Jesús boejthʉtpox bʉꞌxaenkpon leprawaxaetat
8
Dolisdoꞌ,
Jesús jiw naewʉajnax bʉxtoet wʉt,
bʉloek wʉton mʉaxxot,
xabich jiw fʉlafoson.
2 Jawʉt leprawaxaetat bʉꞌxaenkpon,
fʉlaenon Jesúslel.
Pat wʉton Jesúsxot,
brixtat nukon Jesús pejwʉajnalel sitaeyax itpaeliajwa Jesúsliajwa.
Do jawʉt,
jʉm-aechon:
—Tajpaklon,
xan matabijtax xam xajʉpampox xan naboejthʉsliajwam.
Naboejthʉsasiam wʉt,
¡naboejthʉꞌe!
—aech leprawaxaetat bʉꞌxaenkpon.
3 Jesús pejke-etat jacha wʉt,
jawʉt Jesús jʉm-aech bʉꞌxaeyanliajwa:
—Xam boejthʉsasian.
Malis xam boejthʉtx —aech Jesús japonliajwa.
—¡Asew jiw nabej chapaeꞌ xam boejthʉtxpox!
¡Matxoela fʉlaemch sacerdote poxade,
japon xam taeliajwa boejthʉlpox leprawaxae!
Do jawʉx,
¡Dios chaxduꞌe,
me-ama Moisés chajia lelpox jʉm-aech,
leprawaxae xam chiekal boejthʉl xot!
Jasoxtat jiw matabijaxael xam boejthʉlpox leprawaxae —aech Jesús japonliajwa.
Jesús boejthʉtpox soldawcapitán pamakan
5-6 Jesús pat wʉt Capernaum paklowaxxot,
jawʉt soldawcapitán,
Roma gobiernoliajwa nabistpon,
pat Jesúsxot.
Soldawcapitán wʉljow wʉt,
jʉm-aechon Jesúsliajwa:
—Tajpaklon,
tamakan ok camatat tajbatat.
Japon nansaxil.
Laejaxilbejpon.
Xabich nabijaton xaenkpoxantat —aech soldawcapitán Jesúsliajwa.
7 Do jawʉt,
Jesús jʉm-aech soldawcapitánliajwa:
—Xam nakfʉlaeyaxaelen nejba poxade namakan boejthʉsliajwan —aech Jesús.
8 Do jawʉt,
soldawcapitán jʉm-aechon Jesúsliajwa:
—Tajpaklon,
xan xabich pachaema-enil xam leliajwam tajba,
xam kaes pejme paklokolnam xot.
Ma amxot waxae toꞌam wʉt,
tamakan chiekal boejthʉlaxaeson.
9 Xanbej tajpaklochow.
Japi naketoꞌa wʉt,
xan tajut ow-an.
Xanbej soldawcapitánan.
Kaen soldawan ketoꞌax wʉt,
japon na-ow-aech.
Asan lax wʉt,
japon fʉlaen.
Tamakanbej ketoꞌax wʉt,
ketoꞌaxpox japon chiekal jinawe-is.
Xambej jiw tatoꞌlanam.
Samata,
ma amxot waxae toꞌam wʉt,
tamakan chiekal naweboejthʉlaxaes —aech soldawcapitán Jesúsliajwa.
10 Jesús japox jʉmtaen wʉt,
nejchaxoelanukon,
capitán xabich xanaboejtaspox.
Samata,
Jesús jʉm-aech puexa jiw jʉmtaeliajwa:
—Diachwʉajnakolax xan jʉm-an.
Israel tʉajnʉxot xan xabich naxanaboejtpon,
me-ama ampon capitán,
jason tae-enil —aech Jesús jiwliajwa.
11 Do pejme Jesús jʉm-aech japi jiwliajwa:
—Xamal jʉm-an ampox.
Xabich jiw,
pothatapijiw,
japi judíos-eli,
pasaxael Diosxotse.
Jaxotse chalakaxaeli naxaeliajwa,
wajwʉajnapijiw sʉapich.
Abraham,
Isaac,
Jacobbej,
japi sʉapich,
naxaeyaxaeli.
12 Pelax xabich judíos pelsaxaes itkʉatax poxadik,
‘Infierno’ —tis poxadik.
Jaxotdik xabich noeyaxaeli.
Bʉaꞌtatisaxaelbejpi,
xabich nabijasaxael xot —aech Jesús japi jiwliajwa.
13 Do jawʉt,
Jesús jʉm-aech soldawcapitánliajwa:
—¡Nawiaꞌmich nejba poxade!
Namakan chiekal boejthʉslison,
xam xabich xan naxanaboejtam xot —aech Jesús.
Do jawʉt,
capitán pamakan chiekal boejthʉlspon.
Jesús boejthʉtpox Simón Pedro paem
14 Do asamatkoi,
Jesús fʉlaech wʉt Pedro pejba poxade,
jaxotde ba low wʉt,
taenpon Simón Pedro paem bʉꞌxaenkpox.
Japow ok camatat.
Xabich bʉꞌtʉajnikow.
15 Jesús kefit wʉt,
jawʉt kamta chiekal boejthʉlsow.
Do jawʉt,
nant wʉt,
pajut naxaeyaxan athukow Jesúsliajwa,
asew jiwliajwabej.
Jesús boejthʉtpox xabich jiw, bʉꞌxaeya
16 Do tuila wʉt,
itkʉatnik wʉtbej Jesúslel xabich jiw bʉflaeni asew jiw,
dep webaesi pejmatpʉatanxot.
Do jawʉt,
Jesús kaejametat dep toꞌa puexa dep nakolaliajwa jiw pejmatpʉatanxot.
Jawʉtbej puexa asewbej,
japi bʉꞌxaeya,
chiekal boejthʉls.
17 Ampox ja-aech,
me-ama Dios pejprofeta,
Isaías,
chajia lelpox jachiliajwa.
Jʉm-aechox:
“Japon xatis nakkajachawaesaxael,
bichilas wʉt.
Bʉꞌxaenkas wʉt,
nakboejthʉsaxaelbejpon” —aech Isaías lelpox,
jʉm-aech wʉt Jesúsliajwa.
Asew jiw, naknanʉamsasiapox Jesús
18 Jesús taen wʉt xabich jiw masajiachpox,
jawʉt jʉm-aechon pejnachalaliajwa:
—¡Chijias puka we-enlelde falkamtat!
—aechon.
19 Do jawʉt,
judíos chanaekabʉanan mox soepan wʉt,
jʉm-aechon Jesúsliajwa:
—Jiw chanaekabʉanan,
xanbej xam naknanʉamsasian,
nejmachtʉajnʉchan poxade xam nanʉamtam wʉt —aechon.
20 Do jawʉt,
Jesús jʉm-aech judíos chanaekabʉananliajwa:
—Lam pejmʉthan moejsliajwa.
Miabej pejfenan.
Xanlax,
puexa jiw pakoewkolnan,
ajil tajbakolaba xan damlathʉlaliajwan —aech Jesús judíos chanaekabʉananliajwa.
21 Do jawʉt,
asan pejnachalan jʉm-aechbej Jesúsliajwa:
—Tajpaklon,
xan taj-ax xabich patiꞌin.
¡Xanfʉk natapaem taj-axxot dukaliajwan!
Taj-ax tʉp wʉt,
do jawʉt,
xam naknanʉamsaxaelen —aechon Jesúsliajwa.
22 Do jawʉtbej,
Jesús jʉm-aech japonliajwa:
—¡Xamlax xan nakfʉlaem!
Xan nanaexasis-elpi,
japi jiw,
me-ama patʉpa wʉt,
kabʉan-aechi Diosliajwa.
Japilap nakaewa namʉthaxael,
tʉp wʉt —aech Jesús japonliajwa.
Jesús fiatpox joewa, truxanbej
23 Do jawʉx,
Jesús falkam jul,
pejnachala sʉapich.
24 Jawʉt,
chaflaech wʉti,
chalechkal pat iam,
pinjiyax,
Galilea pukaxot.
Xabich pintruxan,
pinajoewabej.
Xabich falkam min fajabas.
Japox ja-aech wʉt,
Jesús nejmach moejt.
25 Do jawʉt,
Jesús pejnachala thikalisipon.
Jʉm-aechlisipon:
—Tajpaklon,
¡xanal nabʉꞌwem,
chabuꞌlaxaes xot!
—aechipon.
26 Do jawʉt,
Jesús jʉm-aech pejnachalaliajwa:
—¿Ma-aech xotkat xamal nejlewla?
¡Xamal xabicha-el nejxanaboejaxan xanliajwa!
—aech Jesús pejnachalaliajwa.
Samata,
jawʉt,
Jesús nant wʉt,
fiatlison joewa,
truxanbej.
Do jawʉt,
puka chiekal itnapatan.
27 Do jawʉt,
pejnachala xabich natachaema wʉt,
nejchaxoelanuili japoxliajwa.
Samata,
nakaewa najʉm-aechi:
—¿Achankat ampon?
Joewa,
pukabej,
naexasichpon —na-aechi nakaewa.
Jesús toꞌapox dep nakolaliajwa, kolenje aton pejmatpʉatanxot
28 Jesús puka we-enlelde wʉt,
Gadara tʉajnʉxot chapaꞌapon,
pejnachala sʉapich.
Do jawʉt,
kolenje poi fʉlaen Jesúslel.
Japi fʉlaen patʉpamʉthanxotdin.
Japi kolenje xabich chachoel dep pijaxtat.
Samata,
jiw pejlewla mox xenaliajwa japixot.
29 Do jawʉt,
nejlat wʉt,
jʉm-aechi dep pijaxtat:
—Jesús,
Dios paxʉlan,
¡xanal nabej natalias!
¿Ma-aech xotkat xam fʉlaeman xanallel nataliasliajwam that toepax wʉajna?
—aechi.
30 Jaxotde kaesʉapich atʉaxachlejen xabich maran naxaelp.
31 Do jawʉt,
japi dep jʉm-aech Jesúsliajwa:
—Xanal ampi poejiwxot nakolax natoꞌam wʉt,
¡natapaem leliajwan maranxot!
—aech dep.
32 Do jawʉt Jesús jʉm-aech:
—Jaw,
¡xabʉaꞌde!
¡Lem maranxot!
—aech Jesús japi depliajwa.
Do jawʉt dep nakola wʉt poejiwxot,
lowlisi maranxot.
Jawʉt,
puexa maran dʉkp chʉatadik.
Do jawʉt puexa maran buꞌal pukatat.