Si₂ carta le₂ꞌuɨg₅₄ a₂ca₂jmo₃
SAN JUAN
Jág₁ dse₃ juɨ₁liaꞌ₂ ꞌa₂ liaꞌ₂ le₃chan₂ dsa₂
1
Jmo₂ jniaꞌ₅₄ si₂ la₂ dsiangꞌ₅₄ neꞌ₅₄ ꞌniaꞌ₂, ja₁ꞌɨ́n₅ jniaꞌ₅₄ i₂jme₁ma₂chan₂ liaꞌ₂ conꞌ₂ jme₁ca₂rë₃lióg₃ ca₂le₃jë́₃ a₂cha₂, ja₁ꞌɨ́n₅ jniaꞌ₅₄ jan₂ i₂qui₂ma₂néi₁ jniaꞌ₅₄ jág₁ quióꞌ₅, ma₂ca₂néi₄ jniaꞌ₅₄ quianꞌ₅₄ jme₁ne₁ guio₅₄, ma₂qui₂ma₂tí₄ jniaꞌ₅₄ gu₂ quióꞌ₅ në́₃. Të₂le₃ quianꞌ₅₄ jág₁ quióꞌ₅ ꞌéi₂ bá₄ a₂le₃chan₂ dsa₂.
2 I₂chan₂ ꞌéi₂ në́₃ ca₂jme₃jniai₂₃ ꞌŋiog₅ jë₄ quióꞌ₅ dsa₂ mɨ₂güɨ́g₃. Jaun₂ jniaꞌ₅₄ në́₃, ca₂néi₄, jaun₂ jangꞌ₂ jniaꞌ₅₄ jág₁ dsau₅ quióꞌ₅ ꞌéi₂. Qui₂ꞌë́₅ jniaꞌ₅₄ ja₁conꞌ₂ ꞌniaꞌ₂ ꞌa₂ liaꞌ₂ le₃chan₂ dsa₂ co₂tan₅₄. Jme₁ma₂chain₂ bá₄ quiainꞌ₅₄ Jmei₂, tonꞌ₂ ma₂ca₂jme₃jniai₂₃ jë₄ quián₂ jniaꞌ₅₄.
3 Jaun₂ ꞌë́₅ jniaꞌ₅₄ jág₁ juɨ₁liaꞌ₂ a₂ma₂ne₅₄ a₂ma₂néi₁ në́₃, ia₁jaun₂ jme₁quiongꞌ₅₄ ꞌniaꞌ₂ jniaꞌ₅₄ ꞌei₅ caun₂ jág₁, juɨ₁liaꞌ₂ jniaꞌ₅₄ në́₃ ꞌei₅ caun₂ jág₁ quianꞌ₅₄ Diú₄ Jmei₂ jniog₄, quianꞌ₅₄ Jesucristo Ja₁ŋiꞌ₅₄ në́₃.
4 Jaun₂ bá₄ lë₃ jmo₂ jniaꞌ₅₄ si₂ la₂ dsiangꞌ₅₄ neꞌ₅₄ ꞌniaꞌ₂, juaꞌ₂ jniaꞌ₅₄ ca₂le₃jë́₃ jág₁ la₂, ia₁jaun₂ rë₂ꞌŋia₅ a₂ꞌioꞌ₂ jein₂ jniog₄.a
Diú₄ i₂lɨ́n₅ si₂
5 A₂la₂ bá₄ jág₁ dse₃ a₂ma₂ca₂guéi₁ jniaꞌ₅₄ quióꞌ₅, a₂ꞌë́₄ táng₃ jniaꞌ₅₄ ja₁conꞌ₂ ꞌniaꞌ₂: Lɨ́n₅ Diú₄ si₂; ꞌi₁caun₂ ja₁qui₁néꞌ₃ tsá₃ cha₂ ja₁coin₂.
6 Në₁juaꞌ₂ juaꞌ₂ jniog₄ ꞌei₅ caun₂ jág₁ quianꞌ₅₄ Diú₄, la₁ në₁juaꞌ₂ i₂nio₄ guëꞌ₂ jniog₄ jë₄ qui₁néꞌ₃, jmo₂ jniog₄ të₂jág₁; tsá₃ juɨ₅ dsau₅ chong₂.
7 La₁ në₁juaꞌ₂ qui₂i₂nio₄ jniog₄ ja₁jniá₂ si₂, juɨ₁liaꞌ₂ ꞌen₅₄ ꞌéi₂ ja₁jniá₂ si₂, ꞌei₅ caun₂ jág₁ quianꞌ₅₄ rɨnꞌ₅₄ jniog₄ le₂jau₂ le₂jau₂, jaun₂ jmɨ₄ Jesucristo Ja₁ŋiꞌ₅₄ qui₂chéi₂ ca₂le₃jë́₃ dsáu₁ jniog₄.
8 Në₁juaꞌ₂ juaꞌ₂ jniog₄ tsá₃ ꞌe₂ dso₄ le₁cáuꞌ₄, jme₂gán₁ jniog₄ guio₅₄, tsá₃ tí₅ jág₁ quián₂.
9 La₁ në₁juaꞌ₂ jmo₂ jniog₄ jág₁ dsau₅ a₂rë₂cáuꞌ₄ dso₄, rë₂tiꞌ₅₄ bá₄ Diú₄, rë₂ bá₄ qui₂dsɨ₂₃ ꞌéiꞌ₃, ꞌéin₂ bá₄ dso₄ quián₂ jniog₄, qui₃chéi₂ ca₂le₃jë́₃ a₂ꞌlɨgꞌ₅₄.
10 La₁ në₁juaꞌ₂ juaꞌ₂ jniog₄ tsá₃ ꞌe₂ dso₄ ma₂ꞌnióg₁, jmo₂ jniog₄ co₂ꞌnióꞌ₄ të₂jɨ́n₁ bá₄ Diú₄; tsá₃ ꞌi₄ jág₁ quióꞌ₅ ja₁con₂ jniog₄.