Jesús naewʉajanpox jiw kofaliajwa babijaxan isfʉlpoxan naexasisfʉlaliajwa Dios
13
Jiw patpi Jesúsxot,
japi jʉm-aech Jesúsliajwa:
—Galilea tʉajnʉpijiw pat Jerusalén paklowaxxot.
Japi choef xʉaꞌat Dios pejtemplobatat Dios chaxduiliajwapi ofrenda.
Do jawʉt,
Pilato toꞌa pejsoldaw japi jiw beliajwas.
Baes wʉt,
japi pejjal,
choefjal sʉapich,
matanialas —aechi Jesúsxot pati,
chapaei wʉti Jesús.
Lucas 13.1-21
2 Jesús jʉm-aech japi jiwliajwa:
—Xamal bej nejchaxoelambej:
‘Japi japox wejatis,
kaes babijaxan is xot.
Me-ama asew jiw pejtʉajnʉpijiw,
jachi-el xoti’ —bej ambej,
nejchaxoelam wʉt.
3 Xan jʉm-an:
‘Japi japox wejatis xamal najut kofaliajwam babijaxan isfʉlampoxan.
Kofa-emil wʉt,
asamatkoi tʉpam wʉt,
xamalbej Dios kastikaxael.
Diosxotaximilbej’ —an xan.
4 Ba,
xabich athʉpox,
Torre de Siloé pawʉlpox,
chalechkal chajia jʉwal Jerusalén paklowaxxot.
Japox jʉwal wʉt,
dieciocho jiw matkaeyas.
Xamal nejchaxoelam wʉt,
bej jʉm-ambej matkaeyaspiliajwa:
‘Japi japox wejatis,
kaes babijaxan is xot.
Me-ama asew jiw,
Jerusalén paklowaxpijiw,
jachi-el xoti’ —bej ambej,
nejchaxoelam wʉt.
5 Xan jʉm-an:
‘¡El!
Japi jasox wejachi-esal.
Xamallax kofa-emil wʉt babijaxan isfʉlampoxan,
asamatkoi tʉpam wʉt,
Dios xamalbej kastikaxael.
Diosxotaximilbej’ —an xan —aech Jesús jiwliajwa.
Higonae naboes-elpox pejwʉajan
6 Jesús naewʉajan wʉt jiw,
higonaeliajwa jʉm-aechon:
“Kaen aton pejlul.
Pejlultutat higonae nuk,
chajia mʉthtasnae.
Lulpijin mox soepan japanae taeliajwa,
pabaech wʉt tʉsliajwa.
Pe japanae baechjil.
7 Samata,
lulpijin jʉm-aech pejlul wetataeflasponliajwa:
‘¡Taem ampanae!
Ampoxtat tres waechan fʉlaenxpox,
pabaech wʉt tʉsliajwan.
Pe chinax naboes-el.
Samata,
¡likde nae!
¡Kaes nabej tapaetis ampanae sat it-elaliajwa’!
—aech lulpijin.
8 Lul tataeflan jʉmnot wʉt,
jʉm-aechon paklonliajwa:
‘Tajpaklon,
¡ma ampawaechtatfʉk tapaem!
Xan chabakasaeyaxaelen.
Do jawʉt,
abono chabakatholaxaelenbej.
9 Ja-an wʉt,
japanae bej naboesaxaelbej asawaestat.
Pe japawaestat naboes-el wʉt,
do jawʉt,
japanae liksaxaelen’ —aech lul tataeflan” —aech Jesús jiwliajwa.
Jesús boejthʉtpox napatamatkoitat kaeow pawis, jajʉlopow bʉꞌxaeyaxtat
10 Asamatkoi,
napatamatkoi wʉt,
Jesús naewʉajan judíos naewʉajnabaxot.
11 Japabaxot kaeow pawis ek,
bʉꞌxaenkpow.
Pomatkoicha jajʉlwax chalaejapow.
Chinax nadolsaxilow.
Japow dieciocho waechan,
ja-aech dep ketispoxtat.
12 Jesús taen wʉt japow,
lapon.
Japow pat wʉt Jesúsxot,
jʉm-aechon japowliajwa:
—Xam boejthʉtx bʉꞌxaenkampox —aech Jesús.
13 Jesús ke-ot japow pejtaꞌtat.
Jawʉt japow chiekal nadolt.
Kaes jajʉlwa-elow.
Do jawʉt,
japow jʉm-aechfʉl Diosliajwa:
“Dios,
xam isam xabich pachaempox xanliajwa.
Xam xabich pachaemam” —aechow Diosliajwa.
14 Jawʉt judíos naewʉajnaba tataeflan palala Jesúsliajwa,
Jesús boejthʉt xot japow napatamatkoitat.
Samata,
judíos naewʉajnaba tataeflan jʉm-aech jiwliajwa:
—Kaesemana seis matkoiyan nabichliajwas.
Japamatkoiyan wʉt,
xamal fʉlaeyaxaelam ampaleldin.
¡Nabej fʉlaeꞌ napatamatkoi wʉt Jesús boejthʉsliajwa xamal!
—aech judíos naewʉajnaba tataeflan.
15 Do jawʉt,
Jesús jʉm-aech judíos naewʉajnaba tataeflanliajwa,
asew jiwliajwabej:
—¡Xamal naekichachajbapijwam!
Chaemilam wʉt,
me-ama pachaemam wʉt,
pakabʉan-am.
Xamalbej najut nabistam napatamatkoitat.
Xamal najut sitae-emil napatamatkoi.
Nijan woei joltam bʉflaeliajwam japon woei min feliajwa.
Woei-el wʉt,
nijan bur joltam napatamatkoitat bʉflaeliajwam,
japon bur min feliajwa.
16 Ampow,
Abraham pamow,
kaes pejme pachaem.
Me-ama choefan,
jachi-el.
Dep ketispoxtat dieciocho waechan japow bʉꞌxaenk.
Samata,
napatamatkoitat japow boejthʉtx —aech Jesús judíos naewʉajnaba tataeflanliajwa,
asew jiwliajwabej.
17 Jesús japox jʉm-aech wʉt,
Jesús padaelmajiw padala.
Samata,
asbʉan jʉmch boejlach chalaki,
padala xoti Jesúsliajwa.
Asew judíoslax nejchachaemil,
jʉmtaen wʉti Jesús jʉm-aechpoxliajwa,
taen wʉtbejpi koechax,
Jesús ispox.
Mostazafut pejwʉajan
18 Jesús jʉm-aech:
“Jʉmchiyaxaelen wʉajan xamal chiekal matabijaliajwam,
achax kabʉanchiyaxael,
Dios puexa pejjiw tatoꞌlaxael wʉt.
19 Dios puexa pejjiw tatoꞌlaxaelpox,
me-ama mostazafut,
ja-aechox.
Kaen aton mʉtht japafut pejlultat.
Kamta wenaboeltas.
Chiekal wetiꞌtasbejpon.
Tiꞌt wʉt,
naelisdoꞌ.
Samata,
japadalantat mia is pejfenan tabʉ-owaliajwa” —aech Jesús.
(Jasoxtat japi jiw naexasit Dios tatoꞌalpox majt kaesʉapich.
Kaesʉapich matkoiyan wʉt,
kaes pejme xabichaxael jiw.)
Levadura pejwʉajan
(Mt 13.33)
20 Do pejme Jesús jʉm-aech:
“¿Masoxkat wʉajan chiekal pachaem xamal naewʉajnaliajwan,
matabijaliajwambej Dios tatoꞌalpox puexa pejjiw?
21 Dios puexa pejjiw tatoꞌlaxaelpox me-ama levadura pan isas wʉt,
jachiyaxael japox.
Kaeow pawis pan is wʉt,
taniala tres taso trigobelan,
levadura sʉapich.
Do jawʉx,
cha-etfʉk posapa puthlaliajwa levaduratat kaes pinasapaliajwa” —aech Jesús.
(Jachiyaxaelbej,
asamatkoi Dios puexa pejjiw tatoꞌlaxael wʉt.
Pothata jiw xabich xajʉpaxael.)
Asew jiwliajwa xabich tampoelpox, japi naexasisliajwa Dios
(Mt 7.13-14, 21-23)
22 Jesús Jerusalén paklowax poxade wʉt,
asapaklowaxanxot,
tʉajnʉchanxotbej,
jiw naewʉajnafʉlon.
Lucas 13.22-35
—Tajpaklon,
¿diachwʉajnakolaxkat Dios kaesʉapich jiw bʉꞌweyaxael?
—tispon.
Jesús jʉmnot wʉt,
jʉm-aechon:
24 —Diosxotse pasliajwa,
me-ama cha-aelaxach laleyax,
ja-aechox.
Xabich jiw nejxasink pajut pasliajwa.
Pe jiw pajut pijaxtat pasaxil.
25 Bapijin ba fakaꞌt wʉt,
xamal namaeyaxaelam tathoetat.
Lam wʉt,
jʉmchiyaxaelam:
‘Tajpaklon,
¡ba fafaꞌe xanal leliajwan!’
—chiyaxaelam bapijin.
Pe japon jʉmnoꞌan wʉt,
jʉmchiyaxaenon xamalliajwa:
‘Xan matabijs-enil xamal.
¿Amxotpijwamkat xamal?’
—chiyaxaen bapijin.
26 Xamal jʉmchiyaxaelam:
‘Xanallape,
xam sʉapich,
kaeyaxtat naxaelaxpin,
afxpinbej.
Tajpaklowaxxot xam naewʉajnamponam’ —chiyaxaelam.
27 Bapijin pejme xamal jʉmnosaxaen:
‘Xamal matabijs-enil.
Matabijs-enilbej amxotpijwam.
Xamal babejchowam.
¡Chijiamde!’
—chiyaxaelon.
28 Xamal atʉaj taeyaxaelam Abraham,
Isaac,
Jacob sʉapich,
puexa asew profetasbej.
Japi Diosxotse amwʉtjel duil.
Pe xamal pelsaxaekon infierno poxadik.
Jaxotdik xamal xabich noeyaxaelam.
Bʉaꞌtatisaxaelambej,
xabich nabijasaxaelam xot.
29 Xabich jiw,
potʉajnʉchanpijiw,
pasaxael Diosxotse.
Japi jiw chalakaxael Diosxot.
Naxaeyaxaelbejpi.
30 Jiw amwʉtjel kaes paklochowpi,
japi Diosxotse paklochowaxil.
Asew amwʉtjel paklochowa-elpi,
japi kaes paklochowaxael Diosxotse —aech Jesús aton,
wʉajnachaemtasponliajwa.
Jesús xabich nejxaejwaspox Jerusalén paklowaxpijiwliajwa
31 Jesús bʉxtoet wʉt wʉajnachaemtasponliajwa,
jawʉt kaesʉapich jaxot fariseos pat,
Jesúsxot.
Do jawʉt,
fariseos jʉm-aech Jesúsliajwa:
—¡Ma amxot xam asalel chijiamde,
rey Herodes fʉlaeyaxaen xot xam boesaliajwa!
—aech fariseos Jesúsliajwa.
32 Jesús jʉmnot wʉt,
jʉm-aechon:
—¡Xamal xabʉaꞌde Herodes poxade!
Japon aton,
me-ama lam wʉt,
ja-aechon,
jiw tabejsan xot.
¡Chapaempon xan isfʉlaxpoxan,
nanʉamtax wʉt!
¡Jʉm-amopon,
chapaeyam wʉt:
‘Jesús jʉm-aech:
“Amwʉtjel,
kandiawabej,
toꞌaxaelen dep nakolaliajwa,
jiw pejmatpʉatanxot webaespi.
Bʉꞌxaenkpibej boejthʉsaxaelen.
Asakandiawa wʉt,
toesaxaelen tajbichax’ —aech Jesús’ —amo Herodes!
33 Amwʉt fʉlaeyaxaelen Jerusalén paklowax poxade.
Jasoxtat pasaxaelen Jerusalén paklowax,
jaxotde naboesaliajwapi,
Dios pejprofetas jibaes xot Jerusalén paklowaxxot —aech Jesús fariseosliajwa.
34 Jesús xabich nejxaejwas,
nejchaxoel wʉt Jerusalén paklowaxpijiwliajwa.
Samata,
jʉm-aechon:
“Xamal Jerusalén paklowaxpijwam,
Dios pejprofetas pabam.
Asew profetasbej iaꞌtat dadapam,
Dios bʉxtoꞌaspi xamal naewʉajnaliajwa.
Me-ama kawaema paxi tameja pejbaꞌbʉxfaltat,
xan jachisian xamal bʉꞌweliajwan.
Pe xamal xan nanejwesla.
35 ¡Chiekal najʉmtaem!
Nejpaklowaxxotaxil Dios.
Kaes kajachawaesfʉlaxilbejpon xamal.
Piach nataeyaximil.
Xan pejme patx wʉt,
jawʉt xamal jʉmchiyaxaelam xanliajwa:
‘Dios nej kajachawaesas fʉlaenpon Dios pijaxtat’ —chiyaxaelam,
pejme nataeyaxaelam wʉt” —aech Jesús,
nejxaejwas wʉt Jerusalén paklowaxpijiwliajwa.