Dsa₂ i₂jme₂tag₅ jág₁ a₂tsá₃ tí₅
2
Le₂në₅ bá₄ ca₂rë₃chán₃ dsa₂ i₂juɨ₁gan₂ ján₃ i₂ca₂ꞌë́₂ jág₁ a₂tsá₃ tí₅ jɨn₄ dsa₂ juɨg₂ quián₅ Diú₄ ma₂lɨ́gꞌ₂, le₂në₅ bá₄ qui₃ꞌuɨ́n₃ jë₄ quiánꞌ₂ ꞌniaꞌ₂ rë₂në́₃ të₅ i₂qui₂jme₃gau₅. Dsa₂ le₂ꞌéi₂, ꞌa₂ conꞌ₂ tsá₃ jme₁li₅₄ meiꞌ₂ jme₃tag₂₃ juáꞌ₅ a₂tsá₃ tí₅ a₂jiog₅ juɨ₅ ja₁dsɨ₃ꞌén₂ dsa₂. Jmo₃ ca₂liaꞌ₂ tsá₃ ma₃le₃jiꞌ₅₄ ꞌéiꞌ₃ quióꞌ₅ Te₁guiꞌ₅₄ i₂ca₂láu₂. La₁ tsá₃ uë́₂ le₃léi₄ dsɨ₃ꞌéin₂ bá₄ guioin₅₄.
2 Juɨn₅ lɨn₃ dsa₂ i₂ꞌen₃ juɨ₅ ja₁tión₂ dsa₂ ꞌéi₂, jmo₅-dsáu₅ liaꞌ₂ lë́₂ dsɨ́₅, jaun₂ ꞌéi₂ bá₄ ꞌuɨn₄ në́₃ a₂qui₃táun₂ dsa₂ ꞌlɨgꞌ₅₄ juɨ₅ tí₅.
3 Ne₄ ia₁ a₂tsá₃ o₁jau₅₄ líꞌ₂ cu₄, qui₂jme₃tag₂₃ jág₁ a₂qui₂ma₂ꞌnáuꞌ₃ dsɨ́₅ guioin₅₄, a₂conꞌ₂ jŋiaꞌ₅₄ lë₁ꞌnio₃ líꞌ₂ quiánꞌ₂ ꞌniaꞌ₂. La₁ ma₂i₁jáun₃ bá₄ ma₂lë́₅ co₂jŋia₅₄ jág₁ a₂ma₂tioinꞌ₅₄ ꞌéiꞌ₃ a₂dsi₁qui₅ ŋiꞌ₅₄ ta₁ ja₁dsɨ₃ꞌéin₂; tion₅₄ bá₄ dsɨ₃ꞌéin₂.
4 Chi₂juaꞌ₂ le₂në₅ tsá₃ ca₂ꞌén₂ Diú₄ dsáu₁ ángeles i₂ca₂sénꞌ₂ dso₄ ma₂lɨ́gꞌ₂, i₃gainꞌ₅₄ bá₄ guio₃-juɨ́g₃ i₃léin₂ le₁ꞌŋeiꞌ₅₄ jë₄ qui₁néꞌ₃, ja₁jaun₂ tioinꞌ₅₄ lë́₅ co₂jŋia₅₄ jmɨg₄ i₁të₃dsɨ₅₄ ꞌéiꞌ₃ quióꞌ₅;
5 ján₃ bá₄ le₂në₅ chi₂juaꞌ₂ tsá₃ ca₂ꞌén₂ Diú₄ dsáu₁ dsa₂ i₂jme₁chan₂ mɨ₂güɨ́g₃ guiꞌ₅₄ ma₂lɨ́gꞌ₂, tion₅₄ bá₄ ca₂jme₃cainꞌ₂ jmɨg₂ ca₂ꞌéin₂ ca₂le₃jɨ́n₃ dsa₂ i₂tsá₃ Diú₄ cuɨn₅, jŋiaꞌ₅₄ liaꞌ₂ Noé bá₄ i₂ca₂lióin₂ i₂jme₁ꞌë́₂ jág₁ a₂ꞌë₂₃ caun₂ juɨ₅ co₂dsau₅, quianꞌ₅₄ guë́₄ guion₃ dsa₂;
6 chi₂juaꞌ₂ le₂jaun₂ bá₄ ján₃, ca₂ꞌén₂ Diú₄ le₃tɨn₃ juɨg₂ Sodoma quianꞌ₅₄ Gomorra*, ca₂dsɨ́ꞌ₂ ca₂liaꞌ₂ ca₂lë₃ jua₂ li₁, jaun₂ le₂në₅ jángꞌ₅ caun₂ jág₁ dsau₅ co₂ꞌnióꞌ₄ a₂rë₂ꞌë́₂ jág₁ ja₁con₂ dsa₂ i₂tsá₃ Diú₄ cuɨn₅ i₂qui₂le₃chan₂ cang₂;
7 chi₂juaꞌ₂ le₂në₅ ca₂lióin₂ bá₄ jan₂ Lot, i₂jme₁lɨ́n₄ guë́₄ dsa₂ dsen₃ jme₁chain₂ quian₅ o₂i₁ dsɨ₅ ia₁ jme₁të₅ ne₅₄ ꞌa₂ liaꞌ₂ lë́₅ juɨ₅ le₁quian₅ dsa₂ ꞌlɨnꞌ₅₄ jmɨg₄ jaun₂,
8 (jaun₂ jme₁taꞌ₂ quɨꞌ₂ dsɨ́₅ bá₄ dsa₂ dsen₃ ꞌéi₂, ia₁ ca₂le₃jë́₃ jmɨg₄ bá₄ jme₁të₅ ne₅₄, jme₁nag₂₃ në́₃ ca₂le₃jë́₃ ne₅₄ cosa ꞌlɨgꞌ₅₄ a₂jme₁jmo₅-dsáu₅ dsa₂ juɨg₂ ja₁jme₁guá₄);
9 chi₂juaꞌ₂ le₂në₅, jaun₂ ŋi₅ bá₄ Te₁guiꞌ₅₄ ꞌa₂ liaꞌ₂ lióin₃ dsa₂ dsen₃ ne₄ ꞌe₂ táu₂ dsɨ₂ŋɨ́i₂, tonꞌ₂ ŋi₅ ꞌa₂ liaꞌ₂ toinꞌ₂ dsa₂ ꞌlɨnꞌ₅₄ lë́₅ ꞌí₁ ca₂liaꞌ₂ ca₂të₂ jmɨg₄ i₁gue₃ uɨg₅ i₁të₃dsɨ₅₄ ꞌéiꞌ₃ quióꞌ₅.
10 A₂në₅ në́₃, lë́₅ caun₂ jág₁ tí₅ dsónꞌ₂ a₂jángꞌ₅ jág₁ dsau₅ ja₁con₂ juɨ₁liaꞌ₂ dsa₂ i₂i₂nio₄ jme₂ti₃ a₂ꞌlɨgꞌ₅₄ a₂mɨ₅ nɨ₁ŋɨ₁₂, co₂ꞌnióꞌ₄ quióꞌ₅ dsa₂ i₂tsá₃ jiꞌ₅₄ ꞌéiꞌ₃. I₂nioi₅₄ ꞌŋio₅ lɨn₃ táinꞌ₅, ꞌnio₃ juaꞌ₅₄ ꞌéiꞌ₃ quióꞌ₅ ꞌéi₂ bá₄ lé₂, tonꞌ₂ ꞌŋio₅ lɨn₃ tiá₂ dsɨ́₅ ꞌe₂ caun₂ a₂ꞌnio₃ jmo₃; tsá₃ góꞌ₅ táun₂ ꞌlɨgꞌ₅₄ ꞌɨin₂₃ juɨ₁liaꞌ₂ i₂jlánꞌ₁ chan₂ quián₅ Diú₄,
11 juɨ₁la₂ ángeles i₂ꞌio₅ guë́₄ bí₂, i₂ꞌuanꞌ₂ guë́₄, tsá₃ le₂jaun₂ tiá₂ dsɨ́₅ juaꞌ₅₄ ꞌag₃ ꞌlɨgꞌ₅₄, a₂ꞌnɨi₃ dsa₂ ꞌéi₂ ne₄ Te₁guiꞌ₅₄.
12 La₁ dsa₂ ꞌéi₂, lɨ́in₅ juɨ₁liaꞌ₂ lɨ́n₅ jáꞌ₂ náu₂ i₂tsá₃ ꞌen₅₄ dsɨ́₅, chain₂ tsá₃ ꞌe₂ ŋɨ́ꞌ₂ dsɨ́₅ ꞌe₂ jmo₅-dsáu₅, rë₂chain₂ a₂jŋiaꞌ₅₄ conꞌ₂ tsáunꞌ₂ dsa₂ jme₃dsiog₂₃. Të₃jŋiá₅ bá₄ ma₂ꞌë₂₃ ꞌlɨgꞌ₅₄ ꞌe₂ a₂tsá₃ ma₂ŋɨ́iꞌ₂. La₁ le₂jaun₂ bá₄ dsiáin₃ ján₃ juɨ₁liaꞌ₂ dsan₂ jáꞌ₂ náu₂.
13 Le₃chain₂ ŋág₃ uɨg₅ co₂ꞌnióꞌ₄ ꞌliainꞌ₅₄ juɨ₁liaꞌ₂ qui₂ma₂jmáiꞌ₂ i₂siánꞌ₂. Jmo₂₃ dsɨ́₅ ꞌŋio₅ lɨn₃ dse₃ chain₂ lɨ́in₂ ia₁ cuë́ꞌ₅ o₂ꞌŋió₃ o₂jŋia₃ dsɨ₅ o₁jŋiaꞌ₅₄ a₂jmɨ₂. Lɨ́n₅ dsa₂ ꞌéi₂ co₂ꞌnióꞌ₄ caun₂ ꞌméꞌ₅ ꞌlɨgꞌ₅₄ a₂rë₂ꞌióg₄ a₂quian₅ o₂guíꞌ₃ jë₄ quiánꞌ₂ ꞌniaꞌ₂, ꞌŋio₅ të₅ dsɨ́₅ cuë́ꞌ₅ o₂ꞌŋió₃ dsɨ₅ a₂jme₂gau₂₃ tóinꞌ₅ jmo₂₃ jmɨg₄ jɨnꞌ₄ ꞌniaꞌ₂.
14 Co₂tan₅₄ liaꞌ₂ ma₂dsɨ₂jiog₅ dsɨ́₅ ꞌlɨgꞌ₅₄ bá₄ jë₁ma₂ca₂jɨ́in₂ jan₂ dsa₂ mɨ́₂, tsá₃ magꞌ₂ dsɨ́₅ juaꞌ₅₄ a₂tsá₃ ꞌno₂₃ dso₄; ꞌŋio₅ lɨn₃ ꞌio₂₃ mai₅₄ ŋi₅ ꞌa₂ liaꞌ₂ jme₃gain₂₃ dsɨ́₅ juɨ₁liaꞌ₂ dsa₂ ꞌuan₅₄ i₂tsá₃ tiá₂ tión₂; ꞌŋio₅ lɨn₃ tɨin₂ ŋi₅ táng₃ ꞌa₂ liaꞌ₂ jme₃ꞌŋióiꞌ₃ ꞌe₂ caun₂ ꞌnio₃ jme₃ꞌŋióiꞌ₃; ia₁ lɨ́in₅ jaun₅ i₂ma₂tionꞌ₅₄ juɨ₅ dsɨ₃ꞌén₂.
15 Ma₂qui₂ma₂tí₄ juɨ₅ co₂dsau₅, tonꞌ₂ ma₂i₂cóinꞌ₅, ma₂qui₂le₁quian₅ juɨ₅ quióꞌ₅ Balaꞌama ja₁ŋiꞌ₅₄ Beor, i₂ꞌéi₂ jme₁ꞌnio₃ líꞌ₂ cu₄ quianꞌ₅₄ caun₂ a₂ꞌlɨgꞌ₅₄ a₂jme₁jmo₃.
16 Jan₂ dsɨ₂búꞌ₄ i₂tsá₃ lé₂ dsia₃ jág₁ bá₄ ca₂jí₂ quióꞌ₅ ꞌuɨg₅₄ dsáu₁, ia₁ jáꞌ₂ ꞌéi₂ ca₂ꞌŋiai₂ jág₁ liaꞌ₂ lë́₅ jag₄ dsa₂ mɨ₂güɨ́g₃. Ca₂jné₃ juɨ₅ co₄ quióꞌ₅ dsa₂ i₂ꞌë́₂ jág₁ quián₅ Diú₄ ꞌéi₂.
17 Dsa₂ ꞌéi₂ lɨ́in₅ juɨ₁liaꞌ₂ lë́₅ caun₂ o₄tu₁ jmɨg₂ a₂tsá₃ ꞌe₂ jmɨg₂ cha₂; o₃ le₃juaꞌ₅₄ lɨ́in₅ juɨ₁liaꞌ₂ lë́₅ ti₁jnei₅ a₂lë₁qui₂ŋag₅ tiá₂ quianꞌ₅₄ dsí₂. Ma₂tioinꞌ₅₄ juɨ₅ a₂dsi₁lein₅ jë₄ qui₁néꞌ₃ ꞌŋio₅ lɨn₃, ja₁ma₂lë́₅ co₂jŋia₅₄ quióꞌ₅.b
18 Ia₁ qui₂ꞌuë́ꞌ₅ mɨ₂ꞌo₅₄ jág₁ táꞌ₅ a₂tsá₃ ta₁ tí₄, qui₂cáin₂ dsa₂ a₂jmo₃ dsó₃ a₂jme₃ti₃ a₂ꞌɨ́n₅ dsɨ́₅ nɨ₁ŋɨ₁₂; qui₂jme₂gain₂₃ dsa₂ i₂lag₃ ma₂lión₂ o₄gú₃ dsa₂ i₂le₁quian₅ juɨ₅ a₂ma₂i₂cóinꞌ₅.
19 Qui₂cuë₂₃ jág₁ a₂juáꞌ₂ a₂lió₂, la₁ guioin₅₄ guëꞌ₂ në́₃ i₂nioi₅₄ le₁ꞌŋeiꞌ₅₄ juɨ₅ ja₁dsɨ₃ꞌéin₂. Ia₁ le₂jaun₂ dsónꞌ₂ lë́₅ bá₄, lé₂ le₃juaꞌ₅₄ chi₁ꞌŋeꞌ₅₄ dsa₂ ne₄ juɨ₁ꞌe₂ caun₂ juɨ₅ ꞌlɨgꞌ₅₄ a₂quian₅, ia₁ dso₄ jaun₂ ca₂lë₃ juɨg₅₄ bá₄ dsa₂. Ia₁ a₂jaun₂ jiog₅ jmo₅ ꞌéiꞌ₃ ja₁coin₂.
20 La₁ juɨ₁liaꞌ₂ dsa₂ i₂ma₂ca₂rë₃cuɨn₅ Te₁guiꞌ₅₄ Jesucristo i₂lɨ́n₅ i₂ma₂ca₂lió₂ quióꞌ₅ ne₄ juɨ₅ lë₁ꞌiog₅ a₂le₁quian₅ dsa₂ mɨ₂güɨ́g₃, la₁ në₁juaꞌ₂ siáꞌ₂ ca₂dsi₃lein₅ ca₂guioinꞌ₂ táng₃ quianꞌ₅₄ a₂ꞌlɨgꞌ₅₄, o₃ në₁juaꞌ₂ ca₂jme₃gón₃ táng₃ a₂ꞌlɨgꞌ₅₄ jaun₂ të₂dsɨ́₅, dsi₁lein₅ tsón₂ guë́₄ le₃ꞌlɨinꞌ₅₄ conꞌ₂ guë́₄ le₂jŋiá₅.c
21 Juɨ₁liaꞌ₂ dsa₂ le₂ꞌéi₂, ja₂lɨn₃ guë́₄ dse₃ juaꞌ₅₄ co₂ŋeiꞌ₅₄ bá₄ tsá₃ ca₂rë₃cuɨ́ꞌ₅ juɨ₅ co₂dsau₅, liaꞌ₂ conꞌ₂ guë́₄ a₂ma₂ca₂rë₃ŋi₅, në₁juaꞌ₂ cang₂ jaun₂ ca₂tí₂ bá₄ táng₃ ꞌéiꞌ₃ jŋió₅ a₂jme₁ma₂ŋɨi₂.d
22 La₁ ja₁jaun₂ rë₃ti₃ quianꞌ₅₄ dsa₂ le₂ꞌéi₂ juɨ₁liaꞌ₂ lë́₅ caun₂ jag₄ dsa₂ jme₁juáꞌ₂: “Guë́ꞌ₅ táng₃ dsɨ₂jɨꞌ₅₄ te₁ŋi₅₄ quióꞌ₅”,e conꞌ₂ siáꞌ₂ táng₃: “Juɨ₁liaꞌ₂ i₂ŋí₅ i₂liaꞌ₂ ma₂në₂sei₃ dsa₂, dsó₅ qui₂ba₂lɨ́inꞌ₂ táng₃ jë₄ ti₁jéin₃.”