Chiꞌ₂-guein₂ quián₅ Diú₄
3
Jag₄ ꞌniaꞌ₂ jaun₂, ꞌŋio₅ lɨn₃ ꞌnio₃ Diú₄ Jmei₂ jniog₄, juáꞌ₂ dé₄ jmáꞌ₃ të́₂ jniog₄ a₂lág₅ chiꞌ₂-guein₂ quiáin₅. ꞌUɨg₅₄ në₅, dsa₂ mɨ₂güɨ́g₃ tsá₃ cuɨg₂₃ jniog₄ ia₁ tsá₃ ma₂ca₂rë₃cuɨin₂₃ Diú₄.
2 ꞌNiaꞌ₂ rɨnꞌ₅₄ jniog₄ i₂ꞌnióg₃, ma₂lág₅ jniog₄ chiꞌ₂-guein₂ quián₅ Diú₄. O₁jŋiaꞌ₅₄ la₂ tsá₃ ma₂ne₄ guë́₄ jniog₄ ꞌa₂ liaꞌ₂ léi₂ jë₁ca₂tóꞌ₂, la₁ ne₄ jniog₄, jmɨg₄ jë₁ma₂të́₂ rë₁jme₃jnia₅ ꞌéi₂, léi₂ jniog₄ juɨ₁liaꞌ₂ lɨ́in₅ ꞌŋiog₅, ia₁ néi₄ jniog₄ tonꞌ₂ le₃cuɨin₅ jniog₄ ꞌa₂ liaꞌ₂ jniái₂.
3 Ca₂le₃jɨ́n₃ i₂ꞌɨ́n₂ dsɨ́₅ jág₁ në₅, jmo₂₃ le₁jë́₃ të₂dsɨ́₅, juɨ₁liaꞌ₂ le₁jɨ́n₃ ꞌéi₂.
4 Dsa₂ i₂caun₂ ꞌno₅ dso₄, rë₂cáinꞌ₄ ꞌÉiꞌ₃ quióꞌ₅ Diú₄. Ia₁ juɨ₁ꞌein₂ guë́₃ i₂ca₂i₁juɨn₅₄ conꞌ₂ lë́₅ ꞌÉiꞌ₃, dso₄ bá₄ jaun₂.
5 Ia₁ ma₂ŋiꞌ₅₄ bá₄ ꞌniaꞌ₂, ta₁ jaun₂ ca₂guan₃ dsa₂ i₂rë₂ꞌɨ́n₁ ꞌéi₂ quián₅ Diú₄, a₂qui₃ꞌéin₂ dsáu₁ jniog₄. Ia₁ ꞌi₁caun₂ dso₄ tsá₃ ꞌe₂ ca₂rë₃cáinꞌ₂ ꞌŋiog₅.
6 Jaun₂ le₂në₅, ꞌi₁jan₂ i₂chan₂ le₃quióꞌ₅ ꞌéi₂ tsá₃ ma₃ŋɨ₂₃ juaꞌ₅₄ caun₂ qui₂ꞌno₂₃ guë́₄ dso₄. La₁ juɨ₁liaꞌ₂ i₂caun₂ i₂nio₄ ꞌno₅ dso₄ në́₃, tsá₃ ma₂ca₂jág₂, on₃ guëꞌ₂ ma₂ca₂rë₃cuɨg₂₃ në́₃.
7 ꞌNiaꞌ₂ chiꞌ₂-guein₂ quiáng₃, tsá₃ ꞌein₂ juɨ₁jiog₅₄ cau₅ quiánꞌ₂ ꞌniaꞌ₂. Juɨ₁liaꞌ₂ i₂jmo₅ conꞌ₂ dsi₂ten₅₄, dsein₃ bá₄, juɨ₁liaꞌ₂ dsen₃ ꞌéi₂ ꞌŋiog₅.
8 La₁ juɨ₁liaꞌ₂ i₂caun₂ ꞌno₅ dso₄, i₂quián₅ i₂së₃dsen₃ bá₄ ꞌéi₂, ia₁ i₂së₃dsen₃ në́₃ ma₂já₅ ꞌno₂₃ dso₄ ca₂le₃ jme₁ca₂rë₃lióg₃ mɨ₂güɨ́g₃. La₁ Ja₁ŋiꞌ₅₄ Diú₄ në́₃, ta₁ jaun₂ ca₂guain₃ a₂qui₂ꞌéin₂ ta₁ quióꞌ₅ i₂së₃dsen₃.
9 ꞌI₁jan₂ juɨ₁liaꞌ₂ i₂ma₂ca₂rë₃chán₃ le₃quióꞌ₅ Diú₄, juaꞌ₅₄ caun₂ qui₂ꞌno₂₃ guë́₄ dso₄, ia₁ quion₂ quióꞌ₅ Diú₄ Jmei₂. Jaun₂ tsá₃ ma₂lé₂ juaꞌ₅₄ caun₂ ꞌno₃ guë́₄ dso₄, ia₁ ma₂ca₂rë₃cháin₃ ma₂lɨ́in₅ guein₂ quián₅ Diú₄ bá₄.
10 Jaun₂ le₂në₅ bá₄ lé₂ jiógꞌ₂ ꞌí₁ ꞌein₂ lɨ́n₅ i₂quián₅ Diú₄, ꞌein₂ lɨ́n₅ i₂quián₅ i₂së₃dsen₃ në́₃. Ia₁ juɨ₁ꞌein₂ guë́₃ i₂tsá₃ dse₃ jmo₅, o₃ juɨ₁liaꞌ₂ i₂tsá₃ ꞌnio₃ rɨnꞌ₅₄, on₃juaꞌ₅₄ chiꞌ₂-guein₂ quián₅ Diú₄ ꞌéi₂.
Juɨ₁jme₁ꞌnió₄ jniog₄ rɨnꞌ₅₄ le₂jau₂ le₂jau₂
11 Jág₁ dse₃ a₂ma₂neiꞌ₂ ꞌniaꞌ₂ le₂ꞌuɨg₅₄, a₂la₂ bá₄ jaun₂: a₂jme₁ꞌnió₄ jniog₄ rɨnꞌ₅₄ le₂jau₂ le₂jau₂.
12 Tsá₃ ꞌnióꞌ₅ jmó₁ jniog₄ juɨ₁liaꞌ₂ ca₂jmo₃ Caín i₂jme₁lɨ́n₄ i₂quián₅ i₂së₃dsen₃, jaun₂ ca₂jŋɨiꞌ₃ dsó₂ rɨinꞌ₅₄. ¿ꞌE₂ lë₃ ca₂jŋagꞌ₃? Ia₁ a₂ꞌlɨgꞌ₅₄ bá₄ jme₁jmo₅-dsáu₅ ꞌéi₂ ꞌŋiog₅; rɨinꞌ₅₄ guëꞌ₂ në́₃, a₂dse₃ bá₄ jme₁jmo₂₃.
13 Rɨnꞌ₅₄ jniog₄, tsá₃ juɨ₁dsi₂góꞌ₃ ꞌauꞌ₂ ꞌniaꞌ₂ në₁juaꞌ₂ ꞌiog₅₄ dsa₂ mɨ₂güɨ́g₃,
14 ia₁ ma₂ca₂ŋag₅ bá₄ jniog₄ ja₁jme₁dsióg₃; ma₂ca₂rë₃chóng₃ táng₃ jniog₄ jë₁le₃chong₂ co₂tan₅₄. Ne₄ jniog₄ a₂në₅ ia₁ ꞌnio₃ bá₄ jniog₄ rɨnꞌ₅₄. La₁ i₂tsá₃ ꞌnio₃ rɨnꞌ₅₄, i₂caun₂ ŋɨ₅ ꞌlɨn₄ bá₄ ꞌéi₂.
15 Ca₂le₃jɨ́n₃ juɨ₁liaꞌ₂ i₂ꞌŋia₅₄ rɨnꞌ₅₄, i₂rë₂cánꞌ₄ dso₄ co₂ꞌnióꞌ₄ i₂jme₂dsian₅ dsa₂ bá₄ ꞌéi₂. Ŋiꞌ₅₄ bá₄ ꞌniaꞌ₂ jaun₂, ꞌi₁jan₂ dsa₂ i₂jme₂dsian₅ dsa₂ tsá₃ ꞌi₄ jme₂dsí₂ a₂chain₂ co₂tan₅₄.
16 Le₂la₂ bá₄ ne₄ jniog₄ ꞌe₂ jaun₂ a₂ꞌnio₃ dsa₂ rɨnꞌ₅₄, ia₁ chan₂ jan₂ i₂ca₂guen₃ ꞌmú₃ o₄quián₂ jniog₄. Ján₃ bá₄ le₂jaun₂ ca₂tág₂ jniog₄ guén₄ ꞌmú₃ o₄quióꞌ₄ rɨnꞌ₅₄.
17 Juɨ₁liaꞌ₂ i₂cha₂ quióꞌ₅ ne₄ guaꞌ₅₄ ꞌuë₃ la₂, në₁juaꞌ₂ chan₂ jan₂ rɨinꞌ₅₄, i₂ŋɨ₅ ꞌɨn₂ quióꞌ₅, në₁juaꞌ₂ tsá₃ ca₂dsia₃ guëꞌ₂ ŋéi₂ dsɨ́₅ ja₁coin₂, ¿ꞌa₂ liaꞌ₂ lé₂ le₃juáꞌ₂ ma₂të₁ꞌŋiá₄ të₂dsɨ́₅ a₂ꞌnio₃ Diú₄?
18 ꞌNiaꞌ₂ guein₂ quiáng₃, on₃juaꞌ₅₄ jmáꞌ₃ quianꞌ₅₄ jág₁ tioꞌ₅₄ ꞌo₄ jniog₄ dsi₂ten₅₄ juaꞌ₅₄ a₂ꞌnio₃ jniog₄ rɨnꞌ₅₄. A₂ca₂tág₂ jniog₄ jme₁ꞌnió₄ të₃dsónꞌ₂ rɨnꞌ₅₄, të₂le₃ quianꞌ₅₄ a₂léi₄ a₂qui₂rë₂jniá₂ ꞌe₂ a₂jmo₂ jniog₄.
ꞌEi₅ caun₂ dsɨ₅ jniog₄ të₂le₃ quióꞌ₅ Diú₄
19 Le₂në₅ bá₄ ne₄ jniog₄ a₂téi₅ le₃quióꞌ₅ juɨ₅ dsau₅, jaun₂ guë́₄ le₃ꞌéi₁ jniog₄ caun₂ dsɨ₅ ne₄ Diú₄.
20 La₁ në₁juaꞌ₂ cha₂ a₂qui₂dsɨ₂jŋi₅ dsɨ₅ jniog₄ a₂jme₂cáuꞌ₂, Diú₄ bá₄ i₂lɨ́n₅ i₂juɨnꞌ₂ guë́₄ liaꞌ₂ conꞌ₂ guë́₄ ꞌe₂ a₂qui₂dsɨ₂jŋi₅ dsɨ₅; ꞌéi₂ bá₄ ŋi₅ ca₂le₃jë́₃.
21 Le₂në₅ jaun₂ rɨnꞌ₅₄ jniog₄ i₂ꞌnióg₃ guë́₄ lɨn₃, chi₂juaꞌ₂ lei₅₄ jniog₄ të₂dsɨ₅ guio₅₄ tsá₃ ꞌe₂ rë₂cáuꞌ₄, caun₂ bá₄ lé₂ le₃ꞌéi₁ jniog₄ dsɨ₅ ne₄ Diú₄,
22 jaun₂ cuë₃ bá₄ ꞌéi₂ ca₂le₃jë́₃ ꞌe₂ a₂mɨ₂, të₂le₃ ia₁ jme₂tí₁ jniog₄ ꞌéiꞌ₃ quióꞌ₅, tonꞌ₂ ia₁ jmo₂ bá₄ jniog₄ ne₄ ꞌéi₂ a₂të₅ dsɨ́₅.
23 A₂la₂ bá₄ ꞌéiꞌ₃ quióꞌ₅: a₂le₃ꞌéin₂ jniog₄ të₂le₃ quióꞌ₅ Jesucristo Ja₁ŋiꞌ₅₄, tonꞌ₂ ján₃ guëꞌ₂ jme₁ꞌnió₄ jniog₄ rɨnꞌ₅₄ le₂jau₂ le₂jau₂. Conꞌ₂ në₅ bá₄ lë́₅ ꞌéiꞌ₃ quióꞌ₅ ca₂tság₃ jniaꞌ₅₄.
24 Ca₂le₃jɨ́n₃ i₂jme₂ti₃ ꞌéiꞌ₃ në₅ në́₃, chain₂ le₃quióꞌ₅ ꞌéi₂; ján₃ guëꞌ₂ le₂jaun₂ ꞌéi₂ ꞌŋiog₅ chain₂ ja₁con₂ ꞌéi₂ në́₃. Le₂në₅ bá₄ ne₄ jniog₄ a₂guá₅ ꞌéi₂ të₂dsɨ₅ jniog₄: të₂le₃ quianꞌ₅₄ Jme₂dsí₂ i₂ma₂cuɨin₃.