Ca₂tián₃ jniog₄ ne₄ cosas ꞌlɨgꞌ₅₄ a₂jénꞌ₅ mɨ₂güɨ́g₃
5
Ca₂le₃jɨ́n₃ i₂ꞌén₂ a₂lɨ́n₅ Jesús të₃dsónꞌ₂ I₂rë₂ꞌɨ́n₁* quián₅ Diú₄, lɨ́in₅ chiꞌ₂-guein₂ quián₅ Diú₄. Juɨ₁liaꞌ₂ ja₁ꞌnio₃ dsa₂ jan₂ dsa₂, ján₃ bá₄ ꞌnioi₃ chiꞌ₂ quián₅ dsa₂ ꞌéi₂.
2 Le₂në₅ bá₄ ne₄ jniog₄ ꞌa₂ liaꞌ₂ jme₁ꞌnió₄ chiꞌ₂-guein₂ quián₅ Diú₄: chi₂juaꞌ₂ dsónꞌ₂ ꞌnió₃ jniog₄ Diú₄, tonꞌ₂ jme₁tí₁ jniog₄ ꞌéiꞌ₃ quióꞌ₅.
3 A₂la₂ bá₄ a₂ꞌnio₃ jniog₄ Diú₄, a₂jme₁tí₁ jniog₄ ꞌéiꞌ₃ quióꞌ₅ bá₄. ꞌÉiꞌ₃ quióꞌ₅ në́₃, on₃juaꞌ₅₄ ꞌe₂ ŋɨ́₄ guei₂.
4 Ia₁ ca₂le₃jɨ́n₃ i₂ma₂lɨ́n₅ chiꞌ₂-guein₂ quián₅ Diú₄, líꞌ₂ ne₄ cosas a₂jénꞌ₅ mɨ₂güɨ́g₃. Jaun₂ quianꞌ₅₄ a₂ꞌéin₂ bá₄ jniog₄, léi₂ ne₄ cosas a₂jénꞌ₅ mɨ₂güɨ́g₃.
5 ¿ꞌEin₂ ꞌéi₂ i₂líꞌ₂ ne₄ cosas a₂jénꞌ₅ mɨ₂güɨ́g₃? Jŋiaꞌ₅₄ liaꞌ₂ i₂ꞌéi₂ bá₄ i₂ꞌén₂ a₂lɨ́n₅ Jesús Ja₁ŋiꞌ₅₄ Diú₄.
Jág₁ dsau₅ ꞌein₂ ꞌéi₂ lɨ́n₅ Ja₁ŋiꞌ₅₄ Diú₄
6 Liaꞌ₂ conꞌ₂ jme₁guan₃ Jesucristo, ca₂jángꞌ₃ Diú₄ Jmei₂ jág₁ dsau₅ a₂lɨ́n₅ Jesús Ja₁ŋiꞌ₅₄ të₃dsónꞌ₂. Ia₁ ca₂cuë₃ léi₄ jme₁ca₂jŋó₂ ꞌéi₂ jmɨg₂. Jaun₂ on₃juaꞌ₅₄ jmáꞌ₃ jme₁ca₂jŋói₂ jmɨg₂ ca₂cuë₃ léi₄. Jme₁ca₂jon₃ Jesús, jme₁ca₂i₃ꞌo₅₄ jmɨ₂ ꞌain₅₄ në́₃, ca₂cuë₃ léi₄ táng₃. Quianꞌ₅₄ le₃tɨn₃ léi₄ në₅ ca₂jángꞌ₃ Jme₂dsí₂ quián₅ Diú₄ jág₁ dsau₅, ia₁ Jme₂dsí₂ ꞌéi₂ bá₄ i₂lɨ́n₅ jág₁ dsau₅.
7 Ún₂ i₂lɨ́n₅ i₂jángꞌ₅ jág₁ dsau₅ në₅:
8 Jme₂dsí₂ Jŋió₅ i₂jŋia₄ jniog₄ të₂dsɨ₅, Diú₄ Jmei₂ i₂ca₂cuë₃ léi₄ conꞌ₂ jme₁ca₂jŋó₂ Jesús jmɨg₂, ꞌŋiog₅ Jesús në́₃ ca₂cuë₃ léi₄ liaꞌ₂ conꞌ₂ jme₁ca₂join₃, ca₂i₃ꞌo₅₄ jmɨ₂ ꞌain₅₄. Le₃ún₂ i₂në₅ caun₂ bá₄ jág₁ lë́₅ quióꞌ₅.a
9 Guén₅ bá₄ jniog₄ juɨ₁liaꞌ₂ ꞌe₂ caun₂ jág₁ dsau₅ jángꞌ₅ dsa₂ mɨ₂güɨ́g₃, la₁ ꞌŋio₅ lɨn₃ guë́₄ quen₅ jág₁ dsau₅ a₂ca₂cuë₃ Diú₄ ꞌŋiog₅, ia₁ quianꞌ₅₄ jág₁ dsau₅ a₂ca₂jángꞌ₃ jaun₂ në́₃, ca₂ꞌë₃ ꞌein₂ lɨ́n₅ Ja₁ŋiꞌ₅₄.
10 I₂ꞌén₂ të₂le₃ quióꞌ₅ Ja₁ŋiꞌ₅₄ Diú₄, ꞌi₄ jág₁ dsau₅ në₅ të₂dsɨ́₅. I₂tsá₃ ꞌén₂ të₂le₃ quióꞌ₅ Diú₄ në́₃, jmo₂₃ dsɨ́₅ co₂ꞌnióꞌ₄ të₂jɨ́n₁ bá₄ Diú₄, ia₁ tsá₃ ꞌéin₂ jág₁ dsau₅ a₂ma₂cuë₃ Diú₄ të₂le₃ quióꞌ₅ Ja₁ŋiꞌ₅₄.
11 ¿ꞌE₂ jaun₂ a₂ma₂juáꞌ₂ Diú₄? Ma₂ca₂juáꞌ₂ a₂ma₂cuë₃ jág₁ quióꞌ₅ a₂le₃chong₂ jniog₄ co₂tan₅₄. Jaun₂ le₃chong₂ jniog₄ co₂tan₅₄ të₂le₃ quianꞌ₅₄ Ja₁ŋiꞌ₅₄.
12 Dsa₂ i₂quianꞌ₅₄ Ja₁ŋiꞌ₅₄ Diú₄, jéinꞌ₃ bá₄. La₁ juɨ₁liaꞌ₂ i₂tsá₃ quianꞌ₅₄ Ja₁ŋiꞌ₅₄ Diú₄, tsá₃ jéinꞌ₃.
Toinꞌ₂ jág₁ rɨinꞌ₅₄ jë₁ca₂tóꞌ₂
13 Jmo₅ jniá₂ si₂ la₂ tsɨ́ng₂ neꞌ₅₄ ꞌniaꞌ₂ dsa₂ i₂ꞌén₂ të₂le₃ quióꞌ₅ Ja₁ŋiꞌ₅₄ Diú₄, ia₁jaun₂ ŋiꞌ₅₄ ꞌniaꞌ₂ changꞌ₂, a₂ꞌi₄ të₂ꞌauꞌ₂ jme₂dsí₂ a₂changꞌ₂ co₂tan₅₄.b
14 Caun₂ ꞌei₅ dsɨ₅ jniog₄ chong₂ të₂le₃ quióꞌ₅ Diú₄, ia₁ ne₄ jniog₄ në₁juaꞌ₂ ꞌe₂ caun₂ a₂mɨ₂ jniog₄ liaꞌ₂ conꞌ₂ lë́₅ ꞌŋio₂ dsɨ́₅, nag₃ bá₄ jág₁ quián₂.
15 Chi₂juaꞌ₂ ne₄ jniog₄, a₂nag₂₃ jág₁ a₂chi₂leinꞌ₅₄ jniog₄, ne₄ bá₄ jniog₄ ján₃, në₂jag₄ bá₄ a₂ma₂në₂guéi₁ ꞌe₂ mɨ₂.
16 Në₁juaꞌ₂ chan₂ i₂ca₂jɨ́n₂ rɨnꞌ₅₄ ꞌno₂₃ dso₄, la₁ në₁juaꞌ₂ tsá₃ lë́₅ dso₄ a₂jiog₅ juɨ₅ ꞌmú₃, ꞌnióꞌ₅ mɨ₃ dsa₂ ne₄ Diú₄ ia₁jaun₂ jmo₃ Diú₄ a₂le₃chan₂ táng₃ dsa₂ ꞌéi₂; co₂ꞌnióꞌ₄ le₃juaꞌ₅₄ dso₄ on₃juaꞌ₅₄ a₂jiog₅ juɨ₅ ꞌmú₃. Ia₁ cha₂ dso₄ a₂jiog₅ juɨ₅ ꞌmú₃. Tsá₃ juáꞌ₅ jniá₂ a₂ꞌnióꞌ₅ mɨ₃ dsa₂ o₄quióꞌ₄ dsa₂ i₂ꞌno₅ dso₄ le₂jaun₂.
17 Ca₂le₃jë́₃ a₂ꞌlɨgꞌ₅₄, dso₄ bá₄ jaun₂. La₁ cha₂ dso₄ a₂tsá₃ jiog₅ juɨ₅ ꞌmú₃.
18 Ne₄ bá₄ jniog₄, juɨ₁liaꞌ₂ i₂ca₂rë₃chán₃ le₃quióꞌ₅ Diú₄, tsá₃ ma₂ŋɨ₂₃ juaꞌ₅₄ caun₂ qui₂ꞌno₂₃ guë́₄ dso₄; ia₁ Ja₁ŋiꞌ₅₄ Diú₄ bá₄ jmo₅ ꞌí₁,c jaun₂ tsá₃ téi₂ i₂së₃dsen₃ gu₂.
19 Jaun₂ ne₄ bá₄ jniog₄ a₂lág₅ dsa₂ quián₅ Diú₄; tonꞌ₂ ne₄ bá₄ jniog₄ ján₃, a₂ma₂rë₂ꞌi₄ bí₂ quióꞌ₅ i₂së₃dsen₃ ta₁caun₂ mɨ₂güɨ́g₃.
20 Ján₃ bá₄ ne₄ jniog₄, ta₁ jaun₂ ca₂guan₃ Ja₁ŋiꞌ₅₄ Diú₄ a₂jme₃tag₂₃ ia₁jaun₂ le₃ŋágꞌ₂ jniog₄ ꞌa₂ liaꞌ₂ ꞌnióꞌ₅ le₃cuɨn₅ jniog₄ i₂lɨ́n₅ të₃dsónꞌ₂. Jaun₂ chong₂ bá₄ jniog₄ ꞌei₅ caun₂ jág₁ le₃quióꞌ₅ i₂lɨ́n₅ të₃dsónꞌ₂, co₂ꞌnióꞌ₄ le₃juaꞌ₅₄ le₃quióꞌ₅ Jesucristo Ja₁ŋiꞌ₅₄ Diú₄. ꞌÉi₂ bá₄ lɨ́n₅ Diú₄ të₃dsónꞌ₂ i₂cuë₅ a₂le₃chan₂ dsa₂ co₂tan₅₄.
21 ꞌNiaꞌ₂ chiꞌ₂-guein₂ quiáng₃, jmo₄ ꞌniaꞌ₂ ꞌí₁ jaun₂ tsá₃ le₃ganꞌ₂ ꞌniaꞌ₂ quianꞌ₅₄ diú₄ lag₄.
Co₂në₅.