Jesús toꞌapox dep nakolaliajwa aton pejmatpʉatxot
5
Jesús,
pejnachala sʉapich,
chapaꞌa Gerasa tʉajnʉ,
puka we-enlelde.
Marcos 5.1-20
2-3 Jesús nant wʉt papʉtxot,
kaen aton najaeꞌan Jesúsleldin.
Japon aton dep webaes pejmatpʉatxot.
Japon aton duk patʉpamʉthanxot.
Jiw keꞌsaxilipon.
Cadenamʉatatbej piach xawaesaxil.
4 Wʉajna chajia pin-iaveces xawaekson cadenamʉatantat.
Tʉakwasixawaekspon.
Kewʉsixawaeksbejpon.
Japon xawaeks wʉt,
cadenamʉa likton.
Jiw xajʉpa-el piach xawaesliajwapi,
xabich mamnik xoton.
5 Pomatkoicha,
pomadoichabej,
japon jʉmch nanʉamt mʉaxanxot,
patʉpamʉthanxotbej.
Nanʉamt wʉt,
xabich nejlaton.
Iaꞌtat pajut naxkoljabapon naxbijabaxtat.
6 Japon aton dep webaes pejmatpʉatxot,
Jesús atʉaxach fʉlaeyax taen wʉt,
najaeꞌnon Jesúslel.
Pat wʉton Jesús pejwʉajnalel,
brixtat nukon.
7-8 Brixtat nuk wʉt,
Jesús jʉm-aech depliajwa:
—Dep,
¡xamal nakolim japon aton pejmatpʉatxot!
—aechon.
Samata,
dep aton pejkaechatat nejlat wʉt,
jʉm-aechon:
—Jesús,
¡xam Dios athʉpijin paxʉlnam!
¿Achaxasiamkat xanalxot?
¡Xanal jʉm-an Dios pejwʉajnalel natalias-elaliajwam!
—aech dep,
nejlat wʉt.
9 Do jawʉt,
Jesús wʉajnachaemt wʉt,
jʉm-aechon:
—¿Achawʉlamkat xam?
—aech Jesús.
Japi dep xabich pin-iat.
Samata,
jʉmnot wʉt,
jʉm-aechi:
—Xanal tajwʉl Xabich,
xabich pin-iatan xot —aech japi dep.
10 Dep jʉm-aech Jesús toꞌasamata atʉaj asatʉajnʉlel.
11 Jaxot mox mʉaxxot maran pin-iakola naxaelp.
12 Samata,
dep xabich jʉm-aech:
—Ampon atonxot xanal nakolax natoꞌam wʉt,
¡natapaem maranxot leliajwan!
—aech japi dep.
13 Do jawʉt,
Jesús ow-aech dep wʉljowpox.
Dolisdoꞌ,
dep nakola wʉt japon aton pejmatpʉatxot,
japi dep lowlisi maranxot.
Japi maran xabich pin-iat,
me-ama dos mil.
Jawʉt puexa maran dʉkp chʉatadik.
Mintat natacholan wʉt,
jaxotdik puexa maran buꞌal.
14 Do jawʉtbej,
maran tataefʉlpi pejlewt dʉkp pejpaklowax poxade.
Chapaeilisi taenpoxan.
Paklowaxxot mox duilibej chapaeipi.
Jawʉt jiw fʉlaen pajut chiekal taeliajwa jʉmtaenpoxan.
15 Japi jiw Jesúsxot pat wʉt,
taenlisi japon aton.
Japon aton dep wejisallison pejmatpʉatxot.
Jesúsxot bʉꞌla-eklison naxoelax,
wepachaemsxot pejnejchaxoelax.
Jiw fʉlaeni,
taen wʉti japon,
xabich pejlewlapi.
16 Taenpi Jesús ispox japon atonliajwa,
maranliajwabej,
japi chiekal chapaei taenpoxan asew jiw,
paꞌanpiliajwa.
17 Do jawʉt,
japatʉajnʉpijiw toꞌapi Jesús asatʉajnʉlelaliajwa,
Gerasa tʉajnʉxot namanasamata.
18 Do jawʉx,
Jesús falkam jul wʉt,
japon aton,
dep wejisalpon pejmatpʉatxot,
xabich kawʉajan nakfʉlaeliajwapon Jesús.
19 Pe Jesús tapae-el japon aton nakfʉlaeliajwas.
Do jawʉt,
Jesús toꞌa japon aton pejjiw poxade nawiasliajwa.
Jesús jʉm-aech:
—¡Nawiaꞌmich nejba poxade!
¡Nejjiw chapaem puexa Dios ispox xamliajwa,
Dios xam beltaen xot!
—aech Jesús.
20 Do jawʉt,
fʉlaechlison Decápolis tʉajnʉ poxade.
Chapaefʉllison japapaklowaxanpijiw Jesús ispox japonliajwa.
Puexa jiw jʉmtaen wʉt,
jʉm-aechnapi:
“¡Taeꞌnik ampon aton!
¡Chiekal pachaemlison!”
—na-aechnapi nakaewa.
Amxot jʉm-aechox Jesús pawis boejthʉtpoxliajwa, asaow patʉpow mat-etpoxbejliajwa, pejme dukaliajwapow
21 Jesús,
pejnachala sʉapich,
kaxa nawen puka we-enleldin falkamtat.
Jesús chapaꞌan wʉt,
xabich jiw papasfʉl Jesúsxot pukababʉꞌtat.
Marcos 5.21-43
22 Jawʉt kaen aton pat.
Japon pawʉl Jairo.
Judíos naewʉajnabapijiwxot,
japon japixot paklonpon.
Jesús taen wʉton,
brixtat nukjabapon Jesús pejwʉajnalel.
23 Jairo xabich tadʉt Jesús nakfʉlaeliajwas japon pejba poxade.
Jʉm-aechon:
—Taxʉlow xabich nawebʉꞌxaenk.
Mox pawʉajnapow tʉpaliajwa.
¡Xabʉaꞌt!
¡Xan nakfʉlaem taxʉlowxot ke-osliajwam,
boejthʉsliajwampow!
—aech Jairo.
24 Do jawʉt,
Jesús nakfol Jairo.
Jesús xabich jiw chalas.
Japixot xabich jiw Jesús pejwʉajnalel fol.
Asew fol Jesús wʉchakallel.
Jesús xabich tabeꞌnafʉlas.
25 Do jawʉt,
kaeow pawis wʉchakal fol.
Japow bʉꞌxaenk.
Xabich nabijatow.
Pejlaw wʉt,
jal chiekal matduka-el.
Doce waechan jal chiekal matduka-elpox.
26 Xabich jiw woew wʉalachipow.
Pe chinax kaen aton japow boejthʉs-esal.
Xabich nabijatow wʉaspoxtat.
Xadaeptbejpow puexa pejew plata nawoeyaxtat.
Pe jal chiekal matduka-el.
27-29 Japow wʉltaen Jesús.
Samata,
Jesús mox wʉt,
wʉchakal folow.
Jawʉt nejchaxoelow:
“Xan Jesús pejnaxoelax jajastaxpoxtat naboejthʉsaxaelon” —aechow,
nejchaxoel wʉt.
Samata,
japow jajast Jesús naxoelax.
Do jawʉt,
japow chiekal boejthʉls.
Jal chiekal ajil.
Pajut bʉꞌboejtaenpow chiekal boejthʉlsox.
30 Jesús boejtaen,
pejpamamax wenakolsas wʉt.
Samata,
Jesús kaxa natachaemdik wʉt,
jʉm-aechon:
—¿Achankat xan tajnaxoelax nawejajast?
—aech Jesús.
31 Do jawʉt,
Jesús pejnachala jʉm-aechi Jesúsliajwa:
—Jiw xam tabeꞌnafʉl.
¿Ma-aech xotkat xam wʉajnachaemtam:
‘¿Achankat xan tajnaxoelax nawejajast?’
—amkat xam?
—aechi Jesúsliajwa.
32 Dolisdoꞌ Jesús natadiajsfʉl jiwlel taeliajwa,
achan jajastason.
33 Jawʉt japow tathʉlal pejlewt.
Matabijtow wejatisox.
Samata,
brixtat nukow Jesús pejwʉajnalel.
Jawʉt chapaeipow wejatispox.
34 Do jawʉt,
Jesús jʉm-aech japowliajwa:
—Taj-atow,
amwʉtjel xam pachaemam,
chiekal naxanaboejtam xot.
¡Xabʉaꞌde nejmach!
Nejwaxae kaes ajil xamxot —aech Jesús.
35 Jesús naksiya wʉtfʉk,
Jairo pamak pat Jairoxot.
Japi jʉm-aech Jairo jʉmtaeliajwa:
—Naxʉlow tʉplisow.
Samata,
¡nabej tadʉs jiw chanaekabʉanan xam nakfʉlaeliajwa nejba poxade!
—aechi.
36 Jesús naekʉanjiamt japi jʉm-aechpox,
jʉmtaen wʉton.
Samata,
Jesús jʉm-aech Jairoliajwa:
—¡Nabej nejlewleꞌ naxʉlow tʉppoxliajwa!
¡Xanaboejsfʉlde Dios!
—aech Jesús.
37 Do jawʉt,
Jesús nakiowa nakfolon.
Jawʉt Jesús bʉꞌfol Pedro,
Santiagobej,
Jairo pejba poxade.
Bʉꞌfolbejpon Juan.
Japon Santiago pakoewan.
Jesús tapae-el kaes asew jiw nakfʉlaeliajwas Jairo pejba poxade.
38 Pat wʉti Jairo pejbaxot,
Jesús jʉmtaen xabich jiw jʉmxan-elpoxan,
jiw pinjametat wʉnowpoxanbej Jairo paxʉlow tʉppoxliajwa.
39 Ba lech wʉt,
Jesús jʉm-aech:
—¿Ma-aech xotkat xamal xabich jʉmxan-elam?
¿Wʉnowambej?
Japow tʉpa-el.
Japow moejt —aech Jesús wʉnowpiliajwa.
40 Japox jʉmtaen wʉti,
asbʉan jʉmch xafafoli Jesúsliajwa.
Do jawʉt,
Jesús nakolax toꞌa jiw tathoetade.
Jawʉt Jesús bʉflaech pejnachala batuchade,
patʉpow och poxade.
Bʉflaechbejpon patʉpow pax,
japow penbej.
41 Jaxot Jesús patʉpow kefit wʉt,
jʉm-aechon patʉpowliajwa:
—Talita cum —aech Jesús.
(Japox jʉmchiliajwa hebreojametat:
“Jam,
xan jʉm-an:
‘¡Mat-eꞌe pejme dukaliajwam!’
—an xan” —chiliajwa.)
42 Do jawʉt,
kamta patʉpow mat-et.
Mat-et wʉt,
nantow.
Jawʉt pajut chiekal laejepow.
Japow doce waechan.
Jawʉt puexa jiw jʉm-aech:
“¡Taem patʉpow!
¡Laejapow pejme!”
—aechi.
43 Jesús nejthʉꞌaxtat jʉm-aech:
“¡Nabej chapaeꞌ ampox asew jiw,
xan isxpox xamalliajwa!”
—aech Jesús jaxotpijiwliajwa.
Do jawʉt,
Jesús pejme jʉm-aech:
“¡Chaxduim naxaeyax japow xaeliajwa!”
—aech Jesús.