Chííⁿ chí diīⁿ chí ngii nuuⁿndi ꞌiiⁿꞌyāⁿ
7
Tuuꞌmi ní ꞌiiⁿꞌyāⁿ fariseos ndúúcū nꞌduuvi maestros yeⁿꞌe ley nꞌdaa yā na yáāⁿ Jerusalén, ní ndaa yā nanááⁿ Jesús. 2 ꞌIiⁿꞌyāⁿ sꞌeeⁿ ní nꞌdiichí yā chí discípulos yeⁿꞌe Jesús miiⁿ ngéꞌe yā ndúúcū taꞌa yā chí vaatíī, ní vɛɛ nuuⁿndi yeⁿꞌe yā ti nguɛ́ɛ́ inaaⁿnu yā taꞌa yā taachí āā cuɛ́ɛ́ cheꞌe yā tanꞌduucā chi ngaⁿꞌa ley yeⁿꞌé yā. 3 Chúū chii caati ꞌiiⁿꞌyāⁿ fariseos ndúúcū nducyáácá ꞌiiⁿꞌyāⁿ Israel candíi yā costumbres yeⁿꞌé ꞌiiⁿꞌyāⁿ ndiicúú sꞌeeⁿ chi nguɛ́ɛ́ cheꞌe yā ndúúti chi nguɛ́ɛ́ nꞌdeēe cuuví nnaaⁿnú yā taꞌa yā. 4 Taachí indáa yā niiꞌvɛ̄ɛ̄, nguɛ́ɛ́ cheꞌe yā nduuti chi nguɛ́ɛ́ nnaaⁿnu yā taꞌa yā nꞌdeēe cuūví. Vɛ́ɛ́ cá costumbres chi ꞌiiⁿꞌyāⁿ sꞌeeⁿ icandiica yā, chi nnaaⁿnu yā vasos chi nꞌgeē chí ngiꞌi yā, ndúúcū jarros, ndúúcū taza yeⁿꞌe cūū, ndúúcū mesas. 5 Tuuꞌmi ní ꞌiiⁿꞌyāⁿ fariseos ndúúcū maestros yeⁿꞌe ley miiⁿ itiinguunéeⁿ yā Jesús: ¿Dɛꞌɛ̄ cúúví chí nguɛ́ɛ́ candíí discípulos yeⁿꞌe nī costumbres yeⁿꞌe ꞌiiⁿꞌyāⁿ ndiicúú sꞌeeⁿ? Ngeꞌé yā ndúúcū taꞌa yā chi vaatíī.6 Jesús nanꞌguɛɛcútaⁿꞌa yā: Nꞌdáacā caⁿꞌa profeta Isaías miiⁿ ndii cuááⁿ vmnaaⁿ yeⁿꞌe ndísꞌtiī chí ꞌuūvī naaⁿ ꞌuūvī cheendí nī. Chuū caⁿꞌa yā taachí dingúuⁿ yā ꞌtúúcā:
ꞌIiⁿꞌyāⁿ sꞌuúⁿ ní dichꞌɛɛtɛ́ yā ꞌúú ndúúcū cheendi yā, naati staava yeⁿꞌe yā yaⁿꞌāī canee yeⁿꞌe ꞌúú.
7 Nguɛ́ɛ́ dɛꞌɛ̄ vɛɛ dichííꞌvɛ̄ chí diiⁿ yā chi dichꞌɛɛtɛ́ yā ꞌúú, ti chííⁿ chí ngiꞌcueeⁿ yā ní ley yeⁿꞌe saⁿꞌā yeⁿꞌe iⁿꞌyeeⁿdí ꞌcūū.
8 Naati ndísꞌtiī ní chiꞌnéeⁿ nī leyes yeⁿꞌe Ndyuūs ní candíi nī costumbres yeⁿꞌe saⁿꞌā yeⁿꞌē iⁿꞌyeeⁿdí ꞌcūū. Chííⁿ chi neené nꞌdeee cuūví nnaaⁿnu yā jarros ndúúcū vasos naachi ngiꞌi nuúⁿ yā, ndúúcū chí diíⁿ yā ndúúcū neené nꞌdeēe cá denduꞌū. Tanducuéⁿꞌē chuū ní nguɛ́ɛ́ dichííꞌvɛ̄.
9 ꞌTíícā caⁿꞌa Jesús chii yā ꞌiiⁿꞌyāⁿ sꞌeeⁿ: Ndísꞌtiī ní cándii nī costumbres maáⁿ nī ní cáávā chuū iꞌneéⁿ nī ꞌáámá lado ley yeⁿꞌé Ndyuūs. 10 Moisés caⁿꞌa yā ley ꞌcūū: Diíⁿ nī honrar chiidá nī ndúúcū chɛɛcú nī ní ꞌiiⁿꞌyāⁿ chi nguɛ́ɛ́ nꞌdáacā ngaⁿꞌa yā yeⁿꞌe chiidá yā o yeⁿꞌē chɛɛcú yā canéé chi ꞌcuūvi yā. 11 Naati ndísꞌtiī ní ngaⁿꞌa nī chí ngaꞌa nī permiso ꞌaama saⁿꞌā chí caaⁿꞌmaⁿ sá cuuvi sa chiida sa o chɛɛcu sa, ꞌtíícā: ꞌÚú ní nguɛ́ɛ́ cuuvi nneé nꞌdiī, caati nducuéⁿꞌē chi yeⁿꞌé ní Corbán. (Nduudu Corbán miiⁿ ní neⁿꞌe caaⁿꞌmaⁿ chi caꞌá yā Ndyuūs.) 12 Ndúúti chi saⁿꞌā ngaⁿꞌa sa ꞌtúúcā, tuuꞌmi ní ndísꞌtiī ngaⁿꞌa nī chi ꞌāā ntɛ́ɛ́ ngaꞌa nī lugar chi cunnee sá chiida sá ndúúcū chɛɛcu sá. 13 Ndísꞌtiī ní diíⁿ nī chi ꞌāā ntɛ́ɛ́ dichííꞌvɛ̄ Nduudu yeⁿꞌé Ndyuūs cáávā costumbre chi ngoꞌó yeⁿꞌē ꞌáámá nī taama nī. Nééné nꞌdeēe dendúꞌū diíⁿ nī tanꞌdúúcā chuū.
14 Caⁿꞌa ntúūⁿ Jesús chii yā ꞌiiⁿꞌyāⁿ taama vmnéⁿꞌēe ní caⁿꞌa yā: Cuꞌneeⁿ veeⁿ nducyaaca nī yeⁿꞌé, ní tuumicadiinuuⁿ nī. 15 Mar ꞌáámá denduꞌū chi ngeꞌe saⁿꞌā chi ꞌāā cuɛ́ɛ́ cheꞌe sa cuuví diīiⁿ chi ꞌāā ntɛ́ɛ́ dɛɛvɛ sa. Chííⁿ chi nadicádíínuuⁿ saⁿꞌa na staava yeⁿꞌē sa ní icanꞌdaā na staava yeⁿꞌē sa chííⁿ idiīíⁿ chi ꞌāā ntɛ́ɛ́ dɛɛvɛ sa. 16 Ndísꞌtiī chi vɛ́ɛ́ veéⁿ nī, ꞌcaandiveéⁿ nī.
17 Taachí Jesús sꞌneeⁿ yā ꞌiiⁿꞌyāⁿ miiⁿ ní sndaa yā vaꞌai yeⁿꞌé discípulos yeⁿꞌe yā, discípulos yeⁿꞌé yā ní itiinguuneeⁿ yā: ¿Dɛꞌɛ néⁿꞌé caaⁿꞌmaⁿ ejemplo ꞌcūū?
18 Ní caⁿꞌa Jesús chii yā discípulos: ¿ꞌÁá ꞌtiicá ntuūⁿ ndísꞌtiī nguɛ́ɛ́ ituumicadíínuuⁿ nī? ¿ꞌÁá nguɛ́ɛ́ deenu nī chi tanducuéⁿꞌē chi ngeꞌe saⁿꞌā ní cungɛ́ɛ cuaaⁿ chuvaꞌāī ní nguɛ́ɛ́ cuuví diīiⁿ chí saⁿꞌā miiⁿ ní vaati sa, 19 ti nguɛ́ɛ́ indaā na staava yeⁿꞌē sa naati na chɛɛ̄tī sa? Ní cuayiivi mííⁿ nanꞌdaā na cuerpo yeⁿꞌē sa. ꞌTíícā ní nducuéⁿꞌē chi ngéꞌé saⁿꞌā ní dɛɛvɛ. Ní nguɛ́ɛ́ diīiⁿ chi dinuuⁿndí yā. 20 Ní caⁿꞌa Jesús: Chííⁿ chí canꞌdaā na staava yeⁿꞌē sa chííⁿ chi diiiⁿ chi vɛ́ɛ́ nuuⁿndi yeⁿꞌē sa. 21 Ti chiiⁿ cuaaⁿ chɛɛ̄tī sáⁿꞌā chí neⁿꞌe caaⁿꞌmaⁿ chi yeⁿꞌē na staava yeⁿꞌē sa, icanꞌdáā yeⁿꞌē vaanicadíínūuⁿ yeⁿꞌe sa chi nguɛ́ɛ́ nꞌdaācā. Nadacadíínuuⁿ yā yeⁿꞌe chi caⁿꞌa sa ndúúcū ꞌaama nꞌdaataá o isáⁿꞌā chi nguɛ́ɛ́ yeⁿꞌe yā, ndúúcū yeⁿꞌe chi nꞌdiichí yā ꞌáámá saⁿꞌā o nꞌdaataá ní duuchinééⁿ viꞌi yā, ní ndúúcū chi ꞌcaaⁿꞌnúⁿ yā ꞌiiⁿꞌyāⁿ, 22 ndúúcū yeⁿꞌē chi ididuucú yā, ndúúcū yeⁿꞌe chi neⁿꞌe yā cosas chi vɛ́ɛ́ yeⁿꞌē taama yā, ndúúcū yeⁿꞌē dendúꞌū chi yeⁿꞌe yááⁿnꞌguiinūuⁿ, ndúúcū yeⁿꞌe chi nginncheꞌéí yā ꞌiiⁿꞌyāⁿ, ndúúcū vicios, ndúúcū nꞌdaataá chi caⁿꞌā tá ndúúcū nꞌdaataá chi duuchinee tá viꞌī, ndúúcū yeⁿꞌē sáⁿꞌā chi caⁿꞌa sa ndúúcū saⁿꞌā chi duuchinee sa viꞌī, ndúúcū yeⁿꞌē chi nꞌdiichí yā cosas chi nguɛ́ɛ́ nꞌdaācā, ndúúcū yeⁿꞌē chi caaⁿꞌmaⁿ taáⁿ yā contra yeⁿꞌe Ndyuūs, ndúúcū yeⁿꞌe chi dichꞌɛɛtɛ́ maáⁿ yā ꞌiiⁿꞌyāⁿ, ndúúcū nduudu chi nadicádíínuuⁿ yā tanꞌduucā chi loco yā. 23 Tanducuéⁿꞌē dendúꞌu ꞌcūū chi nguɛ́ɛ́ nꞌdaācā icanꞌdaā yeⁿꞌē na staava yeⁿꞌé yā. Chííⁿ chi diīiⁿ chi vɛ́ɛ́ nuuⁿndi yeⁿꞌé yā.
ꞌÁámá nꞌdaataá chi nguɛ́ɛ́ nꞌdaataá Israel tá chi iꞌteenu tá Jesús
24 Nanꞌdáā Jesús miiⁿ ní cunaⁿꞌa yā na yáⁿꞌāa Tiro ndúúcū Sidón. Ní chindáa yā na ꞌáámá vaꞌai. Ní nguɛ́ɛ́ neⁿꞌé yā chi ꞌiiⁿꞌyāⁿ sꞌeeⁿ cadíínuuⁿ yā naachi cánéé yā naati nguɛ́ɛ́ chii canúúⁿ nꞌdeꞌei yā. 25 Maaⁿnchɛɛtɛ́ tuumicadiinuuⁿ ꞌáámá nꞌdaataá chi vɛ́ɛ́ ꞌáámá nꞌdaataá ꞌlííⁿ daiya tá chi cánéé ndúúcū espíritu yeⁿꞌe yááⁿnꞌguiinūuⁿ. Nꞌdaata miiⁿ ní ndaā tá ní chiintiiꞌyā tá ná caꞌa Jesús miiⁿ. 26 Nꞌdaata mííⁿ ní nguɛ́ɛ́ yeⁿꞌē ndaata yeⁿꞌe ꞌiiⁿꞌyāⁿ Israel naati yeⁿꞌe ndaataá yeⁿꞌe ꞌiiⁿꞌyāⁿ yeⁿꞌe yáⁿꞌāa Sirofenicia. Ndaā tá ní chiica tá Jesús miiⁿ chí tunꞌdáa yā espíritu yeⁿꞌe yááⁿnꞌguiinūuⁿ yeⁿꞌē nꞌdaataá ꞌlííⁿ daiya tá. 27 Naati Jesús miiⁿ ní caⁿꞌa yā chii yā nꞌdaataá miiⁿ: Caꞌa di lugar chi cheꞌe daiyá ꞌiiⁿꞌyāⁿ Israel vmnááⁿ vmnaaⁿ ti nguɛ́ɛ́ cánéé chí divií pan yeⁿꞌe daiyá ꞌnū ní caꞌá ꞌnū chi cheꞌe ꞌyaānā.
28 Táⁿꞌā miiⁿ ní nanꞌguɛɛcútaⁿꞌā tá: ꞌTíícā, Señor, naati ꞌyaānā chi snée tī maaⁿ mesa miiⁿ ngeꞌé tī cheeyéī pan chi ngéē yeⁿꞌē daꞌcaīyāá.
29 Tuuꞌmi ní Jesús miiⁿ ní caⁿꞌa yā chii yā táⁿꞌā: Dii nꞌdaataá nꞌdaācā ngaⁿꞌa di. ꞌĀā cuuví naⁿꞌa di. Espíritu yeⁿꞌe yááⁿnꞌguiinūuⁿ ꞌāā nanꞌdáā yeⁿꞌē daiya di.
30 Taachí ndaā tá na vaacu tá, nꞌdaataá ꞌlííⁿ miiⁿ yeⁿꞌē tá canee tá na cama ní candiiti tá. Ní espíritu yeⁿꞌe yááⁿnꞌguiinūuⁿ ní ꞌāā nanꞌdáā yeⁿꞌē nꞌdaata ꞌlííⁿ miiⁿ.
Jesús diíⁿ yā chi nduūvā yeⁿꞌe ꞌáámá sáⁿꞌā chi nguɛ́ɛ́ ngaⁿꞌa sa ndíí nguɛ́ɛ́ ndúú nꞌgiindiveeⁿ rá sá
31 Jesús nanꞌdaa ntuuⁿ yā yeⁿꞌe yáⁿꞌāa Tiro ndúúcū yáⁿꞌāa Sidón ndúúcū na yáāⁿ sꞌeeⁿ yeⁿꞌe yáⁿꞌāa Decápolis. Ní ndaa yā na yáⁿꞌāa chi ꞌdíítūu nuūⁿnīⁿꞌyáⁿꞌā Galilea. 32 Miiⁿ ní ndaā ꞌiiⁿꞌyāⁿ ndúúcū ꞌáámá saⁿꞌā chi chɛɛtúū chi nguɛ́ɛ́ ngii ngaⁿꞌā sa nꞌdáacā. Ní chiicá sá Jesús chi cunꞌduú yā taꞌa yā vmnaaⁿ yeⁿꞌē sa. 33 Jesús candɛ́ɛ yā saⁿꞌā miiⁿ ꞌáámá lado naachi ꞌāā ntɛ́ɛ́ snée ꞌiiⁿꞌyāⁿ ní tingúúⁿ ndutáꞌa yā na veeⁿ sá ní chiīdaiⁿ yā ní sꞌneeⁿ ndutaꞌá yā na chꞌiiya sa. 34 Ní chꞌíínu yā nanguuvi, ní nndaa niiⁿnúⁿ yā ní caⁿꞌa yā: Efata, chi neⁿꞌe caaⁿꞌmaⁿ na nduudu yeⁿꞌé, nꞌguaaⁿ di.
35 Ndúúcū chuū ní nꞌguaaⁿ veeⁿ sá ndúúcū chꞌiiya sa ní nduūvā yeⁿꞌē sa. Ní ꞌāā chí caⁿꞌa nꞌdáacā sā. 36 Jesús ní caⁿꞌa yā chii yā ꞌiiⁿꞌyāⁿ sꞌeeⁿ chi nguɛ́ɛ́ cuuvi yā mar ꞌáámá ꞌiiⁿꞌyāⁿ. ꞌÁárá chi neené caꞌa cuidado yā ꞌiiⁿꞌyāⁿ sꞌeeⁿ chi nguɛ́ɛ́ cuuvi yā ꞌiiⁿꞌyāⁿ, ꞌiiⁿꞌyāⁿ sꞌeeⁿ ní caⁿꞌa yā chii yā nꞌdeee nꞌdáí ꞌiiⁿꞌyāⁿ. 37 Ní ꞌiiⁿꞌyāⁿ sꞌeeⁿ ní neene cheⁿꞌe yiinú yā, ní caⁿꞌa yā: ꞌIiⁿꞌyāⁿ miiⁿ ní tanducuéⁿꞌē idinꞌdaacá yā, ndíí ꞌiiⁿꞌyāⁿ chi chɛɛtúū ní idiíⁿ yā chí nꞌgiindiveéⁿ yā. Ní ꞌiiⁿꞌyāⁿ chi nguɛ́ɛ́ ngaⁿꞌá yā ní diíⁿ yā chí ngíí ngaⁿꞌa yā.