yipoj jin cꞌul, pilan jix lawi el jaxca chi yun stokꞌle atej xeꞌ junoj teꞌ teꞌ.

11 Jix sbꞌejeytej sjowal scꞌul wibꞌan, jaxca xacꞌal tol jin cajat jin bꞌa yetoj.

12 Masanil ebꞌ soldado Dios jix jul oc joyan ebꞌ win. Jix oc joyan ebꞌ yin jin na, catuꞌ jix yakꞌon jowal ebꞌ wetoj.

13 Jix jin yute Dios jaxca tuꞌ, tol jaꞌ ebꞌ wuẍtaj cꞌal ebꞌ jin watxꞌil ánima jix jin sbꞌejcan ebꞌ, comon ánima jin xacꞌal yul sat ebꞌ.

14 Jix jin bꞌejlecan yu ebꞌ wican cꞌal ebꞌ jin watxꞌil ánima, jix jin too can qꞌueycꞌulal yu ebꞌ.

15 Jaꞌ ebꞌ caan wetoj yul jin na, yetoj cꞌal ebꞌ wakꞌomal servil chi low wetoj yin jin meẍa, jaxca xacꞌal txꞌoj animail jin yul sat ebꞌ, tol manxa yotaj oj jin ebꞌ chi yute yaloni.

16 Ta chi wawte junoj ebꞌ wakꞌomal servil tuꞌ, cꞌamxa chi takꞌwi ebꞌ ey jin, caxcꞌal mi caw chin oc tean yin ebꞌ.

17 Jaꞌ yet chin oc scawilal ix wistil, chin yintajne el ix an, txꞌojxa wal sabꞌ xobꞌ jin tiꞌ chi yabꞌ ix, cꞌamxa chin ochele yu ebꞌ caan wetoj yul jin na.

18 Quey pax tuꞌ ebꞌ unin chin yintajne can el ebꞌ; jaꞌ yet chin yilon ebꞌ chi bꞌuchwa ebꞌ win.

19 Jaꞌ ebꞌ yel xacꞌal watxꞌ wakꞌon yetoj, chin yale xacꞌal yu ebꞌ; jaꞌ ebꞌ jin watxꞌil ánima watxꞌ wakꞌon yetoj, caw chi jowi xacꞌal oc ebꞌ win.

20 Tuxa chi tajoc jin tzꞌuumal cꞌal jin chiꞌbꞌeal yin jin bꞌajil, ian xacꞌal chin cami.

21 Jex jin watxꞌil ánima, cus ojabꞌ oc je cꞌul win xin, yutol jaꞌ Dios jix aon oc jun syaꞌilal tiꞌ wibꞌan.

22 ¿Tzet yuxan tzajan jex cꞌal oc wintaj jaxca chin yute Dios? ¿kꞌojbꞌilxa jin je txꞌemon cusoj?

23 Toloj wal ey junoj chi tzꞌibꞌen masanil jin kꞌane tiꞌ yin junoj juun; toloj wal chi tzꞌibꞌelecan oc yin junoj chꞌen chꞌen.

24 Toloj wal ey junoj chi tzꞌibꞌencan oc yin chꞌen plomo yetoj junoj chꞌen tzꞌujubꞌ, catuꞌ chi cancan yin junelne.

25 Wotaj, tol jaꞌ mac chin Coloni, Iquis cꞌal ecꞌoj, jaꞌ chi aon oc jin tiꞌ, jaꞌ yet slawubꞌ cꞌual oj jul jin yiꞌa waan sat txꞌotxꞌ tiꞌ.

26 Caxcꞌal chi lawi el jin tzꞌuumal tiꞌ, jaꞌ yetoj jun jin mimanil tiꞌ oj wiloc yin Dios.

27 Jain wal caw oj wiloc yin; jain caw oj wilaꞌ, man txꞌoj animail oj jun oj ilon oc tuꞌ.

Caxcꞌal lalan slawi el yip jin cꞌul chi wabꞌe,

28 jaꞌ yet che yalon win jaxca tiꞌ: ¿Tzet wal oj yun cu txꞌemon cꞌal cusoj, yutol jacꞌal oc chi iꞌontej jun syaꞌilal tiꞌ yibꞌan? je chi.

29 Xiwanwej tet chꞌen espada xin, jaꞌton chꞌen chi yakꞌbꞌalne Dios yu sjowal scꞌul yin ebꞌ chi yun spenail. Otajnewej eloj tol jaꞌ Naj oj naꞌon oc kin, ẍi naj Job.