3 Në₁juaꞌ₂ jme₂tí₁ ꞌéiꞌ₃ quióꞌ₅ në́₃, jaun₂ le₂në₅ bá₄ ne₄ a₂ma₂ca₂rë₃cuɨin₅ jniog₄.

4 La₁ në₁juaꞌ₂ chan₂ i₂juáꞌ₂: “Cuɨ́n₅ jniá₂ Diú₄”, la₁ në₁juaꞌ₂ tsá₃ jme₂ti₃ guëꞌ₂ ꞌéiꞌ₃ quióꞌ₅, i₂ꞌéi₂ lɨ́n₅ dsa₂ të₂jág₁, tsá₃ ꞌi₄ jág₁ tí₅ ja₁coin₂.

5 La₁ të₂le₃ quióꞌ₅ juɨ₁liaꞌ₂ i₂jme₂ti₃ ꞌéiꞌ₃ quióꞌ₅ Diú₄, i₂ꞌéi₂ guëꞌ₂ dsónꞌ₂ rë₂ꞌŋia₅ a₂ꞌnioi₃ Diú₄. Jaun₂ le₂në₅ bá₄ ne₄ jniog₄ chong₂ a₂ꞌei₅ caun₂ jág₁ quiainꞌ₅₄.

6 Juɨ₁liaꞌ₂ i₂juáꞌ₂ téin₅ le₃quióꞌ₅ Diú₄, ꞌnióꞌ₅ i₃nioi₅₄ juɨ₁liaꞌ₂ ca₂ŋɨ₃ Jesucristo.

7 ꞌNiaꞌ₂ rɨnꞌ₅₄ jniog₄ i₂ꞌnióg₃, on₃juaꞌ₅₄ ꞌéiꞌ₃ ꞌmɨ́₂ la₂ tóꞌ₅ jniá₂ ne₄ si₂ juɨ́g₂ ꞌniaꞌ₂. A₂le₂jaun₂ bá₄ la₂ juɨ₁liaꞌ₂ ꞌéiꞌ₃ a₂jme₁ma₂cha₂ ja₁conꞌ₂ ꞌniaꞌ₂ ca₂le₃ jmɨg₄ le₂ꞌuɨg₅₄ jme₁ca₂rë₃ꞌénꞌ₂ ꞌniaꞌ₂. ꞌÉiꞌ₃ guiꞌ₅₄ la₂ lë́₅ jág₁ a₂ma₂neiꞌ₂ ꞌniaꞌ₂.

8 La₁ia₁ a₂tóꞌ₅ jniá₂ ne₄ si₂ la₂ a₂tsɨ́ng₂ neꞌ₅₄ ꞌniaꞌ₂, lë́₅ co₂ꞌnióꞌ₄ caun₂ ꞌéiꞌ₃ ꞌmɨ́₂, a₂dsau₅ të₃dsónꞌ₂ quióꞌ₅ Cristo, ján₃ guë́₄ dsau₅ të₂le₃ ja₁conꞌ₂ ꞌniaꞌ₂ në́₃. Ia₁ ma₂ca₂ŋɨ́₂ bá₄ jë₄ qui₁néꞌ₃, ma₂tág₅ si₂ a₂dsau₅ të₃dsónꞌ₂.

9 Chi₂juaꞌ₂ chan₂ i₂juáꞌ₂ chain₂ ja₁jniá₂ si₂, la₁ në₁juaꞌ₂ ꞌŋiai₅₄ bá₄ guëꞌ₂ rɨinꞌ₅₄ në́₃, i₂le₂ꞌéi₂ ꞌein₅₄ bá₄ guë́₄ jë₄ qui₁néꞌ₃.

10 La₂ i₂ꞌnio₃ rɨnꞌ₅₄ guëꞌ₂ në́₃, të₂ꞌŋiai₅₄ ja₁jniá₂ si₂, tonꞌ₂ ꞌi₁caun₂ tsá₃ ꞌe₂ cha₂ juaꞌ₅₄ jmo₃ a₂qui₃nióiꞌ₃.

11 La₁ i₂ꞌŋia₅₄ rɨnꞌ₅₄ guëꞌ₂ në́₃, ꞌein₅₄ jë₄ qui₁néꞌ₃. Tsá₃ ŋi₅ ꞌa₂ juɨ₅ dsó₃, ia₁ co₂ꞌnióꞌ₄ tein₅₄ bá₄ ŋɨ₂₃ jë₄ nei₂.

12 Tsɨ́n₂ jniá₂ si₂ la₂ neꞌ₅₄ ꞌniaꞌ₂ i₂lɨ́ngꞌ₅ chiꞌ₂-guein₂ quiáng₃, ia₁ ma₂rë₂ꞌén₄ bá₄ dsáuꞌ₂ ꞌniaꞌ₂, ma₂ca₂ꞌén₂ bá₄ Diú₄ të₂le₃ o₄quióꞌ₄ Jesucristo.

13 ꞌNiaꞌ₂ dsa₂ i₂chan₂ chiꞌ₂ quián₅, tsɨ́n₂ jniá₂ si₂ la₂ neꞌ₅₄ ꞌniaꞌ₂ ia₁ ma₂ca₂rë₃cuɨnꞌ₂ bá₄ ꞌniaꞌ₂ i₂jme₁ma₂chan₂ liaꞌ₂ conꞌ₂ jme₁ca₂rë₃lióg₃ ca₂le₃jë́₃. ꞌNiaꞌ₂ dsa₂ chiꞌ₂, tsɨ́ng₂ si₂ la₂ neꞌ₅₄ ꞌniaꞌ₂ ia₁ ma₂ca₂tianꞌ₃ bá₄ ꞌniaꞌ₂ ne₄ quióꞌ₅ i₂së₃dsen₃.

14 ꞌNiaꞌ₂ dsa₂ i₂chan₂ chiꞌ₂ quián₅, tsɨ́n₂ jniá₂ si₂ la₂ neꞌ₅₄ ꞌniaꞌ₂ ia₁ ma₂ca₂rë₃cuɨnꞌ₂ ꞌniaꞌ₂ i₂jme₁ma₂chan₂ liaꞌ₂ conꞌ₂ jme₁ca₂rë₃lióg₃ ca₂le₃jë́₃. Ján₃ bá₄ tsɨ́n₂ jniá₂ si₂ la₂ neꞌ₅₄ ꞌniaꞌ₂ dsa₂ chiꞌ₂, ia₁ ꞌuanꞌ₂ bá₄ ꞌniaꞌ₂, ia₁ jág₁ dse₃ quióꞌ₅ Diú₄ ma₂ꞌi₄ ꞌauꞌ₂ ꞌniaꞌ₂, ia₁ ma₂ca₂tianꞌ₃ ꞌniaꞌ₂ ne₄ quióꞌ₅ i₂së₃dsen₃.

15 Tsá₃ lë₁jmo₂ ꞌniaꞌ₂ ꞌɨ́n₅ ꞌauꞌ₂ juaꞌ₅₄ a₂le₃changꞌ₂ i₁niogꞌ₄ juɨ₅ ja₁i₂nio₄ dsa₂ mɨ₂güɨ́g₃, on₃ guëꞌ₂ jmó₁ ꞌniaꞌ₂ ꞌɨ́n₅ ꞌauꞌ₂ ꞌe₂ niog₅ cha₂ mɨ₂güɨ́g₃. Chi₂juaꞌ₂ chan₂ i₂ꞌɨ́n₅ dsɨ́₅ a₂jénꞌ₅ mɨ₂güɨ́g₃, i₂le₂ꞌéi₂ tsá₃ të₃dsónꞌ₂ ꞌnioi₃ Diú₄ Jmei₂.

16 Ia₁ ca₂le₃jë́₃ a₂jénꞌ₅ mɨ₂güɨ́g₃, juɨ₁liaꞌ₂ ca₂le₃jë́₃ a₂ꞌlɨgꞌ₅₄ a₂mɨ₅ nɨ₁ŋɨ₁ dsa₂, a₂ꞌɨ́n₅ dsɨ́₅ dsa₂ jmo₃ ca₂le₃jë́₃ ꞌe₂ niog₅ të₅ jme₁ne₁₂, a₂jme₂rón₂ dsa₂ ꞌe₂ niog₅ cha₂ quióꞌ₅ të₁liaꞌ₂ chain₂: Ca₂le₃jë́₃ a₂në₅, on₃juaꞌ₅₄ já₅ quióꞌ₅ Diú₄ Jmei₂ jniog₄; a₂já₅ quióꞌ₅ mɨ₂güɨ́g₃ bá₄ jaun₂.

17 La₁ a₂jë₁ca₂ŋɨ́₂ bá₄ mɨ₂güɨ́g₃, quianꞌ₅₄ ca₂le₃jë́₃ ꞌe₂ ꞌlɨgꞌ₅₄ a₂ꞌɨ́n₅ dsɨ́₅ dsa₂ chain₂ ne₄ guaꞌ₅₄ ꞌuë₃. La₁ i₂jmo₅ a₂ꞌŋio₂ dsɨ́₅ Diú₄, le₃chain₂ co₂tan₅₄.

18 ꞌNiaꞌ₂ chiꞌ₂-guein₂ quiáng₃, jmɨg₄ jë₁ca₂tóꞌ₂ bá₄ la₂ chong₂ jniog₄. Ma₂neiꞌ₂ bá₄ ꞌniaꞌ₂, já₅ jan₂ i₂ꞌŋia₅₄ Cristo. Rë₂në́₃ në́₃, juɨn₅ bá₄ i₂ma₂ca₂rë₃jniá₂ i₂ꞌŋia₅₄ Cristo. Jaun₂ bá₄ lë₃ ne₄ jniog₄ a₂ja₂quián₃ jmɨg₄ jë₁ca₂tóꞌ₂.

19 I₂ca₂ꞌuɨn₂ jë₄ quián₂ jniog₄ bá₄ ꞌéi₂. Dsónꞌ₂ bá₄ dsau₅, on₃juaꞌ₅₄ i₂quián₂ jniog₄ ꞌéi₂, ia₁ juaꞌ₅₄ meiꞌ₂ guë́₃ lɨ́in₅ i₂quián₂ jniog₄, jme₁jŋia₃ bá₄ quianꞌ₅₄ jniog₄. La₁ le₂në₅ ca₂lë₃ ia₁jaun₂ le₃jniá₂, ꞌi₁jan₂ ꞌéi₂ tsá₃ lɨ́n₅ i₂quián₂ jniog₄.

20 La₁ ꞌniaꞌ₂ në́₃, ma₂ca₂guenꞌ₅₄ bá₄ ꞌniaꞌ₂ Jme₂dsí₂ Jŋió₅, jaun₂ cuɨngꞌ₂ bá₄ ꞌniaꞌ₂ ca₂le₃jɨ́ngꞌ₃^a jág₁ tí₅.

21 Jaun₂ tsɨ́ng₂ si₂ la₂ neꞌ₅₄ ꞌniaꞌ₂, on₃juaꞌ₅₄ ia₁ a₂tsá₃ cuɨnꞌ₂ ꞌniaꞌ₂ jág₁ tí₅, të₂le₃ ia₁ a₂cuɨnꞌ₂ ꞌniaꞌ₂. Jaun₂ ma₂le₁ŋiꞌ₅₄ bá₄ ꞌniaꞌ₂, ꞌi₁caun₂ jág₁ të₂jág₁ tsá₃ lé₂ le₃o₃ꞌag₅ jë₄ jág₁ dsau₅.

22 ¿ꞌEin₂ ꞌéi₂ i₂lɨ́n₅ të₂jág₁? I₂ꞌéi₂ bá₄ i₂juáꞌ₂ a₂tsá₃ lɨ́n₅ Jesús I₂rë₂ꞌɨ́n₁* quián₅ Diú₄. ꞌÉi₂ bá₄ i₂ꞌŋia₅₄ Cristo*, i₂tsá₃ jen₅₄ Diú₄ Jmei₂, on₃ guëꞌ₂ Ja₁ŋiꞌ₅₄ në́₃.

23 Ca₂le₃jɨ́n₃ i₂tsá₃ jen₅₄ Ja₁ŋiꞌ₅₄ Diú₄, ján₃ bá₄ le₂jaun₂ tsá₃ quiainꞌ₅₄ Diú₄ Jmei₂. La₁ juɨ₁liaꞌ₂ i₂jme₂jnia₅ jángꞌ₅ jág₁ dsau₅ të₂le₃ quióꞌ₅ Ja₁ŋiꞌ₅₄, ján₃ bá₄ le₂jaun₂ quiainꞌ₅₄ Jmei₂ në́₃.

24 Jaun₂ lë₃, ꞌma₄ ꞌniaꞌ₂ të₂ꞌauꞌ₂ jág₁ dse₃ a₂ma₂neiꞌ₂ ꞌniaꞌ₂ le₂ꞌuɨg₅₄. Ia₁ në₁juaꞌ₂ ma₂të₁ꞌŋiá₄ të₂ꞌauꞌ₂ ꞌniaꞌ₂, jaun₂ të₃ꞌŋiáꞌ₄ bá₄ ꞌniaꞌ₂ ja₁con₂ Ja₁ŋiꞌ₅₄, quiainꞌ₅₄ Jmei₂ në́₃.

25 Jaun₂ a₂la₂ bá₄ jág₁ quióꞌ₅ a₂ca₂cuë₃: A₂le₃chong₂ jniog₄ co₂tan₅₄.

26 Jaun₂ tsɨ́n₂ jniá₂ si₂ la₂ neꞌ₅₄ ꞌniaꞌ₂ ja₁ꞌɨ́ng₅ juɨ₁liaꞌ₂ i₂ꞌnio₃ jiog₃ cau₅.

27 La₁ quianꞌ₅₄ bá₄ ꞌniaꞌ₂ Jme₂dsí₂ Jŋió₅ i₂ma₂të₁ꞌŋiá₄ të₂ꞌauꞌ₂ ꞌniaꞌ₂ i₂ma₂cuɨn₃ Cristo. Jaun₂ tsá₃ ma₃i₂siánꞌ₂ ꞌnióꞌ₅ jme₃tag₅. La₁ juɨ₁të₂ꞌŋiáꞌ₄ bá₄ ꞌniaꞌ₂ le₃quióꞌ₅ ꞌéi, ia₁ ꞌŋiog₅ bá₄ Jme₂dsí₂ Jŋió₅ jme₃tɨin₂₃ ꞌniaꞌ₂ ca₂le₃jë́₃ conꞌ₂ lë́₅ jág₁ tí₅ dsónꞌ₂, on₃juaꞌ₅₄ jág₁ të₂jág₁.

28 Jaun₂ në́₃, ꞌniaꞌ₂ chiꞌ₂-guein₂ quiáng₃, juɨ₁të₂ꞌŋiáꞌ₄ bá₄ ꞌniaꞌ₂ quiainꞌ₅₄, ia₁jaun₂ caun₂ bá₄ le₁ꞌág₄ dsɨ₅ jniog₄ jë₁ma₂të́₂ jmɨg₄ i₁jme₃jniai₂₃ táng₃. Tsá₃ ꞌnióꞌ₅ jmó₁ jniog₄ guiꞌ₅₄ ne₅₄ jë₁ma₂guáinꞌ₅.

29 Chi₂juaꞌ₂ ma₂ŋiꞌ₅₄ ꞌniaꞌ₂, Cristo bá₄ i₂lɨ́n₅ i₂jmo₅ conꞌ₂ dsi₂ten₅₄, jaun₂ juɨ₁le₂ŋiꞌ₅₄ bá₄ ꞌniaꞌ₂ ján₃, ca₂le₃jɨ́n₃ i₂jmo₅ conꞌ₂ dsi₂ten₅₄, lɨ́in₅ chiꞌ₂-guein₂ quián₅ Diú₄.