Jme₂dsí₂ quián₅ Diú₄ quianꞌ₅₄ jme₂dsí₂ i₂ꞌŋia₅₄ Cristo
4
ꞌNiaꞌ₂ guein₂ quiáng₃ i₂ꞌnióg₃ guë́₄ lɨn₃, tsá₃ o₁lenꞌ₂ ꞌniaꞌ₂ juaꞌ₅₄ ca₂le₃jɨ́n₃ i₂juáꞌ₂, jiog₅ Jme₂dsí₂ quián₅ Diú₄. Rë₂ deꞌ₂ quion₂ ꞌniaꞌ₂ ꞌí₁ quióꞌ₅, chi₂juaꞌ₂ të₃dsónꞌ₂ lɨ́in₅ i₂quián₅ Diú₄. Ia₁ juɨn₅ dsa₂ juɨ₁gan₂ ma₂i₂nio₄ qui₂ꞌë́₂ jág₁ mɨ₂güɨ́g₃ la₂.
2 Le₂la₂ bá₄ lé₂ le₃caunꞌ₅₄ ꞌniaꞌ₂ ꞌí₁ quióꞌ₅ i₂juáꞌ₂ jiog₅ Jme₂dsí₂ quián₅ Diú₄: ca₂le₃jɨ́n₃ jme₂dsí₂ i₂jmo₅ jág₁ a₂ca₂guan₃ Jesucristo chi₁dsáin₃ mɨ₂güɨ́g₃ la₂, i₂le₂ꞌéi₂ bá₄ lɨ́n₅ i₂quián₅ Diú₄.
3 La₁ juɨ₁ꞌein₂ guë́₃ jme₂dsí₂ i₂tsá₃ jmo₅ jág₁ le₂në₅ ꞌɨin₂₃ Jesús, on₃juaꞌ₅₄ i₂quián₅ Diú₄ ꞌéi₂. I₂quián₅ i₂ꞌŋia₅₄ Cristo bá₄ i₂le₂ꞌéi₂, i₂ma₂neiꞌ₂ ꞌniaꞌ₂ jág₁ a₂jiá₃, i₂ma₂ꞌen₅₄ mɨ₂güɨ́g₃ rë₂në́₃.
4 ꞌNiaꞌ₂ chiꞌ₂-guein₂ quiáng₃, lɨ́nꞌ₅ bá₄ ꞌniaꞌ₂ i₂quián₅ Diú₄; ia₁ ma₂ca₂tianꞌ₃ bá₄ ꞌniaꞌ₂ dsa₂ i₂të₂jɨ́n₁. Ia₁ i₂ꞌuanꞌ₂ lɨn₃ guë́₄ bá₄ Jme₂dsí₂ i₂quianꞌ₅₄ ꞌniaꞌ₂, liaꞌ₂ conꞌ₂ guë́₄ i₂quianꞌ₅₄ dsa₂ mɨ₂güɨ́g₃.
5 Dsa₂ mɨ₂güɨ́g₃ bá₄ ꞌéi₂, jaun₂ jmáꞌ₃ liaꞌ₂ ca₂ne₅₄ a₂cha₂ mɨ₂güɨ́g₃ bá₄ jme₂tag₂₃. Jaun₂ lë₃ dsa₂ mɨ₂güɨ́g₃ në́₃ nag₂₃ jág₁ a₂jme₂tag₅ dsa₂ ꞌéi₂.
6 La₁ dsa₂ quián₅ Diú₄ bá₄ lág₅ jniog₄; jaun₂ lë₃, juɨ₁liaꞌ₂ dsa₂ i₂cuɨn₅ Diú₄ në́₃, nag₂₃ jág₁ quián₂ jniog₄. La₁ dsa₂ i₂tsá₃ quián₅ Diú₄ në́₃, tsá₃ ꞌnio₃ nag₃ jág₁ quián₂ jniog₄. Jaun₂ le₂në₅ bá₄ rë₂cuɨn₅ jniog₄ juɨ₁liaꞌ₂ i₂jiog₅ Jme₂dsí₂ quióꞌ₅ jág₁ tí₅. Ján₃ guëꞌ₂ le₂jaun₂ rë₂cuɨn₅ jniog₄ juɨ₁liaꞌ₂ i₂jiog₅ jme₂dsí₂ i₂juɨ₁gan₂.
Diú₄ bá₄ i₂ꞌnio₃ jniog₄
7 Rɨnꞌ₅₄ jniog₄, juɨ₁jme₁ꞌnió₄ jniog₄ rɨnꞌ₅₄ le₂jau₂ le₂jau₂, ia₁ ja₁con₂ Diú₄ bá₄ já₅ a₂ꞌnio₃ dsa₂ rɨinꞌ₅₄. Ca₂le₃jɨ́n₃ i₂ꞌnio₃ rɨnꞌ₅₄ ca₂rë₃cháin₃ të₂le₃ quióꞌ₅ Diú₄, tonꞌ₂ cuɨin₂₃ Diú₄.
8 I₂tsá₃ ꞌnio₃ rɨnꞌ₅₄ në́₃, tsá₃ ma₂ca₂rë₃cuɨin₂₃ Diú₄, ia₁ Diú₄ lɨ́n₅ i₂ꞌnio₃.
9 Ca₂jme₃jnia₅ Diú₄ a₂ꞌnio₃ jniog₄ jme₁ca₂chein₃ Ja₁ŋiꞌ₅₄ i₂jan₂ tan₅₄ ꞌéi₂ mɨ₂güɨ́g₃ la₂.
10 Le₂la₂ bá₄ lë́₅ a₂ꞌnio₃ Diú₄: on₃juaꞌ₅₄ a₂ma₂ca₂jme₁ꞌniói₄ jniog₄ ja₁ma₂ja₂náu₅. ꞌŊiog₅ bá₄ Diú₄ ca₂dsia₃ ŋéi₂ dsɨ́₅ ca₂rë₃ꞌnio₃. Jaun₂ ca₂chein₃ Ja₁ŋiꞌ₅₄ ia₁jaun₂ ꞌéi₂ quí₃ a₂rag₂ jniog₄.
11 Rɨnꞌ₅₄ jniog₄, chi₂juaꞌ₂ le₂në₅ ca₂rë₃ꞌnio₃ Diú₄, ján₃ bá₄ le₂në₅ ca₂tág₂ jniog₄ jme₁ꞌnió₄ rɨnꞌ₅₄ le₂jau₂ le₂jau₂.
12 ꞌI₁jan₂ tsá₃ ꞌein₂ ma₂jɨ́n₂ Diú₄. La₁ në₁juaꞌ₂ ꞌnio₃ jniog₄ rɨnꞌ₅₄ le₂jau₂ le₂jau₂, guá₅ bá₄ Diú₄ të₂dsɨ₅ jniog₄, tonꞌ₂ qui₂rë₂ꞌŋia₅ bá₄ të₂dsɨ₅ a₂ꞌnio₃ Diú₄.
13 Le₂në₅ bá₄ jauꞌ₂ ꞌí₁ a₂téi₅ jniog₄ të₂le₃ quióꞌ₅ Diú₄, tonꞌ₂ ꞌein₅₄ të₂dsɨ₅ jniog₄ në́₃: ia₁ ma₂cuɨin₃ Jme₂dsí₂ quiáin₅.
14 Jniaꞌ₅₄ guio₅₄ ca₂néi₄, jaun₂ jangꞌ₂ jniaꞌ₅₄ jág₁ dsau₅ la₂: Diú₄ Jmei₂ ca₂chein₃ Ja₁ŋiꞌ₅₄ a₂ca₂o₃lioin₅₄ dsa₂ mɨ₂güɨ́g₃.
15 Juɨ₁ꞌein₂ guë́₃ i₂ꞌɨn₅ Jesús, a₂lɨ́n₅ ꞌéi₂ Ja₁ŋiꞌ₅₄ Diú₄, quiainꞌ₅₄ bá₄ Diú₄, tonꞌ₂ guá₅ bá₄ Diú₄ quiongꞌ₅₄ táng₃.
16 Le₂në₅ ma₂ca₂rë₃ne₄, ma₂ca₂rë₃ꞌéin₂ jniog₄ a₂ꞌnio₃ Diú₄. Diú₄ lɨ́n₅ i₂ꞌnio₃; jaun₂ i₂chan₂ ꞌnio₃ rɨnꞌ₅₄ në́₃, chain₂ le₃quióꞌ₅ Diú₄, tonꞌ₂ chan₂ Diú₄ ja₁coin₂ ján₃.
17 Le₂në₅ bá₄ rë₂ꞌŋia₅ ja₁con₂ jniog₄ a₂jme₁ꞌnió₄ jniog₄ rɨnꞌ₅₄, ia₁jaun₂ jë₁ma₂ca₂të́₂ jmɨg₄ i₁qui₃dsɨ₅ Diú₄ ꞌéiꞌ₃, lé₂ le₃ꞌéi₁ jniog₄ caun₂ dsɨ₅. Ia₁ lág₅ jniog₄ chong₂ mɨ₂güɨ́g₃ la₂ liaꞌ₂ lɨ́n₅ Jesucristo.
18 Juɨ₁liaꞌ₂ jë₁ꞌnio₃ dsa₂ rɨinꞌ₅₄, tsá₃ ꞌe₂ gau₂ cha₂. La₁ juɨ₁liaꞌ₂ jë₁ꞌnio₃ dsa₂ rɨnꞌ₅₄ liaꞌ₂ rë₂ꞌŋia₅, quianꞌ₅₄ a₂në₅ jŋiaꞌ₅ a₂góꞌ₅ dsa₂. Ia₁ juɨ₁liaꞌ₂ a₂góꞌ₅ dsa₂, caun₂ jmɨ₁uɨg₅ bá₄ jaun₂ rë₂ꞌë́₄ ja₁coin₂. Ia₁ juɨ₁liaꞌ₂ i₂góꞌ₅, tsá₃ ma₂ca₂rë₃ꞌŋia₅ ja₁coin₂ ꞌa₂ liaꞌ₂ jme₃ꞌnioi₃ rɨinꞌ₅₄.
19 ꞌNio₃ jniog₄ Diú₄ ia₁ ꞌŋiog₅ deꞌ₂ le₂ꞌuɨg₅₄ ca₂rë₃ꞌnio₃ jniog₄.
20 La₁ në₁juaꞌ₂ chan₂ i₂lɨn₅₄ juáꞌ₂: “ꞌNió₃ jniá₂ Diú₄”, la₁ në₁juaꞌ₂ ꞌŋiai₅₄ bá₄ guëꞌ₂ rɨinꞌ₅₄ në́₃, jan₂ dsa₂ të₂jág₁ bá₄ ꞌéi₂. Ia₁ në₁juaꞌ₂ tsá₃ ꞌnio₃ dsa₂ rɨinꞌ₅₄ i₂jɨ́in₂, ¿ꞌa₂ bá₄ liaꞌ₂ lé₂ jme₃ꞌnioi₃ Diú₄ i₂tsá₃ ma₂jɨ́in₂?
21 ꞌŊiog₅ bá₄ Diú₄ ma₂cuë₃ ꞌéiꞌ₃ la₂: I₂ꞌnio₃ Diú₄, ca₂tɨ́in₂ jme₃ꞌnioi₃ rɨinꞌ₅₄ ján₃.