3 Diú₄ ma₂cuë₃ quianꞌ₅₄ bí₂ quióꞌ₅, ca₂le₃jë́₃ a₂ꞌnióꞌ₅ quián₂ jniog₄ le₃chong₂, a₂léi₂ jniog₄ dsa₂ jŋió₅ në́₃, tonꞌ₂ ma₂jmo₃ ján₃ a₂ma₂ca₂rë₃cuɨinꞌ₂ ꞌniaꞌ₂ ꞌa₂ liaꞌ₂ lɨ́in₅. Ma₂ca₂të₃ jniog₄ të₂le₃ quianꞌ₅₄ juɨ₅bí₂ jláꞌ₁ quióꞌ₅, ꞌuɨg₅₄ ia₁ a₂ŋɨ́₄ dse₃ dsɨ́₅.^a

4 Le₂në₅ ma₂ca₂quiog₂ ꞌlióng₂ jág₁ caꞌ₅₄ a₂quen₅ ꞌŋio₅ lɨn₃ quióꞌ₅, ia₁jaun₂ të₂le₃ quianꞌ₅₄ jág₁ a₂ma₂cuë₃ jaun₂ dsi₁nóꞌ₅ ꞌniaꞌ₂ lióngꞌ₂ juɨ₅ ja₁tión₂ dsa₂ mɨ₂güɨ́g₃ ja₁dsɨ₃ꞌéin₂ ꞌuɨg₅₄ ia₁ a₂tsá₃ caun₂ ꞌɨ́n₅ dsɨ́₅, tonꞌ₂ dsi₁nóꞌ₅ ꞌniaꞌ₂ léngꞌ₂ liaꞌ₂ lɨ́n₅ Diú₄.

5 Jaun₂ lë₃, quenꞌ₂ ꞌniaꞌ₂ bí₂ ne₄ ia₁ a₂ꞌéngꞌ₂, quian₂ ꞌniaꞌ₂ caun₂ juɨ₅ dse₃; ia₁jaun₂ ne₄ juɨ₅ dse₃ jaun₂, juɨ₁lenꞌ₅₄ ꞌniaꞌ₂ dsa₂ i₂ŋɨ́ꞌ₂ dsɨ́₅;

6 ne₄ ja₁ŋó₄ jaun₂ táng₃, juɨ₁le₂ŋɨ́ꞌ₂ ꞌauꞌ₂ ꞌniaꞌ₂ ꞌa₂ liaꞌ₂ jme₁ꞌuangꞌ₅₄ ꞌauꞌ₂ guiongꞌ₅₄; ne₄ ja₁ŋó₄ jaun₂ táng₃, juɨ₁lenꞌ₅₄ ꞌniaꞌ₂ dsa₂ i₂juɨnꞌ₂ dsɨ́₅; ne₄ juɨ₅ ja₁ŋó₄ jaun₂ táng₃, juɨ₁lenꞌ₅₄ ꞌniaꞌ₂ dsa₂ i₂qui₂rë₂jɨnꞌ₅₄ ne₄ Diú₄;

7 ja₁ŋó₄ jaun₂, jmo₄ ꞌniaꞌ₂ ꞌua₁ ꞌauꞌ₂; jë₁ca₂tóꞌ₂ guë́₄ në́₃, jme₁ꞌnió₄ ꞌniaꞌ₂ rɨ́ngꞌ₂.

8 Ia₁ në₁juaꞌ₂ quianꞌ₅₄ ꞌniaꞌ₂ juɨ₅ le₂në₅, dsɨ₂cangꞌ₅₄, tsá₃ lë́₅ juaꞌ₅₄ a₂tsá₃ ta₁ tí₄ ꞌa₂ liaꞌ₂ niog₅ chanꞌ₂ ꞌniaꞌ₂, tsá₃ juaꞌ₅₄ a₂lë₁ma₂ca₂rë₃cuɨnꞌ₂ ꞌniaꞌ₂ Te₁guiꞌ₅₄ Jesucristo quián₂.

9 Ia₁ juɨ₁liaꞌ₂ dsa₂ i₂tsá₃ jme₂tɨn₅ dsɨ́₅ le₃chain₂ liaꞌ₂ conꞌ₂ lë́₅ jág₁ në₅, lɨ́in₅ në₂jag₄ bá₄ jan₂ dsa₂ ten₄, o₃ jan₂ dsa₂ i₂tsá₃ lɨn₄ uɨ́ng₂ jnióꞌ₅, ia₁ ma₂ca₂i₃ꞌén₂ bá₄ dsɨ́₅ a₂jme₁ma₂le₁chí₄ quióꞌ₅, ca₂le₃jë́₃ dso₄ a₂jme₁rë₂cáinꞌ₄ le₂jŋiá₅.

10 Jaun₂ në́₃ ꞌniaꞌ₂ rɨnꞌ₅₄ jniog₄, dsen₅₄ ꞌauꞌ₂ ꞌniaꞌ₂ cuëꞌ₅₄, ia₁jaun₂ bá₄ chi₁dse₃ ta₁ a₂ma₂ca₂të₃ Diú₄ a₂ma₂quióinꞌ₂ ꞌniaꞌ₂. Ia₁ në₁juaꞌ₂ ca₂tiónꞌ₂ ꞌniaꞌ₂ quianꞌ₅₄ juɨ₅ në₅, o₁lɨ́gꞌ₂ tsá₃ ma₃tsɨ₃sénꞌ₂ ꞌniaꞌ₂.

11 Ia₁ le₂në₅ bá₄ tɨnꞌ₃ ꞌniaꞌ₂, caun₂ dse₃ ja₁o₁tongꞌ₄ co₂tan₅₄ gueiꞌ₅₄ i₂juɨ́g₃ ja₁gon₂ Te₁guiꞌ₅₄ Jesucristo quián₂ i₂lió₂.

12 Juɨ₁la₂ ma₂ŋiꞌ₅₄ ꞌniaꞌ₂, la₁ co₂tan₅₄ bá₄ ca₂tɨ́n₂ jniá₂ juáꞌ₄ ia₁jaun₂ bá₄ dsiogꞌ₂ ꞌauꞌ₂ ꞌniaꞌ₂ náuꞌ₁ tiá₂ juɨ₅ dsau₅ a₂ma₂tiónꞌ₂ ꞌniaꞌ₂ ja₂nógꞌ₅.

13 Ia₁ lɨ́n₂ jniá₂ ꞌŋió₃, ꞌŋio₅ lɨn₃ dsi₂ten₅₄, a₂juɨg₅₄ jniá₂ ꞌniaꞌ₂ të₁liaꞌ₂ chang₂ guë́₄ nɨ₁ŋɨ₃ la₂, jaun₂ dsiogꞌ₂ ꞌauꞌ₂ jág₁ në₅.

14 Ia₁ a₂ma₂ca₂rë₃guion₅₄, ŋiꞌ₅₄ ta₁ bá₄ tí₄ nɨ₁ŋɨ₃^b liaꞌ₂ conꞌ₂ lë́₅ ma₂ca₂jme₃jnia₅ Jesucristo Te₁guiꞌ₅₄ quián₂ jniog₄.

15 La₁ quɨ́nꞌ₅ jniá₂ bí₂ juáꞌ₅ ia₁jaun₂ dsiogꞌ₂ ꞌauꞌ₂ ꞌniaꞌ₂ co₂tan₅₄, jë₁ma₂jong₂₃, ca₂le₃jë́₃ jág₁ në₅ ca₂juáꞌ₃.

16 Ca₂le₃jë́₃ a₂ma₂ca₂jme₁tag₅ jniaꞌ₅₄ ꞌa₂ liaꞌ₂ lë́₅ juɨ₅bí₂ quióꞌ₅ Te₁guiꞌ₅₄ Jesucristo, ꞌa₂ liaꞌ₂ lé₂ i₁guainꞌ₂ táng₃, jaun₂ tsá₃ o₁lenꞌ₂ ꞌniaꞌ₂ juaꞌ₅₄ a₂lɨ́ngꞌ₂ jág₁ la₂ a₂lë₁qui₂ca₂ꞌnáuꞌ₃ dsɨ́₅ dsa₂ i₂ŋɨ́₄ ꞌio₅ mai₅₄ ꞌa₂ liaꞌ₂ jme₃gau₂₃. Ia₁ guio₅₄ dsónꞌ₂ bá₄ jniaꞌ₅₄ ca₂të́₂ ne₄ tonꞌ₂ ca₂néi₄ jniaꞌ₅₄ ꞌa₂ liaꞌ₂ lë́₅ juɨ₅bí₂ a₂ca₂jme₃jniai₂₃ a₂jláinꞌ₁.

17 Ca₂jme₃juagꞌ₂ Diú₄ Jmei₂ liaꞌ₂ conꞌ₂ jme₁ca₂néꞌ₂ jág₁ juëꞌ₂ quióꞌ₅ jme₁ca₂juáꞌ₂: “I₂la₂ bá₄ jón₃ quiáng₃ i₂ŋɨ́₄ lë₃ ꞌnióg₃ guë́₄ lɨn₃; ꞌe₂ bá₄ ꞌŋio₂ dsɨ₃ quiainꞌ₅₄.”^c

18 Le₂në₅ ca₂néi₁ jniaꞌ₅₄ guio₅₄ jág₁ në₅ a₂ca₂já₃ gueiꞌ₅₄ i₂juɨ́g₃, liaꞌ₂ conꞌ₂ jme₁quiainꞌ₅₄ jniaꞌ₅₄ ne₄ máꞌ₂ jŋió₅ jaun₂.

19 Le₂në₅ bá₄ lë́₅ chi₁dse₃ ꞌŋio₅ lɨn₃ bá₄ jág₁ ron₅ quióꞌ₅ dsa₂ i₂jme₁ꞌë́₂ jág₁ quián₅ Diú₄ ma₂lɨ́gꞌ₂. Jaun₂ ꞌniaꞌ₂ në́₃, dse₃ lɨn₃ bá₄ dsi₁nógꞌ₅ në₁juaꞌ₂ ca₂tionꞌ₂ ꞌniaꞌ₂ juɨ₅, ia₁ lë́₅ liaꞌ₂ lë́₅ caun₂ nɨ₁tsɨ́₅ chi₁guíꞌ₂ si₂ tág₅ jë₄ qui₁néꞌ₃, ca₂liaꞌ₂ ca₂jnia₃ ca₂liaꞌ₂ ca₂ꞌŋia₂ Nei₅ ꞌIóg₁^d i₂jmo₃ tág₅ të₂ꞌauꞌ₂ ꞌniaꞌ₂.

20 La₁ ne₄ ca₂le₃jë́₃, dsá₂ ꞌauꞌ₂ ꞌniaꞌ₂ jmo₄ a₂la₂: ꞌi₁caun₂ jág₁ a₂rë₂ꞌë́₂ ne₄ Si₂ quióꞌ₅ Diú₄ tsá₃ ca₂tóꞌ₂ dsa₂ quián₅ Diú₄ juaꞌ₅₄ ꞌa₂ conꞌ₂ ca₂ŋɨ́ꞌ₂ dsɨ́₅ guioin₅₄.

21 Ján₃ bá₄ guëꞌ₂ le₂jaun₂, tsá₃ jág₁ cha₂ juaꞌ₅₄ ca₂rë₃lióg₃ ꞌuɨg₅₄ conꞌ₂ ꞌŋio₂ dsɨ́₅ dsa₂ mɨ₂güɨ́g₃. Dsa₂ ꞌéi₂ në́₃, të₂le₃ ca₂dsia₃ bá₄ o₄quióꞌ₄ Diú₄ liaꞌ₂ conꞌ₂ lë́₅ ca₂jiog₃ Jme₂dsí₂ Jŋió₅.