3 Jesús nanꞌguɛɛcútaⁿꞌa yā ní caⁿꞌa yā chiī yā ꞌiiⁿꞌyāⁿ sꞌeeⁿ: ¿Dɛꞌɛ̄ cúúví chí ndísꞌtiī ní nguɛ́ɛ́ diíⁿ nī tanꞌdúúcā chi ngaⁿꞌa ley yeⁿꞌé Ndyuūs ní diíⁿ nī tanꞌdúúcā costumbre yeⁿꞌē ꞌiiⁿꞌyāⁿ ndiicúū? 4 Ti Ndyuūs ní caꞌá yā ley yeⁿꞌe yā ní caⁿꞌa yā: Diíⁿ nī honrar chiidá nī ndúúcū chɛɛcú nī. ꞌIiⁿꞌyāⁿ chi nguɛ́ɛ́ nꞌdáacā ngaⁿꞌa yā yeⁿꞌe chiidá yā o yeⁿꞌē chɛɛcú yā ní ꞌcuūvi yā. 5 Naati ndisꞌtiī ní ngaⁿꞌa nī chi ꞌāā duꞌú nūuⁿ ꞌiiⁿꞌyāⁿ chí caaⁿꞌmáⁿ yā cuuvi yā chiidá yā ndúúcū chɛɛcú yā ꞌtíícā: Nducuéⁿꞌē chi teé nꞌdiī maaⁿ ní caꞌá lado yeⁿꞌé Ndyuūs caava ofrenda yeⁿꞌe yā. 6 ꞌIiⁿꞌyāⁿ ꞌāā ntɛ́ɛ́ idiíⁿ yā chi neⁿꞌé yā chiida yā ndúúcū chɛɛcú yā. ꞌTíícā caavā costumbre yeⁿꞌé nī diíⁿ nī chi ꞌāā ntɛ́ɛ́ idichííꞌvɛ̄ ley yeⁿꞌé Ndyuūs yeⁿꞌe yú. 7 Ndísꞌtiī ꞌuūvī naaⁿ ꞌuuvi cheendí nī. Nꞌdaācā caⁿꞌa profeta Isaías miiⁿ yeⁿꞌé nī taachi caⁿꞌa sa ndíí vmnaaⁿ ní canéé nguūⁿ na libro yeⁿꞌe Ndyuūs ꞌtííca:

10 Jesús nꞌgai yā nꞌdeee nꞌdáí ꞌiiⁿꞌyāⁿ chí ndaa yā nanáaⁿ yā. Ní caⁿꞌa yā chii yā ꞌiiⁿꞌyāⁿ sꞌeeⁿ: ꞌCaandivéeⁿ nī ní tuumicadíínuuⁿ nī. 11 Nguɛ́ɛ́ tanducuéⁿꞌē chi ngeꞌe saⁿꞌā chi ndaā cheendi saⁿꞌā idivaatí saⁿꞌā naati nduudu chí icanꞌdaā cheendi saⁿꞌā, chííⁿ chí diiⁿ chí vɛ́ɛ́ nuūⁿndī yeⁿꞌē saⁿꞌā.

12 Tuuꞌmi ní discípulos yeⁿꞌe Jesús ndaá yā nanáaⁿ yā ní caⁿꞌa yā chii yā Jesús miiⁿ: ¿ꞌÁá nguɛ́ɛ́ déénu nī chí ꞌiiⁿꞌyāⁿ fariseos taachí chꞌiindiveéⁿ yā nduudú ꞌcūū nduuvi taáⁿ yā?

13 Naatí Jesús miiⁿ nanꞌguɛɛcútaⁿꞌa yā ní caⁿꞌa yā: Taanduvɛ́ɛ́ yaāta chi nguɛ́ɛ́ chiīchi Chiidá chi canéé yā na vaꞌai chɛɛti nguuvi canee chí tiīcūu ndii dííꞌyú. 14 ꞌĀā sꞌnééⁿ rá ꞌiiⁿꞌyāⁿ sꞌeeⁿ chi tanꞌdúúcā ꞌiiⁿꞌyāⁿ chi ngueenááⁿ chi candɛ́ɛ yā táámá ꞌiiⁿꞌyāⁿ chi ngueenááⁿ ndúúcu yā. Nduuti chi ꞌáámá ꞌiiⁿꞌyāⁿ chi ngueenááⁿ candɛ́ɛ yā táámá ꞌiiⁿꞌyāⁿ chi ngueenááⁿ ndúúcu yā, nduu ꞌuuví yā cungéē nuúⁿ yā na yiivi yáⁿꞌāⁿ.

15 Tuuꞌmi ní Pedro miiⁿ ní nanꞌguɛɛcútaⁿꞌa sa ní caⁿꞌa sa chii sa Jesús miiⁿ: Cúúví nī núsꞌuu dɛꞌɛ néⁿꞌé caāⁿꞌmāⁿ ejemplo ꞌcūū.

16 Jesús caⁿꞌa yā: ¿ꞌÁá ꞌtiicá ntúūⁿ nguɛ́ɛ́ ituumicadíínuuⁿ nī? 17 ¿ꞌÁá nguɛ́ɛ́ ituumicadíínuuⁿ nī chi tanducuéⁿꞌē chí indaā cheendi saⁿꞌā ngeⁿꞌe chɛɛ̄tī sa ní cungéē cuaaⁿ chuvaꞌāī? 18 Naati nduudu chi ícanꞌdaa cheendi sa chí níngiica na staava yeⁿꞌē sa, chuū idiīiⁿ chi vɛ́ɛ́ núúⁿndí yeⁿꞌē sáⁿꞌā. 19 Caati yeⁿꞌe na staava yeⁿꞌe ꞌiiⁿꞌyāⁿ ngiicá dendúꞌū chi nguɛ́ɛ́ nꞌdáacā chi inadicádíínuuⁿ yā. Chuū ní inadicádiinúúⁿ yā yeⁿꞌē chi ꞌcaāⁿꞌnuⁿ yā ꞌiiⁿꞌyāⁿ, ndúúcū yeⁿꞌē chi caⁿꞌá yā ndúúcū isaⁿꞌā o nꞌdaataá chi nguɛ́ɛ́ yeⁿꞌe yā, ndúúcū chi nꞌdiichí yā ꞌaama saⁿꞌā o nꞌdaataá chi duuchí viꞌī, ndúúcū yeⁿꞌē chi ididuucú yā, ndúúcū yeⁿꞌē chi testigo yā ní caaⁿꞌmáⁿ yā nduudu yaadi, ndúúcū yeⁿꞌē chi caaⁿꞌmaⁿ taáⁿ yā contra yeⁿꞌe Ndyuūs. 20 Dendúꞌu ꞌcūū chi ídiīiⁿ chi vɛ́ɛ́ nuuⁿndi yeⁿꞌē sa naati chi cheꞌe sa taachi nguɛ́ɛ́ naaⁿnú sa taꞌa sa, chiiⁿ ní nguɛ́ɛ́ idinuuⁿndi sa.

21 Jesús chiicá yā yeⁿꞌē yáāⁿ miiⁿ ní cueⁿꞌe yā na yáⁿꞌāa yeⁿꞌe Tiro ndúúcū Sidón. 22 Cuinꞌdííchí nī. ꞌÁámá nꞌdáátāa yeⁿꞌe yáⁿꞌāa Canaán chí canꞌdaā tá yeⁿꞌe yáāⁿ vaacu tá. Nꞌgaī yiicu tá ní ngaⁿꞌa tá ngii tá Jesús miiⁿ: Nꞌdií Señor chi Daiya David, nnéé yaꞌai ꞌiinu nī ꞌúú. ꞌÁámá espíritu yeⁿꞌe yááⁿnꞌguiinūuⁿ idindúꞌū taaví táⁿꞌā daīyá.

23 Jesús nguɛ́ɛ́ nanꞌguɛɛcútaⁿꞌa yā yeⁿꞌē tá. Tuuꞌmi ní discípulos yeⁿꞌē Jesús miiⁿ ndaá yā nanáaⁿ yā ní diꞌcuíítu yā Jesús ní caⁿꞌa yā chii yā ꞌiiⁿꞌyāⁿ: Nꞌdiī Jesús, diíⁿ nī despedir yeⁿꞌē ta ti táⁿꞌa ꞌcūū ní nꞌgaī tá cūchiitá cuaaⁿ daami yú.

24 Jesús nanꞌguɛɛcútaⁿꞌa yā ní caⁿꞌa yā: Dendyuūs dichoꞌó yā ꞌúú cucáávā ꞌiiⁿꞌyāⁿ yeⁿꞌe Israel chi tanꞌdúúcā ꞌiiti cuūchī chí nindáí, ꞌtiicá yā.

25 Tuuꞌmi ní taⁿꞌā miiⁿ ndaā ta nanááⁿ Jesús ní chiintiīꞌya tá ní caⁿꞌa tá chii tá ꞌiiⁿꞌyāⁿ: Nꞌdií Señor, cunneé nī ꞌúú.

26 Jesús miiⁿ ní nanꞌguɛɛcútaⁿꞌá yā yeⁿꞌē tá ní caⁿꞌa yā chii yā táⁿꞌā: Nguɛ́ɛ́ nꞌdaācā chí divií pan yeⁿꞌē daiyá ꞌnū ní caꞌá chi cheꞌe ꞌyaānā.

27 Táⁿꞌā miiⁿ ní caⁿꞌā ta: ꞌTíícā Señor, naati ꞌyáanā miiⁿ ngéꞌe tī yeⁿꞌē cheeyéē chi ngéē yeⁿꞌē na mesa yeⁿꞌē ꞌiiví tī.

28 Tuuꞌmi ní Jesús miiⁿ nanꞌguɛɛcútaⁿꞌa yā ní caⁿꞌa yā chii yā táⁿꞌā: Dií nꞌdaataá, dɛ́ꞌɛ chúúcā chꞌɛɛtɛ vaadī iꞌtéénú yeⁿꞌē di. Cuuví ndúúcu di tanꞌdúúcā chi neⁿꞌē di. Daiya tá miiⁿ ní hora mííⁿ nūuⁿ nduuva yeⁿꞌē ta.

29 Jesús chiicá yā yeⁿꞌē yáⁿꞌāa miiⁿ ní ndaá yā ꞌdiituú nuūⁿnīⁿꞌyáⁿꞌā Galilea. Cuayiivi ní cuchɛ́ɛ yā ná yiīcū miiⁿ ní chꞌiīndi yā. 30 Nééné ꞌyaaⁿ ꞌiiⁿꞌyāⁿ ndaā niiⁿnuúⁿ yā nanááⁿ Jesús miiⁿ ní ndɛ́ɛ yā ꞌiiⁿꞌyāⁿ chi ngaā yóꞌōo, ndúúcū ꞌiiⁿꞌyāⁿ chi ngueenááⁿ, ndúúcū ꞌiiⁿꞌyāⁿ ꞌdíiꞌmī, ndúúcū ꞌiiⁿꞌyāⁿ chi lóꞌō taꞌá yā o caꞌa yā, ndúúcū ꞌyaaⁿ nꞌdáí ꞌiiⁿꞌyāⁿ chi vɛ́ɛ́ cá tanáⁿꞌā caꞌai chi ndíi yā. Ní sꞌneeⁿ yā ꞌiiⁿꞌyāⁿ sꞌeeⁿ nanááⁿ Jesús miiⁿ. Ní Jesús diíⁿ yā chi nduūvā yeⁿꞌe ꞌiiⁿꞌyāⁿ sꞌeeⁿ. 31 Nducyáácá ꞌiiⁿꞌyāⁿ cheⁿꞌe yiinú yā taachí nꞌdiichi yā chí ꞌiiⁿꞌyāⁿ ꞌdíiꞌmī ní ngíí ngaⁿꞌa, ní ꞌiiⁿꞌyāⁿ chi lóꞌō taꞌá yā o caꞌa yā nduuva yeⁿꞌe yā, ní ꞌiiⁿꞌyāⁿ chi nguɛ́ɛ́ ngii ngiicá, ngiica yā; ní ꞌiiⁿꞌyāⁿ ngueenááⁿ, inaaⁿ yā; ní tucáꞌa yā caⁿꞌa yā: Dɛꞌɛ̄ chúúca chꞌɛɛtɛ Ndyuūs yeⁿꞌe ꞌiiⁿꞌyāⁿ Israel.

32 Jesús ꞌcaí yā discípulos yeⁿꞌé yā ní caⁿꞌa yā chii yā discípulos: Yaꞌáí cáávā ꞌiiⁿꞌyāⁿ sꞌtíī ti ꞌāā ꞌiīnū nguuvī snée yā nduucú ní ꞌmuuⁿ ní nguɛ́ɛ́ dɛꞌɛ̄ vɛɛ chi cheꞌe yā. Nguɛ́ɛ́ neⁿꞌé nadichoꞌó ꞌiiⁿꞌyāⁿ chi nguɛ́ɛ́ cheꞌe yā. ꞌÁátiī cuuví cúúnu yā cuaaⁿ cyúúní chi náⁿꞌa yā.

33 Tuuꞌmi ní discípulos yeⁿꞌe yā caⁿꞌa yā chīi yā Jesús: ¿Tií cáⁿꞌa ꞌnū nguaí ꞌnū pan chi nꞌdeee nꞌdáí chi chéꞌé nducyaaca ꞌiisꞌtíī na lugar ꞌcūū naachi nguɛɛ chꞌɛɛtinéé ꞌiiⁿꞌyāⁿ?

34 Jesús caⁿꞌa yā chii yā discípulos: ¿ꞌÁá ꞌyaaⁿ ca pan yeⁿꞌé nī vɛɛ? Discípulos caⁿꞌa yā: Ndɛɛ̄chɛ̄ panes ndúúcū nꞌduuvi ꞌyaācā nꞌgaiyáā vɛɛ.

35 Jesús caꞌa yā orden ꞌiiⁿꞌyāⁿ sꞌeeⁿ chí ꞌcuɛɛtɛ́ yā na yáⁿꞌāa miiⁿ. 36 Tuuꞌmi ní Jesús staꞌá yā nduꞌū ndɛɛ̄chɛ̄ panes miiⁿ ndúúcū ꞌyaācā miiⁿ. Ní caꞌa yā gracias Ndyuūs cáávā panes miiⁿ. Ní nꞌdee yā panes miiⁿ ní caꞌa yā discípulos yeⁿꞌe yā. Ní discípulos ní caꞌa yā ꞌiiⁿꞌyāⁿ chi snéé miiⁿ. 37 Nducyááca yā cheꞌe yā ní chiitu ꞌiiⁿꞌyāⁿ. Discípulos ní nānꞌguaáⁿ yā chí nángaāva ní chiitu tá ndɛɛ̄chɛ̄ ꞌcuɛ́ɛ́tɛ̄ɛ. 38 ꞌIiⁿꞌyāⁿ chí cheꞌe yā miiⁿ ní taanduu cuūuⁿ mil ngii sáⁿꞌā. Nguɛ́ɛ́ diduuchɛ yā nꞌdaataá ndíí nguɛ́ɛ́ ndúú daꞌcaīyāa. 39 Tuuꞌmi ní Jesús yaaꞌví yā ꞌiiⁿꞌyāⁿ sꞌeeⁿ chi cunaⁿꞌá yā. Ní Jesús ndaá yā na barco miiⁿ ní cueⁿꞌe yā na yáⁿꞌāa yeⁿꞌe Magdala.