Jmɨg₄ i₁jŋióꞌ₂ Te₁guiꞌ₅₄
3
ꞌNiaꞌ₂ rɨnꞌ₅₄ jniog₄ i₂ꞌnióg₃, jë₁ca₂të́₂ tɨn₃ si₂ bá₄ la₂ tsɨ́ng₂ neꞌ₅₄ ꞌniaꞌ₂. Jë₁le₃tɨn₃ si₂ në₅ ma₂ca₂jme₁jnio₂ jniá₂ neꞌ₅₄, ma₂ca₂jmo₃ dsá₂ ꞌauꞌ₂ a₂dsɨ₃jiog₅ ꞌauꞌ₂ jmáꞌ₃ liaꞌ₂ a₂le₁jë́₃.
2 Juɨ₁dsiogꞌ₂ ꞌauꞌ₂ ꞌniaꞌ₂ ca₂le₃jë́₃ jág₁ a₂qui₂ca₂juáꞌ₂ dsa₂ jŋió₅ i₂jme₁ꞌë́₂ jág₁ quián₅ Diú₄ ma₂lɨ́gꞌ₂ quianꞌ₅₄ guë́₄ ꞌéiꞌ₃ a₂ca₂quiog₂ Te₁guiꞌ₅₄ i₂ma₂lió₂ jniog₄, a₂ma₂ca₂ŋag₅ ja₁conꞌ₂ ꞌniaꞌ₂ të₂le₃ quianꞌ₅₄ dsa₂ i₂chen₄ quiáin₅.
3 Jë₁le₂ꞌuɨg₅₄ jmo₄ ꞌniaꞌ₂ dsá₂ ꞌauꞌ₂ a₂juáꞌ₅ jniá₂ la₂. Jmɨg₄ jë₁ca₂tóꞌ₂ të₁ja₃lén₂ dsa₂ i₂caun₂ lë₁qui₃táun₂ ꞌlɨgꞌ₅₄, le₃chain₂ jmáꞌ₃ liaꞌ₂ jŋiaꞌ₅₄ conꞌ₂ lë́₂ ꞌɨ́n₅ dsɨ́₅ guioin₅₄.
4 Dsa₂ ꞌéi₂ ŋag₃, juáꞌ₂: “¿ꞌE₂ ca₂lë₃ quianꞌ₅₄ jág₁ a₂ron₅, a₂juáꞌ₂ ꞌniaꞌ₂ a₂guanꞌ₂ táng₃ Cristo? Ia₁ ca₂le₃ ca₂dsan₃ dsa₂ canꞌ₅₄ quián₂ jniog₄, juaꞌ₂ liaꞌ₂ ma₂lë́₅ jaun₂ bá₄ mɨ₂güɨ́g₃ liaꞌ₂ conꞌ₂ lë́₅ jme₁ca₂nio₃ le₂ꞌuɨg₅₄.”
5 La₁ a₂ta₁ dsɨ́₅ bá₄ dsa₂ ꞌéi₂ tsá₃ ꞌnio₃ le₃ŋɨ́iꞌ₂, a₂ca₂lë₃ të₂le₃ quianꞌ₅₄ jág₁ quióꞌ₅ Diú₄ dsɨ₄ gueiꞌ₅₄ mɨ₂güɨ́g₃ ma₂lɨ́gꞌ₂, quianꞌ₅₄ guaꞌ₅₄ ꞌuë₃, quianꞌ₅₄ jmɨg₂ a₂ca₂jmo₃ jma₃quén₅ guaꞌ₅₄ ꞌuë₃ quianꞌ₅₄ jmɨg₂ në́₃.
6 Tonꞌ₂ quianꞌ₅₄ jmɨg₂ bá₄ ján₃, ca₂ꞌén₂ Diú₄ mɨ₂güɨ́g₃ jmɨg₄ jaun₂.
7 Ján₃ bá₄ le₂në₅, të₂le₃ quianꞌ₅₄ jág₁ quióꞌ₅ ꞌŋiog₅ bá₄ Diú₄, dsɨ₄ gueiꞌ₅₄ quianꞌ₅₄ guaꞌ₅₄ ꞌuë₃, ron₅ ma₂lë₅ co₂jŋia₅₄ a₂cáu₃ jë₁ma₂të́₂ jmɨg₄ i₁qui₃dsɨ₅ Diú₄ ꞌéiꞌ₃ i₁ꞌéin₂ co₂ŋeiꞌ₅₄ dsa₂ i₂tsá₃ Diú₄ cuɨn₅.
8 Conꞌ₂ siáꞌ₂ rɨnꞌ₅₄ jniog₄, tsá₃ juɨ₁dsi₂ꞌén₂ ꞌauꞌ₂ ꞌniaꞌ₂, ia₁ të₂le₃ quióꞌ₅ Te₁guiꞌ₅₄, lë́₅ caun₂ jmɨg₄ co₂ꞌnióꞌ₄ caun₂ mei₅ ŋi₂; tonꞌ₂ caun₂ mei₅ ŋi₂ guëꞌ₂, lë́₅ co₂ꞌnióꞌ₄ caun₂ jmɨg₄.
9 La₁ tsá₃ o₁lei₅₄ jniog₄ juaꞌ₅₄ a₂jme₂ꞌag₄ Te₁guiꞌ₅₄ a₂jme₃ti₃ jág₁ quióꞌ₅, juɨ₁liaꞌ₂ lɨ́n₂ i₂lɨn₅₄; a₂jmo₂₃ juɨnꞌ₂ dsɨ́₅ bá₄ ja₁conꞌ₂ ꞌniaꞌ₂, ia₁ ꞌnio₃ juaꞌ₅₄ ꞌi₁jan₂ bá₄ tsá₃ ꞌein₂ dsɨ₃ꞌén₂, ꞌnio₃ juaꞌ₅₄ ca₂le₃jɨ́n₃ bá₄ dsi₁quénꞌ₅ dsɨ́₅.
10 Ia₁ jmɨg₄ jaun₂ quióꞌ₅ Te₁guiꞌ₅₄ guá₂ conꞌ₂ tsá₃ ꞌein₂ rë₂ján₁, lé₂ juɨ₁liaꞌ₂ ja₁ꞌí₂ jan₂ ꞌang₂. Jaun₂ guë́₄ të₃tsɨꞌ₅₄ co₂mɨꞌ₅₄ gau₂ lɨn₃ lé₂ dsɨ₃ꞌén₂ dsɨ₄ gueiꞌ₅₄; qui₂dsɨ₃ꞌén₂ ca₂le₃jë́₃ a₂cha₂ qui₃jmág₂ quianꞌ₅₄ si₂; liaꞌ₂ rë₂cuáꞌ₃a guaꞌ₅₄ ꞌuë₃ lé₂, liaꞌ₂ jma₃quianꞌ₅₄ ꞌe₂ niog₅ ca₂jmo₃ dsa₂ ja₁jaun₂.
11 Chi₂juaꞌ₂ le₂në₅ dsɨ₃ꞌén₂ ca₂le₃jë́₃, ¡ꞌe₂ guë́₄ ꞌŋio₅ lɨn₃ dsi₂ten₅₄ ꞌnióꞌ₅ jmóꞌ₂ ꞌniaꞌ₂ dsen₅₄ ꞌauꞌ₂ le₃changꞌ₂ jŋió₅, a₂ꞌniógꞌ₃ Diú₄!
12 Jmo₄ ꞌniaꞌ₂ co₂jŋiagꞌ₅₄ rë₂jángꞌ₁ ia₁jaun₂ ŋiꞌ₅₄ ta₁ guá₂ jmɨg₄ jaun₂ quióꞌ₅ Diú₄. Jmɨg₄ jaun₂ gueiꞌ₅₄ mɨ₂güɨ́g₃ qui₂dsɨ₃ꞌén₂ quianꞌ₅₄ si₂, ca₂le₃jë́₃ ꞌe₂ a₂cha₂ qui₃jmág₂ jë₁ma₂ca₂dséi₃ ꞌŋio₅ lɨn₃.
13 La₁ jniog₄ në́₃, le₁jŋia₁ dsi₁no₃ caun₂ gueiꞌ₅₄ i₂juɨ́g₃ ꞌmɨ́₂ quianꞌ₅₄ caun₂ guaꞌ₅₄ ꞌuë₃ ꞌmɨ́₂ ja₁ma₂lë́₅ jág₁ cuë₃ Diú₄, ja₁të₂ꞌŋiá₄ jmá₃ a₂jŋió₅.
14 Le₂në₅ jaun₂ në́₃ rɨnꞌ₅₄ jniog₄, të₁liaꞌ₂ tsá₃ ma₂të́₂ jmɨg₄ jaun₂, quenꞌ₂ ꞌniaꞌ₂ bí₂ ia₁jaun₂ bá₄ dsiogꞌ₂ Diú₄ qui₂le₁ꞌág₄ bá₄ tei₄ ꞌauꞌ₂ ꞌniaꞌ₂, tsá₃ ꞌe₂ cha₂ juaꞌ₅₄ lë́₅ qui₂rë₂ꞌióg₄ jme₂dsí₂ quiángꞌ₂, juaꞌ₅₄ a₂rë₂cánꞌ₄ ꞌniaꞌ₂ dso₄.
15 Jmo₄ ꞌniaꞌ₂ ꞌauꞌ₂ a₂juɨnꞌ₂ dsɨ́₅ bá₄ Te₁guiꞌ₅₄ ia₁jaun₂ cuɨn₅ jmɨg₄ liónꞌ₂ ꞌniaꞌ₂. Le₂në₅ bá₄ ján₃, Pa₄ rɨnꞌ₅₄ jniog₄ ma₂dsiáinꞌ₂ si₂ neꞌ₅₄ ꞌniaꞌ₂, conꞌ₂ lë́₅ ma₂ŋɨ́ꞌ₂ dsɨ́₅ a₂ma₂ca₂cuë₃ Diú₄.
16 Jë₄ ca₂le₃jë́₃ Si₂ quióꞌ₅, ma₂ca₂tsɨ́ꞌ₃ ꞌniaꞌ₂ ján₃ ca₂le₃jë́₃ a₂në₅, o₁jŋiaꞌ₅₄ la₂ juɨ́ꞌ₅ le₃ŋágꞌ₂ a₂lɨn₅₄; ꞌuɨg₅₄ jaun₂ dsa₂ i₂tsá₃ lɨn₄ ŋɨ́ꞌ₂ dsɨ́₅ i₂tsá₃ tiá₂ tión₂, le₃jen₅ bá₄ jme₂tɨin₂₃ dsa₂, ján₃ bá₄ le₂jaun₂ ca₂le₃jë́₃ guë́₄ rɨnꞌ₅₄ Si₂ quióꞌ₅ Diú₄ në́₃, la₁ a₂ꞌuɨin₅₄ guioin₅₄ bá₄ a₂dsɨ₃ꞌéin₂ ia₁ a₂jmo₂₃ le₂jaun₂.
17 Jaun₂ lë₃ ꞌniaꞌ₂ rɨnꞌ₅₄ jniog₄, ia₁ të₃jŋiá₅ bá₄ ma₂le₁ŋiꞌ₅₄ ꞌniaꞌ₂ ꞌa₂ liaꞌ₂ niog₅ lé₂, jmo₄ ꞌniaꞌ₂ ꞌí₁ ia₁jaun₂ tsá₃ qui₃tsagꞌ₂ dsa₂ ꞌlɨnꞌ₅₄ i₂jme₂gau₅, jaun₂ tsá₃ sénꞌ₂ ꞌniaꞌ₂ juɨ₅ ja₁tióngꞌ₂ tiá₂.
18 La₁ juɨ₁dsi₂canꞌ₅₄ bá₄ ꞌniaꞌ₂ juɨ₅ ja₁ꞌua₁ dsɨ́₅ Te₁guiꞌ₅₄ Jesucristo quián₂ jniog₄ i₂ma₂lió₂, jaun₂ dsi₁nóꞌ₅ ꞌniaꞌ₂ le₃cuɨinꞌ₂ guë́₄ dse₃. ꞌÉi₂ bá₄ ca₂tɨ́n₂ le₃juɨnꞌ₂, jmɨg₄ në₃, co₂tan₅₄. ¡A₂méi₃*!
Co₂në₅.