Trigo pejwʉajan, xasaljabapon
4
Asamatkoi Jesús tʉadut jiw naewʉajnaliajwa pukababʉꞌtat.
Do jawʉt,
xabich jiw papasfʉl japonxot.
Samata,
falkam julon ekaliajwa japafalkamtat.
Jasoxtat chadukon jiw naewʉajnaliajwa.
Japi jiw pʉtat nuil.
Marcos 4.1-20
Do jawʉt,
naewʉajan wʉt,
jʉm-aechon:
3 “¡Chiekal naeweꞌe ampawʉajan!
Kaen aton fʉlaech pejlul poxade,
trigo xasaljabaliajwa.
4 Xasaljaba wʉt,
asew trigo natacholan nʉamtat.
Do jawʉx,
mia pat japatrigo xaeliajwas.
Do jawʉtbej,
japi trigo mia xaeslisi,
nʉamtat natacholanpi.
5 Asew trigo natacholan iaꞌxot,
jaxot as xanajaꞌal.
Japi trigo kamta naboela,
sat kaesʉapich xot.
6 Xabich masxaenk wʉt,
japi trigo selnas,
xabich tathinkasnika-el xotdik.
Do jawʉt,
tʉplisi.
7 Asew trigo natacholan na-eꞌlʉ tasiaptasxot.
Japi trigo naboela wʉt,
do jawʉt,
na-eꞌlʉbej naboela.
Na-eꞌlʉ tapae-el trigo tiꞌsax,
na-eꞌlʉ kaes athʉ xot.
Samata,
japi trigo naboesaxil.
8 Asew trigo natacholan sat pachaemxot.
Puexa japi trigo chiekal naboela.
Tiꞌt wʉt,
trigoton chiekal naboet.
Asew trigoton naboet treinta trigofu.
Asew trigoton naboet sesenta trigofu.
Asew trigoton naboet cien trigofu” —aech Jesús.
9 Jesús pejme jʉm-aech:
“Xamal Dios pejnejchaxoelax matabijasiam wʉt,
¡chiekal naeweꞌe xan jʉm-anpoxan!”
—aech Jesús.
Ma-aech xot Jesús xabich wʉajantat naewʉajan
10 Do jawʉx,
Jesús tamach wʉt,
doce apóstoles sʉapich,
kaes asewbej,
japon pejnachalapi,
jawʉt japi puexa wʉajnachaemt wʉt,
jʉm-aechi Jesúsliajwa:
—¿Achax jʉmchiyaxaelkat japawʉajan?
—aechi,
wʉajnachaemt wʉt Jesús.
11 Jesús jʉmnot wʉt,
jʉm-aechon:
—Dios xamal tapaei matabijaliajwam Dios pejjiw tatoꞌalpox,
xan japox naewʉajnax wʉt.
Pe asew jiw,
xanaboeja-elpi Dios,
jʉmtaeyaxael wʉajankal asbʉan jʉmch.
12 Samata,
japi jiw xabich natachaema.
Pe japi taeyaxil.
Japibej xabich naewet jʉmmatabijaliajwa,
pe jʉmmatabijaxili,
japi Dios xanaboejasamata,
Dios japi babijaxan ispoxanliajwa beltaesamatabej —aech Jesús pejnachalaliajwa.
Jesús chiekal chanaekabʉanapox trigo pejwʉajan, xasaljabapon
13 Do jawʉt,
Jesús pejme jʉm-aech pejnachalaliajwa:
“¿Xamalkat matabija-emil trigo xasaljabapon pejwʉajan?
¿Machiyaxaelamkat matabijaliajwam,
naewʉajnax wʉt asawʉajan?”
—aech Jesús pejnachalaliajwa.
14 Do jawʉt,
trigo pejwʉajan,
xasaljabapon,
Jesús chiekal chanaekabʉana pejnachala.
Jʉm-aechon:
“Trigo xasaljabapon,
japon,
me-ama Dios pejjamechan naewʉajanpon.
15 Trigo natacholanpi nʉamtat,
japox,
me-ama Dios pejjamechan jiw naewʉajnaspox.
Jʉmtaenpi naewʉajnaspox,
asew japixot,
matabijaxil,
matnaetink xoti.
Me-ama sat tink,
ja-aech xot japi pejmatnaetan.
Do jawʉt,
Satanás pasaxael Dios pejjamechan jukaliajwa japi jiw pejmatpʉatanxot.
Samata,
japi jiw naexasisaxil Dios pejjamechan.
16 Trigo natacholanpi iaꞌmatwʉajtat,
as xanajaꞌalxot,
japi trigo kamta naboela.
Japi trigo,
me-ama jiw.
Japi jiw jʉmtaen wʉt Dios pejjamechan,
chiekal naexasiti.
Do jawʉtbej,
nejchachaemili.
17 Pe jawʉtbej,
naexasit xoti Dios,
asew jiw bʉꞌwʉajanpaeis wʉti,
o,
chaemilpox wepach wʉtbej,
do jawʉt,
japi jiw kofa Dios naexasitpox.
Kaes naexasis-ellisi,
pejnejchaxoelaxan kaes mamnika-el xot,
chiekal naexasis-el xoti Dios.
Japi jiw,
me-ama trigo tathinkasnika-elpi,
chiekal tiꞌsfʉla-el.
Ja-aechlap-is japi jiw,
kofa xoti Dios naexasitox.
18 Asew jiw,
me-ama trigo,
naboelapi na-eꞌlʉ tasiaptasxot.
Japi jiw naexasit Dios pejjamechan,
naewʉajnas wʉt.
Do jawʉx,
kofapi,
pejnejchaxoelaxan asaxan matakas xot.
19 Japi jiw nejchaxoel ampathatpijaxankal.
Nejchaxoelbejpi kemaenkaliajwa.
Xabich platasiapi.
Japanejchaxoelaxantat Dios pejjamechan matakas.
Samata,
Dios pejjamechan tiꞌsfʉlaxil japi pejmatpʉatanxot.
20 Asew jiw,
me-ama trigo,
natacholanpi sat pachaemxot.
Japi jiwlax chiekal naexasisfʉl,
Dios pejjamechan naewʉajnas wʉt.
Ja-aech wʉt,
japi jiw isfʉl Dios nejxasinkpoxan.
Samata,
asew japixot,
me-ama trigoton naboeti treinta trigofu.
Asew jiw japixot,
me-ama trigoton naboeti sesenta trigofu.
Asew jiw japixot,
me-ama trigoton naboeti cien trigofu” —aech Jesús,
pejnachala chanaekabʉana wʉt trigowʉajanliajwa.
Lámpara pejwʉajan
21 Jesús pejme jʉm-aech:
“Lámpara tamdutam wʉt,
asaxtat matakasaximil.
Cha-esaximilbej camabʉxfaltat.
Athʉ cha-esaxaelam atʉaj itliakaliajwa.
Marcos 4.21-41
22 Jachiyaxaelam tajnaewʉajnaxliajwa.
Puexa tajnejchaxoelaxan,
me-ama moechaspoxan.
Pe asamatkoi puexa chiekal matabijaxaeli tajnaewʉajnaxpijaxtat.
Puexa jiw tajnaewʉajnax matabija-elpi,
japi asamatkoi matabijaxael.
23 Xamal Dios pejnejchaxoelax matabijasiam wʉt,
¡xan jʉm-anpox chiekal naeweꞌe!”
—aech Jesús.
24 Jesús pejme jʉm-aech:
“¡Chiekal nejchaxoelde xan jʉm-anox!
Asew jiw weweꞌpas wʉt,
¡xamal chaxduim xajʉpampoxtat!
Ja-am wʉt,
xamalbej Dios chaxduiyaxael weweꞌppoxan.
Dios kaes pejme xamal chaxduiyaxael pachaempoxan,
chiekal matabijt xoton xamalliajwa.
25 Dios pejew chiekal tataefʉlpon,
japon kaes pejme chaxdusaxaes.
Asanlax,
chiekal tataefla-elpon Dios pejew,
japon kaesʉapich tataefʉlpoxan,
japoxan kefisaxaeson” —aech Jesús,
jiw naewʉajan wʉt.
Pafut tiꞌtpox pejwʉajan
26 Do jawʉt,
Jesús naewʉajan pejnachala.
Dios tatoꞌal wʉt pejjiw,
japox kaesfʉlaxael.
Samata,
Jesús jʉm-aech:
“Dios pejjiw tatoꞌlaxaelpox kaesfʉlaxael ampathatat.
Me-ama aton trigo xasaljaba wʉt satat,
jachiyaxaellapi-is Dios tatoꞌalpox pejjiw.
27 Dolisdoꞌ,
japi trigo naboela wʉt,
tiꞌsfʉl matkoi,
madoibej.
Trigo xasaljabapon moejt wʉt,
japi trigo tamach tiꞌsfʉl.
Japon matabijs-el,
ma-aech,
trigo tiꞌsfʉl wʉt.
28 Japi trigo naboela satat.
Naboela wʉt,
tiꞌti.
Tiꞌt wʉt,
trigo naboet.
29 Trigo chiekal tiꞌt wʉt,
pachaem jolaliajwa,
pat wʉt pejmatkoi” —aech Jesús.
Mostazafut pejwʉajan
30 Jesús pejme jʉm-aech:
“Xamal chiekal matabijaliajwam,
naewʉajnaxaelen wʉajan,
ma-aech Dios tatoꞌlaxaelpox pejjiw kaesfʉlaliajwa.
31 Dios puexa pejjiw tatoꞌalpox,
me-ama mostazafut.
Kaen aton japafut mʉtht pejlultat.
Kamta wetiꞌtas wʉt,
do chiekal naedoꞌ.
Diachwʉajnakolax japafut kaes pejme cha-aelfut ampathatat.
32 Japafut mʉthtas wʉt,
kamta tiꞌt.
Japanae,
boejtachnaechlejen,
kaewaech wʉt,
tiꞌt.
Tiꞌt wʉt,
kaes athʉ.
Me-ama asaxan jiw pejlulanxot mʉthapi,
jachi-el.
Samata,
pachaem mia chalakaliajwa japadalantat,
japanae pejnajelnaxtat” —aech Jesús.
Jesús naewʉajan wʉt, xabich naewʉajan wʉajantat jiw jʉmtaeliajwa
33 Jesús naewʉajan wʉt,
xabich naewʉajan wʉajantat jiw jʉmtaeliajwa.
Jiw kaes xajʉpa-el wʉt japawʉajan matabijaliajwa,
Jesús bʉxkoft naewʉajanpox.
34 Pomatkoicha Jesús jiw naewʉajan wʉajantat.
Do jawʉx,
tamach wʉt,
pejnachala sʉapich,
Jesús chiekal chanaekabʉana puexa pejnachala chiekal matabijaliajwa.
Jesús fiatpox joewa, truxanbej
35 Japamatkoitat,
chatuil wʉti,
Jesús jʉm-aech pejnachalaliajwa:
—¡Chijias puka we-enlelde!
—aechon.
36 Jawʉt pejnachala falkam jul.
Jesús chajia wʉajna falkamtat ek,
jiw naewʉajan xot.
Do jawʉt,
jaxot asew jiw waelapon pukababʉꞌtat.
Jawʉt,
Jesús,
pejnachala sʉapich,
chaflaech wʉt,
asafalkammochantat asew jiw wʉchakal chafol.
37 Do jawʉt,
chalechkal xabich pinajoewa pat,
xabich pintruxanbej.
Falkam min wʉlʉkafʉl truxan fajabaxtat.
38 Pe falkamta-ulel Jesús nejmach moejt.
Taxʉ-oton taxʉ-osax.
Do jawʉt,
pejnachala thikas wʉt,
jʉm-aechi:
—¡Jiw chanaekabʉanan!
¿Xamkat nejchaxoela-emil xatis chabuꞌlaxaesox?
—aechi Jesúsliajwa.
39 Do jawʉt,
Jesús nant fiasliajwa joewa,
truxanbej.
Jawʉt jʉm-aechon pukaliajwa:
—¡Kaes nabej pintruxneꞌ!
—aech Jesús.
Do jawʉt,
chalechkal joewa chiekal toep.
Puexa chiekal itnapatan.
40 Do jawʉt,
Jesús jʉm-aech pejnachalaliajwa:
—¿Ma-aech xotkat xamal nejlewla?
¿Chiekal xan naxanaboeja-emilfʉk xamal bʉꞌweyaxaelenpox?
—aech Jesús pejnachalaliajwa.
41 Do jawʉt,
japi xabich natachaemanuil.
Xabich pejlewlabejpi.
Samata,
nakaewa najʉm-aechi:
—¿Achankat ampon?
Joewa,
pukabej,
chiekal naexasichpon —na-aechi nakaewa.